পুনৰ বিমান দুৰ্ঘটনা… বিদ্যুৎ পৰিবাহী তাঁৰৰ সৈতে সংঘৰ্ষ
পুনৰ সংঘটিত হৈছে এক বিমান দুৰ্ঘটনা । উচ্চ বিদ্যুৎ পৰিবাহী তাঁৰৰ সৈতে সংঘৰ্ষ হোৱাৰ ফলত এই অঘটন ঘটে ।
মধ্যপ্ৰদেশৰ ছিৱনী জিলাৰ কুৰাই ব্লকৰ গোপালগঞ্জৰ সমীপৱৰ্তী আমগাঁৱৰ পথাৰত সংঘটিত হয় এক বিমান দুৰ্ঘটনা । খবৰ অনুসৰি ৰেডবাৰ্ড এভিয়েশন কোম্পানীৰ এখন প্ৰশিক্ষণ বিমান দুৰ্ঘটনাগ্ৰস্ত হয় । বিমানখন হঠাতে প্ৰায় ৫:৪৫ বজাত তললৈ নামি আহে আৰু ৩৩ কেভি হাই-ভল্টেজ বৈদুত্যিক তাঁৰৰ সৈতে সংঘৰ্ষ হয় । ঘটনাত বিদ্যুৎ পৰিবাহী তাঁৰ বিচ্ছিন্ন হৈ বিমানখনৰ সন্মুখভাগত পৰে আৰু যথেষ্ট ক্ষতিসাধন হয় ।
প্ৰত্যক্ষদৰ্শীৰ মতে বিমানখন উৰণৰ সময়তে হঠাতে উচ্চতা কমিবলৈ ধৰে । কেইছেকেণ্ডমানৰ ভিতৰতে বিমানখনৰ ডেউকাই হাই ভল্টেজৰ তাঁৰ স্পৰ্শ কৰে । তীব্ৰ শব্দ আৰু অগ্নি স্ফুলিংগই চাৰিওফালৰ অঞ্চলত আতংকৰ সৃষ্টি কৰে যাৰ ফলত প্ৰত্যক্ষদৰ্শীয়ে ডাঙৰ দুৰ্ঘটনা সংঘটিত হোৱা বুলি ধৰি লয় ।
ঘটনাৰ লগে লগে গাঁওবাসী ঘটনাস্থলীত উপস্থিত হৈ পাইলটক প্ৰশিক্ষাৰ্থীক বিমানখনৰ পৰা উদ্ধাৰ কৰি নিৰাপদ স্থানলৈ লৈ যায় । দুয়োজন সামান্য আঘাতপ্ৰাপ্ত হোৱাৰ লগতে প্ৰাথমিক চিকিৎসাৰ বাবে চিকিৎসালয়লৈ লৈ যোৱা হয় । ৰেডবাৰ্ড মেনেজমেণ্টে সন্ধিয়া ৫:৪৫ বজাত বিমানখন দুৰ্ঘটনাগ্ৰস্ত হোৱা বুলি উল্লেখ কৰে । বিমানখনত থকা প্ৰশিক্ষক আৰু প্ৰশিক্ষাৰ্থী পাইলটজন সামান্য আঘাতপ্ৰাপ্ত হয় ।
স্থানীয় গাঁওবাসীয়ে জনোৱা মতে, প্ৰশিক্ষণ বিমান দুৰ্ঘটনাগ্ৰস্ত হোৱা এয়াই প্ৰথম নহয় । ইয়াৰ পূৰ্বেও দুবাৰকৈ প্ৰশিক্ষণ বিমান ৰাণৱেৰ পৰা পিছলি পৰিছে । তেওঁলোকে কয় যে এনে দুৰ্ঘটনা গাঁওবাসীৰ মাজত ক্ৰমান্বয়ে চিন্তনীয় হৈ পৰিছে ।
লগতে পঢ়ক : ছবছৰে এচপৰা ইটাও পৰা নাই প্রস্তাৱিত ভূমিত, এতিয়াও অনিশ্চয়তা আঁতৰা নাই বাবৰি মছজিদৰ