আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছে ৰবিচন্দ্ৰন অশ্বিনে । অশ্বিনে টিম ইণ্ডিয়াৰ হৈ অল ৰাউণ্ডাৰৰ ভূমিকা পালন কৰি আহিছে । টেষ্টৰ লগতে এদিনীয়া ক্ৰিকেটতো তেওঁ নিজৰ প্ৰতিভা প্ৰদৰ্শন কৰিছে । ভাৰত আৰু অষ্ট্ৰেলিয়াৰ মাজত অনুষ্ঠিত তৃতীয়খন টেষ্ট খেলৰ অন্তত অশ্বিনে আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰে । কিন্তু আন্তঃৰাষ্ট্ৰীয় ক্ৰিকেটত অশ্বিনৰ শেষ চিকাৰ কোন হ’ল জানেনে ?
অশ্বিনে অন্তিমখন এদিনীয়া মেচ চেন্নাইত অষ্ট্ৰেলিয়াৰ বিৰুদ্ধে খেলিছিল । এই মেচখন ২০২৩ চনৰ অক্টোবৰ মাহত অনুষ্ঠিত হৈছিল । শেষৰখন টি-২০ আন্তঃৰাষ্ট্ৰীয় মেচ ২০২২ চনত ইংলেণ্ডৰ বিৰুদ্ধে অনুষ্ঠিত হৈছিল । শেষৰখন টেষ্টত অষ্ট্ৰেলিয়াৰ বিৰুদ্ধে এডিলেইডত খেলিছিল অশ্বিনে । এই খেলখন চলিত বৰ্ষৰ ৬ ডিচেম্বৰৰ পৰা অনুষ্ঠিত হৈছিল ।
কোন আছিল অশ্বিনৰ শেষ আন্তঃৰাষ্ট্ৰীয় চিকাৰ-
এডিলেইডত অষ্ট্ৰেলিয়াৰ বিৰুদ্ধে অন্তিমটো আন্তঃৰাষ্ট্ৰীয় উইকেট দখল কৰিছিল অশ্বিনে । ভাৰত আৰু অষ্ট্ৰেলিয়াৰ মাজত খেলা দ্বিতীয়খন টেষ্টত তেওঁ মিচেল মাৰ্ছক আউট কৰে । প্ৰথম ইনিংছত অষ্ট্ৰেলিয়াৰ হৈ বেটিং কৰিবলৈ আহিছিল মাৰ্ছ । ব্যক্তিগতভাৱে ৯ ৰানৰ স্ক’ৰত আউট হৈছিল তেওঁ । ঋষভ পন্টে এই কেচ লৈছিল । এই টেষ্টৰ পিছত ব্রিছবেনত খেলা নাছিল অশ্বিনে ৷ তেওঁ টিম ইণ্ডিয়াৰ মূল একাদশৰ অংশ নাছিল ।
অশ্বিনৰ নামত বহুতো অভিলেখ-
টেষ্টত সৰ্বাধিক প্লেয়াৰ অৱ দ্য ছিৰিজৰ বঁটা লাভ কৰা খেলুৱৈগৰাকী হৈছে অশ্বিন । ইয়াৰ লগতে টেষ্টত সৰ্বাধিক উইকেট লোৱাৰ ক্ষেত্ৰত তেওঁ ৭ম স্থানত আছে । ভাৰতীয় বলাৰৰ তালিকাত তেওঁ দ্বিতীয় স্থানত আছে । একেখন টেষ্ট ইনিংছত শতক অৰ্জন কৰাৰ লগতে ৫টা উইকেট দখল কৰিছে অশ্বিনে । টিম ইণ্ডিয়াৰ অল ৰাউণ্ডাৰ ৰবীন্দ্ৰ জাডেজাইও এই অভিলেখ গঢ়িছে । অশ্বিনে টেষ্টত ৫৩৭টা আৰু এদিনীয়াত ১৫৬টা উইকেট দখল কৰিছে ।
