শনিবাৰে মহিলা টি-২০ বিশ্বকাপ ক্ৰিকেট প্ৰতিযোগিতাত নিউজীলেণ্ডে শ্ৰীলংকাক ৫ উইকেটৰ বিনিময়ত ১১৫ ৰানত সীমাবদ্ধ কৰি ৰাখে । প্ৰত্যুত্তৰত নিউজীলেণ্ডে ১৭.৩ অভাৰত দুটা উইকেট হেৰুৱাই লক্ষ্যত উপনীত হয় । নিউজীলেণ্ডৰ এই বিজয়ে ভাৰতৰ সমস্যা বৃদ্ধি কৰিছে । এতিয়া ভাৰতে যিকোনো মূল্যৰ বিনিময়ত অষ্ট্ৰেলিয়াক পৰাস্ত কৰিব লাগিব, অন্যথা অন্য দলৰ ওপৰত নিৰ্ভৰ কৰিব লাগিব ।
এই জয়ৰ পাছত নিউজীলেণ্ড দলটোৱে গ্ৰুপ-এত পইণ্ট তালিকাত তৃতীয় স্থান দখল কৰিছে । দলটোৰ নেট ৰান ৰেট হৈছে +০.২৮২ । একে সময়তে শ্ৰীলংকাৰ দলটো বিশ্বকাপৰ দৌৰৰ পৰা বাহিৰ হৈছে । এইবাৰ এছিয়ান চেম্পিয়ন হ’ল শ্ৰীলংকাৰ দলটো । একে সময়তে দ্বিতীয় স্থানত আছে ভাৰত । তিনিখন মেচৰ পৰা দলটোৱে লাভ কৰিছে ৪ পইণ্ট । টিম ইণ্ডিয়াৰ নেট ৰান ৰেট হৈছে +০.৫৭৬ । তিনিখন মেচত তিনিটা জয় আৰু নেট ৰান ৰেট +২.৭৮৬ লৈ প্ৰথম স্থানত আছে অষ্ট্ৰেলিয়া । ভাৰতৰ পৰৱৰ্তী মেচ অষ্ট্ৰেলিয়াৰ বিৰুদ্ধে আৰু নিউজীলেণ্ডৰ পৰৱৰ্তী মেচ পাকিস্তানৰ বিৰুদ্ধে ।
যদিহে ভাৰতে অষ্ট্ৰেলিয়াৰ বিৰুদ্ধে পৰৱৰ্তী মেচত জয়লাভ কৰে আৰু নিউজীলেণ্ডেও পাকিস্তানক পৰাস্ত কৰে, তেন্তে সেয়া হ’ব নেট ৰান ৰেটৰ খেল । এনে পৰিস্থিতিত ভাৰতে ভাল ব্যৱধানত জয়লাভ কৰিব লাগিব আৰু লগতে কিৱি দলটোৱে পাকিস্তানক বেছি ব্যৱধানত পৰাস্ত কৰিব নালাগিব । একে সময়তে যদি ভাৰত অষ্ট্ৰেলিয়াৰ হাতত পৰাস্ত হয় আৰু নিউজীলেণ্ডে পাকিস্তানক পৰাস্ত কৰাত সফল হয়, তেন্তে কিৱি দলটোৱে ছেমি ফাইনেলত প্ৰৱেশ কৰিব ।
যদিহে কিৱি দল পৰাস্ত হয় আৰু অষ্ট্ৰেলিয়াৰ বিৰুদ্ধে ভাৰতে জয়লাভ কৰে তেন্তে টিম ইণ্ডিয়াই স্বয়ংক্ৰিয়ভাৱে ছেমি ফাইনেলত প্ৰৱেশ কৰিব । ১৪ অক্টোবৰত পাকিস্তান আৰু নিউজীলেণ্ডৰ মাজত অনুষ্ঠিত হ’ব আৰু ১৩ অক্টোবৰত, দেওবাৰে ভাৰত আৰু অষ্ট্ৰেলিয়াৰ মাজত অনুষ্ঠিত হ’ব হাইভল্টেজ এই মেচ ।
গ্ৰুপ-এৰ পৰা ছেমি ফাইনেলত প্ৰৱেশৰ সমীকৰণ-
-যদি ভাৰতে অষ্ট্ৰেলিয়াক ৬১ ৰাণ বা তাতকৈ অধিক ৰানত পৰাস্ত কৰে (প্ৰথমে বেটিং কৰি থাকোঁতে টিম ইণ্ডিয়াই ১৫০ ৰান সংগ্ৰহ কৰে বুলি ধৰি ল’লে) তেন্তে ভাৰতে স্বয়ংক্ৰিয়ভাৱে ছেমি ফাইনেললৈ যোগ্যতা অৰ্জন কৰিব ।
-যদি ভাৰতে অষ্ট্ৰেলিয়াক ২০ ৰাণত পৰাস্ত কৰে তেন্তে নেট ৰান ৰেটত আগবাঢ়ি থাকিবলৈ পাকিস্তানৰ বিৰুদ্ধে নিউজীলেণ্ডৰ জয়ৰ ব্যৱধান ৩৭ ৰাণতকৈ বেছি নহয় বুলি আশা কৰিব লাগিব (দুয়োটা ক্ষেত্ৰতে প্ৰথম ইনিংছৰ স্ক’ৰ ১৫০ বুলি ধৰি ল’লে)।
-যদি ভাৰত অষ্ট্ৰেলিয়াৰ হাতত পৰাস্ত হয় আৰু পৰাজয়ৰ ব্যৱধান ১৬ ৰানৰ কম হয় (১৫১ ৰানৰ লক্ষ্য ধৰি লৈ) তেন্তে ভাৰতৰ নেট ৰানৰ হাৰ নিউজীলেণ্ডতকৈ আগবাঢ়ি থাকিব ।
-অৱশ্যে ইয়াৰ অৰ্থ হ’ব যে নিউজীলেণ্ডে পাকিস্তানৰ বিৰুদ্ধে এক ৰানৰ জয় সাব্যস্ত কৰিলেও ছেমি ফাইনেলত প্ৰৱেশ কৰিব আৰু টিম ইণ্ডিয়া বিশ্বকাপৰ পৰা বাহিৰ হ’ব ।
