আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্প প্ৰশাসনে ইউক্ৰেইনলৈ দিয়া সকলো সামৰিক সাহায্য বন্ধ কৰি দিয়াৰ ফলত কিয়েভত হাহাকাৰ সৃষ্টি হৈছে । ইউক্ৰেইনৰ বিষয়াসকলে এই সিদ্ধান্তক তীব্ৰ গৰিহণা দি ৰাছিয়াৰ বিৰুদ্ধে ইউক্ৰেইনৰ প্ৰতিৰক্ষা দুৰ্বল কৰি তোলা পদক্ষেপ বুলি অভিহিত কৰিছে ।
ইউক্ৰেইনে কয় যে এই সিদ্ধান্ত মিত্ৰশক্তিৰ বিশ্বাসঘাতকতাৰ সমান আৰু ইয়াৰ ফলত ৰাছিয়াই অধিক সাধাৰণ নাগৰিকক বোমা বৰ্ষণ কৰি হত্যা কৰিবলৈ সক্ষম হ’ব ।
ইউক্ৰেইনে সকীয়াই দিছিল যে ইয়াৰ ফলত আমি আত্মসমৰ্পণ কৰিবলৈ বাধ্য হৈছো । ইউক্ৰেইনৰ সংসদীয় বৈদেশিক পৰিক্ৰমা সমিতিৰ অধ্যক্ষই ৰয়টাৰক দিয়া এক বিবৃতিত কয় যে, “সাহায্য বন্ধ কৰিলে সঁচাকৈয়ে গুৰুতৰ সংকটৰ সৃষ্টি হ’ব পাৰে । দেখা গৈছে যে ট্ৰাম্প প্ৰশাসনে আমাক আত্মসমৰ্পণ কৰিবলৈ বাধ্য কৰাইছে ।”
হোৱাইট হাউছৰ এজন বিষয়াই কয় যে, “ৰাষ্ট্ৰপতি ট্ৰাম্পে স্পষ্ট কৰি দিছে যে তেওঁৰ গুৰুত্ব শান্তিৰ ওপৰত । আমি নিশ্চিত কৰিব বিচাৰো যে আমাৰ সহায় যুদ্ধখন দীঘলীয়া কৰাৰ কাৰণে নহয়, স্থায়ী সমাধানৰ অংশ।” কিন্তু আমেৰিকাৰ বাতৰি কাকত নিউয়ৰ্ক টাইমছৰ এক প্ৰতিবেদন অনুসৰি এই নিষেধাজ্ঞাই ইউক্ৰেইনলৈ প্ৰেৰণ কৰিবলগীয়া লাখ লাখ ডলাৰৰ সামৰিক অস্ত্ৰ আৰু গোলাবাৰুদত প্ৰভাৱ পেলাব ।
ডেম’ক্ৰেটৰ তীক্ষ্ণ আক্ৰমণ-
আমেৰিকাৰ কংগ্ৰেছৰ ডেম’ক্ৰেটসকলে এই পদক্ষেপক বেআইনী আৰু বিপজ্জনক বুলি অভিহিত কৰিছে । হাউছ ফৰেইন এফেয়াৰ্ছ কমিটীৰ মুৰব্বী ডেম’ক্ৰেট কংগ্ৰেছী গ্ৰেগৰী মিক্সে কয় যে মোৰ ৰিপাব্লিকান সহযোগীসকলে পুটিনক ‘যুদ্ধ অপৰাধী’ বুলি অভিহিত কৰি ইউক্ৰেইনক সমৰ্থন কৰাৰ প্ৰতিশ্ৰুতি দিছে । এতিয়া তেওঁলোকে ৰাষ্ট্ৰপতি ট্ৰাম্পক এই ধ্বংসাত্মক আৰু অবৈধ অৱৰোধৰ অন্ত পেলাবলৈ হেঁচা প্ৰয়োগ কৰিব লাগিব ।
জেলেনস্কিক সকীয়াই দিয়ে ট্ৰাম্পে-
তেওঁৰ বিবৃতিত ট্ৰাম্পে ইউক্ৰেইনৰ ৰাষ্ট্ৰপতি জেলেনস্কিকো লক্ষ্য কৰি কয় যে, “আমেৰিকাৰ পৰা পোৱা সহায়ৰ বাবে ইউক্ৰেইনে অধিক কৃতজ্ঞতা প্ৰকাশ কৰা উচিত । যদি জেলেনস্কিয়ে মস্কোৰ সৈতে কোনো চুক্তি নকৰে তেন্তে তেওঁ আৰু বেছি দিন ক্ষমতাত থাকিব নোৱাৰিব ।”
ইউক্ৰেইনৰ সঁহাৰি-
ইউক্ৰেইনৰ ৰাষ্ট্ৰপতি ভ্লাদিমিৰ জেলেনস্কিয়ে এই সিদ্ধান্তৰ প্ৰতি সতৰ্কতাৰে প্ৰতিক্ৰিয়া প্ৰকাশ কৰি কয় যে, “ইউক্ৰেইনে যুদ্ধৰ অন্ত পেলাব বিচাৰে, কিন্তু তাৰ অৰ্থ এইটো নহয় যে আমি শক্তিশালী নিৰাপত্তাৰ নিশ্চয়তা অবিহনে ৰাছিয়াৰ ওচৰত আত্মসমৰ্পণ কৰিম ।” তেওঁ সোঁৱৰাই দিয়ে যে নিৰাপত্তাৰ নিশ্চয়তাৰ অভাৱৰ বাবেই ২০১৪ চনত ৰাছিয়াই ক্ৰিমিয়াক নিজৰ অন্তৰ্ভুক্ত কৰিছিল ।
ইউৰোপীয় মিত্ৰশক্তিৰ প্ৰতিক্ৰিয়া
আমেৰিকাৰ এই সাহায্য বন্ধই ইউৰোপীয় দেশসমূহতো উদ্বেগ বৃদ্ধি কৰিছে । ব্ৰিটেইন আৰু ফ্ৰান্সে ইউক্ৰেইন আৰু ৰাছিয়াৰ মাজত এমাহজোৰা যুদ্ধবিৰতিৰ সম্ভাৱনাৰ সন্ধান চলাইছে বুলি জানিব পৰা গৈছে । জাৰ্মানীৰ সম্ভাৱ্য পৰৱৰ্তী চ্যান্সেলৰ ফ্ৰেড্ৰিখ মেৰ্জে ট্ৰাম্পৰ এই সিদ্ধান্তক “ইচ্ছাকৃতভাৱে বৃদ্ধি” বুলি অভিহিত কৰি কয় যে ই ৰাছিয়াক সাহসী কৰি তুলিব আৰু ইউক্ৰেইনক দুৰ্বল কৰি তুলিব । ফ্ৰান্সৰ ইউৰোপ মন্ত্ৰী বেঞ্জামিন হাদ্দাদে কয় যে যদি আপুনি সঁচাকৈয়ে শান্তি বিচাৰে তেন্তে ইউক্ৰেইনলৈ অস্ত্ৰ যোগান বন্ধ কৰাৰ সিদ্ধান্তই ৰাছিয়াৰ স্থিতি শক্তিশালী কৰি তুলিব ।
