বংগৰ ফাল্টা বিধানসভাৰ আসনত অনুষ্ঠিত পুনৰ নিৰ্বাচনৰ ভোটগণনাত বিজেপিৰ প্ৰাৰ্থী দেৱাংশু পাণ্ডাই বিপুল ব্যৱধানত জয়লাভ কৰিছে।
পশ্চিম বংগৰ দক্ষিণ ২৪ পৰগনা জিলাৰ ফাল্টা বিধানসভাৰ আসনত বিজেপিৰ প্ৰাৰ্থী দেৱাংশু পাণ্ডাই বিজয় নিশ্চিত কৰিছে।এইখন আসন পূৰ্বে টিএমচিৰ হাতত আছিল।ইয়াৰ লগে লগে সদনত দলটোৰ সংখ্যা ২০৮খনলৈ বৃদ্ধি হয়। ২৯ এপ্ৰিলত দ্বিতীয় পৰ্যায়ৰ ভোটগ্ৰহণত হোৱা বিসংগতিৰ মাজতে ফাল্টাত পুনৰ ভোটগ্ৰহণ হয়। পুনৰ ভোটগ্ৰহণৰ পিছত ভোট গণনাত বিজেপিয়ে ১,০৯,০২১ ভোটৰ ব্যৱধানত বিজয় পঞ্জীয়ন কৰে।
ফলাফলত চতুৰ্থ স্থানত আছিল তৃণমূল কংগ্ৰেছৰ প্ৰাৰ্থী জাহাংগীৰ খান। টিএমচিৰ প্ৰাৰ্থীগৰাকীয়ে মাত্ৰ ৭,৭৮৩টা ভোট লাভ কৰাৰ আমোদজনক কথাটো হ’ল যে, পুনৰ ভোটদান হোৱাৰ পূৰ্বেই জাহাংগীৰ খানে নিৰ্বাচনত অৱতীৰ্ণ হ’বলৈ অস্বীকাৰ কৰিছিল। ৰাজ্যত বিজেপিয়ে চৰকাৰ গঠন কৰাৰ কেইদিনমান পাছতে, খানে পুনৰ ভোটদানৰ পৰা “প্ৰত্যাহাৰ” বুলি ঘোষণা কৰিছিল আৰু সমষ্টিটোত নৱনিৰ্বাচিত মুখ্যমন্ত্ৰী শুভেন্দু অধিকাৰীৰ কাম-কাজৰ প্ৰশংসা কৰিছিল।
নিৰ্বাচনত জয় লাভ কৰি দেৱাংশু পাণ্ডাই কয় যে, “ফাল্টাৰ জনতাই বিজেপিৰ ওপৰত আশীৰ্বাদৰ বৰষুণ দিছে… মই ফাল্টাৰ জনসাধাৰণক ধন্যবাদ জনাইছো।” ইফালে ফলাফল সন্দৰ্ভত গুৰুতৰ অভিযোগ উত্থাপন কৰি প্ৰাক্তন মুখ্যমন্ত্ৰী মমতা বেনাৰ্জীয়ে কয় যে আকৌ এবাৰ ভোট চুৰি কৰা হৈছে।
চলিত মাহৰ আৰম্ভণিতে ২০২৬ চনৰ বিধানসভা নিৰ্বাচনত ২০৭ খন আসন লাভ কৰি পশ্চিম বংগত বিজেপিয়ে প্ৰথমখন চৰকাৰ গঠন কৰিছিল, য’ত শুভেন্দু অধিকাৰীয়ে মুখ্যমন্ত্ৰী হিচাপে শপত গ্ৰহণ কৰিছিল।তৃণমূল কংগ্ৰেছক ৮০খন আসনত সীমাবদ্ধ কৰি ৰখাৰ ফলত মমতা বেনাৰ্জীৰ ১৫ বছৰীয়া শাসনৰ অন্ত পৰে।
লগতে পঢ়ক: বংগত অবৈধ অনুপ্ৰৱেশকাৰীৰ বিৰুদ্ধে ডাঙৰ পদক্ষেপ: স্থাপন হ’ব বিশেষ ‘হোল্ডিং চেন্টাৰ’
