সামগ্ৰী আৰু সেৱা কৰ (জি এছ টি)ৰ হাৰ সংশোধনৰ বাবে গঠন কৰা মন্ত্ৰী গোটে শনিবাৰে ব্যৱসায়িক ব্যৱহাৰৰ বাবে ক্ৰয় কৰা পুৰণি বৈদ্যুতিক বাহনৰ মাৰ্জিন মূল্যত ১৮ শতাংশ জি এছ টি আৰোপ কৰাৰ সিদ্ধান্ত গ্ৰহণ কৰে । পৰিষদে বিমান ইন্ধন (এ টি এফ) জি এছ টি ব্যৱস্থাৰ বাহিৰত ৰাখিবলৈয়ো সন্মতি প্ৰকাশ কৰে । একে সময়তে জি এছ টি পৰিষদে পপকৰ্ণৰ ওপৰত কৰ সন্দৰ্ভত স্পষ্টীকৰণ জাৰি কৰিবলৈ সন্মত হয় । পৰিষদে কয় যে প্ৰি-পেকেজড আৰু লেবেলযুক্ত ৰেডি টু ইট স্নেকছৰ ওপৰত ১২ শতাংশ কৰ আৰোপ কৰা হ’ব । জি এছ টি পৰিষদে কয় যে যদি জলপান কেৰামেলাইজ কৰা হয়, তেন্তে ইয়াৰ ওপৰত ১৮ শতাংশ জি এছ টি প্ৰযোজ্য হ’ব ।
কি সস্তা হ’ব ?
-নতুন হাৰ ৰূপায়ণৰ লগে লগে ফৰ্টিফাইড ৰাইচ কাৰ্নেল অৰ্থাৎ এফ আৰ কে সস্তা হ’ব । ইয়াৰ ওপৰত ৫ শতাংশ জি এছ টি হ্ৰাস কৰাৰ সিদ্ধান্ত লৈছে পৰিষদে ।
-পৰিষদে জিন থেৰাপীক সম্পূৰ্ণৰূপে জি এছ টিৰ পৰিসৰৰ বাহিৰত ৰাখিছে ।
বিনামূলীয়া বিতৰণৰ বাবে খাদ্য প্ৰস্তুত কৰাঃ অৰ্থনৈতিকভাৱে দুৰ্বল শ্ৰেণীৰ বাবে চৰকাৰী কাৰ্যসূচীৰ অধীনত যোগান ধৰা খাদ্য সামগ্ৰীৰ ওপৰত ৫ শতাংশ জি এছ টিৰ ৰেহাইমূলক হাৰ আৰোপ কৰা হৈছে ।
দীৰ্ঘ দূৰত্বৰ মাটিৰ পৰা বায়ুলৈ মিছাইল এচেম্বলীৰ প্ৰণালীঃ এল আৰ এছ এ এম নিৰ্মাণৰ বাবে ব্যৱহৃত ব্যৱস্থা, উপ-ব্যৱস্থা আৰু সঁজুলিসমূহতো আই জি এছ টি ৰেহাই দিয়া হৈছে ।
আই এ ই এৰ বাবে পৰিদৰ্শন সঁজুলি: আন্তঃৰাষ্ট্ৰীয় পাৰমাণৱিক শক্তি সংস্থাৰ পৰিদৰ্শনৰ বাবে সঁজুলি আৰু উপভোগ্য নমুনা আমদানিৰ ক্ষেত্ৰত আই জি এছ টিৰ ৰেহাই দিয়া হয় ।
জালুক আৰু কিচমিচ (কৃষকে যোগান ধৰা): কৃষকে পোনপটীয়াকৈ বিক্ৰী কৰিলে জি এছ টি দায়ী নহয় বুলি স্পষ্ট কৰা হৈছে ।
যিবোৰ বস্তু অধিক ব্যয়বহুল হ’ব-
পুৰণি আৰু ব্যৱহৃত বাহন (ইভিকে ধৰি): কিছুমান পেট্ৰ’ল আৰু ডিজেলৰ ভিন্নতাৰ বাহিৰে সকলো পুৰণি আৰু ব্যৱহৃত বাহনৰ বিক্ৰীৰ জি এছ টি ১২ শতাংশৰ পৰা ১৮ শতাংশলৈ বৃদ্ধি কৰা হৈছে ।
ৰেডি টু ইট পপকৰ্ণ: প্ৰি-পেক কৰা আৰু লেবেলযুক্ত ৰেডি টু ইট স্নেকছত ১২ শতাংশ কৰ আৰোপ কৰা হৈছে, আনহাতে কেৰামেলাইজড পপকৰ্ণত ১৮ শতাংশ জি এ ছটি আৰোপ কৰা হৈছে । নিমখ আৰু মছলাৰ সৈতে মিহলি কৰা, আৰু প্ৰয়োজনীয় নিমখীয়া গুণসম্পন্ন ৰেডি টু ইট পপকৰ্ণত প্ৰি-পেকেজিং কৰি লেবেল লগোৱা নহ’লে বৰ্তমান ৫ শতাংশ জি এছ টি আৰোপ কৰা হৈছে ।
অটোক্লেভড এয়াৰেটেড কংক্ৰিট (এ চি চি) ব্লক: যদি ইয়াত ৫০ শতাংশতকৈ অধিক ফ্লাই এছ থাকে তেন্তে ১২ শতাংশ জি এছ টি প্ৰযোজ্য ।
কৰ্পৰেটৰ দ্বাৰা পৃষ্ঠপোষকতা সেৱা: এতিয়া ইয়াক ফৰৱাৰ্ড চাৰ্জ ব্যৱস্থাৰ অধীনত অনা হৈছে, যিয়ে পৃষ্ঠপোষকসকলৰ বাবে সম্ভাৱ্যভাৱে খৰচ বৃদ্ধি কৰিব ।
