দুদিনীয়া ভ্ৰমণসূচীৰে শনিবাৰে কুৱেইট উপস্থিত হয় প্ৰধানমন্ত্ৰী নৰেন্দ্ৰ মোদী । দেশখনত উপস্থিত হৈ তেওঁ শনিবাৰে ‘হালা মোদী’ অনুষ্ঠানত ভাৰতীয় প্ৰবাসীসকলক সম্বোধন কৰে । ভাষণত তেওঁ কয় যে, আপোনালোক সকলোকে দেখি মোৰ সন্মুখত ‘মিনি ইণ্ডিয়া’ আবিৰ্ভাৱ হোৱা যেন অনুভৱ হৈছে । য’ত মোৰ সন্মুখত প্ৰতিটো অঞ্চলৰ মানুহ দেখা পাইছো, কিন্তু সকলোৰে হৃদয়ত এটাই প্ৰতিধ্বনি-ভাৰত মাতা কি জয়…
প্ৰধানমন্ত্ৰী মোদীয়ে কয় যে আজি এই মুহূৰ্তটো মোৰ বাবে ব্যক্তিগতভাৱে অতি বিশেষ, কাৰণ ৪ দশকৰো অধিক সময়ৰ পাছত ভাৰতৰ এজন প্ৰধানমন্ত্ৰী কুৱেইটলৈ আহিছে । যদি আপুনি ভাৰতৰ পৰা ইয়ালৈ আহিব বিচাৰে তেন্তে মাত্ৰ ৪ ঘণ্টা সময় লাগে, কিন্তু এজন প্ৰধানমন্ত্ৰী ইয়ালৈ আহিবলৈ ৪ দশক সময় লাগিল । প্ৰধানমন্ত্ৰী মোদীয়ে কয় যে ভাৰত আৰু কুৱেইটৰ মাজৰ সম্পৰ্ক সভ্যতা, সাগৰ আৰু বাণিজ্যৰ । দুয়োখন দেশে সদায়ে ইখনে সিখনৰ হৈ থিয় দি আহিছে ।
ইফালে প্ৰধানমন্ত্ৰী মোদীয়ে ২০২৫ চনৰ জানুৱাৰী মাহত ভাৰতত অনুষ্ঠিত হ’বলগীয়া প্ৰবাসী ভাৰতীয় দিৱস আৰু মহা কুম্ভত অংশগ্ৰহণৰ বাবেও দেশখনৰ প্ৰবাসী ভাৰতীয়সকলক আমন্ত্ৰণ জনায় ।
