বি চি চি আইৰ সভাপতি ৰজাৰ বিন্নীয়ে দেৱজিৎ শইকীয়াক ভাৰতৰ ক্ৰিকেট নিয়ন্ত্ৰণ ব’ৰ্ডৰ কাৰ্যবাহী সচিব হিচাপে নিযুক্তি দিছে । ১ ডিচেম্বৰৰ পৰা আই চি চিৰ নতুন অধ্যক্ষৰ দায়িত্ব গ্ৰহণ কৰা জয় শ্বাহৰ ঠাইত তেওঁক নিযুক্তি দিয়া হৈছে । স্থায়ী সচিব নিযুক্তি নোপোৱালৈকে অন্তৱৰ্তীকালীন পদত থাকিব অসম সন্তান দেৱজিৎ শইকীয়া । উল্লেখ্য যে ২০১৯ বৰ্ষৰ পৰা জয় শ্বাহে বি চি চি আইৰ সচিবৰ পদত অধিষ্ঠিত আছিল, কিন্তু এতিয়া বিন্নীয়ে নিজৰ সাংবিধানিক ক্ষমতা ব্যৱহাৰ কৰি এই পদত দেৱজিৎ শইকীয়াক নিযুক্তি দিছে ।

ৰজাৰ বিন্নীয়ে এই ঘোষণা কৰি কয় যে, “বি চি চি আইৰ পৰিস্থিতি আৰু নিয়মৰ প্ৰতি লক্ষ্য ৰাখি এই পদত স্থায়ী নিযুক্তি নোহোৱালৈকে মই আপোনাৰ হাতত সচিব পদৰ দায়িত্ব অৰ্পণ কৰিছো । মই নিশ্চিত যে আপুনি আপোনাৰ সামৰ্থ আৰু গৌৰৱেৰে আপোনাৰ কাম সম্পাদন কৰিব ।” উল্লেখ্য যে, অহা বছৰ ছেপ্টেম্বৰ পৰ্যন্ত কাৰ্যবাহী সচিব পদত থাকিব শইকীয়া । সচিব পদ খালী হোৱাৰ ৪৫ দিনৰ ভিতৰত বি চি চি আইয়ে নতুনকৈ নিযুক্তি দিব লাগে, সেয়েহে বৰ্তমান দেৱজিৎ শইকীয়াক ভাৰপ্ৰাপ্ত সচিব হিচাপে নিযুক্তি দিয়া হৈছে ।

কোন হয় দেৱজিৎ শইকীয়া ?

দেৱজিৎ শইকীয়া ভাৰতৰ এগৰাকী প্ৰথম শ্ৰেণীৰ ক্ৰিকেটাৰ আছি, তেওঁ এগৰাকী অধিবক্তা হোৱাৰ উপৰিও ক্ৰিকেট প্ৰশাসনৰ অভিজ্ঞতাও আছে । অসম সন্তানগৰাকীয়ে ৰঞ্জী ট্ৰফীত নিজৰ ৰাজ্যক প্ৰতিনিধিত্ব কৰিছিল । শইকীয়াই ক্ৰিকেট কেৰিয়াৰত উইকেটকীপাৰ আৰু মিডল অৰ্ডাৰ বেটছমেনৰ ভূমিকা পালন কৰিছিল । ২০২২ চনৰ পৰা বি চি চি আইৰ যুটীয়া সচিব হিচাপে কাৰ্যনিৰ্বাহ কৰি জয় শ্বাহৰ নেতৃত্বত বহু ডাঙৰ সিদ্ধান্ত লোৱাত গুৰুত্বপূৰ্ণ অৱদান আগবঢ়াই আহিছে শইকীয়াই ।

ইয়াৰ উপৰিও শইকীয়াই ২০২৩ চনৰ মে’ মাহৰ পৰা গুৱাহাটী ক্ৰীড়া সন্থাৰ সাধাৰণ সম্পাদকৰ পদত অধিষ্ঠিত হৈ আছে । প্ৰথম শ্ৰেণীৰ কেৰিয়াৰত তেওঁ অসমৰ হৈ মাত্ৰ ৪ খন মেচ খেলিছিল য’ত তেওঁ ৫৩ ৰান সংগ্ৰহ কৰিছে । উইকেটকীপাৰৰ ভূমিকাত তেওঁ ৮টা কেচ লোৱাৰ লগতে এজন বেটছমেনক ষ্টাম্প কৰিছে ।