অঘটনঃ সাগৰত পৰিল কাৰ্গো বিমান
সোমবাৰে পুৱা হংকং বিমানবন্দৰত সংঘটিত হয় এক ভয়ংকৰ বিমান দুৰ্ঘটনা । হংকং আন্তঃৰাষ্ট্ৰীয় বিমানবন্দৰত অৱতৰণ কৰাৰ সময়তে এখন কাৰ্গো বিমান ৰাণৱেৰ পৰা পিছলি সাগৰত পৰে । এই ভয়ংকৰ দুৰ্ঘটনাত দুজন লোক নিহত হয় । আনহাতে ঘটনাত আহত হয় চাৰিজন ক্ৰু । তেওঁলোকক উদ্ধাৰ কৰি চিকিৎসালয়ত ভৰ্তি কৰা হয় ।
এই বয়িং ৭৪৭ কাৰ্গো বিমানখন তুৰ্কীৰ এচিটি এয়াৰলাইন্সে পৰিচালনা কৰিছিল আৰু ডুবাইৰ আল মাকটুম আন্তঃৰাষ্ট্ৰীয় বিমানবন্দৰৰ পৰা হংকংলৈ উৰা মাৰিছিল । বিমানখন এমিৰেটছ এয়াৰলাইন্সৰ পৰা ৱেট লিজত লোৱা হৈছিল, অৰ্থাৎ এচিটি এয়াৰলাইন্সে বিমানখন, পাইলট, ক্ৰু, ৰক্ষণাবেক্ষণ, বীমা আদি চম্ভালিছিল ।
সংবাদ মাধ্যমৰ খবৰ অনুসৰি বিমানখনৰ পিছৰ অংশটো সাগৰত ডুব যোৱাৰ বিপৰীতে সন্মুখ আৰু ককপিট পানীৰ ওপৰত দেখা গৈছে । উল্লেখ্য যে হংকং বিমানবন্দৰৰ উত্তৰ ফালৰ ৰানৱেত পুৱা প্ৰায় ৩:৫০ বজাত সংঘটিত হয় এই দুৰ্ঘটনা, যিটো এতিয়া সাময়িকভাৱে বন্ধ কৰি দিয়া হৈছে । বাকী দুটা ৰানৱে কাৰ্যক্ষম হৈ আছে ।
প্ৰাথমিক তথ্য অনুসৰি বিমানবন্দৰৰ এখন গ্ৰাউণ্ড বাহনত থকা দুজন লোকৰ মৃত্যু হৈছে । সেই সময়ত বিমানখনত কোনো ধৰণৰ সামগ্ৰী কঢ়িয়াই অনা হোৱা নাছিল । হংকঙৰ অসামৰিক বিমান পৰিবহণ বিভাগে এই দুৰ্ঘটনাৰ তদন্তৰ বাবে বিমান সংস্থা আৰু অন্যান্য সংশ্লিষ্ট সংস্থাসমূহৰ সৈতে যোগাযোগ কৰি থকা বুলি জানিবলৈ দিয়ে ।
লগতে পঢ়ক : বাংলাদেশত অথন্তৰঃ জুই আৰু ক’লা ধোঁৱাই আৱৰি ধৰিলে ঢাকা বিমানবন্দৰ
