ভাৰতীয় দলটোৱে এদিনীয়া আৰু টি-২০ শৃংখলাৰ বাবে বাংলাদেশ ভ্ৰমণ কৰিব নে নকৰে সেয়া নিশ্চিত নহয়

চলিত বৰ্ষৰ ছেপ্টেম্বৰ মাহত হ’বলগীয়া আয়াৰলেণ্ড ভ্ৰমণ পিছুৱাই দিছে বাংলাদেশ ক্ৰিকেট ব’ৰ্ডে । এই সময়ছোৱাত ভাৰতীয় ক্ৰিকেট দলটোক আতিথ্য দিয়াৰ পৰিকল্পনা কৰিছে ব’ৰ্ডে । বাংলাদেশ ক্ৰিকেট ব’ৰ্ডৰ এজন বিষয়াৰ মতে, যেতিয়া ভাৰতৰ সৈতে শৃংখলা ২০২৫ চনৰ পৰা ২০২৬ চনৰ ছেপ্টেম্বৰলৈ স্থানান্তৰিত কৰা হৈছিল, তেতিয়া ক্ৰিকেট আয়াৰলেণ্ডক নতুন তাৰিখ দিবলৈ অনুৰোধ কৰা হৈছিল । আয়াৰলেণ্ড ক্ৰিকেট ব’ৰ্ডে ভ্ৰমণৰ সময়সীমা ২০২৬ লৈ পুনৰ নিৰ্ধাৰণ কৰাত অক্ষমতা প্ৰকাশ কৰে । ইয়াৰ পিছত দুয়োখন ব’ৰ্ডে পাৰস্পৰিকভাৱে শৃংখলাটো পিছুৱাই দিবলৈ সন্মত হয় । ২০২৭ চনৰ কোনোবা এটা সময়ত বাংলাদেশৰ আয়াৰলেণ্ড ভ্ৰমণ অনুষ্ঠিত হ’ব পাৰে ।

পূৰ্ব নিৰ্ধাৰিত সময়সূচী অনুসৰি ভাৰতীয় ক্ৰিকেট দলটোৱে চলিত বৰ্ষৰ ২৮ আগষ্টত বাংলাদেশত উপস্থিত হ’ব ! দলটোৱে ধাৰাবাহিকভাৱে তিনিখন এদিনীয়া আৰু তিনিখন টি-২০ মেচ খেলিব । ১, ৩, আৰু ৬ ছেপ্টেম্বৰত এদিনীয়া মেচ অনুষ্ঠিত হোৱাৰ বিপৰীতে ৯, ১২ আৰু ১৩ ছেপ্টেম্বৰত অনুষ্ঠিত হ’ব টি-২০ মেচ ।

শেহতীয়াকৈ বাংলাদেশে ঘৰুৱা মাটিত এদিনীয়া শৃংখলাত পাকিস্তানক ২-১ ব্যৱধানত পৰাস্ত কৰিছিল । শৃংখলা জয়ৰ পাছতে বাংলাদেশে আই চি চিৰ এদিনীয়া ৰেংকিঙত নৱম স্থানলৈ উন্নীত হৈছে । দলটোৱে ৭৯ ৰেটিং পইণ্ট লাভ কৰি দশম স্থানত থকা ৱেষ্ট ইণ্ডিজতকৈ আগবাঢ়ি আছে । বাংলাদেশে ২০২৭ চনৰ এদিনীয়া বিশ্বকাপৰ বাবে যোগ্যতা অৰ্জন কৰাত মনোনিৱেশ কৰিছে । পোনপটীয়াকৈ বিশ্বকাপৰ বাবে যোগ্যতা অৰ্জন কৰিবলৈ হ’লে বাংলাদেশে ২০২৭ চনৰ ৩১ মাৰ্চৰ ভিতৰত শীৰ্ষ আঠৰ ভিতৰত স্থান দখল কৰিব লাগিব । যদি দলটোৱে এই স্থান দখল কৰিব নোৱাৰে তেন্তে যোগ্যতা অৰ্জনকাৰী প্ৰতিযোগিতাত খেলিব লাগিব ।

আয়াৰলেণ্ড ভ্ৰমণ পিছুৱাই দিয়াৰ পিছত বাংলাদেশে নিউজীলেণ্ড, অষ্ট্ৰেলিয়া আৰু ভাৰতৰ বিৰুদ্ধে ঘৰুৱা শৃংখলাৰ লগতে দক্ষিণ আফ্ৰিকা আৰু জিম্বাবুৱে ভ্ৰমণত খেলিব । বিগত দিনসমূহত বাংলাদেশ আৰু ভাৰতৰ মাজত সম্পর্কত কিছু জটিলতাই দেখা দিছে ৷ বাংলাদেশে ২০২৬ চনৰ টি-২০ বিশ্বকাপ খেলিবলৈ ভাৰতলৈ অহা নাছিল আৰু বিশ্বকাপ বৰ্জন কৰিছিল ।

অৱশ্যে ভাৰতীয় দলটোৱে এদিনীয়া আৰু টি-২০ শৃংখলাৰ বাবে বাংলাদেশ ভ্ৰমণ কৰিব নে নকৰে সেয়া নিশ্চিত নহয় । যদি কোনো কাৰণত ভাৰতৰ ভ্ৰমণ পিছুৱাই দিয়া হয় তেন্তে অৰ্হতাৰ সময়সীমাৰ পূৰ্বে বাংলাদেশে সীমিত সংখ্যক এদিনীয়া মেচহে খেলিব, যাৰ ফলত বাংলাদেশৰ প্ৰত্যক্ষ বিশ্বকাপত প্ৰৱেশত বাধাৰ সৃষ্টি হ’ব পাৰে ।

লগতে পঢ়ক : বৰ্ষাপাৰাত আই পি এলৰ মহাৰণ, ৩০ মাৰ্চত ৰাজস্থান বমান চেন্নাইক লৈ ব্যাপক উৎসাহ

আয়াৰলেণ্ড ভ্ৰমণত টিম ইণ্ডিয়াৰ প্ৰথমখন মেচ ২৬ জুনত বেলফাষ্টত অনুষ্ঠিত হ’ব

২৮ মাৰ্চৰ পৰা আৰম্ভ হ’বলগীয়া আই পি এল ২০২৬ৰ প্ৰস্তুতি তুংগত । এই প্ৰতিযোগিতাৰ প্ৰথমখন খেল মুখামুখি হ’ব ৰয়েল চেলেঞ্জাৰছ বেংগালুৰু আৰু ছানৰাইজাৰ্ছ হায়দৰাবাদ । ইয়াৰ পূৰ্বে শনিবাৰে বিচিচিআইয়ে আয়াৰলেণ্ডৰ বিৰুদ্ধে দুখন খেলৰ সময়সূচী ঘোষণা কৰে । সূৰ্যকুমাৰ যাদৱৰ নেতৃত্বত ভাৰতীয় পুৰুষ দলটোৱে আয়াৰলেণ্ড ভ্ৰমণ কৰিব, দুয়োখন মেচ বেলফাষ্টত অনুষ্ঠিত হ’ব ।

আয়াৰলেণ্ড ভ্ৰমণত টিম ইণ্ডিয়াৰ প্ৰথমখন মেচ ২৬ জুনত বেলফাষ্টত অনুষ্ঠিত হ’ব । এই মেচখন ভাৰতীয় সময় অনুসৰি ৭:৩০ বজাৰ পৰা আৰম্ভ হ’ব । ২৮ জুনত অনুষ্ঠিত হ’ব ভাৰত বনাম আয়াৰলেণ্ডৰ দ্বিতীয়খন খেল । এই খেলখন বেলফাষ্টৰ চিভিল চাৰ্ভিচ ক্ৰিকেট ক্লাবত অনুষ্ঠিত হ’ব । এই খেলপথাৰত এইখন হ’ব টিম ইণ্ডিয়াৰ প্ৰথম টি-২০ মেচ, আনহাতে ভাৰতীয় দলটোৱে শেষবাৰৰ বাবে ইয়াত ২০০৭ চনত এদিনীয়া মেচ খেলিছিল ।

১ জুলাইৰ পৰা ভাৰত বনাম ইংলেণ্ডৰ টি-২০ শৃংখলা

২৮ জুনত আয়াৰলেণ্ডৰ বিৰুদ্ধে চূড়ান্ত টি-২০ মেচৰ পিছত ভাৰতীয় ক্ৰিকেট দল ইংলেণ্ডলৈ ৰাওনা হ’ব, য’ত ১ জুলাইৰ পৰা পাঁচখন খেলৰ টি-২০ শৃংখলা আৰম্ভ হ’ব । ১১ জুলাইত দ্য এজিয়াছ বাউলত অনুষ্ঠিত হ’ব টি-২০ শৃংখলাৰ অন্তিমখন খেল । অৰ্থাৎ ১৩ দিনত টিম ইণ্ডিয়াই ৭ খন টি-২০ খেলিব ।

শেহতীয়াকৈ ভাৰতে তৃতীয়বাৰৰ বাবে টি-২০ বিশ্বকাপ খিতাপ দখল কৰে । আহমেদাবাদত অনুষ্ঠিত হোৱা চূড়ান্ত মেচত নিউজীলেণ্ডক পৰাস্ত কৰি একেৰাহে দ্বিতীয়বাৰৰ বাবে টি-২০ বিশ্বকাপ জয় কৰে ভাৰতীয় দলে । সূৰ্যকুমাৰ যাদৱৰ অধিনায়কত্বত টিম ইণ্ডিয়াই ইতিহাস ৰচে আৰু ঘৰুৱা ক্ষেত্ৰত এই খিতাপ দখল কৰা প্ৰথমখন দেশ হিচাপে পৰিগণিত হয় ভাৰত । তদুপৰি ভাৰতে একেৰাহে দুখন টি-২০ বিশ্বকাপ জয় কৰা প্ৰথমটো দল হিচাপে পৰিগণিত হয় ।

লগতে পঢ়ক : বৰ্ষাপাৰাত আই পি এলৰ মহাৰণ, ৩০ মাৰ্চত ৰাজস্থান বমান চেন্নাইক লৈ ব্যাপক উৎসাহ

এই প্ৰতিযোগিতাৰ শক্তিশালী আৰু গুৰুত্বপূৰ্ণ দল কলকাতা নাইট ৰাইডাৰ্ছ এক ডাঙৰ আঘাতৰ সন্মুখীন হৈছে

আৰু মাত্ৰ কেইটামান দিনৰ পিছতেই আৰম্ভ হব ইণ্ডিয়ান প্ৰিমিয়াৰ লীগ ২০২৬ৰ সংস্কৰণ। ইতিমধ্যে ক্ৰিকেটৰ আটাইতকৈ চুটি ফৰ্মেটৰ এই উত্তেজনাপূৰ্ণ প্ৰতিযোগিতাৰ ২০২৬ৰ সংস্কৰণৰ বাবে সাজু হৈ উঠিছে আটাইকেইটা দল। লগতে আই পি এলৰ ৰোমাঞ্চকৰ তথা উত্তেজনাৰে ভৰা মেচসমূহ উপভোগৰ বাবে সাজু হৈছে ক্ৰিকেট প্ৰেমী। ইয়াৰ মাজতেই এই প্ৰতিযোগিতাৰ শক্তিশালী আৰু গুৰুত্বপূৰ্ণ দল কলকাতা নাইট ৰাইডাৰ্ছ এক ডাঙৰ আঘাতৰ সন্মুখীন হৈছে।

জানিব পৰা মতে কলকাতা দলৰ নিৰ্ভৰযোগ্য ফাষ্ট বলাৰ হৰ্ষিত ৰানা এই প্ৰতিযোগিতাৰ ২০২৬ৰ চিজনৰ পৰা সম্পূৰ্ণৰূপে বাহিৰ হৈছে। আঘাতৰ বাবে প্ৰতিযোগিতাখনৰ এই চিজনৰ পৰা বাহিৰ হ’ব লগা হৈছে ক্ৰিকেটাৰজন । শেহতীয়াকৈ টি-২০ বিশ্বকাপ ২০২৬ত দক্ষিণ আফ্ৰিকাৰ বিৰুদ্ধে অনুষ্ঠিত হোৱা প্ৰস্তুতি মেচত আঘাতপ্ৰাপ্ত হৈছিল হৰ্ষিত ।

হৰ্ষিতৰ সোঁ আঁঠুত লিগামেণ্ট ষ্ট্ৰেইন হৈছিল । ফেব্ৰুৱাৰী মাহত তেওঁৰ অস্ত্ৰোপচাৰ কৰা হৈছিল আৰু এতিয়া তেওঁৰ এক দিঘলীয়া প্ৰক্ৰিয়াৰ মাজেৰে আগবাঢ়িব লাগিব । ফলস্বৰূপে তেওঁ আই পি এল ২০২৬ত খেলিব নোৱাৰিব ।

কলকাতাৰ মুখ্য প্ৰশিক্ষক অভিষেক নায়াৰে হৰ্ষিত বাহিৰ হোৱাটোক দলৰ বাবে এক উল্লেখযোগ্য ক্ষতি বুলি অভিহিত কৰে । তেওঁ কয় যে বিগত কেইটামান ছিজনত হৰ্ষিত দলটোৰ এক গুৰুত্বপূৰ্ণ অংশ হৈ আহিছে, বিশেষকৈ চেম্পিয়নশ্বিপ ছিজনত তেওঁৰ অৱদান অতি গুৰুত্বপূৰ্ণ । নায়াৰে লগতে স্পষ্ট কৰি দিয়ে যে দলটোৱে এতিয়া নতুন বলাৰৰ সন্ধানত আছে আৰু তেওঁৰ সলনি বলাৰ সন্দৰ্ভত শীঘ্ৰে সিদ্ধান্ত লোৱা হ’ব ।

লগতে পঢ়ক : আই পি এলৰ এটা ছিজনত সৰ্বাধিক ছয় কোবোৱা শীৰ্ষ ৫ গৰাকী বেটছমেন

২৮ মাৰ্চৰ পৰা আৰম্ভ হ’ব আই পি এলৰ ২০২৬ বৰ্ষৰ সংস্কৰণ

ইণ্ডিয়ান প্ৰিমিয়াৰ লীগৰ আগন্তুক ছিজনক লৈ উৎকণ্ঠা বৃদ্ধি পাইছে । ২৮ মাৰ্চৰ পৰা আৰম্ভ হ’ব আই পি এলৰ ২০২৬ বৰ্ষৰ সংস্কৰণ । ছিজনৰ প্ৰথমখন খেল ৰয়েল চেলেঞ্জাৰছ বেংগালুৰু আৰু ছানৰাইজাৰ্ছ হায়দৰাবাদৰ মাজত অনুষ্ঠিত হ’ব । এই সংস্কৰণ আৰম্ভ হোৱাৰ পূৰ্বে এটা ছিজনত সৰ্বাধিক ছয় কোবোৱা পাঁচজন খেলুৱৈৰ বিষয়ে জানক ।

ক্ৰীছ গেইল-

এই তালিকাত শীৰ্ষস্থান দখল কৰিছে ক্ৰীছ গেইলে । এটা ছিজনত সৰ্বাধিক ছয় কোবোৱাৰ অভিলেখ তেওঁৰ হাতত আছে । ২০১২ চনত ৰয়েল চেলেঞ্জাৰ্ছ বাংগালুৰুৰ হৈ খেলি থকাৰ সময়তে গেইলে ৫৯টা ছয় কোবাইছিল । এইটোৱেই হৈছে কোনো বেটছমেনে এটা ছিজনত কোবোৱা সৰ্বাধিক ছয় । ১৪ বছৰ ধৰি এই অভিলেখ তেওঁৰ হাতত আছিল ।

আন্দ্ৰে ৰাছেল-

তালিকাত দ্বিতীয় স্থানত আছে আন্দ্ৰে ৰাছেল । কলকাতা নাইট ৰাইডাৰ্ছৰ হৈ খেলি থকাৰ সময়ত ২০১৯ চনৰ আই পি এল ছিজনত ৰাছেলে ৫২টা ছয় কোবাই । উল্লেখ্য যে ২০২৫ চনৰ ছিজনৰ পিছত কেকেআৰে ৰাছেলক ৰিলিজ কৰি দিছিল, তাৰ পিছত কেৰিবিয়ান অল-ৰাউণ্ডাৰগৰাকীয়ে প্ৰতিযোগিতাখনৰ পৰা অৱসৰ গ্ৰহণ কৰিছিল ।

ক্ৰীছ গেইল-

এই তালিকাত তিনিবাৰকৈ ক্ৰীছ গেইলৰ নাম আছে । ২০১২ চনত ৫৯টা ছয় কোবোৱাৰ পিছত গেইলে পিছৰ ছিজন ২০১৩ চনত আৰচিবিৰ হৈ খেলি থকাৰ সময়তে ৫১টা ছয় কোবাই । ইয়াৰ ফলত তেওঁ তালিকাৰ তৃতীয় স্থানত আছে ।

জোছ বাটলাৰ-

ইংৰাজ বেটছমেন জোছ বাটলাৰে ২০২২ চনৰ ছিজনত দৰ্শনীয় প্ৰদৰ্শন আগবঢ়াইছিল । ৰাজস্থানৰ হৈ খেলা বাটলাৰে ১৭খন মেচত ১৭টা ইনিংছত ৮৬৩ ৰান সংগ্ৰহ কৰিছিল । এই ছিজনত তেওঁ ৪৫টা ছয় কোবাই আই পি এলৰ এটা ছিজনত সৰ্বাধিক ছয় কোবোৱা চতুৰ্থজন বেটছমেন হিচাপে পৰিগণিত হয় ।

ক্ৰীছ গেইল-

ক্ৰীছ গেইল এই তালিকাত পাঁচ নম্বৰ স্থানতো আছে । ২০১১ চনত আৰচিবিৰ হৈ গেইলে বিস্ফোৰক বেটিং প্ৰদৰ্শন আগবঢ়াইছিল । সেই ছিজনত তেওঁ ৪৪টা ছয় কোবাইছিল ।

লগতে পঢ়ক : শুভমন গীললৈ বিচিচিআইৰ বিশেষ বঁটা, তালিকাত নাই ৰোহিত-কোহলী

২০২৭ চনৰ এদিনীয়া বিশ্বকাপৰ পূৰ্বে ভাৰতীয় ক্ৰিকেট দলৰ এদিনীয়া খেলৰ সংখ্যা বৃদ্ধি পাব পাৰে

২০২৬ বৰ্ষত ভাৰতীয় ক্ৰিকেট দলৰ আন্তঃৰাষ্ট্ৰীয় সূচী অত্যন্ত ব্যস্ত । ইয়াৰ মাজতে ভাৰতীয় ক্ৰিকেট নিয়ন্ত্ৰণ ব’ৰ্ডে (বিচিচিআই) ইয়াক আৰু অধিক ব্যস্ত কৰাৰ কথা চিন্তা কৰিছে । ২০২৭ চনৰ এদিনীয়া বিশ্বকাপৰ পূৰ্বে ভাৰতীয় ক্ৰিকেট দলৰ এদিনীয়া খেলৰ সংখ্যা বৃদ্ধি পাব পাৰে । এক প্ৰতিবেদন অনুসৰি আন কেইবাখনো ক্ৰিকেট ব’ৰ্ডে পূৰ্বতে নিৰ্ধাৰিত এদিনীয়া ভ্ৰমণত খেলৰ সংখ্যা বৃদ্ধি কৰিবলৈ বিচিচিআইক অনুৰোধ জনাইছে । এই অনুৰোধ কৰা ব’ৰ্ডসমূহৰ ভিতৰত আছে ইংলেণ্ড, নিউজীলেণ্ড, আয়াৰলেণ্ড আৰু শ্ৰীলংকা । অতিৰিক্ত এদিনীয়া মেচসমূহে এই ক্ৰিকেট ব’ৰ্ডসমূহক আৰ্থিক সুবিধা প্ৰদান কৰিব ।

ৰোহিত শৰ্মা আৰু বিৰাট কোহলীও এদিনীয়া খেলৰ সংখ্যা বৃদ্ধিৰ বাবে অনুৰোধ কৰাৰ কাৰণ । দুয়োগৰাকী কিংবদন্তি ভাৰতীয় বেটছমেনে বৰ্তমান কেৱল এদিনীয়া ফৰ্মেটতহে খেলে । আন্তঃৰাষ্ট্ৰীয় পৰ্যায়ত দুয়োটাৰে জনপ্ৰিয়তা অপৰিসীম । যদিহে এদিনীয়া মেচ বেছি হয় তেন্তে ৰোহিত আৰু বিৰাটে খেলাৰ অধিক সুযোগ পাব, যাৰ ফলত ইংলেণ্ড, নিউজীলেণ্ড, আয়াৰলেণ্ড, শ্ৰীলংকাৰ দৰে ক্ৰিকেট ব’ৰ্ড লাভান্বিত হ’ব । ৰোহিত আৰু বিৰাটে দৰ্শকৰ ক্ষমতা বৃদ্ধি কৰিব বুলি আশা কৰা হৈছে । কাৰণ ৰোহিত আৰু বিৰাটে কেৱল এদিনীয়া মেচ খেলে, সেয়েহে দৰ্শকে তেওঁলোকক যিমান পাৰে খেলা দেখিব বিচাৰে ।

আই পি এল ২০২৬ৰ পাছত ভাৰতে আফগানিস্তানৰ বিৰুদ্ধে এখন টেষ্ট আৰু তিনিখন এদিনীয়া শৃংখলা খেলিব । ইয়াৰ পিছত দলটোৱে ইংলেণ্ডলৈ গৈ তিনিখন এদিনীয়া আৰু ৫খন টি-২০ মেচত অংশগ্ৰহণ কৰিব । এই সময়ছোৱাত দলটোৱে আয়াৰলেণ্ডৰ বিৰুদ্ধে টি-২০ শৃংখলাও খেলিব পাৰে । ইংলেণ্ডৰ বিৰুদ্ধে এদিনীয়া শৃংখলাত খেলৰ সংখ্যা বৃদ্ধি পাব পাৰে বুলি খবৰ ওলাইছে যদিও বৰ্তমান স্পষ্ট নহয় ।

আগষ্ট মাহত শ্ৰীলংকাত দুখন টেষ্টৰ শৃংখলা খেলিব টিম ইণ্ডিয়াই, ইয়াৰে এখন সিংহলী স্প’ৰ্টছ ক্লাবত দিবা-নৈশ টেষ্ট হ’ব পাৰে । অৱশ্যে শ্ৰীলংকাৰ ক্ৰিকেট ব’ৰ্ডে বিচিচিআইৰ সৈতে আলোচনাত মিলিত হৈ আছে সীমিত অভাৰৰ মেচ সূচীত সংযোজন কৰিবলৈ । ইউ এ ইত বাংলাদেশ আৰু আফগানিস্তানৰ বিৰুদ্ধে শৃংখলাটোক লৈ অনিশ্চয়তাৰ বাবে ভাৰতে এই সময়ছোৱাত অতিৰিক্ত মেচ বিচাৰিব পাৰে । আয়াৰলেণ্ড ছিৰিজৰ মেচসমূহো বৰ্তমান নিৰ্ণয় হোৱা নাই ।

লগতে পঢ়ক : ফিফা বিশ্বকাপতো মধ্যপ্ৰাচ্যৰ যুদ্ধৰ প্ৰভাৱ, ইৰানে ল’লে ডাঙৰ সিদ্ধান্ত

টি-২০ বিশ্বকাপ সমাপ্ত হোৱাৰ পিছতে এতিয়া চৰ্চাত আছে আই পি এল ২০২৬ৰ সূচী

টি-২০ বিশ্বকাপৰ উন্মাদনা সমাপ্ত হোৱাৰ পিছতে এতিয়া ক্ৰিকেটপ্ৰেমী সাজু হৈছে মেগা প্ৰতিযোগিতা আই পি এলৰ বাবে । দেওবাৰে আহমেদাবাদত অনুষ্ঠত হোৱা টি-২০ বিশ্বকাপৰ ফাইনেলত নিউজীলেণ্ডক পৰাস্ত কৰি টি-২০ বিশ্বকাপ ২০২৬ৰ খিতাপ দখল কৰে ভাৰতীয় দলে । ইয়াৰ লগে লগে অন্ত পৰে টি-২০ বিশ্বকাপৰ মাহজোৰা প্ৰতীক্ষা । এতিয়া আগন্তুক আই পি এলত নিজৰ নিজৰ ফেভাৰিট দল সমূহৰ প্ৰদৰ্শন চাবলৈ উত্ৰাৱল হৈ পৰিছে অনুৰাগী ।

টি-২০ বিশ্বকাপ সমাপ্ত হোৱাৰ পিছতে এতিয়া চৰ্চাত আছে আই পি এল ২০২৬ৰ সূচী । প্ৰথম অৱস্থাত ৮ মাৰ্চত এই প্ৰতিযোগিতাৰ সূচী ঘোষণা কৰাৰ কথা আছিল । সংবাদ মাধ্যমৰ বাতৰি অনুসৰি টি-২০ বিশ্বকাপ ২০২৬ৰ ফাইনেলৰ দিনটোত সূচী প্ৰকাশ কৰাৰ কথা আছিল যদিও পৰৱৰ্তী সময়ত এই ঘোষণাৰ তাৰিখ পিছুৱাই দিয়া হয় । ইয়াৰ পিছতে ৯ মাৰ্চ তাৰিখে এই প্ৰতিযোগিতাৰ সূচী ঘোষণা কৰাৰ সম্ভাৱনা আছে বুলি চৰ্চা চলিছে ।

ইণ্ডিয়ান প্ৰিমিয়াৰ লীগৰ ২০২৬ ছিজনৰ সূচী দুটা পৰ্যায়ত প্ৰকাশ পাব পাৰে বুলিও খবৰ প্ৰকাশ পাইছে । প্ৰথম পৰ্যায়ত ১৫-২০ দিনৰ সূচী প্ৰকাশ হোৱাৰ সম্ভাৱনা আছে আৰু বাকী সময় সূচী দ্বিতীয় পৰ্যায়ত প্ৰকাশ হোৱাৰ সম্ভাৱনা আছে । ইফালে, ইয়াৰ পূৰ্বেও বিভিন্ন কাৰণত পাঁচবাৰকৈ আই পি এলৰ সূচী সলনি হৈছিল । কেতিয়া কেতিয়া এই মেগা প্ৰতিযোগিতাৰ সূচী সলনি হৈছিল জানক-

দক্ষিণ আফ্ৰিকা পাইছিলগৈ আই পি এল-

আই পি এল ভাৰতীয় লীগ, গতিকে সাধাৰণতে ভাৰততেই এই প্ৰতিযোগিতাৰ মেচসমূহ অনুষ্ঠিত হয় । অৱশ্যে ২০০৯ চনৰ আই পি এল ছিজনটো দক্ষিণ আফ্ৰিকাত ১৮ এপ্ৰিলৰ পৰা ২৪ মে’লৈ অনুষ্ঠিত হৈছিল । ইয়াৰ মূল কাৰণ আছিল ২০০৯ চনৰ লোকসভা নিৰ্বাচন । দেশজোৰা নিৰ্বাচনৰ বাবে এই প্ৰতিযোগিতা দক্ষিণ আফ্ৰিকালৈ স্থানান্তৰিত হৈছিল ।

আধা মেচ অনুষ্ঠিত হৈছিল ইউ এ ইত-

২০১৪ চনত অনুষ্ঠিত হৈছিল ইণ্ডিয়ান প্ৰিমিয়াৰ লীগৰ সপ্তম সংস্কৰণ । দেশজোৰা লোকসভা নিৰ্বাচনৰ বাবে ইউ এ ইত ১৬-৩০ এপ্ৰিলৰ পৰা আই পি এলৰ মেচ অনুষ্ঠিত হৈছিল । ইয়াৰ পিছত ২ মে’ৰ পৰা পুনৰ প্ৰতিযোগিতাখন আৰম্ভ হয় আৰু সকলো মেচ ভাৰতত অনুষ্ঠিত হয় ।

কোভিডৰ বাবে সময়সূচী সলনি-

২০২০ চনত কৰ’না মহামাৰীৰ প্ৰভাৱৰ বাবে বিচিচিআইয়ে ভাৰতত আই পি এল অনুষ্ঠিত কৰা নাছিল । ফলস্বৰূপে ১৩ সংখ্যক ছিজন আবুধাবি, ডুবাই, শ্বাৰজাহত অনুষ্ঠিত হৈছিল ।

পুনৰ আহিল কৰ’না ভাইৰাছ-

২০২১ চনত কৰ’না ভাইৰাছৰ প্ৰাদুৰ্ভাৱ কিছু পৰিমাণে কমিছিল । ইফালে ৯ এপ্ৰিলৰ পৰা আই পি এল ২০২১ৰ ছিজন আৰম্ভ হৈছিল যদিও ভাৰতত হঠাতে ক’ভিড ৰোগীৰ সংখ্যা বৃদ্ধি পোৱাৰ বাবে আই পি এলৰ মেচ বন্ধ কৰিবলগীয়া পৰিস্থিতিৰ উদ্ভৱ হয় । সেই বছৰৰ ২ ছেপ্টেম্বৰৰ পৰা এই প্ৰতিযোগিতা চলিছিল যদিও ইউ এ ইত অনুষ্ঠিত হৈছিল এই প্ৰতিযোগিতাৰ মেচ । ১৫ অক্টোবৰত ডুবাইত অনুষ্ঠিত হৈছিল ফাইনেল ।

ভাৰত-পাক যুদ্ধৰ প্ৰভাৱ-

২০২৫ বৰ্ষৰ ২২ মাৰ্চৰ পৰা আৰম্ভ হৈছিল আই পি এল । ইফালে ২২ এপ্ৰিলত পহলগামত সন্ত্ৰাসবাদী আক্ৰমণ সংঘটিত হয়, য’ত ২৬ জন নিৰীহ লোকে প্ৰাণ হেৰুৱাইছিল । ভাৰতীয় সেনাই চলোৱা অপাৰেচন সিন্দুৰৰ বাবে যুদ্ধ সদৃশ পৰিস্থিতিৰ সৃষ্টি হয়, সেয়েহে মাজভাগত সময়সূচী সলনি কৰি ৯ মে’ৰ পৰা ১৬ মে’লৈ আই পি এলৰ কোনো মেচ অনুষ্ঠিত নহ’ল ।

লগতে পঢ়ক : ‘যেতিয়াৰ পৰা মোৰ জীৱনলৈ মাহিকা আহিছে…’; খিতাপ জয়ৰ পিছতে হাৰ্দিক পাণ্ডিয়াই প্ৰেয়সীক ক’লে সৰ্বস্ব

এই প্ৰতিযোগিতাত ভাৰতীয় দল একেৰাহে দ্বিতীয়বাৰৰ বাবে চেম্পিয়ন হৈছে ।

দেওবাৰে এ চি চি মহিলা এছিয়া কাপ ৰাইজিং ষ্টাৰ্ছ ২০২৬ৰ ফাইনেলত ইণ্ডিয়া এৰ মুখামুখি হয় বাংলাদেশ এ । বেংককৰ টেৰ্ডথাই ক্ৰিকেট গ্ৰাউণ্ডত অনুষ্ঠিত হোৱা খেলখনত ইণ্ডিয়া এ ৪৬ ৰানত জয়লাভ কৰে । ইণ্ডিয়া এয়ে বাংলাদেশক জয়ৰ বাবে ১৩৫ ৰানৰ লক্ষ্য নিৰ্ধাৰণ কৰি দিছিল যদিও ১৯.১ অভাৰত ৮৮ ৰানত অল আউট হয় দলটো ।

শ্ৰীলংকা এক ৫ উইকেটত পৰাস্ত কৰি ইণ্ডিয়া এ ফাইনেলত প্ৰৱেশ কৰে । ছেমি ফাইনেলত বাংলাদেশ এয়ে পাকিস্তান এক ৫৪ ৰানত পৰাস্ত কৰে । এই প্ৰতিযোগিতাত ভাৰতীয় দল একেৰাহে দ্বিতীয়বাৰৰ বাবে চেম্পিয়ন হৈছে । ২০২৩ চনত হংকঙত অনুষ্ঠিত হোৱা এ চি চি মহিলা এছিয়া কাপ ৰাইজিং ষ্টাৰ্ছৰ প্ৰথম ছিজনত ইণ্ডিয়া এয়ে বাংলাদেশ এক ৩১ ৰানত পৰাস্ত কৰি খিতাপ দখল কৰিছিল ।

ৰান চেজত বাংলাদেশ এৰ হৈ উইকেটকীপাৰ বেটছমেন ছামিমা চুলতানাই তিনিটা চাৰিৰ সহায়ত ২০ ৰান সংগ্ৰহ কৰে । ছামিমাৰ উপৰিও কেৱল ছাৰমীন চুলতানা (১৮), ফাহিমা খাতুন (১৪), আৰু ছাদিয়া আখতাৰ (১০)হে দহকৰ ঘৰত উপনীত হয় । প্ৰেম ৰাৱটে সৰ্বাধিক তিনিটা উইকেট দখল কৰে । তনুজা কানৱাৰ আৰু ছোনিয়া মেন্ধিয়াই দুটাকৈ উইকেট দখল কৰাৰ বিপৰীতে ছাইমা ঠাকুৰ, মিন্নু মণি আৰু ৰাধা যাদৱে এটাকৈ উইকেট দখল কৰে ।

টছত জয়ী হৈ ভাৰতে প্ৰথমে বেটিং কৰিবলৈ সিদ্ধান্ত লয় আৰু ৭ উইকেটত ১৩৪ ৰান সংগ্ৰহ কৰে । ইণ্ডিয়া এৰ হৈ তেজল হাছাবনিছে ৩৪টা বলত অপৰাজিত ৫১ ৰান সংগ্ৰহ কৰে । অধিনায়ক ৰাধা যাদৱে ৩০টা বলত ৩৬ ৰানৰ অৰিহণা যোগাই, য’ত তিনিটা চাৰি আৰু এটা ছয় আছিল ।

পঞ্চম উইকেটৰ বাবে তেজল হাছাবনিছ আৰু ৰাধা যাদৱে ৬৯ ৰানৰ গুৰুত্বপূৰ্ণ অংশীদাৰিত্ব সংযোজন কৰে । অ’পেনাৰ বৃন্দা দিনেশেও (১৯ ৰান) ডাবল ফিগাৰত উপনীত হয় । বাংলাদেশ এৰ হৈ অধিনায়ক ফাহিমা খাতুনে ৪টা উইকেট দখল কৰাৰ বিপৰীতে ফাতিমা জাহান ছোনিয়া আৰু ফাৰ্জানা ইছমিনে এটাকৈ উইকেট দখল কৰে ।

প্ৰতিযোগিতাখনত ইণ্ডিয়া এৰ আৰম্ভণি দুৰ্বল আছিল । প্ৰথমখন মেচত সংযুক্ত আৰব আমিৰশ্বাহী (ইউ এ ই)ৰ হাতত ৭ উইকেটত পৰাস্ত হৈছিল দলটো । ইয়াৰ পিছতে ইণ্ডিয়া এয়ে পাকিস্তান এক ৮ উইকেটত পৰাস্ত কৰে । গ্ৰুপৰ অন্তিমখন খেলত নেপালৰ বিৰুদ্ধে ৭ উইকেটত জয়লাভ কৰি ইণ্ডিয়া এ ছেমি ফাইনেলৰ স্থান নিশ্চিত কৰে ।

পাকিস্তান এ, নেপাল আৰু সংযুক্ত আৰব আমিৰশ্বাহীৰ সৈতে ইণ্ডিয়া-এ দলে এ গ্ৰুপত স্থান লাভ কৰিছিল । গ্ৰুপ বিত থাইলেণ্ড, মালয়েছিয়া, বাংলাদেশ এ, আৰু শ্ৰীলংকা এ আছিল । গ্ৰুপ এৰ পৰা ভাৰত-এ আৰু পাকিস্তান-এ, আৰু গ্ৰুপ বি-ৰ পৰা বাংলাদেশ-এ আৰু শ্ৰীলংকা-এ, ছেমিফাইনেলত প্ৰৱেশ কৰে । ২০ ফেব্ৰুৱাৰীত অনুষ্ঠিত হৈছিল ছেমিফাইনেল ।

লগতে পঢ়ক : বৰষুণৰ বাবে পৰিত্যক্ত চুপাৰ-৮ৰ প্ৰথমখন মেচ, বাতিল নিউজীলেণ্ড-পাকিস্তানৰ খেল

এই মেচতে তাৰকা বেটছমেন স্মৃতি মন্ধানাই অষ্ট্ৰেলিয়াৰ বিৰুদ্ধে এক উজ্জ্বল ইনিংছেৰে এক নতুন অভিলেখ গঢ়িবলৈ সক্ষম হয় ।

চলি থকা টি-২০ শৃংখলাত ভাৰতৰ ওচৰত আত্মসমৰ্পণ কৰিছে অষ্ট্ৰেলিয়া দলে । শনিবাৰে অনুষ্ঠিত হোৱা শৃংখলাৰ তৃতীয় তথা নিৰ্ণায়ক মেচত ১৭ ৰানত বিজয় সাব্যস্ত কৰে ভাৰতীয় দলে । ইফালে এই মেচতে ভাৰতীয় দলৰ তাৰকা বেটছমেন স্মৃতি মন্ধানাই অষ্ট্ৰেলিয়াৰ বিৰুদ্ধে এক উজ্জ্বল ইনিংছেৰে এক নতুন অভিলেখ গঢ়িবলৈ সক্ষম হয় ।

২১ ফেব্ৰুৱাৰীত এডিলেইড অভেলত অনুষ্ঠিত হৈছিল এই মেচখন । প্ৰথমে বেটিং কৰি ভাৰতে ২০ অভাৰত ৬ উইকেটৰ বিনিময়ত ১৭৬ ৰান সংগ্ৰহ কৰে । ইয়াৰ প্ৰত্যুত্তৰত অষ্ট্ৰেলিয়াই মাত্ৰ ১৫৯ ৰানহে সংগ্ৰহ কৰিবলৈ সক্ষম হয়  আৰু ভাৰতে ১৭ ৰানত খেলখনত জয়লাভ কৰি শৃংখলা হস্তগত কৰে ।

এই জয়েৰে টিম ইণ্ডিয়াই ঘৰুৱা মাটিত অষ্ট্ৰেলিয়াক ২-১ ব্যৱধানত পৰাস্ত কৰে । মন্ধানাই ৫৫টা বলত ৮২ ৰানৰ বিস্ফোৰক ইনিংছ খেলে । তেওঁৰ এই ইনিংছত ৮টা চাৰি আৰু ৩টা ছয় আছিল । তেওঁৰ এই ইনিংছ দলটোৰ বাবে গুৰুত্বপূৰ্ণ বুলি প্ৰমাণিত হয় ।

৬ বছৰীয়া অভিলেখ ভংগ মন্ধানাৰ-

অষ্ট্ৰেলিয়াত এগৰাকী ভাৰতীয় বেটছমেনে সৰ্বাধিক ব্যক্তিগত স্ক’ৰ সংগ্ৰহত মন্ধানাই ৬ বছৰীয়া অভিলেখ ভংগ কৰে । ইয়াৰ পূৰ্বে ২০২০ চনত মেলবৰ্ণ ক্ৰিকেট খেলপথাৰত ৩৭টা বলত ৬৬ ৰান সংগ্ৰহ কৰিছিল তেওঁ । ৮২ ৰান সংগ্ৰহ কৰি এতিয়া অষ্ট্ৰেলিয়াৰ মাটিত ভাৰতীয় মহিলা বেটছমেনৰ সৰ্বাধিক ব্যক্তিগত স্ক’ৰ ৰেকৰ্ড কৰিছে মন্ধানাই ।

ইয়াৰ লগে লগে তেওঁ ৩৩ সংখ্যক টি-২০ আন্তঃৰাষ্ট্ৰীয় অৰ্ধশতকো সম্পূৰ্ণ কৰে । অষ্ট্ৰেলিয়াৰ বিৰুদ্ধে এইটোৱেই আছিল মন্ধানাৰ অষ্টমটো ৫০+ স্ক’ৰ, যিটো নিজৰ বাবেই এক অভিলেখ ।

অ’পেনিঙৰ চতুৰ্থ বলত এটা চাৰিৰে মন্ধানাই ইনিংছৰ আৰম্ভণি কৰে । তৃতীয় অভাৰত মাত্ৰ ৭ ৰান সংগ্ৰহ কৰি শ্বেফালী বাৰ্মাক আউট হয় । ইয়াৰ পাছত মন্ধানাই দায়িত্বশীল ইনিংছেৰে জেমিমাহ ৰড্ৰিগোজৰ সৈতে ৮২টা বলত দ্বিতীয় উইকেটৰ বাবে ১২১ ৰানৰ এক উজ্জ্বল অংশীদাৰিত্ব গঢ়ে ।

পাৱাৰপ্লেৰ অন্তিম অভাৰত মন্ধানাই ছফী মলিনেক্সৰ বলত একেৰাহে তিনিটা চাৰি কোবাই । ৩৮ বলত এটা ছয়ৰে অৰ্ধশত সংগ্ৰহ কৰে মন্ধানাই ।

লগতে পঢ়ক : দক্ষিণ আফ্ৰিকাৰ বিৰুদ্ধে মেচৰ পূৰ্বে বিপদত ভাৰতীয় দল, আঘাতপ্ৰাপ্ত এইগৰাকী তাৰকা খেলুৱৈ