বৰ্তমান সময়ত ছ’চিয়েল মিডিয়াত এআইৰ দ্বাৰা নিৰ্মিত ঘিবলী কাৰ্টুন ট্ৰেণ্ডিং হৈ আছে, য’ত মানুহে নিজৰ ব্যক্তিগত ফটো আপলোড কৰি এনিমেচনলৈ ৰূপান্তৰিত কৰিছে।
অৱশ্যে গোৱা আৰক্ষীয়ে এই ঘিবলী ট্ৰেণ্ডিং সন্দৰ্ভত ব্যৱহাৰকাৰীসকলক সাৱধান হ’বলৈ পৰামৰ্শ দিছে। আৰক্ষীয়ে ছ’চিয়েল মিডিয়া প্লেটফৰ্ম ‘এক্স’ত পোষ্ট কৰি কয় যে সকলো এআই এপেই ব্যৱহাৰকাৰীৰ গোপনীয়তা সুৰক্ষিত নকৰে।
কোনো অচিনাকি AI এপত নিজৰ ব্যক্তিগত ফটো আপলোড কৰাৰ আগতে সাৱধানতা অৱলম্বন কৰিব লাগে।
এআই ভিত্তিক ইমেজ জেনেৰেচন এপসমূহে প্ৰায়ে ব্যৱহাৰকাৰীৰ ফটো আৰু ডাটা সংৰক্ষণ কৰে, যাৰ অপব্যৱহাৰ হ’ব পাৰে।
বহুতো বিনামূলীয়া এআই এপে ব্যৱহাৰকাৰীৰ ছবি তেওঁলোকৰ সন্মতি অবিহনে সংৰক্ষণ কৰিব পাৰে, তৃতীয় পক্ষক বিক্ৰী কৰিব পাৰে, বা ডিপফেকৰ দৰে বিপজ্জনক প্ৰযুক্তিত ব্যৱহাৰ কৰিব পাৰে।
এনে গোপনীয়তাৰ চিন্তাৰ বাবে গোৱা আৰক্ষীয়ে মানুহক কেৱল বিশ্বাসযোগ্য এআই এপ ব্যৱহাৰ কৰিবলৈ পৰামৰ্শ দিছে।
Ghibli কাৰ্টুন হৈছে এক বিশেষ এনিমেচন, যাক জাপানী এনিমেচন কিংবদন্তি হায়াও মিয়াজাকিয়ে জনপ্ৰিয় কৰিলে। এই শৈলীত নিৰ্মিত এআই-প’ৰ্ট্ৰেইট ছ’চিয়েল মিডিয়াত যথেষ্ট ভাইৰেল হৈ পৰিছে।
OpenAI এ শেহতীয়াকৈ ChatGPT ৰ Jibli-শৈলী AI ইমেজ জেনেৰেটৰ মুকলি কৰাৰ পিছত এই ধাৰাটোৱে গতি লাভ কৰিছে।
মানুহে নিজৰ স্বাভাৱিক ফটোবোৰ এআই ব্যৱহাৰ কৰি হাস্যৰসময়ী কাৰ্টুনলৈ ৰূপান্তৰিত কৰি শ্বেয়াৰ কৰিছে। কিন্তু ইয়াৰ ফলত ডাটা চুৰি আৰু গোপনীয়তা ভংগৰ আশংকাও বৃদ্ধি পায়।
AI app ব্যৱহাৰ কৰাৰ আগতে এই সাৱধানতা সমূহ অৱলম্বন কৰক
কেৱল বিশ্বাসযোগ্য আৰু জনপ্ৰিয় AI এপ ব্যৱহাৰ কৰক।
এপটোৰ গোপনীয়তা নীতি ভালদৰে পঢ়ক আৰু তেওঁলোকে আপোনাৰ ডাটা কেনেকৈ ব্যৱহাৰ কৰিছে চাওক।
অজ্ঞাত বা নতুন AI ৱেবছাইটত নিজৰ ফটো আপলোড নকৰিব।
যদি কোনো এপে আপোনাৰ ফটোত অপ্ৰয়োজনীয় প্ৰৱেশৰ বাবে কয়, তেন্তে ইয়াক ব্যৱহাৰ নকৰিব।
এআই প্ৰযুক্তিৰ ব্যৱহাৰ বৃদ্ধি পোৱাৰ লগে লগে মানুহে নিজৰ গোপনীয়তা আৰু ডিজিটেল সুৰক্ষাৰ প্ৰতি অধিক সতৰ্ক হোৱাৰ প্ৰয়োজন।
AI ভিত্তিক এপসমূহ ব্যৱহাৰ কৰাৰ সময়ত, নিশ্চিত কৰক যে আপোনাৰ ডাটা সুৰক্ষিত হৈ থাকে আৰু আপুনি কোনো ভুৱা বা সন্দেহজনক প্লেটফৰ্মৰ যাতে বলি নহয়।
