ভাৰতৰ তাৰকা শ্বুটাৰ মনু ভাকেৰে ২০২৪ চনৰ পেৰিছ অলিম্পিকত দুটা ব্ৰঞ্জৰ পদক লাভ কৰি ইতিহাস ৰচনা কৰে । কিন্তু এতিয়া তেওঁৰ পদকবোৰ অৱস্থা বেয়া হ’বলৈ আৰম্ভ কৰিছে । প্ৰকৃততে পদকবোৰৰ ৰং ম্লান হৈ অৰ্থাৎ আঁতৰি গৈছে । ইফালে আন্তঃৰাষ্ট্ৰীয় অলিম্পিক কমিটীয়ে ইয়াৰ মাজতে দিছে এটা ভাল খবৰ ।
এই আটাইকেইটা পদক শীঘ্ৰে সলনি কৰিব বুলি আই অ’ চিয়ে জনাইছে । লগতে যিসকল খেলুৱৈৰ পদকৰ ৰং আঁতৰি গৈছে তেওঁলোকক ইয়াৰ ঠাইত নতুন পদক দিয়া হ’ব । উল্লেখ্য যে পদকৰ ৰং হেৰাই হোৱাৰ অভিযোগ কেৱল মনু ভাকেৰৰে নহয় ।
এই পৰ্যন্ত বিশ্বৰ এশৰো অধিক খেলুৱৈয়ে তেওঁলোকৰ পদকৰ ৰং হেৰাই হোৱাৰ অভিযোগ উত্থাপন কৰিছে । এই তথ্য প্ৰদান কৰিছে ফ্ৰান্সৰ অনলাইন মিডিয়া আউটলেট লা লেট্ৰে । আন্তঃৰাষ্ট্ৰীয় অলিম্পিক কমিটীয়ে এই পদক সলনি কৰি সকলো খেলুৱৈক দিয়া হ’ব বুলি জানিবলৈ দিছে ।
আগষ্ট মাহৰ পৰা পদক সলনিৰ কাম চলি আছে-
এই পদকটো মনাই ডি পেৰিছ নামৰ এটা সংস্থাই প্ৰস্তুত কৰিছিল । এই সংগঠনৰ মুখপাত্ৰই তেওঁৰ স্পষ্টীকৰণত কয় যে পদকসমূহ ‘ত্ৰুটিপূৰ্ণ’ নহয় । বেছিভাগ পদকে মাত্ৰ ৰং হেৰুৱাইছে । আমি এনে পদক সলনি কৰি আছো । আগষ্ট মাহৰ পৰা পদক সলনিৰ কাম চলি আছে আৰু ভৱিষ্যতেও অব্যাহত থাকিব ।
উল্লেখ্য যে মনু ভাকেৰেৰ পেৰিছ অলিম্পিকত অসাধাৰণ প্ৰতিভাৰে দুটাকৈ ব্ৰঞ্জৰ পদক লাভ কৰিছিল । প্ৰথমে মনুৱে পেৰিছ অলিম্পিকত ১০ মিটাৰ এয়াৰ পিষ্টলত পদক লাভ কৰি প’ডিয়ামত স্থান লাভ কৰিছিল । ইয়াৰ পিছত সাৰবজোৎ সিঙৰ সৈতে ১০ মিটাৰ মিক্সড দলীয় প্ৰতিযোগিতাত দ্বিতীয়টো ব্ৰঞ্জৰ পদক লাভ কৰে তেওঁ ।
সকলোবোৰ পদক আইফেল টাৱাৰৰ লোহাৰ পৰা তৈয়াৰ কৰা হৈছে-
আচলতে পেৰিছ অলিম্পিকৰ সকলো পদক বিশেষ ধৰণেৰে তৈয়াৰ কৰা হৈছিল । এই পদকসমূহ ঐতিহাসিক আইফেল টাৱাৰৰ লোহাৰ টুকুৰাৰ পৰা তৈয়াৰ কৰা হৈছিল । পদকটোৰ ওপৰৰ অংশত প্ৰায় ১৮ গ্ৰাম লোহাৰ পৰা এটা ষড়ভুজ তৈয়াৰ কৰা হৈছিল ।
ইয়াৰ বাহিৰেও পদকৰ ওপৰৰ অংশত আইফেল টাৱাৰৰ আকৃতি নিৰ্মাণ কৰা হৈছিল । উল্লেখ্য যে যেতিয়া আইফেল টাৱাৰ শেষবাৰৰ বাবে মেৰামতি কৰা হৈছিল তেতিয়া ইয়াৰ পৰা বহু লোহাৰ টুকুৰা আঁতৰাই পেলোৱা হৈছিল । এই পদকবোৰ ইয়াৰ পৰাই প্ৰস্তুত কৰা হৈছিল ।
