বিগত দুবাৰৰ দৰে এইবাৰো কংগ্ৰেছে দিল্লী বিধানসভা নিৰ্বাচনত খাতা খুলিব নোৱাৰিলে । যিহেতু এইবাৰ কংগ্ৰেছে নিজৰ পূৰ্ণ শক্তি প্ৰয়োগ কৰিছিল আৰু ৰাহুল গান্ধী, প্ৰিয়ংকা গান্ধীকে ধৰি দলটোৰ ডাঙৰ নেতা আৰু সকলো জ্যেষ্ঠ নেতাই প্ৰচাৰ চলাইছিল । ইয়াৰ বাহিৰেও জনসাধাৰণক তেওঁলোকৰ প্ৰতি আকৰ্ষিত কৰাৰ স্বাৰ্থত দলটোৱে বিজেপি আৰু আম আদমী পাৰ্টিতকৈ অধিক জনকল্যাণমূলক আঁচনি আৰম্ভ কৰাৰ প্ৰতিশ্ৰুতি দিছিল যদিও দিল্লীৰ ভোটাৰসকলে কংগ্ৰেছক প্ৰত্যাখান কৰে । নিৰ্বাচনী প্ৰচাৰৰ সময়ত বহু কংগ্ৰেছ নেতাই দাবী কৰিছিল যে তেওঁলোকৰ দলটোৱে পুৰণি ৰাজনৈতিক ভূমি পুনৰ লাভ কৰাত সফল হ’ব । কিন্তু শেষত এই নিৰ্বাচনৰ ফলাফলত মুখথেকেছা খাবলগীয়া হয় দলটোৱে ।

য’ত শক্তিশালী আছিল, তাতো লাভ নকৰিলে সফলতা

এই নিৰ্বাচনত কংগ্ৰেছে বহু জ্যেষ্ঠ নেতাক প্ৰচাৰত থিয় কৰাইছিল । ইয়াৰ উপৰিও একাংশ নতুন মুখৰ ওপৰতো বাজি ধৰিছিল, য’ত যুৱ নেতাক অধিক অগ্ৰাধিকাৰ দিয়া হৈছিল । ইয়াৰ বাহিৰেও কংগ্ৰেছে পৰম্পৰাগতভাৱে যিবোৰ অঞ্চলত মজবুত দখল আছিল সেইবোৰৰ প্ৰতি বিশেষ গুৰুত্ব দিছিল । কিন্তু এই প্ৰচেষ্টাসমূহৰ পিছতো কংগ্ৰেছে নিজৰ পুৰণি স্থিতি পুনৰ লাভ কৰাত চূড়ান্ত ব্যৰ্থ হয় ।

লাভ কৰিব নোৱাৰিলে ২০১৩ চনৰ সন্মানো-

কেৱল এয়াই নহয় ২০১৩ চনৰ নিৰ্বাচনৰ সন্মানো লাভ কৰিব নোৱাৰিলে কংগ্ৰেছে । সেই সময়ত দলটোৱে আঠখন আসন লাভ কৰিছিল । সেয়েহে তেওঁলোকৰ প্ৰদৰ্শনৰ কোনো বিশেষ উন্নতি দেখা নগ’ল । আনহাতে ২০১৩ চনৰ পূৰ্বে কংগ্ৰেছৰ সমৰ্থনৰ ভিত্তি আছিল শক্তিশালী । ১৯৯৮, ২০০৩ আৰু ২০০৮ চনত তেওঁলোকে চৰকাৰ গঠন কৰিছিল । এইদৰে দিল্লী নিৰ্বাচনত বিজেপি আৰু আম আদমী পাৰ্টিৰ মাজত কঠোৰ যুঁজ হৈছিল আৰু কংগ্ৰেছে আশা কৰিছিল যে দলটোৱে পুৰণি স্থিতি পুনৰ লাভ কৰিবলৈ সক্ষম হ’ব ।

নিৰ্বাচনৰ ফলাফলৰ পিছত বিজেপি আৰু আম আদমী পাৰ্টিয়েও কংগ্ৰেছৰ প্ৰদৰ্শনক লৈ প্ৰশ্ন উত্থাপন কৰিছে । তেওঁলোকৰ নেতাসকলে দাবী কৰিছে যে কংগ্ৰেছে দিল্লীৰ ভোটাৰৰ আস্থা হেৰুৱাইছে । তেওঁলোকৰ ভোটদানৰ শতাংশ সামান্য বৃদ্ধি হৈছে । আনহাতে দলটোৰ নেতাসকলে ডাঙৰ ডাঙৰ দাবী কৰি আছিল ।

দিল্লী বিধানসভা নিৰ্বাচনত বিজেপিয়ে ঐতিহাসিক বিজয় সাব্যস্ত কৰিছে । দিল্লী আম আদমী পাৰ্টিৰ দুৰ্গ হৈ আহিছে, সেয়েহে দিল্লীত আপৰ দুৰ্গ ভাঙি পৰাটো অৰবিন্দ কেজৰিৱাল আৰু তেওঁৰ দলৰ ৰাজনীতিত ডাঙৰ আঘাত হিচাপে প্ৰমাণিত হৈছে । ইতিমধ্যে দিল্লী নিৰ্বাচনৰ ফলাফলক লৈ ৰাজনৈতিক প্ৰতিক্ৰিয়া আহিবলৈ আৰম্ভ কৰিছে । ইয়াৰ মাজতে অতি আকৰ্ষণীয় প্ৰতিক্ৰিয়া দিছে জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই । ছ’চিয়েল মিডিয়াত শ্বেয়াৰ কৰা এটা পোষ্টত ওমৰ আব্দুল্লাই লিখিছে, ‘আৰু যুঁজক নিজৰ মাজতে !’ ওমৰ আব্দুল্লাই এটা GIF শ্বেয়াৰ কৰিছে য’ত লিখা আছে, ‘হেঁপাহ পলুৱাই যুঁজক, ইজনে সিজনক শেষ কৰি দিয়ক !’

অনুমান কৰা হৈছে যে দিল্লীত মিত্ৰতা কৰাৰ পৰিৱৰ্তে পৃথকে পৃথকে নিৰ্বাচনত প্ৰতিদ্বন্দ্বিতা কৰাৰ বাবে কংগ্ৰেছ আৰু আম আদমী পাৰ্টিক ওমৰ আব্দুল্লাই কটাক্ষ কৰিছে । দুয়োটা দলেই ইণ্ডি মিত্ৰজোঁটৰ অংশ, কিন্তু বিধানসভা নিৰ্বাচনত পৃথকে পৃথকে প্ৰতিদ্বন্দ্বিতা কৰি প্ৰচাৰৰ সময়ত ইজনে সিজনক তীব্ৰ আক্ৰমণ চলাইছিল ।

সঞ্জয় ৰাউতে কয়- বিজেপিৰ পৰাজয় নিশ্চিত আছিল, যদি…

দিল্লী নিৰ্বাচনৰ ধাৰা সন্দৰ্ভত শিৱসেনাৰ ইউ বি টি নেতা সঞ্জয় ৰাউতে কয় যে ‘প্ৰাথমিক ধাৰাসমূহে কঠোৰ প্ৰতিদ্বন্দ্বিতা দেখুৱাইছে । যদি কংগ্ৰেছ আৰু আম আদমী পাৰ্টিয়ে একেলগে নিৰ্বাচনত অৱতীৰ্ণ হ’লহেঁতেন তেন্তে ফলাফল বেলেগ হ’লহেঁতেননে ?  কংগ্ৰেছ আৰু আপৰ বিৰোধী দল বিজেপি । দুয়োটাই বিজেপিক ক্ষমতাৰ পৰা আঁতৰাই ৰাখিবলৈ যুঁজিছিল, কিন্তু বেলেগে বেলেগে এই যুঁজ দিলে, যদি একেলগে যুঁজিলহেতেন তেন্তে বিজেপিৰ পৰাজয় নিশ্চিত আছিল ।

‘অৰবিন্দ কেজৰিৱালে নিজৰ ভাবমূৰ্তি নিকা কৰি ৰাখিব নোৱাৰিলে’

দিল্লীৰ নিৰ্বাচনৰ ফলাফল সন্দৰ্ভত সমাজ কৰ্মী আন্না হাজাৰে কয় যে ‘মই বহুদিন ধৰি কৈ আহিছো যে নিৰ্বাচনত প্ৰতিদ্বন্দ্বিতা কৰা প্ৰাৰ্থীজনৰ চৰিত্ৰ ভাল হ’ব লাগে আৰু তেওঁৰ ভাল ধাৰণা থাকিব লাগে আৰু তেওঁৰ ভাবমূৰ্তি পৰিষ্কাৰ হ’ব লাগে, কিন্তু আপে এই কাম কৰিব নোৱাৰিলে । সুৰা আৰু টকাৰ জালত পৰিল । তেওঁৰ (অৰবিন্দ কেজৰিৱাল) ভাবমূর্তি কলংকিত আৰু সেইবাবেই তেওঁ কম ভোট পালে ৷ মানুহে দেখিলে যে আগতে চৰিত্ৰৰ কথা কোৱা অৰবিন্দ কেজৰিৱালৰ বিৰুদ্ধে সুৰা কেলেংকাৰীৰ অভিযোগ । ৰাজনীতিত অভিযোগ উত্থাপন হয় । মানুহে নিজকে নিৰ্দোষী বুলি প্ৰমাণ কৰিব লাগিব আৰু সত্য সদায় সত্য হৈয়েই থাকে । মই ইতিমধ্যে সিদ্ধান্ত লৈছিলোঁ যে মই ৰাজনীতিত প্ৰৱেশ নকৰো আৰু এতিয়াও মই সেই সিদ্ধান্তত আছো ।’