এক শোকাৱহ দুৰ্ঘটনাত মৃত্যু হৈছে একে পৰিয়ালৰে সাতজনৰ । এক অগ্নিকাণ্ডৰ ঘটনাত তিনিটি শিশুসহ মৃত্যু হয় আটাইকেইজন লোকৰ । মুম্বাইৰ চেম্বুৰ অঞ্চলত এই মৰ্মান্তিক ঘটনা সংঘটিত হৈছে ।
চেম্বুৰত অৱস্থিত এখন দোকানত অগ্নিকাণ্ডৰ ফলত এই ৭ জন লোকৰ মৃত্যু হৈছে । পুৱা পাঁচ বজাত সংঘটিত হয় এই ঘটনা । মৃতসকলৰ ভিতৰত আছে তিনিটা শিশুও । সংবাদ মাধ্যমৰ খবৰ অনুসৰি এই ঘটনা সংঘটিত হৈছে চেম্বুৰৰ সিদ্ধাৰ্থ কলনীত । ইয়াৰ পূৰ্বে এই দুৰ্ঘটনাটোত পাঁচজন লোকৰ মৃত্যুৰ খবৰ পোহৰলৈ আহিছিল । পৰৱৰ্তী সময়ত এই অগ্নিকাণ্ডত ৭ জন লোকৰ মৃত্যু হোৱাৰ খবৰ পোৱা গৈছে ।
এই হৃদয়বিদাৰক ঘটনাটো পুৱা প্ৰায় ৫ বজাত চেম্বুৰ পূবৰ এ এন গায়কোৱাড পথত সংঘটিত হয় । তলৰ মহলাৰ এখন দোকানত জুই লাগিছিল আৰু পৰিয়ালটো ওপৰৰ এটা ঘৰত বাস কৰিছিল । দোকানখনৰ জুই ওপৰ মহলাৰ ঘৰটো আগুৰি ধৰে । ভৱনটোৰ তলৰ মহলাটো দোকান হিচাপে আৰু ওপৰৰ মহলাটো বাসস্থান হিচাপে ব্যৱহাৰ কৰা হৈছিল বুলি সূত্ৰত প্ৰকাশ । তলৰ মহলাত অৱস্থিত দোকানখনত বৈদ্যুতিক তাঁৰ আৰু অন্যান্য সঁজুলিত জুই লাগিছিল আৰু পিছত ওপৰৰ মহলালৈ বিয়পি পৰিছিল ।
ঘটনাটোত পৰিয়ালটোৰ সদস্যসকল অগ্নিদগ্ধ হৈ গুৰুতৰভাৱে আহত হয় । তেওঁলোকক ততাতৈয়াকৈ ৰাজাৱাড়ী চিকিৎসালয়লৈ লৈ যোৱা হৈছিল যদিও চিকিৎসকে সকলোকে মৃত বুলি ঘোষণা কৰে ।
