ভাৰতীয় ক্ৰিকেট দলৰ দুই জ্যেষ্ঠ খেলুৱৈ ৰোহিত শৰ্মা আৰু বিৰাট কোহলীৰ কেৰিয়াৰ দুদোল্যমান অৱস্থাত আছে । বিশেষকৈ অষ্ট্ৰেলিয়াৰ বিৰুদ্ধে ছিৰিজত তেওঁলোকৰ দুৰ্বল প্ৰদৰ্শনৰ বাবে সমগ্ৰ বিশ্বৰ পৰা সমালোচনাৰ বাহিৰে একো পোৱা নাই দুয়োজন কিংবদন্তি ক্ৰিকেটাৰে । এতিয়া চেম্পিয়নছ ট্ৰফীৰ বাবে বিশ্বৰ শীৰ্ষ ৮ দলৰ মাজত সংঘৰ্ষ হ’ব । ১৯ ফেব্ৰুৱাৰীৰ পৰা আৰম্ভ হ’ব এই আই চি চি টুৰ্ণামেণ্ট, যাৰ বাবে ভাৰতীয় দল এতিয়াও ঘোষণা কৰা হোৱা নাই যদিও নিশ্চিতভাৱে ৰোহিত শৰ্মা আৰু বিৰাট কোহলীৰ বাবে এইখন আই চি চিৰ অন্তিমখন প্ৰতিযোগিতা হ’ব পাৰে ।
বি চি চি আইয়ে দিছে আলটিমেটাম-
বি চি চি আইৰ পৰ্যালোচনা বৈঠকৰ পিছত এই আপডেট আহিছে যে বৰ্তমান ৰোহিত শৰ্মা আৰু বিৰাট কোহলীৰ ভৱিষ্যত সন্দৰ্ভত কোনো সিদ্ধান্ত লোৱা নহ’ব । কিন্তু ইংলেণ্ডৰ বিৰুদ্ধে তিনিখন মেচৰ এদিনীয়া শৃংখলা আৰু চেম্পিয়নছ ট্ৰফীত তেওঁলোকৰ প্ৰদৰ্শনৰ ওপৰত দল পৰিচালনা সমিতিয়ে যে তীক্ষ্ণ দৃষ্টি ৰাখিব সেয়া স্পষ্ট হৈ পৰিছে । এক প্ৰতিবেদন অনুসৰি বিৰাট আৰু ৰোহিতে যদি চেম্পিয়নছ ট্ৰফীত ভাল প্ৰদৰ্শন কৰিবলৈ সক্ষম নহয়, তেন্তে বি চি চি আইয়ে দুয়োৰে কেৰিয়াৰ সন্দৰ্ভত এটা ডাঙৰ আৰু কঠিন সিদ্ধান্ত ল’বলৈ বাধ্য হ’ব ।
বিৰাট-ৰোহিতৰ দুৰ্বল ফৰ্ম টিম ইণ্ডিয়াৰ বাবে ক্ষতিকাৰক-
বিগত দুখন টেষ্ট শৃংখলা বিৰাট কোহলী আৰু ৰোহিত শৰ্মাৰ বাবে অতি বেয়া । নিউজীলেণ্ডৰ বিৰুদ্ধে ৬ টা ইনিংছত ৯১ ৰান সংগ্ৰহ কৰাৰ বিপৰীতে অষ্ট্ৰেলিয়াৰ বিৰুদ্ধে ৫ টা ইনিংছত ৩১ ৰান সংগ্ৰহ কৰিবলৈহে সক্ষম হয় অধিনায়ক ৰোহিত শৰ্মাই । বিৰাটৰ অৱস্থাও বৰ ভাল নহয়, কিৱি দলৰ বিৰুদ্ধে ৬ টা ইনিংছত মাত্ৰ ৯৩ ৰান আৰু এতিয়া অষ্ট্ৰেলিয়াৰ বিৰুদ্ধে মাত্ৰ ১৯০ ৰান সংগ্ৰহ কৰে তেওঁ । বিগত ৫ বছৰত বিৰাটে মাত্ৰ ৩টা টেষ্টত শতক অৰ্জন কৰিবলৈ সক্ষম হৈছে । অৱশ্যে ২০২৩ চনৰ বিশ্বকাপত দুয়োজনেই সৰ্বাধিক ৰান সংগ্ৰহকাৰী আছিল । কিন্তু যদিহে তেওঁলোকৰ বেটে ৫০ অভাৰৰ ফৰ্মেট চেম্পিয়নছ ট্ৰফীত ভাল প্ৰদৰ্শন নকৰে, তেন্তে হয়তো টিম ইণ্ডিয়াত ৰোহিত-বিৰাটৰ উপস্থিতি দীৰ্ঘম্যাদী পৰিকল্পনাত ক্ষতিকাৰক বুলি প্ৰমাণিত হ’ব পাৰে ।
বিশ্বকাপ আৰু ডব্লিউ টি চি ২০২৭ৰ লক্ষ্য নিৰ্ধাৰণ কৰিব লাগিব ভাৰতে-
২০২৫ চনৰ বিশ্ব টেষ্ট চেম্পিয়নশ্বিপৰ ফাইনেলত প্ৰৱেশ কৰিব নোৱাৰিলে ভাৰতীয় দলটোৱে । এতিয়া জুন মাহৰ পৰা WTCৰ নতুন চক্ৰ আৰম্ভ হ’ব, আনহাতে মুখ্য প্ৰশিক্ষক গৌতম গম্ভীয়ে এতিয়াই ২০২৭ চনৰ বিশ্বকাপৰ বাবেও ব্লুপ্ৰিণ্ট প্ৰস্তুত কৰিব লাগিব । অৱশ্যে টি-২০ দলটো প্ৰস্তুত কৰাৰ দিশত তেওঁ অতি ভাল আৰু সুনিৰ্দিষ্ট পদক্ষেপ গ্ৰহণ কৰিছে । কিন্তু ২০২৭ চনৰ বিশ্বকাপ আৰু ডব্লিউ টি চিৰ ফাইনেলৰ বাবে ৰোহিত শৰ্মা আৰু বিৰাট কোহলী দলত থাকিব নে নাই, এই সিদ্ধান্ত চেম্পিয়নছ ট্ৰফীৰ আধাৰত ল’ব পাৰে ব’ৰ্ডে ।
