আগন্তুক বিধানসভা নিৰ্বাচনক লৈ কংগ্ৰেছে গঠন কৰিছে বিশেষ টীম। অসমৰ বাবে স্ক্ৰীনিং কমিটীৰ অধ্যক্ষ হিচাপে দলটোৱে প্ৰিয়ংকা গান্ধী ৱাদ্ৰাক নিযুক্তি দিছে।
আগন্তুক বিধানসভা নিৰ্বাচনক লৈ সাজু হৈছে কংগ্ৰেছ। দলটোৱে অসম, কেৰালা, তামিলনাডু আৰু পশ্চিম বংগৰ বাবে নিৰ্বাচন পৰিচালনা শক্তিশালী কৰাৰ বাবে জ্যেষ্ঠ পৰ্যবেক্ষক আৰু পৰ্যবেক্ষক নিযুক্তি দিয়া হৈছে।
কংগ্ৰেছ নেতৃত্বই এই গুৰুত্বপূৰ্ণ সিদ্ধান্ত গ্ৰহণ কৰি দলটোক ৰাজ্যসমূহত সক্ৰিয় অৱস্থালৈ আনি তৃণমূল পৰ্যায়ত কৌশল তীক্ষ্ণ কৰি তুলিছে।
অসম বিধানসভা নিৰ্বাচনৰ স্ক্ৰীনিং কমিটীৰ অধ্যক্ষ হিচাপে দলটোৱে প্ৰিয়ংকা গান্ধী ৱাদ্ৰাক নিযুক্তি দিছে।আনহাতে ছত্তীশগড়ৰ প্ৰাক্তন মুখ্যমন্ত্ৰী ভূপেশ বাঘেলক জ্যেষ্ঠ নিৰ্বাচনী প্ৰভাৰী হিচাপে নিযুক্তি দিয়া হৈছে।
অসমৰ বাবে জ্যেষ্ঠ পৰ্যবেক্ষক: ভূপেশ বাঘেল আৰু পৰ্যবেক্ষক: ডি.কে. শিৱকুমাৰ, স্ক্ৰীনিং কমিটীৰ অধ্যক্ষ প্ৰিয়ংকা গান্ধী।
পশ্চিম বংগৰ নিৰ্বাচন কংগ্ৰেছৰ বাবে আটাইতকৈ প্ৰত্যাহ্বানজনক হ’বলৈ গৈ আছে।দলটোৱে ইয়াত হেৰাই যোৱা ঠাইখিনি পুনৰ দখল কৰিবলৈ জ্যেষ্ঠ নেতাৰ টীম বনাইছে।
বিগত বিধানসভা নিৰ্বাচনত কংগ্ৰেছে বংগৰ ৯২খন আসনত প্ৰাৰ্থী প্ৰক্ষেপ কৰিছিল,কিন্তু ইয়াৰ এজন প্ৰাৰ্থীও জয়ী হ’ব পৰা নাছিল।
বৰ্তমান বংগত কংগ্ৰেছৰ এখনো আসন নাই।বংগত কংগ্ৰেছে সুদীপ ৰয় বৰ্মন, শকীল আহমেদ খান, প্ৰকাশ যোশীক পৰ্যবেক্ষক হিচাপে নিযুক্তি দিছে।
জ্যেষ্ঠ নেতা মুকুল ৱাছনিক আৰু তেলেংগানাৰ নেতা উত্তম কুমাৰ ৰেড্ডীক তামিলনাডুত মিত্ৰশক্তিৰ সৈতে সমন্বয় আৰু আসন ভাগ-বতৰা কৰাৰ ক্ষেত্ৰত গুৰুত্বপূৰ্ণ ভূমিকা প্ৰদান কৰা হৈছে।
কেৰালাত যুৱ নেতৃত্ব আৰু আগ্ৰাসী প্ৰচাৰ কৌশলৰ বাবে দলটোৱে শচীন পাইলট আৰু কানহাইয়া কুমাৰৰ দৰে মুখৰ ওপৰত দায়িত্ব অৰ্পণ কৰিছে।
লগতে পঢ়ক: ছিৰিয়াছ কথাৰ বাবে নহয় ‘এন্টাৰটেইনাৰ’হে অখিল গগৈ: মুখ্যমন্ত্ৰী
