আহমেদাবাদৰ বিমান দুৰ্ঘটনাৰ তদন্ত কৰি থকা তদন্তকাৰীসকল এই সিদ্ধান্তত উপনীত হৈছে যে এই দুৰ্ঘটনা কোনো কাৰিকৰী বিজুতিৰ বাবে হোৱা নাছিল, বৰঞ্চ এয়া আছিল এটা ইচ্ছাকৃত কামৰ পৰিণতি ।

আহমেদাবাদত এয়াৰ ইণ্ডিয়াৰ বিমান দুৰ্ঘটনাৰ তদন্ত কৰি থকা তদন্তকাৰীসকল এই সিদ্ধান্তত উপনীত হৈছে যে এই দুৰ্ঘটনা কোনো কাৰিকৰী বিজুতিৰ বাবে হোৱা নাছিল, বৰঞ্চ এয়া আছিল এটা ‘উদ্দেশ্যপ্ৰণোদিত কাৰ্য’ৰ পৰিণতি । ইটালীয়ান দৈনিক বাতৰি কাকত ‘Corriere della Sera’ই নতুন দিল্লী আৰু ৱাশ্বিংটনৰ মাজত হোৱা শেহতীয়া বাৰ্তালাপৰ বিষয়ে অৱগত দুটা সূত্ৰৰ উদ্ধৃতি দি এই প্ৰতিবেদন প্ৰকাশ কৰিছে । অৱশ্যে, এ সন্দৰ্ভত ডিজিচিএ (DGCA)ৰ অফিচিয়েল ৰিপৰ্ট এতিয়ালৈকে প্ৰকাশ পোৱা নাই ।

প্ৰতিবেদন অনুসৰি ভাৰতীয় তদন্তকাৰী এই সিদ্ধান্তত উপনীত হৈছে যে ২০২৫ চনৰ ১২ জুনত ইঞ্জিনৰ ফিউল কাট অফৰ পিছত সংঘটিত হোৱা দুৰ্ঘটনাটো যান্ত্ৰিক বিজুতিৰ বাবে নহয়, ইচ্ছাকৃতভাৱে কৰা কাৰ্যকলাপৰ বাবেহে সংঘটিত হৈছে । এতিয়া বিষয়াসকলে নিজৰ চূড়ান্ত প্ৰতিবেদনৰ খচৰা প্ৰস্তুত কৰাৰ প্ৰস্তুতি চলাইছে । কাকতখনে আৰু কয় যে তদন্তত সহায় কৰা আমেৰিকাৰ বিশেষজ্ঞসকলে এই তথ্যসমূহক “বৃহৎ অগ্ৰগতি” বুলি অভিহিত কৰিছে ।

উল্লেখ্য যে, আহমেদাবাদ বিমানবন্দৰৰ পৰা উৰা মৰা এয়াৰ ইণ্ডিয়া বয়িং ৭৮৭ ড্ৰিমলাইনাৰ খন উৰণৰ কেইছেকেণ্ডমানৰ পিছতে দুৰ্ঘটনাত পতিত হৈছিল । এই ঘটনাত বিমানখনে খুন্দা মৰা মেডিকেল ছাত্র হোষ্টেলৰ ভিতৰৰ আৱাসী আৰু যাত্ৰীকে ধৰি মুঠ ২৬০ জন লোক নিহত হয় । মাত্ৰ এজন বিমান যাত্ৰীহে এই দুৰ্ঘটনাৰ পৰা ৰক্ষা পৰে ।

ভাৰতৰ বিমান দুৰ্ঘটনা অনুসন্ধান ব্যুৰো (AAIB) য়ে ২০২৫ চনৰ জুলাই মাহত প্ৰকাশ কৰা এক প্ৰাৰম্ভিক প্ৰতিবেদনত এজন পাইলটে ইন্ধন নিয়ন্ত্ৰণ বন্ধ কৰাৰ বিষয়ে শেষৰ ককপিট কথোপকথনৰ কথা উল্লেখ কৰা হৈছে । ককপিটৰ ভয়েচ ৰেকৰ্ডিঙত এজন পাইলটে সোধা শুনা যায়, “আপুনি ইন্ধন কিয় বন্ধ কৰিলে ?” আনজনে উত্তৰ দিয়ে, “মই কৰা নাছিলো ।”

ইটালীৰ কাকতখনে এই বিৱৰণী পুনৰবাৰ উল্লেখ কৰে । প্ৰতিবেদনত দাবী কৰা হৈছে যে এতিয়া তদন্তকাৰীয়ে বিশ্বাস কৰে যে এজন পাইলটে ইঞ্জিনৰ ইন্ধন নিয়ন্ত্ৰণ চুইচটো বন্ধ কৰি দিয়াৰ ফলত বিমানখনে শক্তি হেৰুৱাই আৰু দুৰ্ঘটনাগ্ৰস্ত হয় । কেপ্তেইন সুমিত সভাৰৱাল পাইলট ইন কমাণ্ড, ফাৰ্ষ্ট অফিচাৰ ক্লাইভ কুণ্ডাৰ বিমানখনৰ সহ-পাইলট আছিল ।

নতুন প্ৰতিবেদনত আৰু কোৱা হৈছে যে, “দায়িত্ব এতিয়াও স্পষ্ট নহয় । মূল সন্দেহযুক্ত ব্যক্তিজন হৈছে কেপ্তেইন সুমিত সভাৰৱাল, দুৰ্ঘটনাৰ পিছত যি হতাশাত ভুগি থকা বুলি পোহৰলৈ আহিছিল ।”

এএআইবিৰ প্ৰাৰম্ভিক তদন্তৰ পিছতে সভাৰৱালৰ পিতৃয়ে অভিযোগ খাৰিজ কৰি নতুন তদন্তৰ দাবী জনায়, পুত্ৰৰ মানসিক স্বাস্থ্যৰ জল্পনা-কল্পনাও খাৰিজ কৰে । বিবাহ বিচ্ছেদৰ প্ৰতিবেদনকে ধৰি ব্যক্তিগত সমস্যাই পুত্ৰৰ উদ্বেগ বা হতাশাৰ সৃষ্টি কৰা বুলি তেওঁ অস্বীকাৰ কৰে তেওঁ ।

লগতে পঢ়ক : আকাশমাৰ্গত অধিক শক্তিশালী হ’ব ভাৰত; ১১৪খন অত্যাধুনিক ৰাফেল বিমান ক্ৰয়ৰ বৃহৎ সিদ্ধান্ত

হেলিকপ্টাৰ বা বিমান দুৰ্ঘটনাত প্ৰাণ হেৰুওৱা উল্লেখযোগ্য ব্যক্তিৰ তালিকাত সংযোজন হ’ল অজিত পাৱাৰৰ নাম । জানক বিমান দুৰ্ঘটনাত দেশে হেৰুওৱা কেইগৰাকীমান উল্লেখযোগ্য ব্যক্তিৰ বিষয়ে ।

মহাৰাষ্ট্ৰৰ পুনে জিলাৰ বাৰামাটিত বিমান দুৰ্ঘটনাত মৃত্যু হৈছে ৰাজ্যখনৰ উপ-মুখ্যমন্ত্ৰী অজিত পাৱাৰৰ । তেওঁৰ সৈতে বিমানখনত থকা আন পাঁচজন লোকৰো মৃত্যু হৈছে বুলি বাতৰিত প্ৰকাশ । এন চি পিৰ নেতা অজিত পাৱাৰ (৬৬) সহ আন লোক কঢ়িয়াই অনা বিমানখন বাৰামাটিৰ ৰাণৱেৰ সমীপত ক্ৰেচ-লেণ্ড হোৱাৰ ফলত সংঘটিত হয় এই দুৰ্ঘটনা । মাত্ৰ কেইমাহমানৰ পূৰ্বে দেশত সংঘটিত হোৱা এক বৃহৎ বিমান দুৰ্ঘটনাৰ পিছতে এই খবৰে শোকাহত কৰিছে দেশবাসীক ।

আহমেদাবাদৰ পৰা লণ্ডনলৈ যোৱা বয়িং ৭৮৭ ড্ৰিমলাইনাৰ বিমান দুৰ্ঘটনাগ্ৰস্ত হোৱাৰ খবৰে কেৱল ভাৰততে নহয় সমগ্ৰ বিশ্বতে শোকৰ ছাঁ পেলাইছিল । উৰণৰ কিছু মুহূৰ্তৰ পিছতে আহমেদাবাদৰ মেঘনীনগৰ অঞ্চলৰ এটা আৱাসিক অট্টালিকাত খুন্দা মৰাৰ ফলত বিমানখন দুৰ্ঘটনাগ্ৰস্ত হয় । এই দুৰ্ঘটনাটোৱে বিশ্বজুৰি শোক লহৰৰ সৃষ্টি কৰে । কেইবাখনো দেশৰ নেতাই এই শোকাৱহ দুৰ্ঘটনাক লৈ গভীৰ শোক প্ৰকাশ কৰাৰ লগতে নিহত পৰিয়াললৈ সমবেদনা জ্ঞাপন কৰে । এয়াৰ ইণ্ডিয়াৰ বিমানখনৰ এই দুৰ্ঘটনাত মৃত্যু হোৱো লোকৰ তালিকাত গুজৰাটৰ প্ৰাক্তন মুখ্যমন্ত্ৰী বিজয় ৰূপানীও আছিল ।

বুধবাৰে বাৰামাটি বিমান দুৰ্ঘটনাই দেশবাসীৰ মনত পুনৰ সজীৱ কৰিছে পুৰণি কৰুণ স্মৃতি । ইয়াৰ পূৰ্বে সংঘটিত হোৱা এই বিমান আৰু হেলিকপ্টাৰ দুৰ্ঘটনাটো দেশে হেৰুৱাইছিল বিভিন্ন ক্ষেত্ৰৰ কেইবাজনো বিশিষ্ট ব্যক্তি ।

হোমি ভাবা-

১৯৬৬ চনৰ ২৪ জানুৱাৰীৰ দিনটোত ভাৰতবাসীয়ে কেতিয়াও পাহৰিব নোৱাৰে । কিয়নো এই দিনটোতে এক ভয়ংকৰ বিমান দুৰ্ঘটনাত দেশে হেৰুৱাইছিল ভাৰতৰ পাৰমাণৱিক বিজ্ঞানৰ পিতৃ হোমি জাহাংগীৰ ভাবাক ।

ভাৰতৰ আগশাৰীৰ পাৰমাণৱিক পদাৰ্থবিজ্ঞানী হোমি জাহাংগীৰ ভাবাৰ ১৯৬৬ চনৰ ২৪ জানুৱাৰীত এয়াৰ ইণ্ডিয়া ফ্লাইট ১০১ৰ এক হৃদয়বিদাৰক দুৰ্ঘটনাত মৃত্যু হয় । এই দুৰ্ঘটনাটোৱে ভাৰতৰ পাৰমাণৱিক কাৰ্যসূচীৰ স্থপতিগৰাকীক মাত্ৰ ৫৬ বছৰ বয়সতে কাঢ়ি নিয়ে ।

সঞ্জয় গান্ধী-

প্ৰাক্তন প্ৰধানমন্ত্ৰী ইন্দিৰা গান্ধীৰ পুত্ৰ, প্ৰাক্তন সংসদ সদস্য সঞ্জয় গান্ধীৰ ১৯৮০ চনৰ ২৩ জুনত এক বিমান দুৰ্ঘটনাত মৃত্যু হয় । নতুন দিল্লীৰ চফদৰজং বিমানবন্দৰত সংঘটিত হোৱা এই দুৰ্ঘটনাই প্ৰাণ কাঢ়ি নিয়ে সঞ্জয়ৰ । সঞ্জয় গান্ধীয়ে পুৱা ট্ৰেইনি বিমানত উৰা মাৰিছিল । তেওঁ নিজেই বিমানখন উৰুৱাইছিল আৰু এটা সময়ত তেওঁৰ বিমানখন নিয়ন্ত্ৰণৰ বাহিৰলৈ গৈ দুৰ্ঘটনাগ্ৰস্ত হৈছিল । মৃত্যুৰ সময়ত তেওঁৰ বয়স আছিল মাত্ৰ ৩৩ বছৰ ।

মাধৱৰাও সিন্ধিয়া-

কংগ্ৰেছ নেতা তথা প্ৰাক্তন কেন্দ্ৰীয় মন্ত্ৰী মাধৱৰাও সিন্ধিয়াৰ ২০০১ চনৰ ৩০ ছেপ্টেম্বৰত উত্তৰ প্ৰদেশৰ মইনপুৰীৰ ওচৰত সংঘটিত হোৱা এক বিমান দুৰ্ঘটনাত মৃত্যু হৈছিল । মাধৱৰাও সিন্ধিয়াই দিল্লীৰ পৰা উত্তৰ প্ৰদেশৰ কানপুৰলৈ এখন চাৰ্টাৰ্ড বিমানত ৰাজনৈতিক সমাৱেশত ভাষণ দিবলৈ গৈ আছিল । উৰণৰ কিছু সময়ৰ পাছতে উত্তৰ প্ৰদেশৰ মইনপুৰী জিলাৰ মটলা গাঁৱৰ সমীপত বেয়া বতৰ আৰু কাৰিকৰী বিজুতিৰ বাবে তেওঁৰ বিমানখন দুৰ্ঘটনাগ্ৰস্ত হয় । এই দুৰ্ঘটনাত সিন্ধিয়াৰ লগতে এগৰাকী সাংবাদিক, পাইলট, সহ-পাইলটৰো মৃত্যু হয় ।

অ’ পি জিন্দাল আৰু সুৰেন্দ্ৰ সিং-

হাৰিয়ানাৰ শক্তি মন্ত্ৰী, উদ্যোগপতি অ’ পি জিন্দাল আৰু ৰাজ্যখনৰ কৃষি মন্ত্ৰী তথা প্ৰাক্তন মুখ্যমন্ত্ৰী বংশীলালৰ পুত্ৰ সুৰেন্দ্ৰ সিঙৰো এক হেলিকপ্টাৰ দুৰ্ঘটনাই প্ৰাণ কাঢ়িছিল । ২০০৫ চনৰ ৩১ মাৰ্চত উত্তৰ প্ৰদেশৰ চাহাৰনপুৰৰ পেডু গাঁৱৰ সমীপত সংঘটিত হৈছিল এই দুৰ্ঘটনা ।  

হাৰিয়ানাৰ কৃষি আৰু ৰাজহ মন্ত্ৰী সুৰেন্দ্ৰ সিং দিল্লীৰ পৰা কিং হেলিকপ্টাৰেৰে চণ্ডীগড়লৈ উভতি আহিছিল । চাহাৰনপুৰৰ সমীপত চিকিৎসাজনিত জৰুৰীকালীন অৱস্থাৰ বাবে জৰুৰী অৱতৰণৰ চেষ্টা চলাওঁতে হেলিকপ্টাৰখন কাৰিকৰী সমস্যাৰ সন্মুখীন হৈ দুৰ্ঘটনাগ্ৰস্ত হয় । এই দুৰ্ঘটনাত হাৰিয়ানাৰ শক্তি মন্ত্ৰী অ’ পি জিন্দাল আৰু পাইলটকে ধৰি তিনিজন লোকৰ মৃত্যু হয় ।

ৱাই এছ ৰাজশেখৰ ৰেড্ডী-

অন্ধ্ৰ প্ৰদেশৰ তেতিয়াৰ মুখ্যমন্ত্ৰী, কংগ্ৰেছৰ জ্যেষ্ঠ নেতা ৱাই এছ ৰাজশেখৰ ৰেড্ডীৰ ২০০৯ চনৰ ৩ ছেপ্টেম্বৰত সংঘটিত হোৱা এক হেলিকপ্টাৰ দুৰ্ঘটনাত মৃত্যু হৈছিল । অন্ধ্ৰ প্ৰদেশৰ তেতিয়াৰ মুখ্যমন্ত্ৰীগৰাকীয়ে হায়দৰাবাদৰ পৰা চিত্তুৰ জিলাৰ এক অনুষ্ঠানলৈ চৰকাৰী হেলিকপ্টাৰেৰে আহিছিল । উৰণৰ সময়ত তেওঁৰ হেলিকপ্টাৰখনে ৰাডাৰৰ সৈতে যোগাযোগ হেৰুৱাই পেলায় । ধাৰাসাৰ বৰষুণ আৰু বেয়া বতৰৰ বাবে হেলিকপ্টাৰখন নল্লামালাৰ ঘন অৰণ্যত দুৰ্ঘটনাগ্ৰস্ত হয় । দুৰ্ঘটনাটোত ৱাই এছ ৰাজশেখৰ ৰেড্ডীকে ধৰি পাঁচজন যাত্ৰীৰ মৃত্যু হয় ।

দৰ্জী খাণ্ডু-

২০১১ চনৰ ৩০ এপ্ৰিলত হেলিকপ্টাৰ দুৰ্ঘটনাত দেশে হেৰুৱাইছিল আন এগৰাকী ৰাজনীতিকক । অৰুণাচল প্ৰদেশৰ টাৱাঙত সংঘটিত হোৱা এই দুৰ্ঘটনাত ৰাজ্যখনৰ তেতিয়াৰ মুখ্যমন্ত্ৰী দৰ্জী খাণ্ডুৰ মৃত্যু হৈছিল ।

পৱন হংস এ এছ ৩৫০ বি ৩ হেলিকপ্টাৰেৰে টাৱাঙৰ পৰা ইটানগৰলৈ গৈ আছিল অৰুণাচল প্ৰদেশৰ মুখ্যমন্ত্ৰী দৰ্জী খাণ্ডু । উৰণৰ প্ৰায় ২০ মিনিটৰ পাছত হেলিকপ্টাৰখনৰ যোগাযোগ হেৰুৱাই পেলায় । ধাৰাসাৰ বৰষুণ আৰু বেয়া বতৰৰ বাবে হেলিকপ্টাৰখন চেলা পাছৰ সমীপত ১৩ হাজাৰ ফুট উচ্চতাত দুৰ্ঘটনাগ্ৰস্ত হয় । ঘটনাৰ প্ৰায় চাৰিদিন পিছত ২০১১ চনৰ ৪ মে’ত মুখ্যমন্ত্ৰী, দুজন পাইলট, এজন নিৰাপত্তা বিষয়া আৰু আন এজন ব্যক্তিকে ধৰি পাঁচোটা মৃতদেহ উদ্ধাৰ কৰা হয় ।

বিপিন ৰাৱাট-

এক শোকাৱহ হেলিকপ্টাৰ দুৰ্ঘটনাত মৃত্যু হৈছিল ভাৰতৰ প্ৰথমগৰাকী চিডিএছ জেনেৰেলৰ । ২০২১ চনৰ ৮ ডিচেম্বৰত তামিলনাডুৰ কুনুৰত বিশ্ব কঁপাই যোৱা এই শোকাৱহ দুৰ্ঘটনাত ভাৰতৰ প্ৰথমগৰাকী চীফ অফ ডিফেন্স ষ্টাফ (চিডিএছ) জেনেৰেল বিপিন ৰাৱাটৰ মৃত্যু হয় । তামিলনাডুৰ কুনুৰৰ সমীপত তেওঁ যোৱা এম আই-১৭ হেলিকপ্টাৰখন দুৰ্ঘটনাত পতিত হয় । এই দুৰ্ঘটনাত পত্নী মধুলিকা ৰাৱাটকে ধৰি মুঠ ১৩ জন লোকে প্ৰাণ হেৰুৱাইছিল । তেওঁৰ মৃত্যুৰ তিনি বছৰৰ পাছত ২০২৪ চনত লোকসভাত প্ৰতিৰক্ষা সম্পৰ্কীয় স্থায়ী সমিতিয়ে দাখিল কৰা প্ৰতিবেদনত কোৱা হৈছিল যে এম আই-১৭ দুৰ্ঘটনাটো মানৱীয় ভুলৰ বাবে সংঘটিত হৈছিল ।

উল্লেখ্য যে, এই কৰুণ ঘটনাসমূহৰ ওপৰিও বিমান বা হেলিকপ্টাৰ দুৰ্ঘটনাত ভাৰতে কেইবাগৰাকীও বিশিষ্ট ব্যক্তিক হেৰুৱাইছিল । ইয়াৰ ভিতৰত নেতাজী সুভাষ চন্দ্ৰ বসু (১৮ আগষ্ট, ১৯৪৫), অভিনেত্ৰী কে এছ সৌম্যা সত্যনাৰায়ণ (৩ মাৰ্চ, ২০০২), লোকসভাৰ প্ৰাক্তন অধ্যক্ষ তথা তেলেগু দেশম পাৰ্টীৰ নেতা জি এম চি বালাযোগী (৩ মাৰ্চ, ২০০২)ৰো বিমান দুৰ্ঘটনাত মৃত্যু হৈছিল ।

লগতে পঢ়ক : বাৰামাটিত বিমান দুৰ্ঘটনা; প্ৰাণ হেৰুৱালে মহাৰাষ্ট্ৰৰ উপ-মুখ্যমন্ত্ৰী অজিত পাৱাৰে