ভাৰতীয় মূলৰ আন এজন ব্যক্তিয়ে আমেৰিকাত লাভ কৰিছে গুৰুত্বপূৰ্ণ তথা ডাঙৰ দায়িত্ব । আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে কাশ পেটেল (Kash Patel)ক এফ বি আই (FBI)ৰ সঞ্চালক হিচাপে মনোনীত কৰিছে । শনিবাৰে (৩০ নৱেম্বৰ, ২০২৪) ছ’চিয়েল মিডিয়া প্লেটফৰ্মত ট্ৰাম্পে লিখিছে যে কাশ্যপ ‘কাশ’ পেটেলে ফেডাৰেল ব্যুৰো অৱ ইনভেষ্টিগেশ্যন (এফ বি আই)ৰ পৰৱৰ্তী সঞ্চালক হিচাপে কাৰ্যনিৰ্বাহ কৰিব বুলি ঘোষণা কৰি গৌৰৱ অনুভৱ কৰিছো ।
ড’নাল্ড ট্ৰাম্পে আৰু লিখিছে, ‘কাশ এজন মেধাৱী অধিবক্তা, অনুসন্ধানকাৰী আৰু ‘আমেৰিকা ফাৰ্ষ্ট’ যোদ্ধা যিয়ে দুৰ্নীতিৰ উন্মোচন, ন্যায় ৰক্ষা আৰু আমেৰিকাৰ জনসাধাৰণক সুৰক্ষা প্ৰদান কৰি নিজৰ কেৰিয়াৰ অতিবাহিত কৰিছে ।‘
এফ বি আইৰ কামৰ ধৰণক লৈ ট্ৰাম্প ক্ষুব্ধ নেকি ?
এই নতুন নিযুক্তিয়ে ট্ৰাম্পৰ দৃষ্টিভংগী দেখুৱাইছে য’ত তেওঁ চৰকাৰৰ আইন প্ৰয়োগকাৰী আৰু চোৰাংচোৱা সংস্থাসমূহৰ পৰিৱৰ্তন প্ৰয়োজনীয় বুলি বিবেচনা কৰিছে । এই পৰিৱৰ্তনে এইটোও দেখুৱাইছে যে ট্ৰাম্প এতিয়াও এফ বি আইৰ কামৰ ধৰণক লৈ ক্ষুব্ধ । আচলতে তেওঁৰ অভিযোগনামাৰ কাৰণ আছিল এফ বি আই নিজেই ।
ক্রিষ্টোফাৰ ৰেৰ ঠাই লব কাশ পেটেলে-
যদিহে পেটেলক নিযুক্তি দিয়া হয় তেন্তে তেওঁ ২০১৭ চনত ট্ৰাম্পে নিযুক্তি দিয়া ক্রিষ্টোফাৰ ৰেৰ ঠাই ল’ব । যিজনে ট্রাম্প আৰু তেওঁৰ মিত্রশক্তিৰ বিৰুদ্ধাচাৰণ কৰিবলৈ আৰম্ভ কৰিছিল ৷ যদিও এফ বি আইৰ মুৰব্বী পদৰ কাৰ্যকাল ১০ বছৰ, কিন্তু ট্ৰাম্পে তেওঁক আৰু এফ বি আইক লৈ দীৰ্ঘদিন ধৰি ৰাজহুৱা সমালোচনা কৰাৰ পৰিপ্ৰেক্ষিতত যোৱা কেইদিনমানৰ পৰা তেওঁক পদৰ পৰা অপসাৰণৰ বিষয়ে জল্পনা-কল্পনা চলি আছিল ।
