কথমপি ৰক্ষা পৰিল এয়াৰ ইণ্ডিয়াৰ বিমান
এয়াৰ ইণ্ডিয়াৰ এখন বিমান মঙলবাৰে ভয়ংকৰ দুৰ্ঘটনাৰ পৰা কথমপি ৰক্ষা পৰে । মঙলবাৰে (৭ অক্টোবৰ) কলম্বো-চেন্নাই অভিমুখী এয়াৰ ইণ্ডিয়াৰ এখন বিমানত এটা চৰাইয়ে খুন্দা মৰাৰ ফলত বিমান সংস্থাটোৱে উভতনি যাত্ৰা বাতিল কৰিবলগীয়া হয় । বিমানবন্দৰৰ কৰ্তৃপক্ষই জনোৱা মতে, বিমানখনত ১৫৮ জন যাত্ৰী আছিল ।
জানিব পৰা মতে চেন্নাইৰ পৰা কলম্বো অভিমুখী এয়াৰ ইণ্ডিয়াৰ এ আই-২৭৩ (A320 VT-TNH) বিমানত এটা চৰাইয়ে খুন্দা মাৰে । কলম্বো বিমানবন্দৰত অৱতৰণ কৰাৰ সময়ত প্ৰায় ১:৫৫ বজাত এই ঘটনা সংঘটিত হয় । অৱশ্যে এই ঘটনা সামান্য বুলি বিবেচিত হোৱাৰ বাবে বিমানখন অৱতৰণ কৰাৰ পিছত উৰণৰ বাবে ক্লিয়াৰেন্স দিয়া হয় ।
পৰৱৰ্তী সময়ত যেতিয়া একেখন বিমান এ আই-২৭৪ৰ ৰূপত পুৱা ৪:৩৪ বজাত কলম্বোৰ পৰা চেন্নাইলৈ উভতি আহে, তেতিয়া কাৰিকৰী দলে নিয়মীয়া পৰিদৰ্শন কৰাৰ সময়ত ফেন ব্লেডৰ ক্ষতি হোৱা বুলি জানিবলৈ দিছিল । বিমানখনক এয়াৰক্ৰাফ্ট অন গ্ৰাউণ্ড ঘোষণা কৰা হৈছে আৰু ই বৰ্তমান সেৱাৰ পৰা আঁতৰি থাকিব । পুংখানুপুংখ পৰিদৰ্শন কৰাৰ পিছতহে ইয়াক মেৰামতি কৰি সেৱালৈ ঘূৰাই অনা হ’ব ।
লগতে পঢ়ক : সাগৰত শত্ৰুক নিমিষতে কৰিব ধ্বংস; আহি গ’ল যুদ্ধজাহাজ ‘INS এণ্ড্ৰথ’
