ইণ্ডিয়ান ইনষ্টিটিউট অৱ টেকন’লজি (আই আই টি) গুৱাহাটী আৰু মাণ্ডীয়ে যৌথভাৱে প্ৰকাশ কৰিছে জলবায়ুৰ বিপদাশংকা মূল্যায়ন প্ৰতিবেদন । প্ৰতিবেদনত কোৱা হৈছে যে বিহাৰ, কেৰালা আৰু ওড়িশাৰ ১১খন জিলাত বান আৰু খৰাং উভয়ৰে ‘অতি উচ্চ’ আশংকা আছে । ইয়াৰ ভিতৰত পাটনা, আলাপ্পুঝা, কেন্দ্ৰপাৰা আদি জিলাও আছে । এই জিলাসমূহত তাৎক্ষণিক পদক্ষেপ লোৱাৰ প্ৰয়োজন ।
প্ৰতিবেদনখনৰ শিৰোনাম হৈছে ‘ভাৰতত জিলা পৰ্যায়ৰ জলবায়ুৰ বিপদৰ মূল্যায়ন: আই পি চি চিৰ ফ্ৰেমৱৰ্ক ব্যৱহাৰ কৰি বান আৰু খৰাং বিপদাশংকা মেপিং’। ইণ্ডিয়ান চেণ্টাৰ ফৰ ছায়েন্স, টেকন’লজি এণ্ড পলিচি ষ্টাডিজ (CSTEP), বাংগালুৰুৰ সহযোগত প্ৰস্তুত কৰা হৈছে এই প্ৰতিবেদন । প্ৰতিবেদন অনুসৰি দেশৰ ৫১খন জিলা বানৰ ‘অতি উচ্চ’ আশংকা আৰু ১১৮খন জিলা ‘উচ্চ’ বিপদৰ শ্ৰেণীত পৰে । অসম, বিহাৰ, উত্তৰ প্ৰদেশ, পশ্চিম বংগ, গুজৰাট, ওড়িশা আৰু জম্মু-কাশ্মীৰৰ দৰে ৰাজ্যত এই বিপদাশংকা অধিক ।
ইয়াৰ উপৰিও প্ৰতিবেদনত উল্লেখ কৰা হৈছে যে বিশেষকৈ বিহাৰ, অসম, ঝাৰখণ্ড, ওড়িশা আৰু মহাৰাষ্ট্ৰত ৯১খন জিলাই ‘অতি উচ্চ’ খৰাং আশংকাৰ সন্মুখীন হৈছে আৰু ১৮৮খন জিলাই ‘উচ্চ’ খৰাং আশংকাৰ সন্মুখীন হৈছে । প্ৰতিবেদনত সকীয়াই দিয়া হৈছে যে বিহাৰৰ পাটনা, কেৰালাৰ আলাপ্পুঝা আৰু ওড়িশাৰ কেন্দ্ৰপাৰাৰ দৰে ১১খন জিলা বান আৰু খৰাং দুয়োটাৰে ‘অতি উচ্চ’ আশংকাত আছে আৰু এই অঞ্চলসমূহে শীঘ্ৰে ব্যৱস্থা গ্ৰহণ কৰাৰ প্ৰয়োজন আছে ।
গুৱাহাটীৰ আই আই টিৰ সঞ্চালক দেৱেন্দ্ৰ জলিহালে কয়, ভাৰতৰ কৃষি বাৰিষাৰ ওপৰত অত্যন্ত নিৰ্ভৰশীল । জলবায়ু পৰিৱৰ্তনৰ বাবে খৰাং আৰু অত্যধিক বৰষুণৰ দৰে সমস্যা অধিক ভয়াৱহ হৈ পৰিছে । প্ৰতিবেদনত ৬০০ৰো অধিক জিলাৰ বিপদৰ মূল্যায়ন কৰা হৈছে, এই সমস্যাসমূহ মোকাবিলা কৰিবলৈ গুৰুত্বপূৰ্ণ তথ্য প্ৰদান কৰা হৈছে । এই অধ্যয়নত জলবায়ু পৰিৱৰ্তনৰ ফলত সৃষ্টি হোৱা ভাবুকি আৰু সমস্যাসমূহ জিলা পৰ্যায়ত দেখুওৱা হৈছে । ইয়াৰ দ্বাৰা মানুহৰ সুৰক্ষাৰ বাবে সহায়ক হ’ব আৰু জলবায়ু পৰিৱৰ্তনে মানুহৰ জীৱন আৰু তেওঁলোকৰ কাম-কাজত কেনে প্ৰভাৱ পেলাব পাৰে সেই বিষয়ে ব্যাখ্যা কৰা হ’ব ।
বিজ্ঞান আৰু প্ৰযুক্তিৰ বৈজ্ঞানিক বিভাগৰ মুৰব্বী অনিতা গুপ্তাই কয়, জলবায়ু পৰিৱৰ্তন আমাৰ সময়ৰ অন্যতম ডাঙৰ প্ৰত্যাহ্বান, ইয়াৰ প্ৰভাৱ কৃষি, জীৱিকা আৰু জীৱনৰ প্ৰতিটো দিশত পৰিছে । এই প্ৰতিবেদনৰ জৰিয়তে আমি স্থানীয় জনগোষ্ঠীসমূহে সন্মুখীন হোৱা প্ৰত্যাহ্বানসমূহৰ মূল্যায়ন কৰিছো আৰু একেলগে এই সমস্যাসমূহৰ সমাধান বিচাৰিবলৈ চেষ্টা কৰিছো ।
