মহিলা প্ৰিমিয়াৰ লীগ (WPL) ২০২৫ ছিজনৰ নিলামৰ অন্ত পৰিল । এই নিলাম দেওবাৰে (১৫ ডিচেম্বৰ) বেংগালুৰুত অনুষ্ঠিত হয় । ইয়াত ৫টা দলে একেলগে মুঠ ১৯ গৰাকী খেলুৱৈ ক্ৰয় কৰে, যাৰ ওপৰত মুঠ ৯.০৫ কোটি টকা খৰচ হয় ।
এইবাৰ মুঠ ১২০ গৰাকী খেলুৱৈয়ে নিলামত অংশগ্ৰহণ কৰে । ৫ টা ফ্ৰেঞ্চাইজি মুম্বাই ইণ্ডিয়ানছ (এম আই), গুজৰাট জায়েন্টছ (জি জি), ইউ পি ৱাৰিয়ৰ্ছ (ইউ পি ডব্লিউ), দিল্লী কেপিটেলছ (ডি চি) আৰু ৰয়েল চেলেঞ্জাৰছ বেংগালুৰু (আৰ চি বি)য়ে তেওঁলোকৰ ওপৰত বাজি ধৰে ।
ছিমৰন শ্বেখ আটাইতকৈ ব্যয়বহুল খেলুৱৈ-
এইবাৰ নিলামত ৪ গৰাকী খেলুৱৈৰ বিড ১ কোটি টকাৰ ওপৰলৈ গৈছিল । ২২ বছৰীয়া মিডল অৰ্ডাৰ বেটছমেন ছিমৰন শ্বেখ আছিল ডব্লিউ পি এল ২০২৫ নিলামৰ আটাইতকৈ দামী খেলুৱৈ । গুজৰাটৰ দলে ১.৯ কোটি টকাৰ নিবিদাত ক্ৰয় কৰে খেলুৱৈগৰাকীক ।
ছিমৰনে লেগ স্পীনো কৰে । তেওঁৰ পিছত দ্বিতীয় আটাইতকৈ দামী খেলুৱৈ আছিল ৱেষ্ট ইণ্ডিজৰ ডিএণ্ড্ৰা ডটিন । গুজৰাটে ১.৭ কোটি টকাত ক্ৰয় কৰে তেওঁক । ডিয়াণ্ড্ৰা এগৰাকী বেগী বলিং অলৰাউণ্ডাৰ । এই তালিকাত তৃতীয় নাম হৈছে ১৬ বছৰীয়া উইকেটকীপাৰ কমলিনীৰ, যাক মুম্বাই ইণ্ডিয়ানছে ১.৬ কোটি টকাত ক্ৰয় কৰে ।
১৬ বছৰীয়া কমলিনীয়ে আলোড়নৰ সৃষ্টি কৰে-
দেওবাৰেই ১৯ বছৰ অনুৰ্ধৰ মহিলা এছিয়া কাপত কমলিনীয়ে এক উজ্জ্বল ইনিংছ খেলে । পাকিস্তানৰ বিৰুদ্ধে ২৯টা বলত অপৰাজিত ৪৪ ৰান সংগ্ৰহ কৰে তেওঁ । ইয়াৰ সহায়ত ভাৰতে মাত্ৰ ৪৭টা বলতে জয়লাভ কৰে । লগে লগে কমলিনীয়ে একেদিনাই দুটা ঠাইত আলোড়নৰ সৃষ্টি কৰে ।
এই নিলামত কোটিপতি হোৱা চতুৰ্থ আৰু শেষ খেলুৱৈ প্ৰেমা ৰাৱট । তেওঁক বেংগালুৰু ফ্ৰেঞ্চাইজিয়ে ১.২ কোটি টকাত ক্ৰয় কৰে । বেটিঙৰ উপৰিও ২৩ বছৰীয়া বলিং অলৰাউণ্ডাৰ প্ৰেমা লেগ স্পীন বিশেষজ্ঞ । এতিয়া তেওঁক আৰ চি বিৰ বাবে খেলা দেখা যাব ।
পাঁচটা ফ্ৰেঞ্চাইজিৰ পাৰ্চত আছিল ১৫ কোটি টকা-
নিলামত সৰ্বাধিক ১৯ জন খেলুৱৈ বিক্ৰী হ’ব লগা আছিল । ইয়াৰে ৫টা স্লট আছিল বহিঃৰাষ্ট্ৰৰ বাবে । ডব্লিউ পি এলৰ নিলামত ৯১ গৰাকী ভাৰতীয় আৰু ২৯ গৰাকী বিদেশী খেলুৱৈৰ নাম অন্তৰ্ভুক্ত কৰা হৈছিল । বিদেশী খেলুৱৈৰ ভিতৰত ৩ গৰাকী সহযোগী দেশৰ ।
ইয়াৰ উপৰিও ৮ গৰাকী আনকেপিং ভাৰতীয় খেলুৱৈও আছিল । এই নিলামৰ বাবে ফ্ৰেঞ্চাইজিৰ মুঠ বাজেট আছিল ১৫ কোটি টকা । ইয়াত গুজৰাট জায়েন্টছৰ সৰ্বাধিক ধন (৪.৪০ কোটি) আৰু দিল্লী কেপিটেলছৰ সৰ্বনিম্ন ২.৫০ কোটি টকা আছিল ।
