বিজেপি নেতা দেৱেন্দ্ৰ ফাড়নৱিছ হ’ব মহাৰাষ্ট্ৰৰ পৰৱৰ্তী মুখ্যমন্ত্ৰী । বুধবাৰে অনুষ্ঠিত মহাযুটীৰ বৈঠকত পৰৱৰ্তী মুখ্যমন্ত্ৰী হিচাবে দেৱেন্দ্ৰ ফাড়নৱিছৰ নামত লাগিল মোহৰ । বিজেপিৰ বিধায়িনী দলৰ নেতা হিচাপে নিৰ্বাচিত হৈছে ফাড়নৱিছ । মহাযুটীৰ এই বৈঠকত একনাথ শিণ্ডে আৰু অজিত পাৱাৰক মহাৰাষ্ট্ৰৰ উপ-মুখ্যমন্ত্ৰী হিচাপে নিযুক্তি দিয়া হৈছে ।
এই সিদ্ধান্তৰ পিছত, দেৱেন্দ্ৰ ফাড়নৱিছে এতিয়া সমৰ্থক আৰু বিধায়কসকলৰ নাম লৈ মহাৰাষ্ট্ৰৰ ৰাজ্যপালক সাক্ষাৎ কৰিব আৰু চৰকাৰ গঠনৰ দাবী কৰিব । মহাযুটীৰ নেতাসকল আজি বিয়লি ৩.৩০ বজাত ৰাজভৱনলৈ যাব । ৫ ডিচেম্বৰত মহাৰাষ্ট্ৰৰ আজাদ ময়দানত শপত গ্ৰহণ অনুষ্ঠান অনুষ্ঠিত হ’ব । অনুষ্ঠানটোত বিজেপিৰ কেইবাজনো জ্যেষ্ঠ নেতা উপস্থিত থাকিব ।
বিধানসভা নিৰ্বাচনত বিজেপিয়ে যিদৰে আসন লাভ কৰিছিল, বিশ্বাস কৰা হৈছিল যে পৰৱৰ্তী মুখ্যমন্ত্ৰীজন বিজেপিৰেই হ’ব । নাগপুৰ দক্ষিণ পশ্চিম আসনৰ পৰা নিৰ্বাচিত হৈছে দেৱেন্দ্ৰ ফাড়নৱিছ । তেওঁ পূৰ্বেও মুখ্যমন্ত্ৰী হিচাপে কাৰ্যনিৰ্বাহ কৰিছিল । একনাথ শিণ্ডে চৰকাৰত উপ মুখ্যমন্ত্ৰীৰ পদত অধিষ্ঠিত হৈ থকা দেৱেন্দ্ৰ ফাড়নৱিছে ২০১৯ চনতো মুখ্যমন্ত্ৰী হোৱাৰ সুযোগ পাইছিল যদিও দুদিনৰ পিছত পদত্যাগ কৰিবলগীয়া হৈছিল ।
