আমেৰিকাৰ ৰাষ্ট্ৰপতি ড’নাল্ড ট্ৰাম্পে সামৰিক বাহিনীক এক কঠোৰ নিৰ্দেশনা জাৰি কৰিছে। ৰাষ্ট্ৰপতি গৰাকীয়ে কৈছে যে যদি ইৰাণে তেওঁক হত্যা কৰা চেষ্টা কৰে তেন্তে ইৰাণক মাটিৰ সৈতে মিলাই দিয়া হ’ব।

আমেৰিকা আৰু ইৰাণৰ মাজত উত্তেজনাই আকৌ এবাৰ বিপজ্জনক টাৰ্নিং পইণ্টত উপনীত হোৱা যেন লাগে। ইৰাণক প্ৰত্যক্ষ সামৰিক সতৰ্কবাণী জাৰি কৰি আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰে যে যদি ইৰাণ চৰকাৰে তেওঁক হত্যা কৰে বা হত্যা কৰাৰ চেষ্টা কৰে তেন্তে ইৰাণক নিঃশেষ কৰি দিয়া হ’ব। পূৰ্বৰে পৰাই ১০০০টা আমেৰিকাৰ ক্ষেপণাস্ত্ৰ ইৰাণক লক্ষ্য কৰি ল’বলৈ সাজু হৈ আছে।

ড’নাল্ড ট্ৰাম্পে নিজৰ ছ’চিয়েল মিডিয়া প্লেটফৰ্মত লিখিছে যে ইৰাণ চৰকাৰে যদি বিশ্বৰ যিকোনো ঠাইৰ পৰাই তেওঁক হত্যা বা হত্যাৰ চক্ৰান্ত কৰে বা কাৰ্যকৰী কৰাৰ চেষ্টা কৰে তেন্তে আমেৰিকাই তৎক্ষণাত ইয়াৰ প্ৰতিক্ৰিয়া প্ৰকাশ কৰিব। ট্ৰাম্পে দাবী কৰে যে ইতিমধ্যে ইৰাণ ইছলামিক ৰিপাব্লিকক লক্ষ্য কৰি ১০০০টা ক্ষেপণাস্ত্ৰ ব্যৱহাৰৰ বাবে সাজু হৈ আছে আৰু প্ৰয়োজন হ’লে আৰু হাজাৰ হাজাৰ ক্ষেপণাস্ত্ৰ তৎক্ষণাত নিয়োগ কৰা হ’ব। তেওঁ কয় যে ইতিমধ্যে আমেৰিকাৰ সেনাবাহিনীক আদেশ জাৰি কৰা হৈছে, আৰু ইৰাণৰ প্ৰতিটো অংশ এবছৰৰ বাবে বা প্ৰয়োজন হ’লে তাতোকৈ বেছি দিনলৈকে সম্পূৰ্ণৰূপে ধ্বংস কৰাৰ ক্ষমতা আৰু প্ৰস্তুতি আমেৰিকাৰ হাতত আছে।

ইয়াৰ পূৰ্বে ইৰাণৰ সংসদৰ অধ্যক্ষ মহম্মদ বাঘেৰ গালিবাফে আমেৰিকাক কঠোৰ বাৰ্তা প্ৰদান কৰে। গালিবাফে কয় যে যোৱা মাহত স্বাক্ষৰিত বুজাবুজিৰ চুক্তিৰ পৰা আমেৰিকাই বিৰত থাকিলে ইৰাণ প্ৰতিৰক্ষাৰ বাবে সম্পূৰ্ণৰূপে সাজু।

ইণ্ডোনেছিয়াৰ পিপলছ কনছালটেটিভ এছেম্বলীৰ অধ্যক্ষ আহমদ মুজানীৰ সৈতে হোৱা বৈঠকৰ পিছত গালিবাফে টেলিগ্ৰামৰ আনুষ্ঠানিক পোষ্টত উল্লেখ কৰে যে শেহতীয়াকৈ শান্তি আলোচনাৰ সময়ত তেওঁ আমেৰিকাৰ উপ-ৰাষ্ট্ৰপতি জে ডি ভ্যান্সক স্পষ্টভাৱে কৈছিল যে ইৰাণৰ আমেৰিকাৰ ওপৰত “অলপো আস্থা” নাই।

গালিবাফে কয়, “আলোচনাৰ সময়ত মই আমেৰিকাৰ উপ-ৰাষ্ট্ৰপতিক স্পষ্টকৈ কৈছিলো যে আমি আপোনাক একেবাৰেই বিশ্বাস নকৰো। মোৰ মতে যুদ্ধৰ বাবে সম্পূৰ্ণ সাজু থকা দেশখনেহে আমেৰিকাৰ সৈতে আলোচনা কৰিব পাৰে। আমি কেতিয়াও আমাৰ দেশৰ প্ৰতিৰক্ষাৰ বাবে প্ৰস্তুতি বন্ধ কৰা নাই। যি মুহূৰ্তত আমেৰিকাই যিকোনো চুক্তিৰ পৰা পিছুৱাই যাব, সেই মুহূৰ্তত আমি পূৰ্ণাংগ প্ৰতিৰক্ষাৰ বাবে সাজু হৈছো। আমি ইয়াৰ সৈতে দৃঢ়তাৰে মুখামুখি হ’ম আৰু ৰাষ্ট্ৰৰ অধিকাৰ ৰক্ষা কৰিম।”

ইয়াৰ পূৰ্বে ট্ৰুথ ছ’চিয়েলৰ আন এটা পোষ্টত ট্ৰাম্পে উল্লেখ কৰিছিল যে ইৰাণে আমেৰিকাৰ সৈতে আলোচনা অব্যাহত ৰাখিবলৈ অনুৰোধ জনাইছে আৰু আমেৰিকাই তেনে কৰিবলৈ ইচ্ছুক, কিন্তু তেওঁ ইৰাণক স্পষ্ট কৰি দিছে যে দুয়োখন দেশৰ মাজত যুদ্ধবিৰতি এতিয়া শেষ হৈছে।

ট্ৰাম্পে লিখিছে, “ইৰাণ  ইছলামিক ৰিপাব্লিকে আমাৰ সৈতে আলোচনা অব্যাহত ৰাখিবলৈ অনুৰোধ কৰিছে। আমি এই কথাত সন্মতি দিছো, কিন্তু আমেৰিকাই তেওঁলোকক স্পষ্ট কৰি দিছে যে এতিয়া যুদ্ধবিৰতি শেষ হৈছে।”

লগতে পঢ়ক: ‘ইৰাণ আলোচনাৰ বাবে সাজু হৈছে, কিন্তু মই…’; আক্ৰমণৰ পিছত ট্ৰাম্পৰ নতুন দাবী

ইৰাণৰ সৰ্বোচ্চ নেতা আয়াতুল্লাহ আলী খামেইনীৰ অন্ত্যেষ্টিক্ৰিয়া মাশাহাদৰ ইমাম ৰেজা মছজিদত অনুষ্ঠিত হয়।

ইৰাণে বৃহস্পতিবাৰে তেওঁলোকৰ প্ৰাক্তন সৰ্বোচ্চ নেতা আয়াতুল্লাহ আলী খামেইনীক মাশাহাদত অৱস্থিত ইমাম ৰেজাৰ দৰগাহ (শ্ৰাইন)ত সমাধিস্থ কৰে। এসপ্তাহ ধৰি চলা জানাজা সমদল আৰু শোকসভাৰ অন্তত তেওঁৰ এই অন্তিম বিদায় সম্পন্ন হয়। ২৮ ফেব্ৰুৱাৰীত যুদ্ধৰ প্ৰথম দিনাই আমেৰিকাৰ বিমান আক্ৰমণত খামেইনীৰ মৃত্যু হৈছিল।

খামেইনীৰ নশ্বৰ দেহ এখন ট্ৰাকত তুলি মাশাহাদৰ জনাকীৰ্ণ পথসমূহৰ মাজেৰে ইমাম ৰেজাৰ দৰগাহলৈ লৈ যোৱা হয়। এই সময়ছোৱাত ক’লা পোছাক পৰিহিত হাজাৰ হাজাৰ শোকাকুল লোকে ইৰাণী পতাকা, প্ৰয়াত নেতাগৰাকীৰ ছবি আৰু বৈপ্লৱিক শ্ল’গান সম্বলিত ৰঙা পোষ্টাৰ জোকাৰি অন্তিম যাত্ৰাত অংশগ্ৰহণ কৰে।

২৮ ফেব্ৰুৱাৰীত তেহৰাণত থকা তেওঁৰ বাসগৃহত আমেৰিকা আৰু ইজৰাইলৰ যৌথ বিমান আক্ৰমণত খামেইনীৰ মৃত্যু হৈছিল। ইৰাণ আৰু আমেৰিকা-ইজৰাইলৰ মাজত যুদ্ধ আৰম্ভ হোৱাৰ প্ৰথম দিনাই এই আক্ৰমণ সংঘটিত হৈছিল। তেওঁৰ সৈতে পৰিয়ালৰ কেইবাজনো সদস্যও নিহত হৈছিল। পিছত তেওঁৰ পুত্ৰ মোজতবা খামেনেইক নতুন সৰ্বোচ্চ নেতা হিচাপে ঘোষণা কৰা হয়, কিন্তু উক্ত আক্ৰমণত তেওঁ আহত হোৱাৰ খবৰ ওলোৱাৰ পিছৰে পৰা তেওঁক ৰাজহুৱাভাৱে দেখা পোৱা হোৱা নাই আৰু তেওঁ অন্ত্যেষ্টিক্ৰিয়াৰ অনুষ্ঠানসমূহতো উপস্থিত থকা নাই।

খামেইনীক ইমাম ৰেজাৰ দৰগাহ চৌহদত নিৰ্মিত সমাধিস্থলত জানাজা কৰা হয়। নৱম শতিকাত নিৰ্মিত এই ধৰ্মীয় স্থলীক ছিয়া মুছলমানসকলৰ আটাইতকৈ পবিত্ৰ তীৰ্থস্থান বুলি গণ্য কৰা হয়, তালৈ প্ৰতি বছৰে লাখ লাখ তীৰ্থযাত্ৰী দৰ্শনৰ বাবে যায়। খামেইনীৰ জন্মও মাশাহাদতে হৈছিল আৰু তেওঁ প্ৰাৰম্ভিক ধৰ্মীয় শিক্ষাও ইয়াতেই গ্ৰহণ কৰিছিল।

লগতে পঢ়ক: আমেৰিকাৰ সামৰিক ঘাটিত ইৰানৰ মিছাইল-ড্ৰোণ আক্ৰমণ

ইৰাণৰ বিৰুদ্ধে বৰ্তমানলৈকে আমেৰিকাই গ্ৰহণ কৰা সৰ্ববৃহৎ সামৰিক ব্যৱস্থাৰ সন্দৰ্ভত এটা ডাঙৰ দাবী উত্থাপন হৈছে। ইৰাণৰ ৮০টাকৈ ঘাটিত ভয়ংকৰ আক্ৰমণ চলাইছে আমেৰিকাই। ড’নাল্ড ট্ৰাম্পে কয় যে এইটো কেৱল আক্ৰমণ নহয়, শাস্তিহে।

মধ্যপ্ৰাচ্যত উত্তেজনা পুনৰবাৰ তীব্ৰতৰ হৈ পৰিছে। আমেৰিকাই ইৰাণৰ বিৰুদ্ধে ব্যাপক বিমান আক্ৰমণ চলাই হৰমুজ প্ৰণালীৰ আশে-পাশে থকা কেইবাটাও সামৰিক ঘাটিক লক্ষ্য কৰি লৈছে। আমেৰিকান বিষয়াসকলৰ মতে, এই কাৰ্যবাহী প্ৰায় ১০ দিন পূৰ্বে কৰা আক্ৰমণৰ তুলনাত বহু বেছি ব্যাপক আৰু শক্তিশালী আছিল। আনহাতে, ইৰাণেও আমেৰিকান আক্ৰমণৰ প্ৰত্যুত্তৰত আমেৰিকাৰ যুদ্ধজাহাজলৈ মিছাইল আৰু ড্ৰোণ আক্ৰমণ চলাইছে।

ইৰাণৰ ৮০টাকৈ ঘাটিত ভয়ংকৰ আক্ৰমণ চলাইছে আমেৰিকাই। এজন জ্যেষ্ঠ আমেৰিকান বিষয়াৰ মতে, এইবাৰৰ সামৰিক পদক্ষেপ পূৰ্বৰ তুলনাত চাৰিৰ পৰা পাঁচ গুণ ডাঙৰ আছিল আৰু এই অপাৰেচন কেইবা ঘণ্টালৈকে চলিব পাৰে। বিষয়াজনে ইয়াক এপ্ৰিল মাহত হোৱা যুদ্ধবিৰতিৰ পিছত ইৰাণৰ বিৰুদ্ধে আমেৰিকাৰ আটাইতকৈ তীব্ৰ সামৰিক অভিযান বুলি অভিহিত কৰে।

আমেৰিকান সংবাদ মাধ্যমৰ ৰিপৰ্ট অনুসৰি, এই আক্ৰমণ কেৱল প্ৰতিশোধমূলক নহয়, বৰঞ্চ ইৰাণক এক কঠোৰ বাৰ্তা দিয়াৰ উদ্দেশ্যে কৰা হৈছে। বিষয়াজনে ইংগিত দিয়ে যে সামৰিক অভিযান এতিয়াই শেষ হোৱা নাই আৰু অনাগত দিনতো এই ব্যৱস্থা অব্যাহত থাকিব পাৰে। আমেৰিকান সেনাই জনোৱা মতে, তেওঁলোকৰ লক্ষ্য আছিল ইৰাণৰ কেইবাটাও গুৰুত্বপূৰ্ণ সামৰিক সামৰ্থ্য। আমেৰিকাই দাবী কৰিছে যে হৰমুজ প্ৰমালীত বাণিজ্যিক জাহাজসমূহৰ বাবে বিপদ সৃষ্টি কৰিবলৈ এই ঘাটিসমূহ ব্যৱহাৰ কৰা হৈছিল।

আনহাতে, ইৰাণে আমেৰিকান আক্ৰমণৰ প্ৰত্যুত্তৰত ওমান সাগৰত থকা আমেৰিকাৰ নৌসেনাৰ জাহাজসমূহলৈ এণ্টি-শ্বিপ ক্ৰুজ মিছাইল আৰু ড্ৰোণ নিক্ষেপ কৰিছে। প্ৰতিবেদন অনুসৰি, আমেৰিকাৰ যুদ্ধজাহাজলৈ অন্ততঃ দুটা এণ্টি-শ্বিপ ক্ৰুজ মিছাইল আৰু কেইবাটাও ড্ৰোণ নিক্ষেপ কৰা হৈছে। মিছাইলসমূহ প্ৰতিহত কৰা হৈছে নে নাই, বা ইয়াৰ ফলত হোৱা কোনো ক্ষতিৰ বিষয়ে এতিয়ালৈকে কোনো তথ্য পোৱা হোৱা নাই আৰু আমেৰিকায়ো এই আক্ৰমণৰ কথা নিশ্চিত কৰা নাই। ইৰাণৰ উপকূলত আজি নিশা হোৱা বৃহৎ আক্ৰমণ আৰু তেল বাণিজ্যৰ ৰেহাই বাতিল কৰাৰ প্ৰত্যুত্তৰত ইৰাণৰ ফালৰ পৰা এই পদক্ষেপ লোৱা হ’ব পাৰে।

আমেৰিকান চেন্ট্ৰেল কমাণ্ড (CENTCOM)ৰ মতে, মঙলবাৰে হৰমুজ প্ৰণালীৰ মাজেৰে পাৰ হৈ যোৱা তিনিখন বাণিজ্যিক জাহাজৰ ওপৰত হোৱা আক্ৰমণৰ প্ৰত্যুত্তৰত এই সামৰিক ব্যৱস্থা গ্ৰহণ কৰা হৈছে। আমেৰিকাই সতৰ্ক কৰি দিছে যে আন্তঃৰাষ্ট্ৰীয় সামুদ্ৰিক বাণিজ্যক লক্ষ্য কৰি লোৱাৰ যিকোনো প্ৰচেষ্টাই গধুৰ মূল্য ভৰিব লাগিব।

সামৰিক পদক্ষেপৰ সমান্তৰালভাৱে আমেৰিকাই ইৰাণৰ তেল ব্যৱসায়ৰ ওপৰত পুনৰ নিষেধাজ্ঞা আৰোপ কৰাৰ কথাও ঘোষণা কৰিছে। ৱাশ্বিংটনে কয় যে বাণিজ্যিক জাহাজৰ ওপৰত হোৱা আক্ৰমণৰ প্ৰত্যুত্তৰত এই পদক্ষেপ লোৱা হৈছে। আনহাতে, ইৰাণে এই নিষেধাজ্ঞাক যোৱা মাহত হোৱা চুক্তিৰ স্পষ্ট উলংঘা বুলি অভিহিত কৰি আন্তঃৰাষ্ট্ৰীয় সম্প্ৰদায়ক এই ক্ষেত্ৰত মনোযোগ দিবলৈ আহ্বান জনাইছে।

লগতে পঢ়ক: নাটো সন্মিলনৰ পূৰ্বে ৰাছিয়াৰ ভয়ংকৰ আক্ৰমণ: মিছাইল আৰু ড্ৰোনৰ আঘাতত কঁপি উঠিল কিয়েভ

ইৰাণৰ প্ৰাক্তন শীৰ্ষ নেতা আয়াতুল্লাহ আলী খামেইনীক ৪ ৰ পৰা ৯ জুলাইলৈকে অন্তিম বিদায় দিয়া হ’ব। তাৰ মাজতে ড’নাল্ড ট্ৰাম্পে পুনৰ ইৰাণক ভাবুকি দিছে।

ইৰাণত বৰ্তমান শোক সপ্তাহ চলি আছে। শীৰ্ষ নেতা হিচাপে থকা আয়াতুল্লাহ আলী খামেইনীক ৪ ৰ পৰা ৯ জুলাইলৈকে অন্তিম বিদায় দিয়া হ’ব। তেহৰানকে ধৰি ইৰাণৰ বেছিভাগ চহৰৰ ৰাজপথত জনতাৰ প্ৰচণ্ড ভিৰ পৰিলক্ষিত হৈছে। প্ৰতিগৰাকী ইৰাণী নাগৰিকে খামেইনীৰ জনাজাৰ পিছে পিছে যাব বিচাৰিছে।

আনহাতে, আমেৰিকাৰ ৰাষ্ট্ৰপতি ড’নাল্ড ট্ৰাম্পে এই সময়ছোৱাতো ভাবুকিপূৰ্ণ সুৰত মন্তব্য কৰিছে । তেওঁৰ মতে, ইৰাণত ইমান বৃহৎ সংখ্যক লোক সমবেত হৈছে; আমি ইচ্ছা কৰিলে একেলগতে সকলোকে শেষ কৰি দিব পাৰোঁ। তথাপিও আমি তেনে কৰা নাই। কাৰণ, যদি আমি সকলোকে মাৰি পেলাওঁ, তেন্তে আলোচনাৰ বাবে কোন জীয়াই থাকিব?

ড’নাল্ড ট্ৰাম্পে এইবুলিও দাবী কৰিছে যে ইৰাণৰ নেতাসকলে আমাৰ সন্মুখত এটা চুক্তি কৰিবলৈ কাকূতি-মিনতি কৰি আছে। তেওঁ কয় যে দুয়োপক্ষই সিদ্ধান্ত লৈছে যে এসপ্তাহলৈ কোনো গুলীচালনা নহ’ব। ইয়াৰ কাৰণ হ’ল ইৰাণৰ ৰাইজ খামেইনীক অন্তিম বিদায় দিয়াত ব্যস্ত আছে। খামেইনীৰ বিদায় ক্ষণত সমবেত হোৱা লাখ লাখ লোকৰ ভিৰক লৈও তেওঁ আশ্চৰ্য প্ৰকাশ কৰে। ট্ৰাম্পে কয়, “মই ভাবিছিলোঁ যে ইৰাণৰ মানুহে তেওঁক ঘৃণা কৰে।” ইৰাণত ধাৰাবাহিকভাৱে ৩৬ বছৰ ধৰি শাসন চলোৱা দেশখনৰ শীৰ্ষ নেতা আয়াতুল্লাহ আলী খামেইনীৰ যোৱা ২৮ ফেব্ৰুৱাৰীত আমেৰিকা আৰু ইজৰাইলৰ আক্ৰমণত মৃত্যু হৈছিল। এই আক্ৰমণৰ পিছত ইৰাণেও তীব্ৰ প্ৰত্যাক্ৰমণ চলাইছিল।

যাৰ ফলত সমগ্ৰ মধ্য প্ৰাচ্যতে অশান্তিয়ে বিৰাজ কৰিছিল। ইয়াৰ উপৰিও বিশ্বৰ তেল আৰু গেছ যোগানৰ এক গুৰুত্বপূৰ্ণ পথ ‘হৰমুজ প্ৰণালী’ বন্ধ হৈ পৰিছিল। এতিয়া এখন শান্তি চুক্তিৰ পৰিৱেশ সৃষ্টি হোৱাত যোগান ব্যৱস্থা পুনৰ আৰম্ভ হৈছে। কিন্তু ড’নাল্ড ট্ৰাম্পে এতিয়াও একেৰাহে ভাবুকি দি থকা পৰিলক্ষিত হৈছে।

লগতে পঢ়ক: ‘আমি ভাল মানুহ, গতিকে এদিনৰ ৰেহাই দিলোঁ’; খামেইনীৰ শ্ৰদ্ধাঞ্জলি অনুষ্ঠানক লৈ ট্ৰাম্পৰ কটাক্ষ

ইৰাণৰ প্ৰয়াত উচ্চতম নেতা আয়াতুল্লাহ খামেইনীৰ জানাজাত অংশগ্ৰহণ কৰিবলৈ সমগ্ৰ বিশ্বৰ নেতাসকল উপস্থিত হৈছে। তেওঁক শ্ৰদ্ধাঞ্জলি জনাবলৈ কেইবাগৰাকীও ভাৰতীয় ৰাজনীতিবিদ আৰু ধৰ্মগুৰুও তেহৰানত উপস্থিত হৈছে ।

তেহৰানত ইৰাণৰ প্ৰাক্তন উচ্চতম নেতা আয়াতুল্লাহ আলী খামেইনীক শ্ৰদ্ধাঞ্জলি জ্ঞাপন কৰা হয়। ইয়াৰ বাবে ভাৰত চৰকাৰৰ তৰফৰ পৰাও এটা প্ৰতিনিধি দল ইৰাণত উপস্থিত হয়। এই দলটোত বিহাৰৰ ৰাজ্যপাল লেফটিনেণ্ট জেনেৰেল (অৱসৰপ্ৰাপ্ত) চৈয়দ আতা হাছনৈন আৰু বৈদেশিক পৰিক্ৰমা ৰাজ্যিক মন্ত্ৰী (MoS) পবিত্ৰ মাৰ্ঘেৰিটা অন্তৰ্ভুক্ত আছিল। ইৰাণৰ তৰফৰ পৰা বিজেপি আৰু কংগ্ৰেছলৈ অন্ত্যেষ্টিক্ৰিয়াৰ নিমন্ত্ৰণী পত্ৰ প্ৰেৰণ কৰা হৈছিল। কংগ্ৰেছৰ হৈ প্ৰাক্তন বৈদেশিক পৰিক্ৰমা মন্ত্ৰী চলমান খুৰ্ছিদ আৰু সাংসদ পৱন খেৰা তাত উপস্থিত থাকে। ইয়াৰ লগতে জম্মু-কাশ্মীৰৰ প্ৰাক্তন মুখ্যমন্ত্ৰী তথা পিডিপি (PDP) প্ৰধান মেহবুবা মুফতী আৰু জম্মু-কাশ্মীৰ আঞ্জুমান-এ-শৰী শ্বিয়ানৰ সভাপতি আগা চৈয়দ হাছান মোচাৱী আল চাফাৱীও তাত উপস্থিত হয়।

উল্লেখ্য যে খামেইনীৰ নশ্বৰ দেহ অন্তিম দৰ্শনৰ বাবে তেহৰানৰ ইমাম খোমেনী গ্ৰেণ্ড মছজিদত ৰখা হৈছে। ২০২৬ চনৰ ৯ জুলাইত তেওঁৰ গৃহচহৰ মাশ্বহাদত তেওঁৰ জানাজা সম্পন্ন হ’ব। ইৰাণৰ প্ৰয়াত উচ্চতম নেতা আয়াতুল্লাহ খামেইনীক শ্ৰদ্ধাঞ্জলি জনাবলৈ বিশ্বৰ বিভিন্ন দেশৰ প্ৰধান নেতাসকল তেহৰানৰ গ্ৰেণ্ড মোচাল্লাত (প্ৰাৰ্থনা গৃহ) উপস্থিত হৈছে। ভাৰতৰ পৰা ৰাজনীতিবিদসকলৰ উপৰিও কেইবাটাও ধৰ্মৰ ধৰ্মীয় নেতায়ো তেহৰানত উপস্থিত হৈছে।

ইৰানী সংবাদ মাধ্যমে শ্বেয়াৰ কৰা ভিডিঅ’সমূহত খামেইনীৰ মৃতদেহ থকা কফিনটো ক’ত ৰখা হৈছে, সেয়া স্পষ্টকৈ দেখুওৱা হৈছে। আনহাতে, ভাৰতৰ হিন্দু, মুছলিমকে ধৰি শিখ ধৰ্মগুৰুসকলেও তাত প্ৰাৰ্থনা জনাইছে। ভাৰতত থকা ইৰাণৰ  দূতবােস  নিজৰ এক্স হেণ্ডেলত শ্ৰদ্ধাঞ্জলি সম্পৰ্কীয় কেইবাখনো ছবি আৰু ভিডিঅ’ শ্বেয়াৰ কৰিছে। নিজৰ প্ৰয়াত নেতাজনক অন্তিম বিদায় দিবলৈ তেহৰানত অজস্ৰ লোকৰ সমাৱেশ ঘটিছে। জনসাধাৰণে ক’লা কাপোৰ পিন্ধি, হাতত ইৰাণৰ পতাকা জোকাৰি আৰু শ্ল’গান দি ৰাজপথত সমদল কৰিছে। খামেইনীৰ নশ্বৰ দেহ শুকুৰবাৰে (৩ জুলাই ২০২৬) পুৱা তেহৰানৰ গ্ৰেণ্ড মোচাল্লাত ৰখা হয়। আনহাতে, তেওঁৰ কফিনটো ইমাম হুছেইনৰ দৰগাহৰ পৰা অনা এখন পবিত্ৰ ৰঙা পতাকাৰে ঢাকি দিয়া হৈছে। ইৰাণ চৰকাৰৰ মতে, এইখন প্ৰতিৰোধ, ত্যাগ আৰু সত্যৰ প্ৰতীক। খামেইনীৰ অন্ত্যেষ্টিক্ৰিয়াৰ প্ৰক্ৰিয়া ৪-৯ জুলাই ২০২৬ লৈকে চলিব। ইৰাণ আৰু ইৰাকৰ প্ৰধান চহৰ কোম, তেহৰান, কৰবালা আৰু নাজাফত এই প্ৰক্ৰিয়া সম্পূৰ্ণ কৰা হ’ব।

উল্লেখ্য যে ২০২৬ চনৰ ২৮ ফেব্ৰুৱাৰীত আমেৰিকা আৰু ইজৰাইলৰ যৌথ আক্ৰমণত খামেইনীৰ নিহত হৈছিল। দুয়োখন দেশৰ পৰা অহা ভাবুকিৰ বাবে ইৰাণে খামেইনীৰ অন্ত্যেষ্টিক্ৰিয়া পিছুৱাই দিছিল।

লগতে পঢ়ক: ভূমিকম্পৰ পাছত আকাশৰ এই ৰূপ দেখি স্তব্ধ হৈ পৰিল সকলো!

হৰমুজত এখন বাণিজ্যিক জাহাজত ড্ৰোন আক্ৰমণৰ পিছতে ইৰাণৰ বিৰুদ্ধে প্ৰতিশোধমূলক সামৰিক ব্যৱস্থা গ্ৰহণ কৰিছে আমেৰিকাই।

মধ্য প্ৰাচ্যত পুনৰ উত্তেজনা চৰম সীমাত উপনীত হৈছে। হৰমুজ প্ৰণালীত এখন বাণিজ্যিক জাহাজত ড্ৰোন আক্ৰমণৰ পিছত আমেৰিকাই ইৰাণৰ বিৰুদ্ধে এক বৃহৎ সামৰিক পদক্ষেপ গ্ৰহণ কৰিছে। আমেৰিকাৰ চেণ্ট্ৰেল কমাণ্ডৰ দাবী অনুসৰি, তেওঁলোকে ইৰাণৰ বহুকেইটা সামৰিক ঘাটিত প্ৰত্যুত্তৰস্বৰূপে বিমান আক্ৰমণ চলাইছে। আমেৰিকাৰ মতে, বাণিজ্যিক জাহাজখনত হোৱা আক্ৰমণৰ প্ৰত্যুত্তৰ হিচাপে এই ব্যৱস্থা লোৱা হৈছে।

CENTCOM-এ সামাজিক মাধ্যম প্লেটফৰ্ম ‘এক্স’ত প্ৰকাশ কৰা এক বিবৃতিত কয় যে ২৬ জুনত আমেৰিকান সেনাই ইৰাণৰ বিৰুদ্ধে এই প্ৰত্যুত্তৰমূলক আক্ৰমণ চলায়। বিবৃতি অনুসৰি, ২৫ জুনত হৰমুজ প্ৰণালীৰ পৰা ওমান উপকূলৰ সমীপৱৰ্তী অঞ্চলত পাৰ হৈ যোৱা এখন বাণিজ্যিক জাহাজক লক্ষ্য কৰি চলোৱা আক্ৰমণৰ প্ৰতিক্ৰিয়া স্বৰূপে এই ব্যৱস্থা লোৱা হৈছে।

আমেৰিকান সেনাই জনোৱা মতে, তেওঁলোকে ইৰাণৰ মিছাইল আৰু ড্ৰোন সংৰক্ষণ কেন্দ্ৰৰ লগতে উপকূলীয় ৰাডাৰ ঘাটিসমূহতো আক্ৰমণ চলাইছে। আমেৰিকাৰ তথ্য অনুসৰি, ছিংগাপুৰৰ পতাকা অংকিত মালবাহী জাহাজ ‘এম/ভি এভাৰ লাভলী’ (M/V Ever Lovely) যেতিয়া হৰমুজ প্ৰণালীৰ পৰা ওলাই আছিল, তেতিয়া ইয়াক এখন একপক্ষীয় আক্ৰমণকাৰী ড্ৰোনেৰে লক্ষ্য কৰি লোৱা হৈছিল। CENTCOM-এ কয় যে বাণিজ্যিক জাহাজখনৰ ওপৰত ইৰাণী বাহিনীৰ এই আক্ৰমণ সম্পূৰ্ণৰূপে অপ্ৰৰোচিত আৰু এয়া যুদ্ধবিৰতি চুক্তিৰ স্পষ্ট উলংঘন।

CENTCOM-এ লগতে কয় যে আমেৰিকান সেনাই হৰমুজ প্ৰণালীৰে পাৰ হৈ যোৱা বাণিজ্যিক জাহাজসমূহৰ বাবে সুৰক্ষিত পথ নিশ্চিত কৰিবলৈ আৰু সমন্বয় ৰক্ষা কৰিবলৈ কাম কৰি যাব। আমেৰিকাই কয় যে ইৰাণৰ সৈতে হোৱা চুক্তিৰ সম্পূৰ্ণ পৰিপালন নিশ্চিত কৰিবলৈ তেওঁলোকৰ সেনা উক্ত অঞ্চলত সম্পূৰ্ণ সতৰ্ক অৱস্থাত মোতায়েন হৈ আছে।

আন্তঃৰাষ্ট্ৰীয় সামুদ্ৰিক সংগঠনে (IMO) পাৰস্য উপসাগৰত আৱদ্ধ জাহাজসমূহৰ প্ৰস্থান সাময়িকভাৱে বন্ধ কৰি দিছে। সংগঠনে জনাইছে যে আন জাহাজসমূহৰ সুৰক্ষাৰ গেৰাণ্টি নোপোৱালৈকে প্ৰস্থান প্ৰক্ৰিয়া পুনৰ আৰম্ভ কৰা নহ’ব। IMO-ৰ সচিব প্ৰধান আৰ্চেনিঅ’ ডমিংগুৱেজৰ মতে, শেহতীয়া দিনবোৰত প্ৰায় ১১৫ খন জাহাজে প্ৰণালীটো পাৰ হৈ গৈছে, আনহাতে প্ৰায় ৫০০ খন জাহাজ এতিয়াও সেই অঞ্চলত উপস্থিত আছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইয়াৰ পূৰ্বে হৰমুজ প্ৰণালীত মালবাহী জাহাজত হোৱা আক্ৰমণক যুদ্ধবিৰতি চুক্তিৰ এক মূৰ্খামিভৰা উলংঘন বুলি অভিহিত কৰে। ট্ৰাম্পে ‘ট্ৰুথ ছ’চিয়েল’ত লিখে যে জাহাজখনৰ ফালে নিক্ষেপ কৰা চাৰিটা ড্ৰোনৰ ভিতৰত এটাই তাৰ ওপৰৰ অংশত ক্ষতিসাধন কৰে, কিন্তু জাহাজখনে তাৰ যাত্ৰা অব্যাহত ৰখাত সফল হয়। তেওঁ কয় যে আমেৰিকান সেনাই বাকী তিনিটা ড্ৰোন গুলীয়াই মাৰিবলৈ সক্ষম হয়।

শুক্ৰবাৰে অ’ভেল অফিচত সাংবাদিকৰ সৈতে হোৱা কথা-বতৰাৰ সময়ত ট্ৰাম্পক প্ৰশ্ন কৰা হৈছিল যে শেহতীয়া ড্ৰোন আক্ৰমণৰ পিছত ইৰাণে কিবা পৰিণাম ভুগিব লাগিব নেকি। ইয়াৰ উত্তৰত তেওঁ কয়, “আপোনালোকে অতি সোনকালেই জানিব পাৰিব।” ট্ৰাম্পে কয় যে ইৰাণে জাহাজখনত আক্ৰমণ কৰাৰ প্ৰচেষ্টা চলোৱাটো তেওঁৰ মুঠেই ভাল লগা নাই। তেওঁ কয়, “তেওঁলোকে চাৰিটা ড্ৰোন পঠিয়াইছিল, তাৰে তিনিটা আমি ধ্বংস কৰিলো। তেওঁলোকে এনে কৰা উচিত নাছিল। এতিয়া আগলৈ কি হ’ব, সেয়া আপোনালোকে অতি সোনকালে জানিব পাৰিব।”

লগতে পঢ়ক: হৰমুজ প্ৰণালীৰ মাজেৰে পাৰ হৈ যোৱা জাহাজত ইৰাণৰ ড্ৰ’ন আক্ৰমণ; ট্ৰাম্পৰ পুনৰ সতৰ্কবাণী

IRGC নৌসেনাই বাণিজ্যিক জাহাজসমূহক সকীয়াই দিছে যে যাতে তেওঁলোকে কেৱল তেহৰানে অনুমোদন জনোৱা হৰমুজ প্ৰণালীৰ পথসমূহহে ব্যৱহাৰ কৰে।

ইৰাণৰ সংবাদ মাধ্যম ‘প্ৰেছ টিভি’ৰ বাতৰি অনুসৰি, ইছলামিক ৰিভলিউশ্যনেৰী গাৰ্ড কৰ্পছ (IRGC) নৌসেনাই জাহাজসমূহক কেৱল অনুমোদিত পথেৰেহে হৰমুজ প্ৰণালী পাৰ হ’বলৈ সতৰ্ক কৰি দিছে। তেওঁলোকে কয় যে ইৰাণে নিৰ্ধাৰণ কৰি দিয়া পথৰ বাহিৰে অন্য পথেৰে পাৰ হোৱা যিকোনো যাতায়তৰ বিৰুদ্ধে বলপূৰ্বক ব্যৱস্থা গ্ৰহণ কৰা হ’ব পাৰে। প্ৰেছ টিভিৰ মতে, IRGC নৌসেনাই জানিবলৈ দিয়ে যে “কিছুমান কৰ্তৃপক্ষই” তেহৰাণৰ সৈতে কোনো আলোচনা নকৰাকৈয়ে এই কৌশলগত জলপথটোত এটা নতুন সামুদ্ৰিক যাতায়ত পথ ঘোষণা কৰিছে।

IRGC নৌসেনাই কয়, “কিছুমান কৰ্তৃপক্ষই ইছলামিক প্ৰজাতন্ত্ৰ ইৰাণক কোনো পূৰ্বসূচনা বা সমন্বয় নকৰাকৈ হৰমুজ প্ৰণালীৰ মাজেৰে এটা নতুন জাহাজ চলাচলৰ পথ ঘোষণা কৰিছে। এই প্ৰস্তাৱিত পথটো গ্ৰহণযোগ্য নহয় আৰু ই গুৰুতৰ নিৰাপত্তা বিপদাশংকাৰ সৃষ্টি কৰে।”

তেওঁলোকে জোৰ দি কয় যে কেৱল ইৰাণে অনুমোদন কৰা পথেৰেহে এই প্ৰণালীৰে পাৰ হ’বলৈ বৈধ। তেওঁলোকে কয়, “হৰমুজ প্ৰণালীৰ মাজেৰে যাতায়তৰ একমাত্ৰ অনুমোদিত পথসমূহ হৈছে ইছলামিক প্ৰজাতন্ত্ৰ ইৰাণে নিৰ্ধাৰণ কৰা পথসমূহ। এই পথসমূহৰ বাহিৰত জাহাজ চলাচল কৰাটো নিষিদ্ধ আৰু অত্যন্ত বিপজ্জনক। সকলো জাহাজকে নিৰ্ধাৰিত কৰিডৰৰ বাহিৰত যিকোনো ধৰণৰ চলাচল পৰিহাৰ কৰিবলৈ কঠোৰভাৱে পৰামৰ্শ দিয়া হৈছে।”

IRGC নৌসেনাই লগতে কয় যে এই জলপথেৰে যোৱা জাহাজসমূহে ইৰাণৰ কৰ্তৃপক্ষৰ সৈতে যোগাযোগ বজাই ৰাখিব লাগিব। বিবৃতিত যোগ কৰা হৈছে, “হৰমুজ প্ৰণালী পাৰ হ’বলৈ ‘চেনেল ১৬’ (Channel 16) ৰ জৰিয়তে IRGC নৌসেনাৰ সৈতে সমন্বয় কৰাটো বাধ্যতামূলক। যিকোনো জাহাজে এই নিয়ম উলংঘা কৰিলে তাৰ বিৰুদ্ধে আইনী বা বলপূৰ্বক ব্যৱস্থা গ্ৰহণ কৰা হ’ব।”

হৰমুজ প্ৰণালীৰ নিয়ন্ত্ৰণক লৈ ওমানে দিয়া এক বক্তব্যৰ প্ৰতিক্ৰিয়া স্বৰূপে IRGC ৰ এই বিবৃতিটো আহিছে। বুধবাৰে ওমানৰ তৰফৰ পৰা কোৱা হৈছিল যে আন্তৰ্জাতিক সামুদ্ৰিক সংস্থা (IMO) ৰ সৈতে সমন্বয় ৰাখি তেওঁলোকে হৰমুজ প্ৰণালীত এটা জাহাজ যাতায়ত কৰিডৰ প্ৰদান কৰি আছে।

চুলতানেটে (ওমান চৰকাৰ) কয় যে আমেৰিকা যুক্তৰাষ্ট্ৰ আৰু ইৰাণৰ মাজত হোৱা প্ৰচেষ্টা আৰু বুজাপৰাৰ ফলাফলৰ সৈতে সংগতি ৰাখি, কোনো ধৰণৰ যাতায়ত মাচুল নোলোৱাকৈ এই প্ৰণালীত নৌ-চলাচলৰ স্বাধীনতা নিশ্চিত কৰিবলৈ এই পদক্ষেপ লোৱা হৈছে। ওমানে আন্তৰ্জাতিক সামুদ্ৰিক সংস্থা (IMO) ৰ সৈতে মিলি সকলো জাহাজৰ বাবে IMO-এ ঘোষণা কৰা স্থানাংক অনুসৰি এটা সাময়িক সামুদ্ৰিক কৰিডৰ ব্যৱহাৰ কৰাৰ বিকল্প প্ৰদান কৰিছে, য’ত যাতায়ত কৰিব বিচৰা জাহাজসমূহে আন্তৰ্জাতিক সামুদ্ৰিক সংস্থাৰ সৈতে সমন্বয় কৰিব লাগিব।

ইয়াৰ পূৰ্বে বুধবাৰে, আমেৰিকাৰ ৰাষ্ট্ৰপতি ড’নাল্ড ট্ৰাম্পে কৈছিল যে যদি ইৰাণ চুক্তিত হৰমুজ প্ৰণালীত জাহাজ চলাচল বা সামুদ্ৰিক কাৰ্যকলাপৰ ওপৰত কোনো ধৰণৰ মাচুল অন্তৰ্ভুক্ত কৰা হয়, তেন্তে সেয়া তেওঁৰ বাবে ‘অগ্ৰহণযোগ্য’ হ’ব।

লগতে পঢ়ক: ড’নাল্ড ট্ৰাম্পৰ মোক্ষম আঘাত; আমেৰিকাৰ কংগ্ৰেছত ইৰাণৰ বিৰুদ্ধে যুদ্ধ বন্ধ কৰাৰ প্ৰস্তাৱ গৃহীত