মঙলবাৰে লোকসভাত উত্থাপন কৰা হয় ‘এক দেশ-এক নিৰ্বাচন’ বিধেয়ক । ইয়াৰ পিছতে ভাৰতীয় জনতা পাৰ্টিয়ে সদনত অনুপস্থিত থকা সাংসদসকললৈ জাননী প্ৰেৰণ কৰিছে । মঙলবাৰে ‘এক দেশ এক নিৰ্বাচন’ বিধেয়ক উত্থাপনৰ সময়ত উপস্থিত নথকা সকলো বিজেপি সাংসদলৈ দলে প্ৰেৰণ কৰিছে জাননী ।
আজি ভোটদানৰ সময়ত সদনত উপস্থিত নাছিল ২০ জনতকৈ অধিক বিজেপি সাংসদ । মঙলবাৰে বিজেপিৰ লোকসভাৰ সদস্যসকলক সদনত উপস্থিত থাকিবলৈ তিনি শাৰীৰ হুইপ জাৰি কৰা হৈছিল । ‘এক দেশ, এক নিৰ্বাচন’ৰ বাবে মঙলবাৰে চৰকাৰে ‘সংবিধান (১২৯ সংশোধনী) বিধেয়ক ২০২৪’ আৰু কেন্দ্ৰীয় শাসিত অঞ্চল আইন (সংশোধনী) বিধেয়ক ২০২৪ সংসদত উত্থাপন কৰে ।
জে পি চিলৈ প্ৰেৰণ কৰা হ’ল বিধেয়ক-
আইন মন্ত্ৰী অৰ্জুন ৰাম মেঘৱালে লোকসভাত উত্থাপন কৰে এই বিধেয়কসমূহ । লোকসভাত হুলস্থুলৰ মাজতে বিষয়টো বিভাজনত উপনীত হয় আৰু ইয়াৰ পিছতে সদনত বিধেয়কখন দাখিল কৰিব পৰা যায় । এক দেশ, এক নিৰ্বাচনৰ ওপৰত বিভিন্ন ৰাজনৈতিক দলৰ বিভিন্ন মতামত শুনা গ’ল । আইন মন্ত্ৰী অৰ্জুন ৰাম মেঘৱালে এই বিধেয়কখন সদনত উত্থাপন কৰাৰ প্ৰস্তাৱ আগবঢ়ায় ।
কংগ্ৰেছৰ পৰা আৰম্ভ কৰি সকলো বিৰোধী দলে এই বিধেয়কখনৰ বিৰোধিতা কৰিছিল । শিৱসেনা আৰু তেলেগু দেশম পাৰ্টিৰ দৰে এন ডি এৰ মিত্ৰ দলসমূহে মুকলিকৈ বিধেয়কখনৰ সপক্ষে থিয় দিয়া দেখা গ’ল । এই বিধেয়কখন বিভাজনৰ পিছত দাখিল কৰা হয় আৰু তাৰ পিছত জে পি চিলৈ প্ৰেৰণ কৰা হয় ।
সপক্ষে ২৬৯টা আৰু বিপক্ষে ১৯৮টা ভোট-
লোকসভাত এই বিধেয়কখন উত্থাপন কৰাৰ সপক্ষে ২৬৯টা ভোট আৰু ইয়াৰ বিৰুদ্ধে ১৯৮টা ভোট পৰে । বৈদ্যুতিক ভোটদানৰ পিছত ভোটদান কৰা হৈছিল আৰু ইয়াৰ পিছত এই বিধেয়কখন লোকসভাত দাখিল কৰিব পৰা হয় । সমগ্ৰ দেশতে একেলগে নিৰ্বাচন অনুষ্ঠিত কৰিবলৈ বিগত বৰ্ষৰ ছেপ্টেম্বৰ মাহত প্ৰাক্তন ৰাষ্ট্ৰপতি ৰামনাথ কোবিন্দৰ অধ্যক্ষতাত এখন সমিতি গঠন কৰা হৈছিল । মাৰ্চ মাহত কমিটীয়ে দাখিল কৰিছিল প্ৰতিবেদন । ইয়াৰ পিছত মোদী কেবিনেটে এই প্ৰতিবেদনত অনুমোদন জনাইছিল । এই প্ৰতিবেদনত লোকসভা নিৰ্বাচনৰ সমান্তৰালকৈ বিধানসভা আৰু পঞ্চায়ত নিৰ্বাচন একেলগে অনুষ্ঠিত কৰাৰ বাবে পৰামৰ্শ দিয়া হৈছে ।
