আমেৰিকাৰ এফ-১৮ যুদ্ধ বিমান ভূপতিত কৰা বুলি দাবী কৰিছে ইৰাণৰ ইছলামিক ৰিভল্যুচনেৰী গাৰ্ড কৰ্পছে

ইৰাণৰ ইছলামিক ৰিভল্যুচনেৰী গাৰ্ড কৰ্পছে আমেৰিকাৰ এফ-১৮ যুদ্ধ বিমান ভূপতিত কৰা বুলি দাবী কৰিছে । ইৰাণৰ সংবাদ মাধ্যমৰ মতে, দেশখনৰ বায়ু প্ৰতিৰক্ষা ব্যৱস্থাই এই কাৰ্য সংঘটিত কৰে আৰু শেহতীয়াকৈ সামৰিক উত্তেজনাৰ মাজতে ইয়াক এক বৃহৎ সফলতা বুলি অভিহিত কৰিছে তেওঁলোকে । অৱশ্যে এই দাবী এতিয়াও নিশ্চিত হোৱা নাই । ইয়াৰ পূৰ্বে আই আৰ জি চিয়ে এফ-১৫ৰ দৰে আমেৰিকাৰ যুঁজাৰু বিমানক ভূপতিত কৰাৰ দাবী কৰিছিল, যাক আমেৰিকাৰ চেণ্ট্ৰেল কমাণ্ডে “ভিত্তিহীন” বুলি উলাই কৰিছিল ।

এই ঘটনা সন্দৰ্ভত আমেৰিকা বা ইয়াৰ পশ্চিম এছিয়াৰ মিত্ৰ ৰাষ্ট্ৰৰ পৰা কোনো আনুষ্ঠানিক নিশ্চয়তা পোৱা হোৱা নাই । ইফালে চলি থকা আমেৰিকা-ইৰাণৰ উত্তেজনাৰ সময়ত আমেৰিকাৰ সামৰিক লোকচানৰ সন্দৰ্ভত নতুন তথ্য ওলাইছে । বিভিন্ন বাতৰি অনুসৰি এতিয়ালৈকে আমেৰিকাই প্ৰায় ১৮খন সামৰিক বিমান হেৰুৱাইছে । এখন এফ-৩৫ যুঁজাৰু বিমানো ক্ষতিগ্ৰস্ত হোৱাৰ খবৰ পোৱা গৈছে ।

সৰ্বাধিক লোকচান হৈছে ড্ৰোনৰ । বাৰখন ইউ এছ এম কিউ-৯ ৰিপাৰ ড্ৰোন ধ্বংস কৰা হৈছে । এম কিউ-৯ ৰিপাৰ হৈছে দীৰ্ঘ দূৰত্বৰ নিৰীক্ষণ আৰু নিখুঁত আক্ৰমণৰ বাবে ব্যৱহাৰ কৰা এক অত্যাধুনিক ড্ৰোন । ই হেলফায়াৰ মিছাইলেৰে সজ্জিত আৰু ই প্ৰায় ২৭ ঘণ্টা ধৰি আকাশত থাকিব পাৰে ।

লগতে পঢ়ক : ঈদ পালন কৰি উভতি অহা ২৩ জনৰ সৈতে শোকাৱহ ঘটনা, কেইবাজনো সন্ধানহীন

ইৰানে শনিবাৰে ভাৰত মহাসাগৰত থকা আমেৰিকা আৰু ব্ৰিটেইনৰ যৌথ সামৰিক ঘাটি ডিয়েগো গাৰ্চিয়ালৈ দুটা বেলিষ্টিক মিছাইল নিক্ষেপ কৰে

মধ্যপ্ৰাচ্যত চলি থকা যুদ্ধই পুনৰ ভয়ংকৰ ৰূপ ধাৰণ কৰিছে । ইৰানে শনিবাৰে ভাৰত মহাসাগৰত অৱস্থিত আমেৰিকা আৰু ব্ৰিটেইনৰ কৌশলগত সামৰিক ঘাটি ডিয়েগো গাৰ্চিয়াত দুটা মধ্যম দূৰত্বৰ বেলিষ্টিক ক্ষেপণাস্ত্ৰৰে আঘাত কৰে । আক্ৰমণৰ লগে লগে ডুবাইত এয়াৰ ডিফেন্স চিষ্টেম সক্ৰিয় কৰা হয় আৰু তীব্ৰ বিস্ফোৰণৰ শব্দ শুনা যায় । উল্লেখ্য যে, ৪ মাৰ্চত আমেৰিকাৰ এখন ছাবমেৰিনে ইৰানৰ যুদ্ধজাহাজ আইৰিছ ডেনাক আক্ৰমণ কৰি ধ্বংস কৰাৰ ফলত জাহাজখনত থকা ৮৫ জনতকৈ অধিক লোকৰ মৃত্য হয় । ইয়াৰ পিছতে ভাৰত মহাসাগৰত যুদ্ধৰ এই তীব্ৰতা বৃদ্ধি পোৱা পৰিলক্ষিত হৈছে ।

ৱাল ষ্ট্ৰীট জাৰ্নেলৰ তথ্য অনুসৰি ইৰানে শনিবাৰে ভাৰত মহাসাগৰত থকা আমেৰিকা আৰু ব্ৰিটেইনৰ যৌথ সামৰিক ঘাটি ডিয়েগো গাৰ্চিয়ালৈ দুটা বেলিষ্টিক মিছাইল নিক্ষেপ কৰে । ইৰানৰ ভূখণ্ডৰ পৰা প্ৰায় ৪ হাজাৰ কিলোমিটাৰ দূৰত্বত অৱস্থিত এই ঘাটিটোৰ বিৰুদ্ধে এতিয়ালৈকে হোৱা এয়া আটাইতকৈ ডাঙৰ আৰু বিৰল আক্ৰমণ । অৱশ্যে ইৰানে নিক্ষেপ কৰা দুয়োটা ক্ষেপণাস্ত্ৰ আকাশতে ধ্বংস কৰা বুলি নিশ্চিত কৰিছে আমেৰিকাই ।

জানিব পৰা মতে উৰণৰ পিছতে এটা ক্ষেপণাস্ত্ৰ নিস্ক্ৰিয় হোৱাৰ বিপৰীতে আনটো ক্ষেপণাস্ত্ৰ আমেৰিকাৰ যুদ্ধজাহাজৰ পৰা নিক্ষেপ কৰা ইন্টাৰচেপ্টৰ (এছ এম-৩)ৰ দ্বাৰা মাজ আকাশতে ধ্বংস হয় ।

চাগোছ দ্বীপপুঞ্জত অৱস্থিত ডিয়েগো গাৰ্চিয়া হৈছে আমেৰিকা-ব্ৰিটেইনৰ এটা গুৰুত্বপূৰ্ণ সামৰিক ঘাটি যিটো আফগানিস্তান আৰু ইৰাকত আমেৰিকাৰ বোমা আক্ৰমণৰ হাব হিচাপে ব্যৱহাৰ কৰা হৈছে ।

ইফালে ইৰানে ডিয়েগো গাৰ্চিয়াক লক্ষ্য কৰি লোৱাৰ পিছতে সামৰিক বিশেষজ্ঞসকলৰ মাজত উদ্বেগ বৃদ্ধি পাইছে । এতিয়ালৈকে ইৰানৰ ক্ষেপণাস্ত্ৰৰ পৰিসৰ সীমিত বুলি ধাৰণা কৰা হৈছিল যদিও ৪০০০ কিলোমিটাৰ দূৰৰ পৰা আক্ৰমণ চলোৱাৰ চেষ্টাই ইংগিত দিয়ে যে তেহৰাণৰ হাতত এতিয়া ইউৰোপৰ লক্ষ্য কৰি লোৱাৰ ক্ষমতা আছে । পেন্টাগনে এতিয়াও আনুষ্ঠানিক বিবৃতি প্ৰকাশ কৰা নাই যদিও কৌশলবিদসকলৰ মতে ইয়াৰ ফলত যুদ্ধৰ ভূগোল সম্পূৰ্ণৰূপে সলনি হৈছে ।

আনহাতে ইৰানৰ বৈদেশিক মন্ত্ৰী ছেইদ আব্বাছ আৰাঘচিয়ে ব্ৰিটিছ প্ৰধানমন্ত্ৰী কেইৰ ষ্টাৰমাৰক তীব্ৰ সমালোচনা কৰিছে । আৰাঘচিয়ে কয় যে ষ্টাৰমাৰে নিজৰ মানুহৰ ইচ্ছাৰ বিৰুদ্ধে গৈ ইৰানৰ বিৰুদ্ধে আগ্ৰাসনৰ বাবে ব্ৰিটিছ ঘাটি ব্যৱহাৰ কৰিবলৈ অনুমতি দিছে ।

তেওঁ সকীয়াই দিয়ে যে ইয়াৰ ফলত ব্ৰিটিছ নাগৰিকৰ জীৱন বিপন্ন হৈছে আৰু ইৰানে আত্মৰক্ষাৰ অধিকাৰ প্ৰয়োগ কৰিব । ইৰানৰ মতে ব্ৰিটেইনৰ এই পদক্ষেপে দেশখনক পোনপটীয়াকৈ যুদ্ধলৈ টানি আনিছে ।

লগতে পঢ়ক : চিকিৎসালয়ত আক্ৰমণ কাপুৰুষোচিত কাৰ্যঃ পাকিস্তানক কঠোৰ নিন্দা ভাৰতৰ

মধ্যপ্ৰাচ্যৰ তয়াময়া যুদ্ধৰ মাজতে এইবাৰ এই উত্তেজনাত প্ৰৱেশ ঘটিছে ইৰাণৰ ডান্সিং মিছাইলৰ । এই ক্ষেপণাস্ত্ৰ এতিয়া ইজৰাইল-আমেৰিকাৰ মূৰৰ কামোৰণি হৈ পৰিছে । আমেৰিকা-ইজৰাইলৰ অত্যধুনিক বায়ু প্ৰতিৰক্ষা প্ৰণালীকো এই মিছাইলে ধূলি দিবলৈ সক্ষম হৈছে ।

ইৰাণ, আমেৰিকা আৰু ইজৰাইলৰ মাজৰ সংঘাতত এটা নতুন অস্ত্ৰৰ আৱিৰ্ভাৱ হৈছে । ইৰাণৰ নতুন ব্ৰহ্মাস্ত্ৰ হিচাবে গণ্য কৰা এই ক্ষেপণাস্ত্ৰক ‘ডান্সিং মিছাইল’ বুলি অভিহিত কৰা হৈছে । চলি থকা যুদ্ধত ইৰাণে প্ৰথমবাৰৰ বাবে ইয়াক ব্যৱহাৰ কৰিছিল আৰু ই ইজৰাইল-আমেৰিকাৰ ঘাটিসমূহৰ যথেষ্ট ক্ষতিসাধন কৰিছিল । এই মিছাইলে তীব্ৰ বেগত ‘নাচি নাচি’ লক্ষ্যৰ দিশে আগবাঢ়ি যায়, যাৰ ফলত আধুনিক বায়ু প্ৰতিৰক্ষা ব্যৱস্থা, যেনে আইৰন ড’ম, পেট্ৰিয়াট বা থাড আদিয়ে ইয়াক বাধা দিয়াত অক্ষম হৈ পৰে । ইৰাণে ইয়াক ‘চেজিল-২’ বুলি উল্লেখ কৰিলেও বিশ্বই ইয়াক ‘ডান্সিং মিছাইল’ বুলি অভিহিত কৰিছে । এই মিছাইলৰ আগত আমেৰিকা আৰু ইজৰাইল সম্পূৰ্ণ অসহায় হৈ পৰা পৰিলক্ষিত হৈছে ।

উল্লেখ্য যে, চেজিল-২ হৈছে ইৰাণৰ থলুৱা প্ৰযুক্তি ব্যৱহাৰ কৰি নিৰ্মাণ কৰা দুটা ষ্টেজৰ চলিড অথবা গোটা ইন্ধনযুক্ত মধ্যম দূৰত্বৰ বেলিষ্টিক মিছাইল (এম আৰ বি এম)। ইয়াৰ দৈৰ্ঘ্য প্ৰায় ১৮ মিটাৰ আৰু ওজন প্ৰায় ২৩,৬০০ কিলোগ্ৰাম । ইয়াৰ ৰেঞ্জ ২০০০ কিলোমিটাৰ পৰ্যন্ত । ই ৭০০ৰ পৰা ১০০০ কিলোগ্ৰাম ওজনৰ ৱাৰহেড কঢ়িয়াব পাৰে, যি সাধাৰণ বা পাৰমাণৱিকো হ’ব পাৰে ।

ইয়াক মোবাইল লঞ্চাৰৰ পৰা নিক্ষেপ কৰিব পাৰি । যাৰ ফলত ইয়াক দ্ৰুতভাৱে আৰু যিকোনো স্থানৰ পৰা নিক্ষেপ কৰিব পৰা যায় । ইয়াৰ গোটা ইন্ধনৰ বাবেই ইয়াক উৎক্ষেপণৰ বাবে প্ৰস্তুতি চলাবলৈ মাত্ৰ কেইমিনিটমান সময় লাগে । আনহাতে পূৰ্বে পুৰণি প্ৰক্ৰিয়াত তৰল ইন্ধনযুক্ত ক্ষেপণাস্ত্ৰৰ বাবে ঘণ্টাৰ পিছত ঘণ্টা সময় লাগে । ইয়াৰ আটাইতকৈ স্বকীয় বৈশিষ্ট্য হ’ল ইয়াৰ মেনুভাৰেবল ৰি-এণ্ট্ৰি ভেহিকেল (MarRV), যি উৰণৰ সময়ত দিশ সলনি কৰিবলৈ সক্ষম ।

এই মিছাইল বতাহত নাচি নাচি যাত্ৰা কৰে বাবে ইয়াক ‘ডান্সিং মিছাইল’ বুলি অভিহিত কৰা হৈছে । বায়ুমণ্ডলত পুনৰ প্ৰৱেশ কৰাৰ লগে লগে ইয়াৰ ৱাৰহেডে তীব্ৰ বেগত দিশ সলনি কৰি ওপৰলৈ তললৈ, বাওঁ আৰু সোঁফালে ঘূৰি যায় । ফলস্বৰূপে বায়ু প্ৰতিৰক্ষা ব্যৱস্থাসমূহে প্ৰতিক্ৰিয়া প্ৰকাশ কৰিবলৈ মাত্ৰ কেইছেকেণ্ডমানহে সময় পায় ।

আইৰন ডম বা পেট্ৰিয়টৰ দৰে ব্যৱস্থাই ইয়াক অনুসৰণ কৰিব নোৱাৰে কাৰণ ই অভাৱনীয়ভাৱে গতি কৰে । ইৰাণৰ সংবাদ মাধ্যম আৰু বিশেষজ্ঞসকলে ইয়াক ‘অপ্ৰতিৰোধ্য’ বুলি অভিহিত কৰিছে । ইয়াৰ গতি অত্যন্ত বেছি—প্ৰায় ১৭,০০০ কিলোমিটাৰ প্ৰতি ঘণ্টা ।

চেজিল-২ৰ আক্ৰমণত ইজৰাইল আৰু আমেৰিকাৰ কেইবাটাও সামৰিক ঘাটিৰ ক্ষতিসাধন হৈছে । এই আঘাতে টেল আভিভক জোকাৰি যায় আৰু বিমানবন্দৰ আৰু ৰাডাৰ ব্যৱস্থাৰ ক্ষতিসাধন হয় । আমেৰিকাৰ ঘাটিসমূহো যথেষ্ট প্ৰভাৱিত হয় । এই মিছাইলৰ ক্ষমতাই ৯০%তকৈ অধিক এয়াৰ প্ৰতিৰক্ষা ব্যৱস্থাক ধূলি দিবলৈ সক্ষম ।

ইফালে এই মিছাইলৰ এটা ইউনিটৰ খৰচো অতি কম, তথাপিও ই ব্যয়বহুল প্ৰতিৰক্ষা ব্যৱস্থাক ধূলি দিবলৈ সক্ষম । ইয়াৰ ফলত ইৰাণৰ মনোবল বৃদ্ধি পাইছে, একে সময়তে আমেৰিকা আৰু ইজৰাইল ডাঙৰ লোকচানৰ সন্মুখীন হৈছে ।

লগতে পঢ়ক : অকলশৰীয়া হৈ পৰিল ট্ৰাম্প; সহায়ৰ বাবে অস্বীকাৰ জাপান-অষ্ট্ৰেলিয়াৰ