প্ৰতিৰক্ষা মন্ত্ৰী ৰাজনাথ সিঙে কয় যে ভাৰতৰ প্ৰতিৰক্ষা ৰপ্তানি সৰ্বকালৰ সৰ্বোচ্চ স্তৰত আছে । যোৱা দশকত এই ৰপ্তানি ৩৪ গুণ বৃদ্ধি পাইছে । আত্মনিৰ্ভৰ ভাৰতৰ ভাৱনাৰ পৰা অনুপ্ৰাণিত হৈ ভাৰতৰ প্ৰতিৰক্ষা খণ্ড পূৰ্বতকৈ শক্তিশালী হৈ উঠিছে ।
ছ’চিয়েল মিডিয়াৰ এটা পোষ্টত প্ৰতিৰক্ষা মন্ত্ৰীগৰাকীয়ে কয় যে, ২০২৪-২৫ চনত ভাৰতে ২৩,৬২২ কোটি টকাৰ প্ৰতিৰক্ষা সামগ্ৰী ৰপ্তানি কৰিছিল, যিটো ২০১৩-১৪ চনত ৬৮৬ কোটি টকা আছিল । প্ৰতিৰক্ষা মন্ত্ৰীৰ কাৰ্যালয়ে কয় যে এই সফলতাৰ আঁৰৰ মনোভাৱ হৈছে দেশখনক প্ৰতিৰক্ষা খণ্ডত স্বাৱলম্বী কৰি তোলা । ভাৰতে ‘আত্মনিৰ্ভৰ’ আৰু ‘মেক ইন ইণ্ডিয়া’ কাৰ্যসূচীৰ অধীনত প্ৰতিৰক্ষা খণ্ডত কেইবাখনো আঁচনি আৰম্ভ কৰিছে । ইয়াৰ ভিতৰত উৎপাদন সম্পৰ্কীয় ব্যৱস্থাও অন্তৰ্ভুক্ত । ইয়াৰ উদ্দেশ্য হৈছে ভাৰতীয় প্ৰতিৰক্ষা সামগ্ৰীক বিশ্বৰ বজাৰত অধিক প্ৰতিযোগিতামূলক কৰি তোলা, ৰপ্তানি বৃদ্ধি কৰা, ভাৰতক বিশ্বৰ যোগান শৃংখলত একত্ৰিত কৰা আৰু আমদানিৰ ওপৰত নিৰ্ভৰশীলতা হ্ৰাস কৰা ।
চৰকাৰে মেক ইন ইণ্ডিয়া পদক্ষেপৰ ওপৰত গুৰুত্ব দিয়াৰ বাবে প্ৰতিৰক্ষা উৎপাদনে ঐতিহাসিক উচ্চতা লাভ কৰিছে । প্ৰতিৰক্ষা উৎপাদনৰ এই বৃদ্ধিয়ে যোৱা কেইবছৰমানৰ পৰা প্ৰধান প্ৰতিৰক্ষা উৎপাদন পি এছ ইউ সমূহৰ বিনিয়োগকাৰীসকলকো যথেষ্ট লাভৰ সূচনা কৰিছে । এই কাৰণতে বৃহৎ প্ৰতিৰক্ষা উৎপাদন কোম্পানীত বিদেশী বিনিয়োগ আহিছে । কেৱল এয়াই নহয়, চৰকাৰে প্ৰতিৰক্ষা আৰু মহাকাশ উৎপাদনত যথেষ্ট বিনিয়োগ কৰিছে । ইয়াৰ বাবেই বিশ্ববিখ্যাত কোম্পানীসমূহে জটিল প্ৰতিৰক্ষা আৰু মহাকাশৰ তথ্য ভাগ-বতৰা কৰাৰ ইচ্ছা প্ৰকাশ কৰিছে ।
৮০খন দেশলৈ অস্ত্ৰ-শস্ত্ৰ আৰু সঁজুলি ৰপ্তানি-
প্ৰতিৰক্ষা মন্ত্ৰালয়ৰ তথ্য অনুসৰি শেহতীয়াকৈ সমাপ্ত হোৱা বিত্তীয় বৰ্ষত প্ৰায় ৮০খন দেশলৈ গোলাবাৰুদ, অস্ত্ৰ-শস্ত্ৰ, উপ-প্ৰণালী, প্ৰমালী আৰু উপকৰণকে ধৰি বহুতো সঁজুলি ৰপ্তানি কৰা হৈছিল । এতিয়া চৰকাৰে ২০২৯ চনৰ ভিতৰত বাৰ্ষিক ৫০,০০০ কোটি টকাৰ ৰপ্তানিৰ লক্ষ্য লৈছে, যাৰ ফলত ইয়াৰ বিশ্বব্যাপী উপস্থিতি অধিক শক্তিশালী হ’ব ।
