দুবাৰৰ অলিম্পিক পদক বিজয়ী নীৰজ চোপ্ৰাই হিমানী মৌৰক বিয়া কৰাই অনুৰাগীক আচৰিত কৰি তোলে । অনুষ্টুপীয়াকৈ বিবাহপাশত আবদ্ধ হয় এই দম্পতীহাল আৰু তাৰ পিছতে হনিমুনলৈ ৰাওনা হয় । ইফালে এতিয়া অনুৰাগীৰ মনত এটাই প্ৰশ্ন উত্থাপন হৈছে যে কোন হয় ‘গোল্ডেন বয়’ৰ কইনা হিমানী মৌৰ ?
নীৰজে বিবাহ অনুষ্ঠানৰ আকৰ্ষণীয় ফটোৰ সৈতে ছচিয়েল মিডিয়াত এই ভাল খবৰ শ্বেয়াৰ কৰিছিল, লগতে লিখিছিল, ‘মোৰ পৰিয়ালৰ সৈতে জীৱনৰ এটা নতুন অধ্যায় আৰম্ভ কৰিছোঁ । এই মুহূৰ্তলৈ আমাক একত্ৰিত কৰা প্ৰতিটো আশীৰ্বাদৰ বাবে কৃতজ্ঞ ।’
কোন হয় নীৰজ চোপ্ৰাৰ কইনা হিমানী মৌৰ ?
২৫ বছৰীয়া হিমানী মৌৰৰ ঘৰ হাৰিয়ানাৰ শোণিপটত । শৈক্ষিক আৰু এথলেটিক দুয়োটা দিশতে তেওঁ পাৰদৰ্শিতা দেখুৱাইছে । শোনিপটৰ লিটিল এঞ্জেলছ স্কুলত অধ্যয়ন কৰা হিমানীয়ে বৰ্তমান আমেৰিকাৰ নিউ হামচায়াৰৰ ফ্ৰেংকলিন পিয়ৰ্চ বিশ্ববিদ্যালয়ৰ পৰা ক্ৰীড়া ব্যৱস্থাপনাত ডিগ্ৰী লাভ কৰিছে । ইয়াৰ পূৰ্বে হিমানীয়ে দিল্লীৰ মিৰাণ্ডা হাউছৰ পৰা ৰাজনীতি বিজ্ঞান আৰু শাৰীৰিক শিক্ষাত স্নাতক ডিগ্ৰী লাভ কৰিছিল ।
টেনিছত হিমানীৰ কৃতিত্ব-
ৰাষ্ট্ৰীয় পৰ্যায়ত টেনিছ খেলুৱৈ হিচাপে উজ্জ্বল প্ৰদৰ্শন আগবঢ়াইছে হিমানীয়ে । তেওঁৰ শ্ৰেষ্ঠ অল ইণ্ডিয়া টেনিছ এছ’চিয়েচন (এ আই টি এ)ৰ ৰেংকিং আছিল একক ত ৪২ আৰু ডাবলছত ২৭, যিটো তেওঁ ২০১৮ চনত ৰাষ্ট্ৰীয় টুৰ্ণামেণ্টত আত্মপ্ৰকাশ কৰাৰ কিছু দিন পিছতে অৰ্জন কৰিছিল । তেওঁ এ আই টি এ মহিলা ডাবলছ ৰেংকিঙৰ শীৰ্ষ ৩০ ত ১৪ সপ্তাহ আছিল আৰু নিজকে হাৰিয়ানাৰ শীৰ্ষ টেনিছ খেলুৱৈ হিচাপে প্ৰতিষ্ঠা কৰিছিল ।
সহকাৰী প্ৰশিক্ষক হিচাপেও কাম কৰে হিমানীয়ে-
অধ্যয়নৰ উপৰিও হিমানীয়ে মাছাচুচেটছৰ আমহাৰ্ষ্ট কলেজত মহিলা টেনিছৰ সহকাৰী প্ৰশিক্ষক হিচাপে কাম কৰে । এই ভূমিকাই তেওঁক কলেজৰ ক্ৰীড়া কাৰ্যসূচীত অৰিহণা যোগোৱাৰ লগতে কাম আৰু অধ্যয়নৰ ফলপ্ৰসূ ভাৰসাম্য ৰক্ষা কৰাত সহায় কৰে ।
গোপনে বিবাহপাশত আৱদ্ধ হয় নীৰজ আৰু হিমানী-
গোপনীয়তা বজাই ৰাখিবলৈ অতি সাধাৰণভাৱে এই বিয়া আয়োজন কৰা হৈছিল । নীৰজৰ খুড়াক ভীমে এই বিবাহ ঘোষণাৰ দুদিন আগতে হোৱা বুলি জনাইছিল যদিও বিয়াৰ স্থানৰ কথা তেওঁ কোৱা নাছিল । হাৰিয়ানাৰ পানীপটৰ সমীপৰ খণ্ড্ৰাত সংবাদমাধ্যমৰ আগত ভীমে কয় যে, ‘হয়, দুদিন পূৰ্বে ভাৰততে হৈছিল এই বিবাহ । কিন্তু এই বিবাহ ক’ত হৈছিল সেয়া ক’ব নোৱাৰিম ।’
