জলবায়ু পৰিৱৰ্তনৰ প্ৰভাৱ এতিয়া সমগ্ৰ বিশ্বতে ক্ৰমান্বয়ে দেখা পোৱা গৈছে । ইফালে ইয়াৰ মাজতে ইউৰোপৰ জলবায়ু পৰিৱৰ্তন সংস্থা কপাৰনিকাছে এক ভয়ংকৰ তথ্য প্ৰকাশ কৰিছে । ২০২৪ বৰ্ষটো বিশ্বৰ ইতিহাসৰ আটাইতকৈ উষ্ণ বছৰ হিচাপে পৰিগণিত হ’ব বুলি সংস্থাটোৱে প্ৰকাশ কৰিছে । সংস্থাটোৱে কয় যে ২০২৪ চনটো অভিলেখৰ আটাইতকৈ উষ্ণ বছৰ হ’ব বুলি প্ৰায় নিশ্চিত । বিবৃতিটোত কোৱা হৈছে যে এয়া প্ৰথমবাৰৰ বাবে, য’ত গড় তাপমাত্ৰা প্ৰাক-ঔদ্যোগিক স্তৰৰ পৰা ১.৫ ডিগ্ৰী চেলছিয়াছতকৈ বেছি হ’ব ।
সংস্থাটোৱে জনোৱা মতে, এই বছৰ ইতিহাসৰ দ্বিতীয়টো উষ্ণ নৱেম্বৰ মাহ ৰেকৰ্ড কৰা হৈছে । ২০২৩ চনৰ নৱেম্বৰ মাহটো এতিয়াও ইতিহাসৰ আটাইতকৈ উষ্ণ নৱেম্বৰ । এইবাৰ নৱেম্বৰ মাহত পৃষ্ঠীয় বায়ুৰ উষ্ণতা আছিল ১৪.১০ ডিগ্ৰী চেলছিয়াছ, যিটো ১৯৯১ চনৰ পৰা ২০২০ চনলৈকে গড় উষ্ণতাতকৈ ০.৭৩ ডিগ্ৰী চেলছিয়াছ বেছি ।
গোলকীয় উষ্ণতা বৃদ্ধিৰ সৈতে জড়িত আন এক অবাঞ্চিত অভিলেখো নৱেম্বৰ মাহত গঢ় লৈ উঠিছে । এই সময়ছোৱাত প্ৰাক-ঔদ্যোগিক সময়ৰ তুলনাত বিশ্বৰ গড় উষ্ণতা ১.৬২ ডিগ্ৰী চেলছিয়াছ বেছি হৈছে । কপাৰনিকাছ এজেন্সীৰ তথ্য অনুসৰি যোৱা ১৭ মাহৰ ভিতৰত এইটো ১৬সংখ্যক মাহ, যেতিয়া বিশ্বৰ গড় উষ্ণতা প্ৰাক-ঔদ্যোগিক যুগৰ তুলনাত ১.৫ ডিগ্ৰী চেলছিয়াছ বেছি হৈছে ।
ভাৰতৰ বতৰ বিজ্ঞান বিভাগৰ তথ্য অনুসৰি ১৯০১ চনৰ পিছত ভাৰতৰ বাবে এইটো দ্বিতীয় উষ্ণ নৱেম্বৰ । এই সময়ছোৱাত গড় সৰ্বোচ্চ উষ্ণতা ২৯.৩৭ ডিগ্ৰী চেলছিয়াছ হয়, যিটো স্বাভাৱিকতকৈ ০.৬২ ডিগ্ৰী চেলছিয়াছ বেছি ।
২০২৪ চনৰ জানুৱাৰীৰ পৰা নৱেম্বৰ মাহলৈকে বিশ্বৰ গড় উষ্ণতা ১৯৯১-২০২০ চনৰ উষ্ণতাতকৈ প্ৰায় ০.৭২ ডিগ্ৰী চেলছিয়াছ বেছি । একে সময়তে ২০২৩ চনৰ জানুৱাৰী-নৱেম্বৰৰ তুলনাত চলিত বৰ্ষৰ একে সময়ছোৱাত তাপমাত্ৰা ০.১৪ ডিগ্ৰী চেলছিয়াছ বৃদ্ধি পাইছে ।
১.৫০ ডিগ্ৰী চেলছিয়াছতকৈ অধিক হোৱাৰ সম্ভাৱনা-
ইউৰোপীয় সংস্থাটোৰ বিজ্ঞানীসকলে কয় যে ২০২৩ চনৰ তাপমাত্ৰা প্ৰাক-ঔদ্যোগিক স্তৰতকৈ ১.৪৮ ডিগ্ৰী চেলছিয়াছতকৈ বেছি আছিল, গতিকে ২০২৪ চনত বাৰ্ষিক উষ্ণতা ১.৫ ডিগ্ৰী চেলছিয়াছ বেছি হ’ব বুলি প্ৰায় নিশ্চিত ।
