তিনিদিনীয়া ৰাছিয়া ভ্ৰমণলৈ যাব প্ৰতিৰক্ষা মন্ত্ৰী ৰাজনাথ সিং । এই সময়ছোৱাত তেওঁ ৰাছিয়াৰ মস্কোত ভাৰত-ৰাছিয়া আন্তঃচৰকাৰী সামৰিক কাৰিকৰী সহযোগিতা আয়োগৰ (আই আৰ আই জি চি-এম এণ্ড এম টি চি) ২১ সংখ্যক বৈঠকৰ সহ-অধ্যক্ষতা কৰিব । তেওঁৰ এই ভ্ৰমণ ৮ ডিচেম্বৰৰ পৰা ১০ ডিচেম্বৰৰ ভিতৰত হ’ব ।
প্ৰতিৰক্ষা মন্ত্ৰালয়ৰ এক বিবৃতিত কোৱা হৈছে যে এই ভ্ৰমণৰ সময়ত ৰাজনাথ সিং আৰু ৰাছিয়াৰ প্ৰতিৰক্ষা মন্ত্ৰী আন্দ্ৰে বেলুছভে ১০ ডিচেম্বৰত মস্কোত এখন বৈঠকৰ সহ-অধ্যক্ষতা কৰিব । দুয়োজন নেতাই প্ৰতিৰক্ষাৰ ক্ষেত্ৰত দুয়োখন দেশৰ বহুমাত্ৰিক সম্পৰ্কৰ পৰ্যালোচনা কৰিব । ইয়াৰ ভিতৰত সৈন্য-সামৰিক আৰু উদ্যোগিক সহযোগিতা অন্তৰ্ভুক্ত আছে ।
লগতে সমসাময়িক আঞ্চলিক আৰু বিশ্বব্যাপী পাৰস্পৰিক স্বাৰ্থৰ বিষয়সমূহৰ ওপৰত মত বিনিময় কৰিব দুয়োজন নেতাই । এই ভ্ৰমণৰ অংশ হিচাপে কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে ২০২৪ চনৰ ০৯ ডিচেম্বৰত ভাৰতীয় নৌসেনাৰ শেহতীয়া বহু ভূমিকাযুক্ত গাইডেড মিছাইস ফ্ৰিগেট ‘আই এন এছ তুছিল’কো কমিচন কৰিব ।
বিবৃতিটোত কোৱা হৈছে যে নৌসেনাৰ মুৰব্বী এডমিৰেল দীনেশ কে ত্ৰিপাঠীয়ে ৰাজনাথ সিঙৰ সৈতে কমিচনিং অনুষ্ঠানত উপস্থিত থাকিব । ইয়াৰ উপৰিও দ্বিতীয় বিশ্বযুদ্ধৰ সময়ত নিহত ছোভিয়েট জোৱানসকলক মস্কোৰ ‘অজ্ঞাত সৈনিকৰ সমাধিক্ষেত্ৰ’ত শ্ৰদ্ধাঞ্জলি জ্ঞাপন কৰিব প্ৰতিৰক্ষা মন্ত্ৰীগৰাকীয়ে ।
তেওঁ ভাৰতীয় সম্প্ৰদায়ৰ সদস্যসকলৰ সৈতেও বাৰ্তালাপ কৰিব । ৰাছিয়াৰ ৰাষ্ট্ৰপতি ভ্লাদিমিৰ পুটিনে অহা বছৰ বাৰ্ষিক সন্মিলনৰ বাবে ভাৰত ভ্ৰমণ কৰাৰ কথা আছে আৰু এই তাৰিখ কূটনৈতিক মাধ্যমৰ জৰিয়তে নিৰ্ধাৰণ কৰা হ’ব বুলি বৈদেশিক পৰিক্ৰমা মন্ত্ৰালয়ে কৈছে ।
