আটাইতকৈ বিশেষ কথাটো হ’ল, ধেমালিৰ লক্ষ্য হোৱা খোদ নীতা আম্বানীয়েও নিজৰ হাঁহি ধৰি ৰাখিব নোৱাৰিলে

বিদ্যালয় বা মহাবিদ্যালয়ৰ দীক্ষান্ত সমাৰোহ সমূহ সাধাৰণতে পুৰণি দিনৰ আবেগিক স্মৃতি, প্ৰেৰণাদায়ক বাৰ্তা আৰু ভৱিষ্যতৰ সপোনেৰে ভৰি থাকে । কিন্তু ধীৰুভাই আম্বানী ইণ্টাৰনেশ্যনেল স্কুলৰ (DAIS) ‘ক্লাছ অৱ ২০২৬’ৰ সমাৰোহত ঘটিল এক ব্যতিক্ৰমী ঘটনা । মঞ্চলৈ অহা এজন ছাত্ৰই ক্ৰিকেটৰ এনে এক মছলা সানি দিলে যে অডিটৰিয়ামত উপস্থিত সকলোৱে জোৰেৰে হাঁহি উঠিল । আটাইতকৈ বিশেষ কথাটো হ’ল, ধেমালিৰ লক্ষ্য হোৱা খোদ নীতা আম্বানীয়েও নিজৰ হাঁহি ধৰি ৰাখিব নোৱাৰিলে ।

ধীৰুভাই আম্বানী ইণ্টাৰনেশ্যনেল স্কুলৰ গ্ৰেজুৱেশ্যন সমাৰোহৰ এটা ভিডিঅ’ বৰ্তমান ছচিয়েল মিডিয়াত তীব্ৰভাৱে ভাইৰেল হৈ পৰিছে । ভিডিঅ’টো ভাইৰেল হোৱাৰ মূল কাৰণ হৈছে স্কুলখনৰ হেড বয়জনৰ এটা ধেমেলীয়া মন্তব্য । ছাত্ৰজনে ভাষণ দি থকা অৱস্থাতে আম্বানী পৰিয়ালৰ আই পি এল দল মুম্বাই ইণ্ডিয়ানছৰ উল্লেখ কৰি এনে এক মন্তব্য কৰে যে হলটোত থকা সকলোৱে গিৰ্জনী মাৰি হাঁহি উঠে ।

জীৱনৰ শিক্ষা আৰু মুম্বাই ইণ্ডিয়ানছ-

নিজৰ ভাষণত ছাত্ৰজনে স্কুলৰ দিনবোৰৰ যাত্ৰা, বন্ধুত্ব আৰু ভৱিষ্যতৰ প্ৰত্যাহ্বানসমূহৰ বিষয়ে কৈ আছিল । এই সময়ছোৱাতে তেওঁ কয়, “আমাৰ প্ৰিয় মুম্বাই ইণ্ডিয়ানছৰ দৰেই জীৱনতো কিছুমান কঠিন ছিজন আহিব ।”

ছাত্ৰজনৰ মুখৰ পৰা এইষাৰ কথা ওলোৱাৰ লগে লগেই অডিটৰিয়ামত জোৰদাৰ হাঁহিৰ ৰোল উঠে । কেমেৰাটো লগে লগে স্কুলখনৰ প্ৰতিষ্ঠাপক তথা চেয়ারপাৰ্ছন নীতা আম্বানীৰ ফালে ঘূৰি যায় আৰু তেওঁকো হাঁহি হাঁহি নিজৰ মুখখন ঢাকি ধৰা দেখা যায় ।

অৱশ্যে ছাত্ৰজনৰ এই বক্তব্য কেৱল ধেমালিৰ মাজতেই সীমাবদ্ধ নাছিল । তেওঁ অতি চতুৰতাৰে নিজৰ কথাখিনিক জীৱনৰ এক ডাঙৰ শিক্ষাৰ সৈতে সংযোগ কৰে । ছাত্ৰজনে কয় যে জীৱনত এনেকুৱা সময়ো আহিব যেতিয়া কঠোৰ পৰিশ্ৰম কৰাৰ পিছতো আশা কৰা ধৰণে ফলাফল পোৱা নাযাব আৰু নিজৰ যোগ্যতাৰ ওপৰত প্ৰশ্ন উত্থাপন হ’ব । কিন্তু তেনে কঠিন পৰিস্থিতিতো মুম্বাই ইণ্ডিয়ানছৰ দৰেই নিজৰ পৰিচয়, ঐতিহ্য আৰু নিজৰ মানুহৰ ওপৰত বিশ্বাস কেতিয়াও হেৰুৱাব নালাগে ।

‘দুনিয়া হিলা দেংগে হাম’ শ্লোগানেৰে সামৰণি-

ভাষণৰ সামৰণি মাৰি ছাত্ৰজনে মুম্বাই ইণ্ডিয়ানছৰ সেই বিখ্যাত শ্লোগান “দুনিয়া হিলা দেংগে হাম” (Duniya Hila Denge Hum) উচ্চাৰণ কৰে । এই কথা শুনিয়েই নীতা আম্বানীয়ে হাঁহি মুখেৰে হাতচাপৰি বজাবলৈ ধৰে আৰু সমগ্ৰ হলটো জাউৰিয়ে জাউৰিয়ে হাতচাপৰিৰে কঁপি উঠে ।

উক্ত সমাৰোহত মুখ্য অতিথি হিচাপে উপস্থিত আছিল ভাৰতৰ তাৰকা বেডমিণ্টন খেলুৱৈ পিভি সিন্ধু । কিন্তু বৰ্তমান ছচিয়েল মিডিয়াত আটাইতকৈ বেছি চৰ্চা লাভ কৰিছে সেই ছাত্ৰজনে, যিয়ে মাত্ৰ কেইটামান ছেকেণ্ডৰ ভিতৰতে সমগ্ৰ অনুষ্ঠানটোক চিৰস্মৰণীয় কৰি তুলিলে । ইণ্টাৰনেট ব্যৱহাৰকাৰীসকলে ছাত্ৰজনৰ এই আত্মবিশ্বাসৰ ভূয়সী প্ৰশংসা কৰিছে ।

লগতে পঢ়ক : আই পি এল ২০২৬: লীগ পৰ্যায় সমাপ্ত, কোৱালিফায়াৰত পৰাস্ত হ’লেও ফাইনেলৰ দৌৰত থাকিব গুজৰাট-বেংগালুৰু

৫ বাৰৰ আই পি এল চেম্পিয়ন মুম্বাইয়ে ৯খন মেচৰ ভিতৰত মাত্ৰ দুখন খেলত জয়লাভ কৰিছে আৰু ৭খন খেলত পৰাস্ত হৈছে

চলিত ইণ্ডিয়ান প্ৰিমিয়াৰ লীগত মুম্বাই ইণ্ডিয়ানছে অনুৰাগীৰ হৃদয় ভাঙি শোচনীয় প্ৰদৰ্শন অব্যাহত ৰাখিছে । ৫ বাৰৰ আই পি এল চেম্পিয়ন মুম্বাইয়ে ৯খন মেচৰ ভিতৰত মাত্ৰ দুখন খেলত জয়লাভ কৰিছে আৰু ৭খন খেলত পৰাস্ত হৈছে । ২ মে’ শনিবাৰে চেন্নাই ছুপাৰ কিংছৰ বিৰুদ্ধে খেলখনত মুম্বাই ইণ্ডিয়ানছৰ বেটিং, বলিং আৰু ফিল্ডিং অতিশয় দুৰ্বল আছিল । ৭ উইকেটত মাত্ৰ ১৫৯ ৰানহে কৰিবলৈ সক্ষম হয় দলটোৱে । কঠিন পৰিস্থিতিত নমন ধীৰে ৫৭ ৰানৰ যুঁজাৰু ইনিংছ খেলিছিল যদিও আনটো মূৰৰ পৰা তেওঁৰ বিশেষ সমৰ্থনৰ লাভত ব্যৰ্থ হয় ।

১৫৯ ৰানৰ লক্ষ্য অনুসৰণ কৰা চেন্নাই ছুপাৰ কিংছে মেচখনত একপক্ষীয় বিজয় সাব্যস্ত কৰে । অধিনায়ক ৰুতুৰাজ গাইকোৱাদে ৬৭ ৰানৰ অপৰাজিত ইনিংছ খেলি মাত্ৰ ১৮.১ অভাৰতে দলটোক বিজয় লক্ষ্যত উপনীয় কৰায় । চি এছ কেয়ে ৮ উইকেটত জয়লাভ কৰি প্লে অফৰ আশা জীয়াই ৰাখিছে । ইফালে, চি এছ কেৰ বিৰুদ্ধে পুনৰ পৰাজয়ৰ ফলত মুম্বাই ইণ্ডিয়ানছ শলঠেকত পৰিছে । ৪ পইন্টেৰে দলটো বৰ্তমান পইণ্ট তালিকাৰ নৱম স্থানত আছে আৰু দলটোৰ আৰু নেট ৰান ৰেট -০.৮০৩ ।

এই ছিজনত মুম্বাই ইণ্ডিয়ানছৰ আটাইতকৈ ডাঙৰ সমস্যা হৈছে মিডল অভাৰৰ বেটিং । ভাল আৰম্ভণিৰ পিছত উইকেট হেৰুৱাই দলটো প্ৰায়ে হেঁচাত পৰে । চি এছ কেৰ বিৰুদ্ধেও একেই দেখা গ’ল, য’ত শক্তিশালী স্থান থকাৰ পাছতো হঠাতে দলটো বেকফুটলৈ যায় ৷ দলটোৰ বলিং আক্ৰমণো দুৰ্বল । কম স্ক’ৰে বলাৰসকলৰ ওপৰত অতিৰিক্ত হেঁচা প্ৰয়োগ কৰে, যাৰ বাবে বিপক্ষই সহজেই দলটোৰ বিৰুদ্ধে জয় সাব্যস্ত কৰিবলৈ সক্ষম হয় ।

বাকী পাঁচখন খেলত মুম্বাই ইণ্ডিয়ানছ জয়ী হ’লে ১৪ পইণ্ট লাভ কৰিবলৈ সক্ষম হ’ব । এতিয়া মুম্বাইৰ বাবে আগন্তুক পথ অত্যন্ত কঠিন হৈ পৰিছে । দলটোৱে বাকী সকলো মেচতে জয়ী হ’ব লাগিব আৰু নেট ৰান ৰেট যথেষ্ট উন্নত কৰিব লাগিব । তদুপৰি তেওঁলোকে আন দলৰ ফলাফলৰ ওপৰতো নিৰ্ভৰ কৰিব লাগিব । যদিহে মুম্বাই এখন মেচতো পৰাস্ত হয় তেন্তে প্ৰতিযোগিতাখনৰ পৰা বাহিৰ হোৱাটো প্ৰায় নিশ্চিত । গাণিতিকভাৱে হয়তো এতিয়াও মুম্বাই বাহিৰ হোৱা নাই, কিন্তু তেওঁলোকৰ বৰ্তমানৰ ফৰ্ম আৰু ধাৰাবাহিক ভুলৰ প্ৰতি লক্ষ্য ৰাখি প্লে অফত প্ৰৱেশ কৰাটো প্ৰায় অসম্ভৱ যেন লাগে ।

মুম্বাই ইণ্ডিয়ানছৰ বাকী থকা মেচ-

৪ মে’ : লক্ষ্ণৌ ছুপাৰ জায়েন্টছৰ বিৰুদ্ধে

১০ মে’: ৰয়েল চেলেঞ্জাৰছ বাংগালুৰুৰ বিৰুদ্ধে

১৪ মে’ : পঞ্জাব কিংছ, ধৰমশালা

২০ মে’ : কলকাতা নাইট ৰাইডাৰ্ছ

২৪ মে’ : ৰাজস্থান ৰয়েলছৰ বিৰুদ্ধে

ইফালে চলিত আই পি এলত আন এক গুৰুতৰ পৰাজয়ৰ পিছত মুম্বাই ইণ্ডিয়ানছৰ অধিনায়ক হাৰ্দিক পাণ্ডিয়াই নিজৰ যন্ত্ৰণা প্ৰকাশ কৰে । হাৰ্দিকে স্বীকাৰ কৰে যে এই ছিজনত তেওঁৰ দলটো পুনৰ ট্ৰেকলৈ আহিবলৈ সক্ষম নহ’ল । মেচৰ পিছত হাৰ্দিক পাণ্ডিয়াই স্পষ্টকৈ কয়, “এয়া আমাৰ ছিজন নহয় । প্ৰতিটো বিভাগতে চি এছ কে ভাল আছিল । তেওঁলোকে ভাল বলিং কৰিছিল, ভাল বেটিং কৰিছিল আৰু ভাল ফিল্ডিং কৰিছিল ।”

লগতে পঢ়ক : নিস্তেজ মুম্বাই… চেন্নাইৰ বিৰুদ্ধে ৮ উইকেটত পৰাস্ত হাৰ্দিক বাহিনী

শনিবাৰে আই পি এল ২০২৬ত অনুষ্ঠিত হোৱা এখন মেচত চেন্নাই ছুপাৰ কিংছে মুম্বাই ইণ্ডিয়ানছক পৰাস্ত কৰে

চলিত আই পি এলত আন এক পকাজয়ৰ সন্মুখীন হৈছে মুম্বাই ইণ্ডিয়ানছ । শনিবাৰে আই পি এল ২০২৬ত অনুষ্ঠিত হোৱা এখন মেচত চেন্নাই ছুপাৰ কিংছে মুম্বাই ইণ্ডিয়ানছক পৰাস্ত কৰে । মেচখনত ৮ উইকেটত জয়লাভ কৰে চেন্নাই চুপাৰ কিংছে । এই খেলখন চেন্নাইৰ এম এ চিদাম্বৰম ষ্টেডিয়ামত অনুষ্ঠিত হয় । টছত জয়ী হোৱাৰ পাছত মুম্বাই ইণ্ডিয়ানছে প্ৰথমে বেটিং কৰাৰ সিদ্ধান্ত লয় । প্ৰথমে বেটিং কৰি মুম্বাইয়ে মাত্ৰ ১৫৯ ৰানহে কৰিবলৈ সক্ষম হয় যিটো চেন্নাইয়ে ১৯ অভাৰতে উপনীত হয় ।

১৬০ ৰানৰ লক্ষ্য অনুসৰণ কৰি চেন্নাই চুপাৰ কিংছে সঞ্জু চেমছন আৰু ৰুতুৰাজ গাইকোৱাদৰ সৈতে ইনিংছৰ আৰম্ভণি কৰে । চেমছন ১১ ৰানত আউট হয় যদিও গাইকোৱাদে আনটো মূৰত দলৰ ইনিংছ চম্ভালে । উৰভিল আউট হোৱাৰ পিছতে গাইকোৱাদে কাৰ্তিক শৰ্মাৰ সৈতে ১৯ অভাৰত মেচখন জয় কৰে । কাৰ্তিক শৰ্মাই আই পি এলৰ প্ৰথমটো অৰ্ধশতক অৰ্জন কৰে ।

প্ৰথম বেটিং কৰা মুম্বাই ইণ্ডিয়ানছৰ আৰম্ভণি দুৰ্বল আছিল । দ্বিতীয় অভাৰত উইল জেকছৰ উইকেট হেৰুৱাই দলটোৱে । জেকছে মাত্ৰ এক ৰানহে সংগ্ৰহ কৰে । তাৰ পাছত ৰিকেল্টনে ভাল ইনিংছ খেলিছিল যদিও সপ্তম অভাৰত তেওঁৰ উইকেটৰ পতন ঘটে । এই খেলখনত সূৰ্য কুমাৰ যাদৱে ১২টা বলত ২১ ৰান সংগ্ৰহ কৰে । মুম্বাইৰ স্ক’ৰে ১১ অভাৰত ১০০ ৰান অতিক্ৰম কৰে । নমন ধীৰে ৩৭টা বলত ৫৭ ৰান সংগ্ৰহ কৰে । অৱশ্যে মুম্বাইৰ নিম্ন ক্ৰম সম্পূৰ্ণৰূপে ফ্লপ হোৱাৰ ফলত মুঠ ১৫৯ ৰানহে কৰিবলৈ সক্ষম হয় দলটো । চি এছ কেৰ হৈ নূৰ আহমেদে ৪ অভাৰত মাত্ৰ ২৬ ৰানত দুটা উইকেট দখল কৰে ।

লগতে পঢ়ক : বৈভৱৰ উইকেট দখল কৰি হৰ্ষোল্লাস কৰা জেমিছনৰ বিৰুদ্ধে কঠোৰ বিচিচিআই

তিলক বাৰ্মাৰ বিস্ফোৰক শতকৰ সহায়ত প্ৰথমে বেটিং কৰি মুম্বাইয়ে গুজৰাটক ২০০ ৰানৰ লক্ষ্য নিৰ্ধাৰণ কৰি দিয়ে

সোমবাৰে আই পি এল ২০২৬ত অনুষ্ঠিত হোৱা এখন ৰোমাঞ্চকৰ মেচত মুম্বাই ইণ্ডিয়ানছে গুজৰাট টাইটানছক ৯৯ ৰানত পৰাস্ত কৰে । আহমেদাবাদৰ নৰেন্দ্ৰ মোদী ষ্টেডিয়ামত খেলখন অনুষ্ঠিত হয় । টছত জয়ী হৈ গুজৰাটে প্ৰথমে বলিং কৰিবলৈ সিদ্ধান্ত লয় । তিলক বাৰ্মাৰ বিস্ফোৰক শতকৰ সহায়ত প্ৰথমে বেটিং কৰি মুম্বাইয়ে গুজৰাটক ২০০ ৰানৰ লক্ষ্য নিৰ্ধাৰণ কৰি দিয়ে । ইয়াৰ প্ৰতিক্ৰিয়া স্বৰূপে গুজৰাটে ১৬ অভাৰতে আটাইকেইটা উইকেট হেৰুৱাই মাত্ৰ ১০০ ৰানহে কৰিবলৈ সক্ষম হয় ।

অশ্বনী কুমাৰৰ ৪ উইকেট-

২০০ ৰানৰ লক্ষ্য অনুসৰণ কৰি ইনিংছৰ আৰম্ভণিতে বিপৰ্যয়ৰ সন্মুখীন হয় গুজৰাট । প্ৰথমটো বলতে যশপ্ৰীত বুমৰাহে ছাই সুদৰ্শনক আউট কৰে । এইটো আছিল বুমৰাহৰ চলিত ছিজনৰ প্ৰথমটো উইকেট । ইয়াৰ পিছতে পৰৱৰ্তী অভাৰত হাৰ্দিকে বাটলাৰক আউট কৰে । ইয়াৰ পিছতে ১৪ ৰান সংগ্ৰহ কৰি পেভিলিয়নমুখী হয় অধিনায়ক শুভমন গীল । ইয়াৰ পিছতে সুন্দৰে ২৬ ৰানৰ ন’কেৰে ইনিংছটো সুস্থিৰ কৰিবলৈ চেষ্টা কৰে যদিও ছেণ্টনাৰে তেওঁক পেভিলিয়নৰ বাট দেখুৱাই । ইয়াৰ পিছতে গুজৰাটৰ বেটিং লাইআপ মুম্বাইৰ শক্তিশালী বলিং আক্ৰমণত তচনচ হৈ পৰে আৰু ১৬ অভাৰত মাত্ৰ ১০০ ৰানতে আটাইকেইটা উইকেট হেৰুৱাই পৰাজয় স্বীকাৰ কৰে ।

পইন্ট তালিকাত সপ্তম স্থানলৈ মুম্বাই-

এই জয়ৰ লগে লগে মুম্বাই এতিয়া পইণ্ট টেবুলৰ দশম স্থানৰ পৰা সপ্তম স্থানলৈ উন্নীত হৈছে । মুম্বাই দলে এতিয়া ৬খন খেলৰ পৰা ৪ পইণ্ট লাভ কৰিছে । অৱশ্যে দলটোৰ নেট ৰান ৰেট চি এছ কে আৰু লক্ষ্ণৌতকৈ ভাল, যাৰ বাবে সপ্তম স্থানলৈ উন্নীত হৈছে দলটো । ইফালে ৬খন খেলৰ পৰা ৬ পইণ্ট লাভ কৰি ষষ্ঠ স্থানত আছে গুজৰাট ।

মুম্বাইৰ ইনিংছ-

প্ৰথমে বেটিং কৰা মুম্বাইৰ এই মেচতো আৰম্ভণি শোচনীয় আছিল । পূৰ্বৰ মেচত শতক অৰ্জন কৰা কুইণ্টন ডি কক ১৩ ৰানত আউট হয় । সূৰ্যকুমাৰ যাদৱো পুনৰ ব্যৰ্থ হয় আৰু মাত্ৰ ১৫ ৰানহে কৰিবলৈ সক্ষম হয় । কিন্তু তিলক বাৰ্মা আৰু নমন ধীৰে অৰ্ধশতকৰ অংশীদাৰিত্ব গঢ়ি ইনিংছটো স্থিৰ কৰে ।

কিন্তু ১৩ নং অভাৰত ৪৫ ৰানত নমন ধীৰৰ উইকেটৰ পতনৰ পিছত মুম্বাইয়ে চতুৰ্থটো বিপৰ্যয়ৰ সন্মুখীন হ’বলগীয়া হয় । নমনে নিজৰ ইনিংছত ৬টা চাৰি আৰু এটা ছয় কোবাই । ইয়াৰ পিছতে তিলক বাৰ্মাই আগ্ৰাসী ৰূপ ধাৰণ কৰি ৩৩টা বলতে অৰ্ধ শতক অৰ্জন কৰে । অৱশ্যে ইয়াৰ পিছতো তিলক বাৰ্মাই থমকি নৰ’ল । তিলকে খেল অব্যাহত ৰাখি মাত্ৰ ৪৫টা বলত শতক অৰ্জন কৰে । ২০ অভাৰৰ শেষৰ বলত চাৰি কোবাই তেওঁ শতক সম্পূৰ্ণ কৰে । তিলকে নিজৰ ইনিংছত ৮টা চাৰি আৰু ৭টা ছয় কোবাই ।

লগতে পঢ়ক : গুজৰাটৰ বিৰুদ্ধে তিলক বাৰ্মাৰ বেটিং ধুমুহা, আই পি এল কেৰিয়াৰৰ প্ৰথমটো শতক অৰ্জন

ইনিংছৰ অন্তিম বলত চাৰি কোবাই ৪৫টা বলত শতক অৰ্জন কৰে তিলক বাৰ্মাই । তেওঁৰ পূৰ্বে ২০০৮ চনত মুম্বাই ইণ্ডিয়ানছৰ হৈ ৪৫টা বলত শতক অৰ্জন কৰিছিল সনথ জয়সূৰিয়াই ।

আই পি এল কেৰিয়াৰৰ প্ৰথম শতক অৰ্জন কৰিছে তিলক বাৰ্মাই । আহমেদাবাদত অনুষ্ঠিত হোৱা এখন মেচত আজি গুজৰাট টাইটানছৰ বিৰুদ্ধে ৪৫টা বলত শতক সম্পূৰ্ণ কৰে মুম্বাইৰ বিস্ফোৰক বেটছমেনজনে । ইয়াৰ লগে লগে তেওঁ ইণ্ডিয়ান প্ৰিমিয়াৰ লীগৰ ইতিহাসত মুম্বাই ইণ্ডিয়ানছৰ হৈ দ্ৰুততম শতক অৰ্জনৰ অভিলেখো স্পৰ্শ কৰিছে । এই বিস্ফোৰক ইনিংছত তেওঁ ৪৫টা বলত ১০১ ৰান সংগ্ৰহ কৰে ।

ইনিংছৰ অন্তিম বলত চাৰি কোবাই ৪৫টা বলত শতক অৰ্জন কৰে তিলক বাৰ্মাই । তেওঁৰ পূৰ্বে ২০০৮ চনত মুম্বাই ইণ্ডিয়ানছৰ হৈ ৪৫টা বলত শতক অৰ্জন কৰিছিল সনথ জয়সূৰিয়াই । এতিয়া ১৮ বছৰৰ পাছত মুম্বাইৰ হৈ দ্ৰুততম শতক অৰ্জনৰ এই অভিলেখ স্পৰ্শ কৰিছে তিলক বাৰ্মাই ।

৪৫ বল – তিলক বাৰ্মা

৪৫ বল – সনথ জয়সূৰিয়া

৪৭ বল – কেমেৰুন গ্ৰীণ

৪৯ বল – সূৰ্য্যকুমাৰ যাদৱ

মুম্বাই ইণ্ডিয়ানছ ইনিংছৰ আৰম্ভণিতে বিপৰ্যয়ৰ গৰাহত পৰিছিল । ৪৪ ৰানত তিনিটা উইকেট হেৰুৱাই বিপদত পৰিছিল দলটো । ইয়াৰ পিছতে তিলক বাৰ্মাই ইনিংছৰ দায়িত্ব গ্ৰহণ কৰে আৰু এটা পৰ্যায়ত ২২ বলত ১৯ ৰানত বেটিং কৰি আছিল । অৱশ্যে তাৰ পিছতে তেওঁ বিধ্বংসী ৰূপ ধাৰণ কৰি পৰৱৰ্তী ২৩টা বলত ৮২ ৰান সংগ্ৰহ কৰে ।

মুম্বাই ইণ্ডিয়ানছে ব্যতিক্ৰমীভাৱে ভাল প্ৰদৰ্শন আগবঢ়ায় । এটা সময়ত দলটোৱে ১৪ অভাৰত ১০৩ ৰান সংগ্ৰহ কৰিছিল যদিও তিলক বাৰ্মাৰ ধুমুহাত মুম্বাইয়ে অন্তিম ছয় অভাৰত ৯৮ ৰান সংগ্ৰহ কৰে । হাৰ্দিক পাণ্ডিয়াৰ দুৰ্বল ফৰ্ম আজিৰ মেচতো পৰিলক্ষিত হয় । ১৩ নং অভাৰত বেটিং কৰিবলৈ আহে হাৰ্দিক । হাৰ্দিকে ১৬টা বল অপচয় কৰি মাত্ৰ ১৫ ৰানহে কৰিবলৈ সক্ষম হয় ।

লগতে পঢ়ক : এদিনীয়া বিশ্বকাপ ২০২৭লৈ অব্যাহত থাকিব আগাৰকাৰ যুগ, বিচিচিআইয়ে দিব উপহাৰ

আই পি এল ২০২৬ ত মুম্বাই ইণ্ডিয়ানছ একেৰাহে চতুৰ্থবাৰৰ বাবে পৰাজয়ৰ সন্মুখীন হ’বলগীয়া হয়। এই পৰাজয়ৰ পিছত অধিনায়ক হাৰ্দিক পাণ্ডিয়াই দলটোৰ অভাৱ-অভিযোগ সন্দৰ্ভত গুৰুতৰ প্ৰশ্ন উত্থাপন কৰে।

ইণ্ডিয়ান প্ৰিমিয়াৰ লীগ ২০২৬(আই পি এল)ত মুম্বাই ইণ্ডিয়ানছৰ (এম আই) দুৰ্বল প্ৰদৰ্শন অবিৰতভাৱে অব্যাহত আছে। বৃহস্পতিবাৰে অনুষ্ঠিত হোৱা খেলখনত পঞ্জাব কিংছে (পিবিকেএছ) মুম্বাইক ৭ উইকেটত পৰাস্ত কৰি একেৰাহে চতুৰ্থবাৰৰ বাবে পৰাজয়ৰ সন্মুখীন হয়।এই পৰাজয়ৰ পিছত অধিনায়ক হাৰ্দিক পাণ্ডিয়াই স্পষ্টভাৱে কয় যে দলটোৱে এতিয়া ‘কিছুমান কঠিন প্ৰশ্নৰ উত্তৰ’ বিচাৰি উলিয়াব লাগিব আৰু দায়িত্ব ল’ব লাগিব।

প্ৰথমে বেটিং কৰি এম আইয়ে ২০ অভাৰত ৬টা উইকেট হেৰুৱাই ১৯৫ ৰান সংগ্ৰহ কৰে।ক্বিণ্টন ডিকাকে ১১২ ৰান (৬০ বল)ৰ অপৰাজিত ইনিংছ খেলিছিল।অৱশ্যে তেওঁৰ শতকটোৱে দলটোক জয়ৰ দিশে আগুৱাই নিব নোৱাৰিলে। তেওঁ নমন ধীৰ (৫০)ৰ সৈতে ৬৮ বলত ১২২ ৰানৰ অংশীদাৰিত্ব ভাগ কৰিছিল। ইফালে, অধিনায়ক পাণ্ডিয়াৰ সৈতে ২৩টা বলত ৪১ ৰান সংযোজন কৰে।

খেলখনৰ অন্তত পৰাজয়ত হতাশ হৈ পাণ্ডিয়াই কয়— আমি চাব লাগিব যে আমি কিছুমান কঠিন সিদ্ধান্ত লোৱাৰ প্ৰয়োজন আছে নে নাই অথবা আমি কেৱল এনেকৈ আগবাঢ়ি গৈ থাকিব লাগে? এইটো এনে এটা প্ৰশ্ন যিটোৰ উত্তৰ আমাক দিব লাগিব আৰু দায়িত্বও ল’ব লাগিব।আমি ড্ৰয়িং বৰ্ডলৈ উভতি গৈ বুজিব লাগিব যে ভুলবোৰ ক’ত হৈছে,ব্যক্তিগত পৰ্যায়ত, দল হিচাপে বা আমাৰ পৰিকল্পনাত।

লগতে পঢ়ক: লক্ষ্ণৌক পৰাস্ত কৰি তালিকাৰ শীৰ্ষত বেংগালুৰু