আজিৰে পৰা বছৰৰ শেষৰটো মাহ আৰম্ভ হৈছে । অৰ্থাৎ ২০২৪ বৰ্ষটো এতিয়া কেইদিনমানৰ অতিথি । ২০২৪ বৰ্ষটোৱে এতিয়া আমাৰ মাজৰ পৰা বিদায় লোৱাৰ সময় সমাগত । যদি আপুনি বছৰৰ শেষৰ কেইটামান দিনক স্মৰণীয় কৰি তুলিব বিচাৰে আৰু এই পাৰ হৈ যোৱা বছৰটোক স্মৰণীয়ভাৱে বিদায় দিব বিচাৰে, তেন্তে আপুনি নাগালেণ্ডলৈ ৰাওনা হ’ব পাৰে ।
কাৰণ আজিৰে পৰা অৰ্থাৎ ১ ডিচেম্বৰৰ পৰা নাগালেণ্ডত আৰম্ভ হ’ব ‘হৰ্ণবিল ফেষ্টিভেল ২০২৪’ । এইবাৰ হৰ্ণবিল ফেষ্টিভেলে ২৫ বছৰ সম্পূৰ্ণ কৰিছে । এই উৎসৱ ভাৰতৰ অন্যতম জনপ্ৰিয় তথা ৰঙীন উৎসৱ বুলি গণ্য কৰা হয়, য’ত পৰিস্ফুট হয় নাগালেণ্ডৰ লগতে উত্তৰ-পূৰ্বাঞ্চলৰ স্বকীয় ঐতিহ্য ।
ৰূপালী জয়ন্তীত হৰ্ণবিল উৎসৱ-
এইবাৰ হৰ্ণবিল উৎসৱে ৰূপালী জয়ন্তী বৰ্ষত পদাৰ্পণ কৰিছে । অৰ্থাৎ এইবাৰৰ উদযাপন আন বছৰৰ তুলনাত অধিক দৰ্শনীয় হ’বলৈ গৈ আছে । ২০০০ চনত যেতিয়া হৰ্ণবিল উৎসৱ আৰম্ভ হৈছিল তেতিয়া মাত্ৰ ৩ দিনৰ বাবেহে উৎসৱ উদযাপন কৰা হৈছিল । কিন্তু সময়ৰ লগে লগে ইয়াক উদযাপন কৰিবলৈ দিনৰ সংখ্যা বৃদ্ধি পালে আৰু এতিয়া এই উৎসৱ ১০ দিন উদযাপন কৰা হয় ।
নাগালেণ্ডৰ হৰ্ণবিল উৎসৱ কেৱল ভাৰততে নহয়, বিদেশতো অতি জনপ্ৰিয় । সেয়েহে নগালেণ্ডৰ সংস্কৃতিৰ সৈতে পৰিচিত হ’বলৈ ইয়াত অংশগ্রহণ কৰিবলৈ বৃহৎ সংখ্যক বিদেশী পর্যটকো আহে ৷
এই উৎসৱ সন্দৰ্ভত সংবাদ মাধ্যমৰ আগত পৰ্যটন সচিব জি হুকুঘা ছেমাই কয় যে হৰ্ণবিল মহোৎসৱলৈ অহা পৰ্যটকক নাগালেণ্ডত বিশেষ অতিথি হিচাপে আদৰণি জনোৱা হয় । মূলতঃ নাগালেণ্ডৰ ঐতিহাসিক গাঁও কিছামাত হৰ্ণবিল উৎসৱৰ আয়োজন কৰা হয় । সেয়ে ভাৰত-বিদেশৰ পৰা অহা লাখ লাখ পৰ্যটক ইয়ালৈ অহা-যোৱা কৰাৰ ক্ষেত্ৰত যাতে কোনো সমস্যাৰ সন্মুখীন নহয় তাৰ বাবে উন্নয়নমূলক কাম-কাজো কৰা হৈছে ।
১০ দিনীয়া এই উৎসৱৰ সময়ত, পৰ্যটকসকলে নাগালেণ্ডৰ জনজাতীয় সংস্কৃতি আৰু ইতিহাস নিবিড়ভাৱে জানিবলৈ আৰু বুজি পোৱাৰ সুযোগ পায় । এই ১০ দিনত, নৃত্য, গীত, বিভিন্ন সাংস্কৃতিক অনুষ্ঠান আয়োজন কৰাৰ লগতে হস্তশিল্প, বাঁহৰ সামগ্ৰী, নাগা হস্ত তাঁত সামগ্ৰী, জনজাতীয় গহনা আদিৰ প্ৰদৰ্শনী হয় ।
