বৈদেশিক পৰিক্ৰমা মন্ত্ৰী এছ জয়শংকৰে দেওবাৰে কয় যে আজি ভাৰত এনে এখন দেশত পৰিণত হৈছে যাৰ পৰা বিশ্বই বহুত আশা ৰাখিছে আৰু যাৰ দায়িত্ব অধিক । তেওঁ কয় যে ভাৰতক ভৱিষ্যতে বিশ্বৰ সমস্যাৰ প্ৰতি ক্ষিপ্ৰ সঁহাৰি জনোৱা দেশ হিচাপে দেখা যাব । ইয়াৰ দ্বাৰা ভাৰতৰ ক্ৰমবৰ্ধমান বিশ্বব্যাপী ভূমিকা প্ৰতিফলিত হৈছে ।
জয়শংকৰে কয় যে ভাৰতে বিশ্বৰ বিশেষকৈ আমাৰ চুবুৰীৰ সমস্যা সমাধানত সহায় কৰিব বুলি আশা কৰা হ’ব ৷ বৈদেশিক মন্ত্ৰীগৰাকীয়ে কয় যে, আমি যি অসুবিধাৰ সন্মুখীন হওঁ, সেয়া যৌথ প্ৰচেষ্টা আৰু সিদ্ধান্তৰ জৰিয়তে সমাধান কৰা হ’ব । পৃথিৱীখন সলনি হৈ আছে । নতুন নতুন ধাৰণা আহি আছে আৰু ভাৰত এই পৰিৱৰ্তনৰ অংশ হ’ব লাগিব । আমি মহান চিন্তা আৰু দীৰ্ঘম্যাদী দৃষ্টিভংগী আৰু প্ৰজ্ঞাৰে আমাৰ বৈদেশিক নীতি আগবঢ়াই নিব লাগিব ।
লগতে তেওঁ কয় যে যোগান শৃংখলৰ পৰিৱৰ্তন কেৱল বৈদেশিক নীতিৰ সৈতে জড়িত নহয়, ভাৰতৰ উন্নয়নৰ বাবেও ই এক বৃহৎ সুযোগ । তেওঁ কয়, আজি আমি দেখিবলৈ পোৱা যোগান শৃংখলৰ পৰিৱৰ্তনে ভাৰতত উৎপাদন ক্ষেত্ৰখনক উন্নীত কৰিছে আৰু লগতে প্ৰযুক্তিগত বিকাশৰ অনুঘটক হিচাপেও কাম কৰি আছে । ডিজিটেল যুগত বৈদেশিক নীতিৰ বাবেও নতুন পন্থাৰ প্ৰয়োজন, কাৰণ এই যুগটো উৎপাদন যুগৰ পৰা সম্পূৰ্ণ পৃথক । ডিজিটেল সামগ্ৰী এতিয়া কেৱল সামগ্ৰী নহয়, এতিয়া তথ্যৰ উৎস হৈ পৰিছে ।
বৈদেশিক মন্ত্ৰীগৰাকীয়ে কয় যে বৈদেশিক নীতি হৈছে এক মিশ্ৰণ য’ত পুৰণি আৰু নতুন দুয়োটা প্ৰত্যাহ্বান অন্তৰ্ভুক্ত কৰা হৈছে । তেওঁ কয়, ‘আমি বহু পুৰণি সমস্যাৰ সন্মুখীন হৈছো, ইয়াৰে বহু সমস্যা এতিয়াও আছে । আমাৰ সীমান্ত সুৰক্ষাও এটা গুৰুতৰ বিষয় আৰু আমি এতিয়াও এক গুৰুতৰ ৰূপৰ সন্ত্ৰাসবাদৰ বিৰুদ্ধে যুঁজি আছো । ইয়াৰ সমান্তৰালকৈ আজিৰ প্রয়োজন অনুযায়ী ৰাষ্ট্রীয় উন্নয়নৰ বাবে বৈদেশিক নীতি ৰূপায়ণ কৰিবলগীয়া হৈছে ৷
লগতে তেওঁ কয় যে যোৱা দহ বছৰত ভাৰতৰ বৈদেশিক নীতিত অৰ্থনৈতিক কূটনীতিৰ ওপৰত অধিক গুৰুত্ব দিয়া হৈছে । প্ৰধানমন্ত্ৰী আৰু বৈদেশিক পৰিক্ৰমা মন্ত্ৰীয়ে যেতিয়াই কোনো দেশ ভ্ৰমণ কৰে তেতিয়াই তেওঁলোকৰ এজেণ্ডাত প্ৰযুক্তি, পুঁজি, সহযোগিতা, বিনিয়োগ আৰু উত্তম পদ্ধতিৰ ডাঙৰ স্থান থাকে । এতিয়া ই বৈদেশিক নীতিৰ এক গুৰুত্বপূৰ্ণ অংগ হৈ পৰিছে ।
