নিৰ্বাচনত শোচনীয় পৰাজয়ৰ পাছতো বিদায়ী মুখ্যমন্ত্ৰী মমতা বেনাৰ্জীয়ে তেওঁৰ পদৰ পৰা পদত্যাগ নকৰাৰ সিদ্ধান্ত গ্ৰহণ কৰিছে

পশ্চিমবংগৰ বিধানসভা নিৰ্বাচনৰ ফলাফলৰ পাছতেই ৰাজ্যখনত এক হাইভল্টেজ ৰাজনৈতিক ড্ৰামা দেখিবলৈ পোৱা গৈছে । নিৰ্বাচনত শোচনীয় পৰাজয়ৰ পাছতো বিদায়ী মুখ্যমন্ত্ৰী মমতা বেনাৰ্জীয়ে তেওঁৰ পদৰ পৰা পদত্যাগ নকৰাৰ সিদ্ধান্ত গ্ৰহণ কৰিছে । বুধবাৰে তৃণমূল কংগ্ৰেছৰ নৱ-নিৰ্বাচিত বিধায়কসকলৰ সৈতে অনুষ্ঠিত এক বৈঠকত তেওঁ এই ঘোষণা কৰে ।

জানিব পৰা মতে মমতা বেনাৰ্জীয়ে অত্যন্ত দৃঢ়তাৰে কয়, “মই পদত্যাগ নকৰো । কেন্দ্ৰই ইচ্ছা কৰিলে মোক বৰ্খাস্ত কৰিব পাৰে । মই বিচাৰো এইটো এটা ক’লা দিন হিচাপে পৰিগণিত হওক ।” নিৰ্বাচনৰ ফলাফলক লৈ প্ৰতিক্ৰিয়া প্ৰকাশ কৰি তেওঁ অভিযোগ কৰে যে এয়া কোনো নিৰ্বাচন নাছিল, বৰঞ্চ এক “অত্যাচাৰ”হে আছিল । তেওঁৰ মতে, তৃণমূলৰ প্ৰাৰ্থীসকলক জোৰকৈ পৰাস্ত কৰা হৈছে আৰু ৰাজ্যৰ ১৫০০ৰো অধিক দলীয় কাৰ্যালয় “হাইজ্যেক” কৰা হৈছে ।

নিজৰ ক্ষোভ উজাৰি বেনাৰ্জীয়ে কয় যে তেওঁক ব্যক্তিগতভাৱে হাৰাশাস্তি কৰা হৈছে আৰু আনকি শাৰীৰিকভাৱে আঘাতো কৰা হৈছে । তেওঁ পশ্চিমবংগ আৰক্ষী, চিআৰপিএফ আৰু নিৰ্বাচন আয়োগৰ বিৰুদ্ধে তীব্ৰ বিষোদগাৰ প্ৰকাশ কৰে । তেওঁৰ অভিযোগ যে নিৰ্বাচনী প্ৰক্ৰিয়াটোত প্ৰধানমন্ত্ৰী আৰু গৃহমন্ত্ৰী পোনপটীয়াকৈ জড়িত আছিল ।

মমতা বেনাৰ্জীয়ে তেওঁৰ বিধায়কসকলক বিধানসভাৰ প্ৰথম দিনটোত ক’লা কাপোৰ পিন্ধি উপস্থিত হ’বলৈ নিৰ্দেশ দিছে । তেওঁ দাবী কৰে যে নিৰ্বাচনত হাৰিলেও তেওঁ বিজেপিক “নৈতিকভাৱে” পৰাস্ত কৰিছে । ইফালে, এই নিৰ্বাচনৰ পাছত বিৰোধী ‘ইণ্ডিয়া’ (INDIA) মিত্ৰজোঁট অধিক শক্তিশালী আৰু ঐক্যবদ্ধ হোৱা বুলিও তেওঁ মন্তব্য কৰে ।

আনহাতে, ২০৭খন আসন লাভ কৰি এক ঐতিহাসিক বিজয় সাব্যস্ত কৰা বিজেপি দলে ৰাজ্যত চৰকাৰ গঠনৰ প্ৰস্তুতি তুংগত তুলিছে । পশ্চিমবংগৰ ইতিহাসত এইখনেই হ’ব প্ৰথমখন বিজেপি চৰকাৰ ।

লগতে পঢ়ক : বংগত হাইভল্টেজ ড্ৰামা : পৰাজয়ৰ পাছতো পদত্যাগ নকৰে মমতাই, কটাক্ষ শুভেন্দুৰ