ছাংহাই সহযোগিতা সংস্থাৰ (এছ চি অ’) সন্মিলনত অংশগ্ৰহণ কৰিবলৈ বৈদেশিক পৰিক্ৰমা মন্ত্ৰী এছ জয়শংকৰ মঙলবাৰে পাকিস্তানৰ ৰাজধানী ইছলামাবাদত উপস্থিত হয় । বিমান বন্দৰত তেওঁ বিষয়াসকলে আদৰণি জনাই । ইফালে জয়শংকৰে এছ চি অ’ৰ সদস্য ৰাষ্ট্ৰসমূহৰ প্ৰতিনিধিসকলক আদৰণি জনোৱাৰ বাবে পাকিস্তানৰ প্ৰধানমন্ত্ৰী শ্বেহবাজ শ্বৰীফৰ দ্বাৰা আয়োজিত নৈশ ভোজত উপস্থিত থাকিব বুলি আশা কৰা হৈছে ।
১৫ আৰু ১৬ অক্টোবৰত এছ চি অ’ সন্মিলনত অংশগ্ৰহণ কৰিবলৈ পাকিস্তানত থকা জয়শংকৰে তাত ২৪ ঘণ্টাতকৈও কম সময় অতিবাহিত কৰিব । জয়শংকৰৰ ভ্ৰমণ এনে এটা সময়ত হৈছে যেতিয়া ভাৰত আৰু পাকিস্তানৰ মাজৰ সম্পৰ্ক বিশেষ উন্নত নহয় । ২০১৯ চনৰ ফেব্ৰুৱাৰীত পুলৱামা আক্ৰমণ আৰু তাৰ পিছত বালাকোট এয়াৰ ষ্ট্ৰাইকৰ পিছৰে পৰা দুয়োখন দেশৰ মাজৰ সম্পৰ্ক উত্তেজনাপূৰ্ণ হৈ আছে । ২০১৯ চনৰ আগষ্টত জম্মু আৰু কাশ্মীৰৰ পৰা অনুচ্ছেদ ৩৭০ আঁতৰোৱাৰ পিছত সম্পৰ্কৰ অধিক অৱনতি ঘটিছিল । “যিকোনো চুবুৰীয়া দেশৰ দৰে ভাৰতেও নিশ্চিতভাৱে পাকিস্তানৰ সৈতে ভাল সম্পৰ্ক ৰাখিব বিচাৰে । কিন্তু যদি সীমান্ত সিপাৰৰ পৰা সন্ত্ৰাসবাদ অব্যাহত থাকে তেন্তে সেয়া হ’ব নোৱাৰে,” জয়শংকৰে কয় ।
এছ চি অ’ কি ?
১৯৯৬ চনৰ এপ্ৰিল মাহত এখন বৈঠক অনুষ্ঠিত হৈছিল । ইয়াত চীন, ৰাছিয়া, কাজাখস্তান, কিৰগিজস্তান আৰু তাজিকিস্তান অন্তৰ্ভুক্ত আছিল । এই সভাৰ উদ্দেশ্য আছিল ইখন দেশে সিখন দেশৰ জাতিগত আৰু ধৰ্মীয় উত্তেজনা দূৰ কৰিবলৈ সহযোগিতা কৰা । তেতিয়া ইয়াক ‘ছাংহাই ফাইভ’ বুলি কোৱা হৈছিল । অৱশ্যে, ইয়াক প্ৰকৃততে ২০০১ চনৰ ১৫ জুনত গঠন কৰা হৈছিল । চীন, ৰাছিয়া, কাজাখস্তান, কিৰগিজস্তান, তাজিকিস্তান আৰু উজবেকিস্তানে তাৰ পিছত ছাংহাই সহযোগিতা সংস্থা স্থাপন কৰে । ইয়াৰ পিছত বৰ্ণ আৰু ধৰ্মীয় উত্তেজনা দূৰ কৰাৰ উপৰিও ব্যৱসায় আৰু বিনিয়োগ বৃদ্ধিৰ ওপৰতো গুৰুত্ব আৰোপ কৰা হৈছে ।
যেতিয়া ১৯৯৬ চনত ছাংহাই ফাইভ গঠন কৰা হৈছিল, ইয়াৰ উদ্দেশ্য আছিল চীন আৰু ৰাছিয়াৰ সীমাত উত্তেজনা প্ৰতিহত কৰা আৰু সেই সীমাবোৰ কেনেদৰে উন্নত কৰিব পাৰি তাৰ বিষয়ে সমাধান সূত্ৰ উলিওৱা । ইয়াৰ কাৰণ হৈছে সেই সময়ত গঠন হোৱা নতুন দেশবোৰত উত্তেজনা আছিল । এই উদ্দেশ্য মাত্ৰ তিনি বছৰত প্ৰাপ্ত কৰা হৈছিল । সেইকাৰণে ইয়াক আটাইতকৈ কাৰ্যকৰী সংগঠন বুলি গণ্য কৰা হয় ।
