২২ জানুৱাৰীৰ পৰা ইংলেণ্ডৰ বিৰুদ্ধে আৰম্ভ হ’বলগীয়া টি-২০ শৃংখলাৰ বাবে ভাৰতে ঘোষণা কৰিছে দল । সূৰ্যকুমাৰ যাদৱৰ অধিনায়কত্বত খেলিব টিম ইণ্ডিয়াই । আজি ঘোষণা কৰা দললৈ ঘূৰি আহিছে প্ৰবীণ বলাৰ মহম্মদ ছামী । ইংলেণ্ডৰ বিৰুদ্ধে খেলা দেখা যাব ছামীক । সঞ্জু চেমছন, অভিষেক শৰ্মা, তিলক বাৰ্মা আৰু বৰুণ চক্ৰৱৰ্তীয়েও স্থান লাভ কৰিছে দলত । অক্ষৰ পেটেলক উপ-অধিনায়ক হিচাপে নিযুক্তি দিয়া হৈছে । ইফালে হৰ্ষিত ৰাণা আৰু অৰ্শদীপ সিঙো টিম ইণ্ডিয়াৰ অংশ ।
ভাৰত আৰু ইংলেণ্ডৰ মাজত অনুষ্ঠিত হ’ব পাঁচখনীয়া মেচৰ টি-২০ শৃংখলা । ভাৰতীয় ক্ৰিকেট নিয়ন্ত্ৰণ ব’ৰ্ডে শনিবাৰে নিশা এই টি-২০ শৃংখলাৰ বাবে দল ঘোষণা কৰে । এদিনীয়া শৃংখলা আৰু চেম্পিয়নছ ট্ৰফীৰ দল পৰৱৰ্তী সময়ত ঘোষণা কৰা হ’ব । ছামী বহুদিন টিম ইণ্ডিয়াৰ বাহিৰত আছিল । কিন্তু এতিয়া পুনৰ দললৈ ঘূৰি আহিছে নিৰ্ভৰযোগ্য বেগী বলাৰগৰাকী । আঘাতৰ পিছৰে পৰা ছামী ক্ৰিকেটৰ পৰা আঁতৰি আছিল । কিন্তু শেহতীয়া ঘৰুৱা মেচসমূহত তেওঁ ভাল প্ৰদৰ্শন আগবঢ়াইছে । এতিয়া তেওঁ দললৈ প্ৰত্যাৱৰ্তন কৰিছে ।
টিম ইণ্ডিয়াত স্থান লাভ কৰিলে স্পীনাৰ বৰুণ চক্ৰৱৰ্তী আৰু বিষ্ণোই-
ভাৰতে ঘাতক স্পীনাৰ বৰুণ চক্ৰৱৰ্তী আৰু ৰবি বিষ্ণোইক এই শৃংখলাত সুযোগ দিছে । ৱাশ্বিংটন সুন্দৰো এই শৃংখলাৰ বাবে টিম ইণ্ডিয়াৰ অংশ হ’ব । ৰিংকু সিং, তিলক বাৰ্মা আৰু হৰ্ষিত ৰাণাই দলত স্থান লাভ কৰিছে ।
দলৰ বাহিৰত শুভমন-পন্ট আৰু যশস্বী-
শুভমন গীল আৰু ঋষভ পন্টক এই শৃং্খলাৰ পৰা বিৰতি দিছে বি চি চি আইয়ে । এই দুয়োজন খেলুৱৈ টি-২০ দলৰ অংশ নহয় । কিন্তু তেওঁলোকে এদিনীয়া আৰু চেম্পিয়নছ ট্ৰফী ২০২৫ৰ বাবে টিম ইণ্ডিয়াত স্থান দখল কৰিব পাৰে । কিন্তু এই সন্দৰ্ভত কোনো আনুষ্ঠানিক তথ্য লাভ কৰা হোৱা নাই । যশস্বী জয়ছোৱালো টি-২০ দলৰ অংশ নহয় ।
ইংলেণ্ডৰ বিৰুদ্ধে টি-২০ শৃংখলাৰ বাবে ভাৰতীয় দল :
সূৰ্যকুমাৰ যাদৱ (অধিনায়ক), সঞ্জু চেমছন (উইকেটকীপাৰ), অভিষেক শৰ্মা, তিলক বাৰ্মা, হাৰ্দিক পাণ্ডিয়া, ৰিংকু সিং, নীতিশ কুমাৰ ৰেড্ডী, অক্ষৰ পেটেল (উপ অধিনায়ক), হৰ্ষিত ৰানা, অৰ্শদীপ সিং , মহম্মদ ছামী , বৰুণ চক্ৰৱৰ্তী, ৰবি বিষ্ণোই, ৱাশ্বিংটন সুন্দৰ, ধ্ৰুৱ জুৰেল (উইকেটকীপাৰ)।
