দিল্লী আবকাৰী নীতিৰ গোচৰত আপ নেতা মনীষ ছিছ’দিয়াক উচ্চতম ন্যায়ালয়ে ডাঙৰ সকাহ দিছে । উচ্চতম ন্যায়ালয়ে তেওঁৰ জামিনৰ চৰ্ত শিথিল কৰিছে । জামিনৰ চৰ্ত অনুসৰি দুৰ্নীতি আৰু ধন সৰবৰাহৰ সৈতে জড়িত গোচৰত তেওঁ সপ্তাহত দুবাৰকৈ তদন্তকাৰী বিষয়াৰ সন্মুখত হাজিৰ হ’বলগীয়া হৈছিল । এতিয়া উচ্চতম ন্যায়ালয়ত ন্যায়াধীশ বি আৰ গাৱৈ আৰু কে ভি বিশ্বনাথনৰ বিচাৰপীঠে কয় যে এইটো প্ৰয়োজনীয় নহয় । আদালতত গোচৰৰ শুনানিত তেওঁ নিয়মিতভাৱে উপস্থিত থাকিব ।
২২ নৱেম্বৰত উচ্চতম ন্যায়ালয়ে জামিনৰ চৰ্তত শিথিলতা বিচাৰি আম আদমি পাৰ্টিৰ নেতা মনীষ ছিছ’দিয়াৰ আবেদনৰ শুনানিৰ বাবে অনুমোদন জনাইছিল । আদালতে চি বি আই আৰু বলবৎকাৰী সঞ্চালকালয় (ইডি)ক জাননী জাৰি কৰি তেওঁলোকৰ সঁহাৰি বিচাৰিছিল । ইয়াৰ পূৰ্বে ৯ আগষ্টত উচ্চতম ন্যায়ালয়ে আবকাৰী নীতিৰ সৈতে জড়িত দুৰ্নীতি আৰু ধন সৰবৰাহৰ গোচৰত ছিছ’দিয়াক জামিন প্ৰদান কৰিছিল ।
এই সময়ছোৱাত আদালতে কৈছিল যে ছিছ’ডিয়াক ১৭ মাহ ধৰি জিম্মাত ৰখা হৈছে আৰু এতিয়াও বিচাৰ আৰম্ভ হোৱা নাই, যাৰ বাবে তেওঁ ক্ষিপ্ৰ বিচাৰৰ অধিকাৰৰ পৰা বঞ্চিত হৈছিল । শীৰ্ষ ন্যায়ালয়ৰ চৰ্ত অনুসৰি প্ৰতি সপ্তাহত সোমবাৰ আৰু বৃহস্পতিবাৰে পুৱা ১০ৰ পৰা ১১ বজাৰ ভিতৰত তেওঁ তদন্তকাৰী বিষয়াৰ ওচৰত ৰিপৰ্ট দিব লাগিব । ২২ নৱেম্বৰত অনুষ্ঠিত শুনানিৰ সময়ত মনীষ ছিছ’দিয়াৰ হৈ হাজিৰ হোৱা জ্যেষ্ঠ অধিবক্তা অভিষেক সিংভীয়ে কৈছিল যে আপ নেতাগৰাকীয়ে তদন্তকাৰী বিষয়াৰ সন্মুখত ৬০ বাৰ হাজিৰ হৈছিল ।
ঘটনাটো কি আছিল-
এতিয়া বাতিল কৰা দিল্লী আবকাৰী নীতি ২০২১-২২ প্ৰণয়নত জড়িত থকাৰ লগতে ইয়াৰ কাৰ্যকৰীকৰণত অনিয়ম সংঘটিত হোৱাৰ অভিযোগত গ্ৰেপ্তাৰ হৈছিল ছিছ’দিয়া । ইয়াৰ পূৰ্বে ২০২৩ চনৰ ২৬ ফেব্ৰুৱাৰীত কেন্দ্ৰীয় তদন্তকাৰী সংস্থাই গ্ৰেপ্তাৰ কৰিছিল তেওঁক । পিছলৈ বলবৎকাৰী সঞ্চালকালয় অৰ্থাৎ ইডিয়েও বহু ভিন্ন অভিযোগত ছিছ’দিয়াক চমন কৰিছিল । ২০২৩ চনৰ ২৮ ফেব্ৰুৱাৰীত তেওঁ দিল্লী কেবিনেটৰ পৰা পদত্যাগ কৰে । অৱশ্যে ছিছ’দিয়াই এই অভিযোগ অস্বীকাৰ কৰিছে ।
