দুয়োখন জাহাজ পাৰস্য উপসাগৰৰ পৰা ভাৰতলৈ ৰাওনা হৈছে আৰু শীঘ্ৰেই যুদ্ধবিধ্বস্ত হৰমুজ প্ৰণালী অতিক্ৰম কৰিব
পশ্চিম এছিয়াত চলি থকা সংঘাতৰ মাজতে ভাৰতৰ বাবে কিছু সকাহ । দুখনকৈ এল পি জি টেংকাৰ “পাইন গেছ” আৰু “জগ বসন্ত” পাৰস্য উপসাগৰৰ পৰা ভাৰতলৈ ৰাওনা হৈছে আৰু শীঘ্ৰেই যুদ্ধবিধ্বস্ত হৰমুজ প্ৰণালী অতিক্ৰম কৰিব । শেহতীয়া খবৰ অনুসৰি জাহাজ দুখনে নিজৰ পৰিচয় পৰীক্ষা কৰোৱাৰ পিছত হৰমুজ প্ৰণালী পাৰ হ’বলৈ সাজু হৈছে ।
পশ্চিম এছিয়াত যুদ্ধ আৰম্ভ হোৱাৰ পিছত উপসাগৰীয় অঞ্চলত আবদ্ধ হৈ থকা ভাৰতৰ পতাকা থকা ২২খন জাহাজৰ ভিতৰত এই দুখন জাহাজ অন্যতম । ইৰাণ আৰু ওমানৰ মাজত হৰমুজ প্ৰণালী হৈছে এক অতি গুৰুত্বপূৰ্ণ সাগৰীয় পথ, যাৰ মাজেৰে উপসাগৰীয় দেশসমূহৰ তেল আৰু গেছ বিশ্বজুৰি পৰিবহ হয় । ইয়াৰ পূৰ্বে প্ৰায় ৯২,৭১২ টন এল পি জি কঢ়িয়াই অনা “শিৱালিক” আৰু “নন্দা দেৱী” নামৰ দুখন জাহাজে গুজৰাটৰ মুন্দ্ৰা আৰু কণ্ডলা বন্দৰত নিৰাপদে উপস্থিত হৈছিল । দুয়োখন জাহাজেই দেশৰ বাবে প্ৰায় এদিনৰ বাবে প্ৰয়োজনীয় ৰন্ধন গেছ কঢ়িয়াই আনিছিল ।
যুদ্ধ আৰম্ভ হোৱাৰ সময়ত মুঠ ২৮খন ভাৰতীয় জাহাজ হৰমুজ প্ৰমালীত, ২৪খন পশ্চিম অংশত আৰু চাৰিখন পূব অংশত আৱদ্ধ হৈ আছিল । যোৱা কিছুদিনত দুয়োপক্ষৰ পৰা দুখনকৈ জাহাজ নিৰাপদে যাত্ৰা কৰিবলৈ সক্ষম হৈছে । ১৬ মাৰ্চত শিৱালিক জাহাজখন মুন্দ্ৰা বন্দৰত উপস্থিত হোৱাৰ বিপৰীতে ১৭ মাৰ্চত কণ্ডলাত উপস্থিত হয় নন্দা দেৱী । ইফালে ৮০,৮৮৬ টন খাৰুৱা তেল কঢ়িয়াই অনা তেল টেংকাৰ “জাগ লড়কী” ১৮ মাৰ্চত মুন্দ্ৰাত উপস্থিত হয় । আন এখন টেংকাৰ “জগ প্ৰকাশ” ওমানৰ পৰা আফ্ৰিকা অভিমুখে ৰাওনা হয় আৰু নিৰাপদে হৰমুজ প্ৰণালী পাৰ হৈ তাঞ্জানিয়া অভিমুখে ৰাওনা হৈছে ।
লগতে পঢ়ক : হৰমুজ প্ৰণালীত অৱৰোধ গ্ৰহণযোগ্য নহয়ঃ লোকসভাৰ পৰা বিশ্ববাসীলৈ প্ৰধানমন্ত্ৰী মোদীৰ বাৰ্তা
