আজি দেশে লৌহ পুৰুষ চৰ্দাৰ পেটেলৰ জন্ম জয়ন্তী উদযাপন কৰিছে । প্ৰধানমন্ত্ৰী নৰেন্দ্ৰ মোদীয়ে গুজৰাটৰ কেৱড়িয়াত ষ্টেচু অৱ ইউনিটিত চৰ্দাৰ পেটেলক শ্ৰদ্ধাঞ্জলি জ্ঞাপন কৰে । প্ৰধানমন্ত্ৰীয়ে ৰাষ্ট্ৰীয় একতা দিৱস পেৰেডৰ অভিবাদনো গ্ৰহণ কৰে । প্ৰধানমন্ত্ৰী নৰেন্দ্ৰ মোদীয়ে চৰ্দাৰ বল্লভভাই পেটেলৰ জন্মজয়ন্তী উপলক্ষে অনুষ্ঠানটোত উপস্থিত থকা লোকসকলক একতাৰ শপত প্ৰদান কৰে ।
প্ৰধানমন্ত্ৰীয়ে কয় যে ‘আজিৰ পৰা চৰ্দাৰ পেটেলৰ ১৫০ সংখ্যক জন্ম বাৰ্ষিকী বৰ্ষ আৰম্ভ হৈছে । আগন্তুক দুবছৰৰ বাবে দেশত চৰ্দাৰ পেটেলৰ ১৫০ সংখ্যক জন্ম জয়ন্তী উদযাপন কৰা হ’ব । ভাৰতৰ প্ৰতি তেওঁৰ অসাধাৰণ অৱদানৰ প্ৰতি এয়া শ্ৰদ্ধাঞ্জলি । দেশখনে স্বাধীনতা লাভ কৰাৰ সময়ত পৃথিৱীত বহু মানুহ আছিল যিয়ে ভাৰতৰ বিভাজনৰ মূল্যায়ন কৰি আছিল, তেওঁলোকৰ কোনো আশা নাছিল যে শ শ ৰাজকীয় ৰাজ্যক একত্ৰিত কৰি এখন ভাৰতৰ সৃষ্টি হ’ব, কিন্তু চৰ্দাৰ চাহেবে সেই কামটো কৰিলে ।“
‘সংবিধানৰ মালা জপা সকলেই সংবিধানক অপমান কৰিলে’-
জম্মু-কাশ্মীৰৰ পৰা ৩৭০ অনুচ্ছেদ আঁতৰোৱাৰ সন্দৰ্ভত ভাষণ দি প্ৰধানমন্ত্ৰী মোদীয়ে কয় যে ‘স্বাধীনতাৰ সাত দশকৰ অন্তত এখন দেশ আৰু এখন সংবিধানৰ সংকল্প পূৰণ হৈছে । চৰ্দাৰ চাহেবলৈ এয়া মোৰ ডাঙৰ শ্ৰদ্ধাঞ্জলি । ৭০ বছৰ ধৰি বাবা চাহেব আম্বেদকাৰৰ সংবিধান সমগ্ৰ দেশতে কাৰ্যকৰী নহ’ল । সংবিধানৰ মালা জপা সকলে সংবিধানক ইমান গুৰুতৰ অপমান কৰিছিল । কাৰণ আছিল জম্মু-কাশ্মীৰত ৩৭০ অনুচ্ছেদৰ দেৱাল । ৩৭০ নং অনুচ্ছেদ চিৰদিনৰ বাবে সমাধিস্থ কৰা হৈছে । প্ৰথমবাৰৰ বাবে এই বিধানসভা নিৰ্বাচনত বৈষম্যহীনভাৱে ভোটদান কৰা হ’ল । প্ৰথমবাৰৰ বাবে তাত থকা মুখ্যমন্ত্ৰীয়ে ভাৰতৰ সংবিধানৰ নামত শপত গ্ৰহণ কৰিছে । এই দৃশ্যই নিশ্চয় ভাৰতৰ সংবিধান নিৰ্মাতাসকলক অপৰিসীম সন্তুষ্টি প্ৰদান কৰিছে আৰু সংবিধান নিৰ্মাতাসকলৰ প্ৰতি এয়া আমাৰ বিনম্ৰ শ্ৰদ্ধাঞ্জলি ।‘
‘ভাৰত দ্ৰুতগতিত শান্তি আৰু সমৃদ্ধিৰ দিশে আগবাঢ়িছে’-
প্ৰধানমন্ত্ৰীয়ে কয় যে ‘সন্ত্ৰাসবাদীৰ মালিকসকলে জানে যে যদি তেওঁলোকে আক্ৰমণ কৰে তেন্তে ভাৰতে তেওঁলোকক উপযুক্ত উত্তৰ দিব । আলোচনাৰ জৰিয়তে উত্তৰ-পূৰ্বাঞ্চলৰ বহু প্ৰত্যাহ্বান সমাধান কৰা হৈছে । বড়ো আৰু ব্ৰু ৰীং চুক্তি হৈছে । ত্ৰিপুৰাত নেশ্যনেল লিবাৰেচন ফ্ৰণ্টৰ সৈতে চুক্তি হৈছে । ভাৰত দ্ৰুতগতিত শান্তি, উন্নয়ন আৰু সমৃদ্ধিৰ দিশত আগবাঢ়িছে ।‘
