প্ৰলয় ক্ষেপণাস্ত্ৰৰ সফল পৰীক্ষণ ভাৰতৰ
প্ৰতিৰক্ষা ক্ষেত্ৰত ভাৰতে এক বৃহৎ সফলতা লাভ কৰিছে । প্ৰতিৰক্ষা গৱেষণা আৰু উন্নয়ন সংস্থাই জনাইছে যে ভাৰতৰ থলুৱা প্ৰলয় ক্ষেপণাস্ত্ৰ ২৮ আৰু ২৯ জুলাইত একেৰাহে দুবাৰকৈ সফলতাৰে পৰীক্ষা কৰা হয় । সেনাৰ প্ৰয়োজন অনুসৰি এই পৰীক্ষাসমূহ সম্পন্ন কৰা হৈছিল যাতে এই ক্ষেপণাস্ত্ৰই কম আৰু দীঘলীয়া দূৰত্বত কিমান সঠিকভাৱে আঘাত কৰিব পাৰে সেয়া চাব পৰা যায় ।
দুয়োটা দিনতে ক্ষেপণাস্ত্ৰই নিৰ্দিষ্ট দিশত উৰি সঠিকতাৰে নিজৰ লক্ষ্যত আঘাত কৰে । ডি আৰ ডি অ’ই কয় যে এই পৰীক্ষাই নিৰ্ধাৰিত সকলো মানদণ্ড আৰু উদ্দেশ্য পূৰণ কৰে । অৰ্থাৎ ক্ষেপণাস্ত্ৰটোৱে ইয়াৰ পৰা আশা কৰা ধৰণে কাম কৰিছিল ।
‘প্ৰলয়’ আধুনিক বেলিষ্টিক মিছাইল, ইয়াৰ বিশেষত্ব জানক-
উল্লেখ্য যে ভাৰতৰ প্ৰতিৰক্ষা শক্তি আৰু অধিক শক্তিশালী কৰাৰ বাবে নিৰ্মিত ‘প্ৰলয়’ হৈছে প্ৰতিৰক্ষা গৱেষণা আৰু উন্নয়ন সংস্থা (ডি আৰ ডি অ’)ৰ দ্বাৰা প্ৰস্তুত কৰা থলুৱা বেলিষ্টিক মিছাইল । ই হৈছে মাটিৰ পৰা মাটিলৈ নিক্ষেপ কৰিব পৰা ক্ষেপণাস্ত্ৰ, যিয়ে লক্ষ্যত অতি দ্ৰুত আৰু সঠিকভাৱে আঘাত কৰিবলৈ সক্ষম । ‘প্ৰলয়’ হৈছে দ্ৰুত প্ৰতিক্ৰিয়াৰ বেলিষ্টিক মিছাইল, অৰ্থাৎ ইয়াক অতি কম সময়তে নিক্ষেপ কৰিব পৰা যায় আৰু শত্ৰুৰ লক্ষ্য ধ্বংস কৰিব পৰা যায় । এই ক্ষেপণাস্ত্ৰই ভাৰতীয় সেনাৰ চুটি দূৰত্বৰ আক্ৰমণৰ ক্ষমতা আৰু অধিক শক্তিশালী কৰে ।
প্ৰলয় ক্ষেপণাস্ত্ৰই ১৫০ কিলোমিটাৰৰ পৰা ৫০০ কিলোমিটাৰ দূৰত্বলৈকে লক্ষ্যত সঠিকভাৱে আঘাত কৰিব পাৰে । অৰ্থাৎ ই কম দূৰত্বত শত্ৰুৰ বাংকাৰ, ৰাডাৰ বা অস্ত্ৰ-শস্ত্ৰ ধ্বংস কৰিব পাৰে । এই ক্ষেপণাস্ত্ৰই ছুপাৰছনিক গতিৰে উৰি যায়, অৰ্থাৎ শব্দৰ গতিতকৈ বেছি বেগেৰে গতি কৰে । ইয়াৰ ওজন প্ৰায় ৫ টন (৫০০০ কিলোগ্ৰাম), য’ত ইয়াৰ ইন্ধন আৰু ৱাৰহেড অন্তৰ্ভুক্ত আছে ।
উল্লেখ্য যে প্ৰলয় ক্ষেপণাস্ত্ৰত জি পি এছ আৰু ইনাৰচিয়েল নেভিগেচন চিষ্টেম ব্যৱহাৰ কৰা হৈছে, যাৰ ফলত ই সঠিক ঠাইত নিজৰ লক্ষ্যত আঘাত কৰিব পাৰে । ইয়াক এনেদৰে ডিজাইন কৰা হৈছে যে ই শত্ৰুৰ বায়ু প্ৰতিৰক্ষা ব্যৱস্থাক ফাঁকি দিব পাৰে । চীন আৰু পাকিস্তানৰ দৰে প্ৰত্যাহ্বানৰ কথা মনত ৰাখি নিৰ্মাণ কৰা হৈছে প্ৰলয় ক্ষেপণাস্ত্ৰ । এই ক্ষেপণাস্ত্ৰই কেইমিনিটমানৰ ভিতৰতে শত্ৰুৰ ৰাডাৰ, এয়াৰবেছ আৰু সামৰিক ঘাটি ধ্বংস কৰিব পাৰে । বিশেষকৈ সীমান্তৱৰ্তী অঞ্চলত ই অত্যন্ত উপযোগী বুলি প্ৰমাণিত হ’ব পাৰে ।
