ছিৰিয়াৰ বিদ্ৰোহী সংগঠন আল নুছৰা ফ্ৰণ্টে ৰাজধানী ডামাস্কাছ দখল কৰি বাছাৰ আল আছাদক উৎখাত কৰা বুলি দাবী কৰিছে । ইফালে, ইৰাণৰ চৰকাৰী টেলিভিছনত দেওবাৰে জনাইছে যে ছিৰিয়াত থকা তেওঁলোকৰ দূতাবাসত আক্ৰমণ কৰা হৈছে । হায়াত তাহৰিৰ আল-শ্বাম (HTS) নামেৰেও পৰিচিত আল-নুছৰা ফ্ৰণ্টে প্ৰথমে দেশখনৰ আলেপ্পো চহৰ দখল কৰিছিল, তাৰ পিছত হোমছ আৰু দাৰা চহৰৰ ওপৰত নিয়ন্ত্ৰণ লাভ কৰিছিল । বিদ্ৰোহী সংগঠনটোৱে ৰাজধানী দামাস্কাছ দখল কৰাৰ কথা ঘোষণা কৰে ।
ৰাজ্যিক টেলিভিছনত দূতাবাসত আক্ৰমণৰ ফুটেজ দেখুওৱা হৈছিল-
ইৰাণৰ টিভি চেনেলে প্ৰকাশ কৰা অনুসৰি একাংশ অজ্ঞাত আক্ৰমণকাৰীয়ে ইৰাণৰ দূতাবাসত আক্ৰমণ চলাইছে । চেনেলটোৱে দূতাবাসৰ চৌহদৰ ভিতৰৰ পৰা আল আৰবিয়া নেটৱৰ্কৰ ভিডিঅ’ ফুটেজো প্ৰকাশ কৰে । ইৰাণৰ বাতৰি কাকত তেহৰাণ টাইমছে প্ৰকাশ কৰা অনুসৰি আক্ৰমণৰ পূৰ্বে দূতাবাসৰ সকলো ইৰাণী কূটনীতিবিদ নিৰাপদ স্থানলৈ স্থানান্তৰিত হৈছিল । প্ৰতিবেদন অনুসৰি দূতাবাসৰ কৰ্মচাৰীসকল সম্পূৰ্ণ সুৰক্ষিত । প্ৰতিবেদনত উল্লেখ কৰা হৈছে যে বিদ্ৰোহী সংগঠনে দূতাবাসত আক্ৰমণ কৰিছে । অৱশ্যে এই অভিযোগ স্বতন্ত্ৰভাৱে নিশ্চিত হোৱা নাই ।
আল আছাদ চৰকাৰ আৰু বিদ্ৰোহী সংগঠনৰ মাজত আলোচনাৰ আহ্বান-
বাছাৰ আল আছাদৰ চৰকাৰৰ পতন সন্দৰ্ভত ইৰাণৰ বিষয়াসকলে এতিয়াও কোনো মন্তব্য কৰা নাই । শনিবাৰে বিদ্ৰোহী সংগঠনে সামৰিক অভিযান অব্যাহত ৰাখিছে । কিন্তু তেতিয়ালৈকে দামাস্কাছ নিয়ন্ত্ৰণত নাছিল । ইৰাণৰ বৈদেশিক মন্ত্ৰী আব্বাছ আৰাঘজীয়ে ছিৰিয়া চৰকাৰ আৰু বিদ্ৰোহী সংগঠনৰ মাজত আলোচনাৰ আহ্বান জনায় ।
