দিল্লীৰ অৰুণ জেটলী ষ্টেডিয়ামত আজি উপস্থিত থাকে ফুটবল সম্ৰাট লিয়নেল মেছি । তেওঁক আই চি চিৰ অধ্যক্ষ জয় শ্বাহে প্ৰদান কৰে বিশেষ উপহাৰ ।
বিশ্বৰ অন্যতম শ্ৰেষ্ঠ ফুটবলাৰ লিয়নেল মেছিয়ে তেওঁৰ “GOAT Tour to India 2025″ৰ অংশ হিচাপে কলকাতা, হায়দৰাবাদ আৰু মুম্বাইৰ পিছত দিল্লীত উপস্থিত হয় । এই ভ্ৰমণৰ সময়ত মেছিয়ে ১৫ ডিচেম্বৰ, সোমবাৰে অৰুণ জেটলী ষ্টেডিয়ামত অনুষ্ঠিত এক অনুষ্ঠানত অংশগ্ৰহণ কৰে । মেছি চাবলৈ ষ্টেডিয়ামখন অনুৰাগীৰে ভৰি পৰে । অনুৰাগীৰ পৰা লাভ কৰা মৰমত মেছি আপ্লুত হৈ পৰে । মেছিৰ সৈতে আৰ্জেণ্টিনাৰ তাৰকা ফুটবলাৰ ৰড্ৰিগো ডি পল আৰু উৰুগুৱেৰ কিংবদন্তি লুইছ ছুয়াৰেজো উপস্থিত আছিল ।
অৰুণ জেটলী ষ্টেডিয়ামত লিয়নেল মেছিয়ে আন্তঃৰাষ্ট্ৰীয় ক্ৰিকেট পৰিষদৰ অধ্যক্ষ জয় শ্বাহ, দিল্লীৰ মুখ্যমন্ত্ৰী ৰেখা গুপ্তা আৰু দিল্লী জিলা ক্ৰিকেট সন্থাৰ সভাপতি ৰোহন জেটলীক সাক্ষাৎ কৰে । শ্বাহে মেছিক ভাৰতীয় ক্ৰিকেট দলৰ ১০ নম্বৰ জাৰ্চি উপহাৰ দিয়ে । লগতে শ্বাহে লুইছ ছুৱেৰেজক ৯ নম্বৰৰ জাৰ্চি আৰু ৰড্ৰিগো ডি পলক ৭ নম্বৰ জাৰ্চি প্ৰদান কৰে ।
লগতে আই চি চিৰ অধ্যক্ষ জয় শ্বাহে লিয়নেল মেছিক ভাৰতীয় ক্ৰিকেটাৰৰ স্বাক্ষৰিত ক্ৰিকেট বেট প্ৰদান কৰে । অনুষ্ঠানটোক আৰু বিশেষ কৰি তুলিবলৈ শ্বাহে মেছিক আই চি চি টি-২০ বিশ্বকাপ ২০২৬লৈ নিমন্ত্ৰণ কৰি ভাৰত বনাম ইউ এছ এৰ খেলখনৰ টিকট উপহাৰ দিয়ে ।
লিয়নেল মেছিয়ে কয়, “মই পূৰ্বেই জানিছিলোঁ যে ভাৰতত বহুত মৰম পাই, কিন্তু প্ৰত্যক্ষভাৱে অনুভৱ কৰাটো সম্পূৰ্ণ বেলেগ অভিজ্ঞতা আছিল । যোৱা কেইদিনমানত আপোনালোক সকলোৱে আমাৰ বাবে যিখিনি কৰিলে সেয়া আছিল আচৰিত ধৰণৰ, উন্মাদনাতকৈ কম নহয় । আপোনালোকৰ সকলো মৰমৰ বাবে আকৌ এবাৰ ধন্যবাদ । আমি নিশ্চিতভাৱে আকৌ ভাৰতলৈ আহিম, হয়তো মেচ খেলিবলৈ বা আন কোনো অনুষ্ঠানৰ বাবে । কিন্তু এটা কথা নিশ্চিত যে আমি আহিম ।”
লগতে পঢ়ক : কেৱল ৰোহিত-কোহলীয়েই নহয়… বৰ্তমানৰ প্ৰতিগৰাকী ভাৰতীয় খেলুৱৈক লৈ বিচিচিআইৰ কঠোৰ স্থিতি
