জৰুৰীকালীন অৱতৰণৰ সময়তে ঘটিল ভয়ংকৰ বিমান দুৰ্ঘটনা । বৰ্তমানলৈকে ৭জন লোকৰ মৃতদেহ উদ্ধাৰ কৰা হৈছে ।
মধ্য মেক্সিকোত এখন সৰু ব্যক্তিগত বিমান দুৰ্ঘটনাগ্ৰস্ত হয় । জৰুৰীকালীন অৱতৰণৰ চেষ্টা চলাই থকাৰ সময়তে সংঘটিত এই বিমান দুৰ্ঘটনাত কমেও ৭ জন লোক নিহত হয় । দুৰ্ঘটনাটোৰ প্ৰভাৱ ইমানেই ভয়াৱহ আছিল যে বিমানখনত জুই জ্বলি উঠে আৰু চৌদিশে আতংকৰ সৃষ্টি হয় । স্থানীয় কৰ্তৃপক্ষই মৃতকৰ সংখ্যা নিশ্চিত কৰিছে আৰু উদ্ধাৰ অভিযান চলি আছে ।
মেক্সিকো ষ্টেট চিভিল প্ৰটেকচনৰ সমন্বয়ক এড্ৰিয়ান হাৰ্নাণ্ডেজে জনোৱা মতে, টলুকা বিমানবন্দৰৰ পৰা প্ৰায় পাঁচ কিলোমিটাৰ আৰু মেক্সিকো চহৰৰ পৰা প্ৰায় ৫০ কিলোমিটাৰ পশ্চিমে ছান মাটিও আটেংকো অঞ্চলত সংঘটিত হয় এই দুৰ্ঘটনা । আকাপুলকোৰ পৰা উৰা মাৰিছিল বিমানখনে । কাৰিকৰী কাৰণত পাইলটজনে জৰুৰীকালীন অৱতৰণ কৰে । বিমানখনত আঠজন যাত্ৰী আৰু দুজন ক্ৰু মেম্বাৰ আছিল । দুৰ্ঘটনাৰ কেইবা ঘণ্টাৰ পিছতহে উদ্ধাৰ হয় ৭টা মৃতদেহ ।
প্ৰাথমিক তথ্য অনুসৰি বিমানখনে ফুটবল খেলপথাৰত অৱতৰণ কৰিবলৈ চেষ্টা কৰি থকা অৱস্থাত ওচৰৰ এটা বাণিজ্যিক ভৱনৰ ধাতুৰ চালত খুন্দা মাৰে । এই আঘাতৰ পিছতে বিমানখনত জুইয়ে আগুৰি ধৰে । ঘটনাস্থলীত অগ্নিনিৰ্বাপক বাহিনী আৰু উদ্ধাৰকাৰী দল উপস্থিত হৈ জুই নিয়ন্ত্ৰণলৈ আনে । দুৰ্ঘটনাটোৰ কাৰণ সন্দৰ্ভত তদন্ত আৰম্ভ কৰা হৈছে ।
ইফালে ছান মাটিও আটেনকোৰ মেয়ৰে কয় যে জুইৰ ভয়াৱহতাৰ বাবে ওচৰৰ প্ৰায় ১৩০ জন লোকক নিৰাপদ স্থানলৈ স্থানান্তৰ কৰা হৈছে । সতৰ্কতা অৱলম্বন কৰি সমগ্ৰ অঞ্চলটো ঘেৰাও কৰে কৰ্তৃপক্ষই । স্থানীয় ৰাইজৰ মাজত আতংকই বিৰাজ কৰিছে । বিষয়াসকলে জনোৱা মতে, তদন্ত সম্পূৰ্ণ হোৱাৰ পিছতহে দুৰ্ঘটনাৰ সঠিক কাৰণ নিৰ্ণয় কৰা হ’ব ।
লগতে পঢ়ক : ছিডনীত সন্ত্ৰাসবাদীৰ ভয়ংকৰ আক্ৰমণ; ধৰ্মীয় অনুষ্ঠানত নিৰ্বিচাৰ গুলীচালনা
