বিহাৰ নিৰ্বাচনৰ দ্বিতীয় পৰ্যায়ৰ ভোটগ্ৰহণ

১১ নৱেম্বৰ, মঙলবাৰে বিহাৰ নিৰ্বাচনৰ দ্বিতীয় তথা অন্তিম পৰ্যায়ৰ ভোটগ্ৰহণ অনুষ্ঠিত হ’ব । ২০খন জিলাৰ ১২২খন বিধানসভাৰ আসনৰ বাবে অনুষ্ঠিত হ’ব দ্বিতীয় পৰ্যায়ৰ ভোটগ্ৰহণ । ইতিমধ্যে দেওবাৰে অন্ত পৰিছে দ্বিতীয় পৰ্যায়ৰ নির্বাচনৰ প্রচাৰ অভিযান । অন্তিম দিনটোত দুৱাৰে দুৱাৰে গৈ ভোটাৰক সাক্ষাৎ কৰে প্ৰাৰ্থীসকলে ।

বিহাৰ নিৰ্বাচনৰ অন্তিম পৰ্যায়ত ৰাষ্ট্ৰীয় জনতা দলৰ ১২২ গৰাকী আৰু মহাগঠবন্ধনৰ ১২৬ গৰাকী প্ৰাৰ্থীৰ ভাগ্য ই ভি এমত বন্দী হ’ব । ইয়াৰ ভিতৰত বিজেপিৰ ৫৩ জন, জে ডি ইউৰ ৪৪ জন, এল জে পি-ৰাম বিলাসৰ ১৫ জন, ৰাষ্ট্ৰীয় লোক মৰ্চাৰ ৪ জন আৰু হামৰ ৬ জন প্ৰাৰ্থী আছে । দ্বিতীয় পৰ্যায়ৰ ভোটগ্ৰহণত আৰ জে ডিৰ ৭০ জন, কংগ্ৰেছৰ ৩৭ জন, ভি আই পিৰ ৮ জন, চি পি আইৰ ৪ জন, চি পি আই এম এলৰ ৬ জন আৰু চি পি আইৰ ১ জন প্ৰাৰ্থীৰ ভাগ্য নিৰ্ণয় কৰিব ভোটাৰে । ইফালে দ্বিতীয় পৰ্যায়ৰ ভোটগ্ৰহণত জনসূৰাজ পাৰ্টিৰ ১২০ গৰাকী প্ৰাৰ্থীৰ নিৰ্ণয় হ’ব ভাগ্য ।

নিৰ্ণয় হ’ব এইসকল হাইপ্ৰফাইল নেতাৰ ভাগ্য-

দ্বিতীয় পৰ্যায়ৰ ভোটগ্ৰহণত প্ৰাক্তন উপ-মুখ্যমন্ত্ৰী তাৰকিশোৰ প্ৰসাদ, ৰেণু দেৱী, মন্ত্ৰী বিজেন্দ্ৰ যাদৱ, নীতিশ মিশ্ৰ, প্ৰেম কুমাৰ, কৃষ্ণনন্দন পাছৱান, প্ৰমোদ কুমাৰ, শীলা মণ্ডল, লেশী সিং, জয়ন্ত ৰাজ, কংগ্ৰেছৰ ৰাজ্যিক সভাপতি ৰাজেশ ৰাম, এলজেপি ৰাম বিলাসৰ ৰাজ্যিক সভাপতি ৰাজু তিৱাৰী, জ্যেষ্ঠ আৰজেডি নেতা উদয় নাৰায়ণ চৌধুৰী, আৰ এল এছ পিৰ মুৰব্বী উপেন্দ্ৰ কুশৱাহাৰ পত্নী স্নেহলতা, কংগ্ৰেছ বিধায়িনী দলৰ নেতা শকীল আহমেদ খানৰ দৰে দ্বিগজ নেতাৰ ভাগ্য বন্দী হ’ব ই ভি এমত ।

পৰিৱৰ্তন নিশ্চিতঃ তেজস্বী

দ্বিতীয় পৰ্যায়ৰ ভোটদানৰ পূৰ্বে ৰাষ্ট্ৰীয় জনতা দলৰ নেতা তেজস্বী যাদৱে কয় যে প্ৰথম পৰ্যায়ৰ পিছত এন ডি এ শিবিৰত গভীৰ দুখৰ পৰিৱেশৰ সৃষ্টি হৈছে । এইবাৰ পৰিৱৰ্তন নিশ্চিত, গতিকে একাংশই আনকি আমালৈ ফোন কৰা লোকৰ স্ক্ৰীণশ্বটো প্ৰেৰণ কৰিছে । বিহাৰ চৰকাৰৰ সৎ বিষয়াসকলে অৱসৰপ্ৰাপ্ত বিষয়াৰ হেঁচাত নপৰাকৈ সংবিধান অনুসৰি নিজৰ কৰ্তব্য পালন কৰিব লাগে ।

এন ডি এয়ে বৃহৎ জয় লাভ কৰিবঃ সম্ৰাট চৌধুৰী

বিহাৰৰ জনসাধাৰণ সম্পূৰ্ণৰূপে এন ডি এৰ পক্ষত আছে । ১১ নৱেম্বৰৰ নিৰ্বাচনত এন ডি এয়ে বৃহৎ জয় লাভ কৰিব বুলি দাবী কৰে সম্ৰাট চৌধুৰীয়ে । তাৰাপুৰ বিধানসভাৰ প্ৰাৰ্থী সম্ৰাট চৌধুৰীয়ে ১১ নৱেম্বৰত জনসাধাৰণক বৃহৎ সংখ্যকত ভোটদান কৰি উন্নয়ন, নিৰাপত্তা আৰু স্থিতিশীলতাৰ বাবে এন ডি এ চৰকাৰ পুনৰ প্ৰতিষ্ঠা কৰিবলৈ আহ্বান জনায় । বিজেপিৰ শাসনকালত কৰ্মসংস্থাপন, শিক্ষা, উদ্যোগীকৰণৰ ক্ষেত্ৰত ব্যাপক কাম কৰা হৈছে বুলি মন্তব্য কৰে সম্ৰাট চৌধুৰীয়ে । বিৰোধী দলক আক্ৰমণ কৰি সম্ৰাট চৌধুৰীয়ে কয় যে এয়া গণতন্ত্ৰ, ৰাজতন্ত্ৰ নহয় । কোনো পৰিয়ালে নহয় কোন ৰজা হ’ব সেইটো ৰাইজে সিদ্ধান্ত ল’ব ।

লগতে পঢ়ক : সকলো শিক্ষানুষ্ঠানতে বাধ্যতামূলক হ’ব বন্দে মাতৰমঃ চৰকাৰৰ নিৰ্দেশনা

প্ৰথম পৰ্যায়ৰ ভোটগ্ৰহণৰ মাজতে বিহাৰত প্ৰধানমন্ত্ৰী মোদী

বিহাৰত প্ৰথম পৰ্যায়ৰ ভোটগ্ৰহণৰ মাজতে আৰৰিয়াত এক সভাত ভাষণ প্ৰদান কৰে প্ৰধানমন্ত্ৰী নৰেন্দ্ৰ মোদীয়ে । এই সময়চোৱাত তেওঁ মহাগঠবন্ধনক তীব্ৰ সমালোচনা কৰে । তেওঁ কয় যে কংগ্ৰেছ-আৰজেডিৰ মিত্ৰজোঁটৰ কেৱল দেশৰ নিৰাপত্তাই নহয়, বিশ্বাসৰ প্ৰতিও কোনো চিন্তা নাই । তেওঁলোকে আমাৰ সংস্কৃতি আৰু বিশ্বাসক অসন্মান কৰে ।

ৰাহুল গান্ধীৰ নাম নোলোৱাকৈয়ে প্ৰধানমন্ত্ৰী মোদীয়ে কয় যে কংগ্ৰেছৰ নেতাসকলে বিহাৰলৈ আহি ছঠী মাইয়া পূজাক নাটক বুলি কয় । এয়া ছঠি মাইয়াৰ অপমান নহয় নেকি ?  এয়া আমাৰ বিশ্বাসৰ অপমান । যেতিয়া এনেবোৰ কথা কোৱা হয় তেতিয়া নিমাত হৈ পৰে আৰজেডি ।

প্ৰধানমন্ত্ৰী মোদীয়ে কয় যে এই একেখিনি কংগ্ৰেছ নেতাই কুম্ভৰ সময়ত স্নান কৰাক উপহাস কৰিছিল । তেওঁলোকে ৰাম মন্দিৰৰ বিৰোধিতা কৰে । তেওঁলোকে ৰামক বিশ্বাস নকৰে । তেওঁলোকৰ বিশ্বাস নাই । প্ৰাণ প্ৰতিষ্ঠাত তেওঁলোক উপস্থিত নাছিল । ভোট বেংকৰ ৰাজনীতিৰ বাবে তেওঁলোকে ভগৱান ৰামক ঘৃণা কৰে ।

প্ৰধানমন্ত্ৰী মোদীয়ে কয়, “মোৰ আৰু এটা প্ৰশ্ন আছে । য’ত ভগৱান ৰামৰ মন্দিৰ নিৰ্মাণ হৈছে তাত নিশাদ ৰাজ জীৰ মন্দিৰো আছে । বাল্মিকীৰ বাবেও মন্দিৰ আছে । মাতা সবৰীৰ মন্দিৰো আছে । ভগৱান ৰামৰ ওপৰত তেওঁলোকৰ খং আছে । তেওঁৰ ওচৰলৈ নাযাব, কিন্তু অন্ততঃ আন ঠাইলৈটো যাওক ।”

“আকৌ এবাৰ এন ডি এ চৰকাৰ”

প্ৰধানমন্ত্ৰী নৰেন্দ্ৰ মোদীয়ে ৰাজহুৱা সভাত ভাষণ দি কয়, “আজি প্ৰথম পৰ্যায়ৰ ভোটগ্ৰহণ চলি আছে । সমগ্ৰ বিহাৰৰ পৰা ছ’চিয়েল মিডিয়াত আচৰিত ধৰণৰ ছবি দেখিবলৈ পোৱা গৈছে, পুৱাৰে পৰা ভোটকেন্দ্ৰত শাৰী পাতিছে । বিহাৰৰ যুৱক-যুৱতীসকলৰ মাজত অভূতপূৰ্ব উৎসাহ । যিসকলে এতিয়াও ভোট দিয়া নাই, যিসকলে ঘৰৰ পৰা ওলাই যোৱা নাই, তেওঁলোকক অতি সোনকালে ভোটদান কৰিবলৈ বিনম্ৰ অনুৰোধ জনাইছো । আজি সমগ্ৰ বিহাৰত এটা কণ্ঠই গুঞ্জৰিত হৈছে- আকৌ এবাৰ এন ডি এ চৰকাৰ ।”

প্ৰধানমন্ত্ৰী নৰেন্দ্ৰ মোদীয়ে কয়, “জংগল ৰাজে ১৫ বছৰ বিহাৰত শাসন কৰিছিল, ১৯৯০ চনৰ পৰা ২০০৫ চনলৈকে । জংগল ৰাজে বিহাৰ ধ্বংস কৰিছিল । চৰকাৰ চলোৱাৰ নামত কেৱল লুটপাত কৰা হৈছিল । জংগলৰাজৰ সেই ১৫ বছৰত বিহাৰত কিমান এক্সপ্ৰেছৱে নিৰ্মাণ কৰা হৈছিল ? শূন্য ।”

তেওঁ কয়, “কিছুদিন পূৰ্বে মই কংগ্ৰেছ-আৰাজেডিৰ কাজিয়া উদঙাই দিছিলো । বিবাদ তীব্ৰতৰ হৈ পৰিছে । কংগ্ৰেছে আৰজেডিৰ বিৰুদ্ধে নিজৰ উপ-মুখ্যমন্ত্ৰী পদৰ প্ৰাৰ্থীক থিয় কৰাইছে । সংবাদ মাধ্যমৰ সাক্ষাৎকাৰ দি আৰজেডিৰ জংগলৰাজ উদঙাই দিছে । তেওঁলোকে কৈছে যে এই জংগলৰাজত দলিত, মহাদলিত আৰু অত্যন্ত পিছপৰা শ্ৰেণীয়ে সৰ্বাধিক অত্যাচাৰ ভোগ কৰিছে । এতিয়া কেৱল নিৰ্বাচন, যেতিয়া ফলাফল ওলাব, তেতিয়া তেওঁলোকে ইজনে সিজনৰ চুলি ছিঙিবলৈ আৰম্ভ কৰিব ।”

লগতে পঢ়ক : পূৰণ হ’ব নে জনপ্ৰতিনিধি হোৱাৰ সপোন ? আজি ই ভি এমত বন্দী হ’ব আনন্দ মিশ্ৰৰ ভাগ্য

বিহাৰত মুখ্যমন্ত্ৰী হিমন্ত বিশ্ব শৰ্মাৰ নিৰ্বাচনী প্ৰচাৰ

আজি বিহাৰত প্ৰথম পৰ্যায়ৰ ভোটগ্ৰহণৰ বাবে নিৰ্বাচনী প্ৰচাৰৰ অন্তিম দিন । এই প্ৰচাৰত সকলো ৰাজনৈতিক দলে নিজৰ পূৰ্ণ শক্তি প্ৰয়োগ কৰিছে । অসমৰ মুখ্যমন্ত্ৰী তথা বিজেপিৰ তাৰকা প্ৰচাৰক হিমন্ত বিশ্ব শৰ্মাই ছিৱানত মিত্ৰজোঁটৰ প্ৰাৰ্থীৰ সমৰ্থনত ৰঘুনাথপুৰত এখন ৰাজহুৱা সভাত আজি ভাষণ প্ৰদান কৰে । হিমন্ত বিশ্ব শৰ্মাই কয় যে ৰাজ্যৰ সকলো ওছামা বিন লাডেনক নিৰ্মূল কৰিব লাগিব । এই বক্তব্যৰে অসমৰ মুখ্যমন্ত্ৰীগৰাকীয়ে আৰ জে ডিৰ প্ৰাৰ্থী তথা চাহাবুদ্দিনৰ পুত্ৰ ওছামা চাহাবক লক্ষ্য কৰি লয় ।

মুখ্যমন্ত্ৰী হিমন্ত বিশ্ব শৰ্মাই কয়, “ৰঘুনাথপুৰলৈ অহাৰ আগতে মই ভাবিছিলো যে ইয়াত ভগৱান ৰাম, লক্ষ্মণ আৰু মাতৃ সীতাক দেখা পাম । কিন্তু মোক কোৱা হৈছিল যে ইয়াত বহুতো ৰাম, লক্ষ্মণ আৰু সীতা আছে, কিন্তু এজন ওছামাও আছে । মই সুধিলোঁ, ওছামা কোন ? এই ওছামা পূৰ্বৰ ওছামা বিন লাডেনৰ দৰে । আমি নিশ্চিত কৰিব লাগিব যে এজনো ওছামা বিন লাডেন যাতে নাথাকে । ওছামাৰ পিতৃ আছিল শ্বাহাবুদ্দিন ।” আৰ জে ডিৰ প্ৰাৰ্থী ওছামা চাহাবৰ নাম নোলোৱাকৈয়ে অসমৰ মুখ্যমন্ত্ৰীগৰায়ে তেওঁক ওছামা বিন লাডেনৰ লগত তুলনা কৰে । মুখ্যমন্ত্ৰী ড০ শৰ্মাই কয় যে এই দেশৰ সকলো ওছামাক এটা এটাকৈ নিৰ্মূল কৰিব লাগিব । তেওঁ কয় যে এই দেশ ৰাম-সীতাৰ ভূমি, ওছামা বিন লাডেনৰ দৰে কোনোবা এজনৰ আধিপত্য কেতিয়াও গ্ৰহণযোগ্য নহয় ।

উল্লেখ্য যে, ছিৱানৰ ৰঘুনাথপুৰ সমষ্টিৰ পৰা আৰ জে ডিৰ টিকটত প্ৰতিদ্বন্দ্বিতা আগবঢ়াইছে ওছামা চাহাবে । জন সুৰজ পাৰ্টিৰ টিকটত ৰাহুল কীৰ্তিয়ে প্ৰতিদ্বন্দ্বিতা কৰাৰ বিপৰীতে জে ডি ইউয়ে বিকাশ কুমাৰ সিঙক মনোনীত কৰিছে । ৰঘুনাথপুৰক ওছামাৰ পিতৃ তথা ছাহাবুদ্দিনৰ দুৰ্গ হিচাপে গণ্য কৰা হয় । ওছামাৰ বিৰুদ্ধে অপৰাধমূলক গোচৰো ৰুজু হৈছে । আৰ জে ডিয়ে ওছামাক টিকট দিয়াৰ সিদ্ধান্তক লৈ যথেষ্ট বিতৰ্কৰ সৃষ্টি হৈছে, সমালোচকসকলে আৰ জে ডিৰ সিদ্ধান্তক লৈ প্ৰশ্ন উত্থাপন কৰিছে ।

লগতে পঢ়ক : কেতিয়া দাখিল হ’ব জুবিন গাৰ্গৰ মৃত্যুৰ তদন্তৰ চাৰ্জশ্বীট ? মুখ্যমন্ত্ৰীৰ ডাঙৰ ঘোষণা