ইৰাণৰ ভূ-ভাগৰ ভিতৰত এসপ্তাহজোৰা স্থল অভিযানৰ ব্লুপ্ৰিণ্টো প্ৰস্তুত কৰিছে পেন্টাগনে
পশ্চিম এছিয়াত চলি থকা সংঘাতে অধিক বিপজ্জনক ৰূপ লোৱাৰ ইংগিত দিছে । শেহতীয়া খবৰ অনুসৰি আমেৰিকাৰ মেৰিন কৰ্পছৰ প্ৰথম ‘এক্সপিডিশেনেৰী ইউনিট’ (৩১ নং এম ই ইউ) মধ্যপ্ৰাচ্যত উপস্থিত হৈছে ।
ইৰাণৰ ভূ-ভাগৰ ভিতৰত এসপ্তাহজোৰা স্থল অভিযানৰ ব্লুপ্ৰিণ্টো প্ৰস্তুত কৰিছে পেন্টাগনে । আমেৰিকাৰ প্ৰতিৰক্ষা মুখ্য কাৰ্যালয় পেন্টাগনে ইৰাণত সম্ভাৱ্য স্থল সামৰিক অভিযানৰ প্ৰস্তুতি তীব্ৰতৰ কৰি তুলিছে । এই অঞ্চলত আমেৰিকাই ৩৫০০ৰো অধিক সৈন্য মোতায়েন কৰিছে ।
আমেৰিকাৰ বিষয়াসকলৰ উদ্ধৃতি দি ৱাশ্বিংটন পোষ্টে দাবী কৰিছে যে পেন্টাগনে কেইবা সপ্তাহ ধৰি স্থল অভিযানৰ পৰিকল্পনা কৰিছে । ইয়াৰ ভিতৰত বিশেষ অভিযান বাহিনী আৰু গতানুগতিক পদাতিক বাহিনীও থাকিব পাৰে । অৱশ্যে চূড়ান্ত সিদ্ধান্ত এতিয়াও আমেৰিকাৰ ৰাষ্ট্ৰপতি ট্ৰাম্পৰ হাতত আছে ।
ইফালে আমেৰিকাৰ চেণ্ট্ৰেল কমাণ্ডে নিশ্চিত কৰিছে যে আমেৰিকাৰ নৌসেনাৰ যুদ্ধজাহাজ ইউ এছ এছ ট্ৰিপলি প্ৰায় ২৫০০ মেৰিনক লৈ মধ্যপ্ৰাচ্যত উপস্থিত হৈছে । জাহাজখনে ৩১ নং মেৰিন এক্সপেডিচনেৰী ইউনিটৰ জোৱান কঢ়িয়াই নিছে । এই ইউনিটটো পূৰ্বে জাপানত নিয়োজিত হৈ টাইৱানৰ আশে-পাশে অনুশীলন চলাই আছিল যদিও প্ৰায় দুসপ্তাহ পূৰ্বে মধ্যপ্ৰাচ্যলৈ যোৱাৰ নিৰ্দেশ দিয়া হৈছিল ।
ইউ এছ এছ ট্ৰিপলিত পৰিবহণ বিমান, অত্যাধুনিক ষ্ট্ৰাইক যুঁজাৰু বিমান (এফ-৩৫), আৰু প্ৰত্যক্ষ সাগৰৰ পৰা স্থললৈ আক্ৰমণ কৰিব পৰা আক্ৰমণাত্মক সঁজুলিও কঢ়িয়াই নিয়া হৈছে ।
ৱাশ্বিংটন পোষ্টৰ তথ্য অনুসৰি আমেৰিকাৰ বিষয়াসকলে এতিয়া ইৰাণৰ ভিতৰত বিশেষ অভিযান আৰু গতানুগতিক পদাতিক সৈন্যৰ দ্বাৰা অভিযান চলাবলৈ পৰিকল্পনা কৰিছে । এই স্থল অভিযানৰ বাবে ট্ৰাম্পে এতিয়াও চূড়ান্ত অনুমোদন দিয়া নাই যদিও ৮২ নং এয়াৰবৰ্ণ ডিভিজনৰ হাজাৰ হাজাৰ সৈন্যই ছান ডিয়েগোৰ পৰা ৰাওনা হৈছে ।
লগতে পঢ়ক : বিশ্ব বাণিজ্যত আন এক আঘাত! হৰমুজৰ পিছত সংকটৰ সন্মুখীন আন এক গুৰুত্বপূৰ্ণ সাগৰীয় পথ
