২০২৩ চনত তেওঁ বিজেপিৰ ৰাজ্যিক সভাপতি আৰু ২০২৪ চনত বিহাৰৰ উপ-মুখ্যমন্ত্ৰী হিচাপে নিযুক্ত হয়

বিহাৰৰ পৰৱৰ্তী মুখ্যমন্ত্ৰী হিচাপে নিৰ্বাচিত হৈছে বিজেপি নেতা সম্ৰাট চৌধুৰী । ইয়াৰ লগে লগে ৰাজ্যখনৰ ইতিহাসত প্ৰথমবাৰৰ বাবে এজন বিজেপি নেতাই এই পদত অধিষ্ঠিত হ’ব । এই নিযুক্তি অ’বিচি (OBC) সম্প্ৰদায়, বিশেষকৈ কুশৱাহা গোটৰ মাজত দলৰ স্থিতি শক্তিশালী কৰাৰ এক কৌশলগত পদক্ষেপ হিচাপে গণ্য কৰা হৈছে । ৫৭ বছৰীয়া চৌধুৰীয়ে নীতিশ কুমাৰৰ উত্তৰাধিকাৰী হিচাপে এক গুৰুত্বপূৰ্ণ দায়িত্ব লাভ কৰিছে, যিয়ে ২০২৫ চনৰ বিধানসভা নিৰ্বাচনত এনডিএৰ ঐতিহাসিক বিজয়ৰ পাছত অভিলেখ সংখ্যক দশমবাৰৰ বাবে মুখ্যমন্ত্ৰী হিচাপে শপত গ্ৰহণ কৰিছিল । তেওঁৰ এই নিযুক্তিয়ে নীতিশ কুমাৰৰ “সুশাসন”ৰ যুগৰ সমাপ্তি আৰু বিহাৰত এনডিএৰ এক নতুন অধ্যায়ৰ সূচনা কৰিছে ।

ৰাজনীতিত সম্ৰাট চৌধুৰীৰ উত্থান উল্লেখনীয় । ৯০ৰ দশকত ৰাষ্ট্ৰীয় জনতা দলৰ (RJD) জৰিয়তে কেৰিয়াৰ আৰম্ভ কৰা চৌধুৰীয়ে ২০১৮ চনত বিজেপিত যোগদান কৰিছিল । ১৯৬৮ চনত জন্মগ্ৰহণ কৰা সম্ৰাট চৌধুৰীৰ পৰিয়ালটো ৰাজনীতিৰ সৈতে ওতপ্ৰোতভাৱে জড়িত । তেওঁৰ পিতৃ শকুনি চৌধুৰী তাৰাপুৰ সমষ্টিৰ পৰা ছয়বাৰৰ বিধায়ক আছিল আৰু তেওঁৰ মাতৃ পাৰ্বতী দেৱীয়ে ১৯৯৮ চনত একেটা সমষ্টিৰ পৰাই সমতা পাৰ্টিৰ হৈ জয়লাভ কৰিছিল ।

সম্ৰাট চৌধুৰীয়ে ১৯৯০ চনত ৰাজনীতিত প্ৰৱেশ কৰিছিল আৰু পিতৃৰ দৰেই তেওঁৰ যাত্ৰাইও বিভিন্ন ৰাজনৈতিক দল অতিক্ৰম কৰিছে । বিজেপিত যোগ দিয়াৰ পূৰ্বে তেওঁ আৰজেডি আৰু জেডিইউৰ (JD-U) সৈতে জড়িত আছিল । ১৯৯৯ চনত ৰাবড়ী দেৱীৰ চৰকাৰত তেওঁ কৃষি মন্ত্ৰী হিচাপে কাৰ্যনিৰ্বাহ কৰিছিল । ২০০০ চনত পৰবত্তা বিধানসভা আসনত জয়লাভ কৰি তেওঁ নিজৰ দক্ষতা প্ৰমাণ কৰে আৰু ২০০৫ চনত পুনৰ সেই আসনখন দখল কৰে । ২০১৪ চনত তেওঁ আৰজেডি ত্যাগ কৰি জেডিইউৰ সৈতে হাত মিলায় আৰু জীতন ৰাম মাঝী চৰকাৰৰ অধীনত নগৰ উন্নয়ন আৰু গৃহ নিৰ্মাণ বিভাগৰ মন্ত্ৰী হিচাপে নিযুক্তি লাভ কৰে । অৱশ্যে নীতিশ কুমাৰ পুনৰ মুখ্যমন্ত্ৰী হোৱাৰ লগে লগে চৌধুৰীয়ে মন্ত্ৰিত্ব হেৰুৱায় ।

২০১৭ চনত তেওঁ বিজেপিত যোগদান কৰে আৰু এবছৰৰ ভিতৰতে তেওঁক ৰাজ্যিক উপ-সভাপতিৰ দায়িত্ব দিয়া হয় । তেওঁৰ উত্থান আছিল অতি দ্ৰুত । ২০২১ চনত তেওঁ পঞ্চায়তী ৰাজ মন্ত্ৰী হয় যদিও নীতিশ কুমাৰে বিজেপিৰ সৈতে মিত্ৰতা ভংগ কৰাৰ বাবে তেওঁৰ কাৰ্যকাল চুটি হয় । ২০২৪ চনত বিজেপি আৰু জেডিইউৰ মিত্ৰতা পুনৰ নবীকৰণ হোৱাৰ পূৰ্বে চৌধুৰী আছিল নীতিশ কুমাৰৰ আটাইতকৈ তীব্ৰ সমালোচক । ২০২২ চনত তেওঁ ৰাজহুৱাকৈ ঘোষণা কৰিছিল যে নীতিশ কুমাৰক ক্ষমতাৰ পৰা অপসাৰণ নকৰা পৰ্যন্ত তেওঁ নিজৰ মূৰৰ কেশৰীয়া পাগুৰি নোখোলে । ২০২৪ চনত দুয়োগৰাকী নেতা পুনৰ মিত্ৰতাত আবদ্ধ হ’লেও আজি চৌধুৰীৰ মুখ্যমন্ত্ৰী হিচাপে নিযুক্তি সেই সংকল্পৰে এক প্ৰতীকী পূৰণ হিচাপে বিবেচিত হৈছে ।

২০২৩ চনত তেওঁ বিজেপিৰ ৰাজ্যিক সভাপতি আৰু ২০২৪ চনত বিহাৰৰ উপ-মুখ্যমন্ত্ৰী হিচাপে নিযুক্ত হয় । ২০২৫ চনৰ বিধানসভা নিৰ্বাচনৰ পাছত নীতিশ কুমাৰ ৰাজ্যিক ৰাজনীতিৰ পৰা আঁতৰি যোৱাৰ চৰ্চা চলি থকাৰ মাজতে সম্ৰাট চৌধুৰীৰ নামটোৱেই মুখ্যমন্ত্ৰী পদৰ বাবে আটাইতকৈ আগত আছিল । আজি বিজেপিয়ে তেওঁক বিধানসভাৰ দলীয় নেতা হিচাপে নিৰ্বাচিত কৰি মুখ্যমন্ত্ৰী হোৱাৰ পথ প্ৰশস্ত কৰিছে । নীতিশ কুমাৰে নতুন চৰকাৰখনক “পূৰ্ণ সহযোগিতা আৰু নিৰ্দেশনা” আগবঢ়োৱাৰ প্ৰতিশ্ৰুতি দিছে । কুমাৰে কয় যে তেওঁ বহু বছৰ ধৰি বিহাৰৰ জনসাধাৰণৰ সেৱা কৰিছে আৰু এতিয়া পদত্যাগ কৰি নতুন চৰকাৰক দায়িত্ব অৰ্পণ কৰাৰ সিদ্ধান্ত লৈছে ।

সম্ৰাট চৌধুৰীয়ে কেন্দ্ৰীয় নেতৃত্বক ধন্যবাদ জনাই এই নতুন দায়িত্বক জনসেৱাৰ এক “পৱিত্ৰ সুযোগ” বুলি অভিহিত কৰিছে । তেওঁ নীতিশ কুমাৰৰ ভূমিকাৰ শলাগ লৈ কয় যে তেওঁ বহু কথা শিকিবলৈ পাইছে আৰু প্ৰধানমন্ত্ৰী নৰেন্দ্ৰ মোদীৰ ‘বিকশিত ভাৰত’ তথা নীতিশ কুমাৰৰ ‘সমৃদ্ধ বিহাৰ’ৰ সপোন বাস্তৱায়িত কৰিবলৈ তেওঁ সম্পূৰ্ণ নিষ্ঠাৰে কাম কৰিব ।

লগতে পঢ়ক : অন্ত পৰিল নীতিশ কুমাৰ যুগৰ, বিহাৰৰ নতুন মুখ্যমন্ত্ৰী হ’ল সম্ৰাট চৌধুৰী

শেহতীয়াকৈ বিহাৰৰ পৰা ৰাজ্যসভালৈ নিৰ্বাচিত হৈছিল নীতিশ কুমাৰ । তেওঁ এতিয়া দিল্লীত থাকি সংসদৰ উচ্চ সদনত অংশগ্ৰহণ কৰিব ।

বিহাৰৰ মুখ্যমন্ত্ৰী হিচাপে থকা দুই দশকৰো অধিক কাৰ্যকালৰ অন্ত পেলাইছে নীতিশ কুমাৰে । মঙলবাৰে ৰাজ্যপাল চৈয়দ আতা হাছনাইনৰ ওচৰত পদত্যাগ পত্ৰ দাখিল কৰে তেওঁ । পদত্যাগৰ পিছতে নীতিশে ছ’চিয়েল মিডিয়াত এটা পোষ্টত কয়, “আমি বিহাৰৰ জনসাধাৰণৰ বাবে বহু কাম কৰিছো । আমি ইমান দিনে তেওঁলোকক অবিৰতভাৱে সেৱা আগবঢ়াই আহিছো । আমি মুখ্যমন্ত্ৰী পদৰ পৰা পদত্যাগ কৰাৰ সিদ্ধান্ত লৈছিলোঁ আৰু সেয়ে আজি কেবিনেট বৈঠকৰ অন্তত মই ৰাজ্যপালক সাক্ষাৎ কৰি পদত্যাগ পত্ৰ দাখিল কৰিলোঁ । এতিয়া, এখন নতুন চৰকাৰে ইয়াত কাম-কাজৰ দায়িত্ব ল’ব ।”

শেহতীয়াকৈ বিহাৰৰ পৰা ৰাজ্যসভালৈ নিৰ্বাচিত হৈছিল নীতিশ কুমাৰ । তেওঁ এতিয়া দিল্লীত থাকি সংসদৰ উচ্চ সদনত অংশগ্ৰহণ কৰিব । ইফালে ভাৰতীয় জনতা পাৰ্টিৰ নেতা তথা বিহাৰৰ উপ-মুখ্যমন্ত্ৰী সম্ৰাট চৌধুৰী ৰাজ্যৰ পৰৱৰ্তী মুখ্যমন্ত্ৰী হ’বলৈ সাজু হৈছে । বিহাৰৰ ইতিহাসত প্ৰথমবাৰৰ বাবে বিজেপিৰ মুখ্যমন্ত্ৰীয়ে ৰাজ্যখনৰ নেতৃত্ব দিব । সম্ৰাট চৌধুৰী বিজেপিৰ এগৰাকী বিশিষ্ট ব্যক্তি আৰু ইয়াৰ পূৰ্বেও দলৰ ৰাজ্যিক সভাপতি হিচাপে কাৰ্যনিৰ্বাহ কৰি আহিছে । কাইলৈ ​​(১৫ এপ্ৰিল) পুৱা ১১ বজাত লোকভৱনত নতুন মন্ত্ৰীসভাৰ সৈতে শপত গ্ৰহণ কৰিব তেওঁ ।

বিজেপি আৰু এন ডি এ বিধায়িনী দলৰ বৈঠকত সৰ্বসন্মতিক্ৰমে মুখ্যমন্ত্ৰী পদৰ বাবে সম্ৰাট চৌধুৰীৰ নাম অনুমোদন জনোৱা হয় । উপ-মুখ্যমন্ত্ৰী বিজয় সিনহাই বিজেপিৰ জ্যেষ্ঠ নেতা মংগল পাণ্ডে, দিলীপ জয়ছোৱাল, আৰু ৰেণু দেৱীৰ সৈতে আনুষ্ঠানিকভাৱে সম্ৰাট চৌধুৰীক দলৰ বিধায়িনী দলৰ নেতা হিচাপে প্ৰস্তাৱ আগবঢ়ায় । এই প্ৰস্তাৱত অনুমোদন জনাইছিল কেন্দ্ৰীয় পৰ্যবেক্ষক শিৱৰাজ সিং চৌহানে । ইয়াৰ পিছত নীতিশ কুমাৰে এন ডি এ বিধানসভা দলৰ বৈঠকত সম্ৰাট চৌধুৰীক আদৰণি জনায় আৰু সকলো মিত্ৰশক্তিয়ে মুখ্যমন্ত্ৰী পদৰ বাবে তেওঁৰ নাম সমৰ্থন কৰে ।

ইফালে সম্ৰাট চৌধুৰীয়ে বিহাৰৰ জনসাধাৰণৰ সেৱাৰ সুযোগ দিয়াৰ বাবে বিজেপিক কৃতজ্ঞতা জ্ঞাপন কৰে । তেওঁ এক্সত লিখিছে, “এয়া কেৱল মোৰ বাবে এটা পদ নহয়, বৰঞ্চ বিহাৰৰ জনসাধাৰণৰ আস্থা আৰু সপোন পূৰণৰ সেৱা কৰাৰ এক পবিত্ৰ সুযোগ । মই সম্পূৰ্ণ নিষ্ঠা, দায়বদ্ধতা আৰু সততাৰে সকলোৰে আশা পূৰণ কৰাৰ প্ৰতিশ্ৰুতি দিছো ।”

সম্ৰাট চৌধুৰীয়ে আৰু কয় যে তেওঁ ভৱিষ্যতে বিহাৰক উন্নয়নৰ নতুন উচ্চতালৈ লৈ যোৱাৰ বাবে নিষ্ঠা সহকাৰে কাম কৰিব । তেওঁ এক্সত লিখিছে, “প্ৰধানমন্ত্ৰী নৰেন্দ্ৰ মোদীৰ সক্ষম নেতৃত্ব আৰু বিজেপিৰ ৰাষ্ট্ৰীয় সভাপতি নীতিন নবীনৰ নিৰ্দেশনাত মই বিহাৰক উন্নয়ন, সুশাসন আৰু সমৃদ্ধিৰ নতুন উচ্চতালৈ লৈ যোৱাৰ বাবে প্ৰতিশ্ৰুতিবদ্ধ হৈ থাকিম । আপোনালোকৰ মৰম, আশীৰ্বাদ আৰু সমৰ্থন মোৰ সৰ্বোচ্চ শক্তি ।”

লগতে পঢ়ক : তামিলনাডু বিধানসভা নিৰ্বাচনৰ বাবে বিজেপিয়ে মুকলি কৰিলে ইস্তাহাৰ

বিহাৰৰ মুখ্যমন্ত্ৰী নীতিশ কুমাৰে ৰাজ্যপাল চৈয়দ আতা হাছনাইনৰ হাতত পদত্যাগ পত্ৰ দাখিল কৰিব

বিহাৰত অন্ত পৰিল নীতিশ যুগৰ । ২০ বছৰ ধৰি বিহাৰৰ মুখ্যমন্ত্ৰী হিচাপে থকা নীতিশ কুমাৰে আজি দিনৰ ১১ বজাত কেবিনেট বৈঠক অনুষ্ঠিত কৰিব । বৈঠকত তেওঁ কেইবাটাও গুৰুত্বপূৰ্ণ কাৰ্যসূচীত অনুমোদন জনাব । ইয়াৰ পিছতে তেওঁ জনতা দল ইউনাইটেডৰ বিধায়িনী দলৰ বৈঠকত অংশ ল’ব । ইফালে ভাৰতীয় জনতা পাৰ্টিৰ বিধায়িনী দলৰো বৈঠক অনুষ্ঠিত হ’ব । ইয়াৰ পাছতে মুখ্যমন্ত্ৰী নীতিশ কুমাৰে ৰাজ্যপাল চৈয়দ আতা হাছনাইনৰ হাতত পদত্যাগ পত্ৰ দাখিল কৰিব ।

মুখ্যমন্ত্ৰীৰ পদত্যাগৰ পিছতে কেন্দ্ৰীয় মন্ত্ৰী তথা পৰ্যবেক্ষক শিৱৰাজ সিং চৌহানৰ তত্বাৱধানত ৰাষ্ট্ৰীয় গণতান্ত্ৰিক মিত্ৰজোঁটৰ এখন বৈঠক অনুষ্ঠিত হ’ব । এই বৈঠকত বিহাৰৰ মুখ্যমন্ত্রী ঘোষণা কৰিব শিৱৰাজ সিং চৌহানে । জানিব পৰা মতে বিজেপি হাইকমাণ্ডে মুখ্যমন্ত্ৰীৰ নাম চূড়ান্ত কৰিছে । আজি দিল্লীৰ পৰা আহিব বিজেপিৰ সভাপতি নীতিন নবীন আৰু কেন্দ্ৰীয় মন্ত্ৰী শিৱৰাজ সিং চৌহান । দুয়োগৰাকী নেতাই এন ডি এৰ বিধায়িনী দলৰ বৈঠকত অংশগ্ৰহণ কৰিব । ইয়াৰ পিছত নতুন মুখ্যমন্ত্ৰীয়ে ৰাজ্যপালক সাক্ষাৎ কৰি চৰকাৰ গঠনৰ দাবীত মোহৰ লগাব ।

ইফালে সোমবাৰে মুখ্যমন্ত্ৰীৰ বাসগৃহত মুখ্যমন্ত্ৰী নীতিশ কুমাৰৰ সৈতে এক উচ্চ পৰ্যায়ৰ বৈঠক অনুষ্ঠিত হয় । বৈঠকত জেডিইউৰ কাৰ্যকৰী সভাপতি সঞ্জয় ঝা, লল্লন সিং, বিজেন্দ্ৰ যাদৱ, বিজয় চৌধুৰী, শ্ৰৱণ কুমাৰ, জামা খান উপস্থিত আছিল । আটাইকেইগৰাকীয়ে মুখ্যমন্ত্ৰী নীতিশ কুমাৰক সাক্ষাৎ কৰে । বৈঠকত ১৪ এপ্ৰিলত অনুষ্ঠিত হ’বলগীয়া এন ডি এৰ বিধায়িনী দলৰ বৈঠক আৰু জে ডি ইউৰ কোটা আৰু মন্ত্ৰীত্ব সন্দৰ্ভত আলোচনা কৰা হয় । বৈঠকৰ অন্তত লল্লন সিং আৰু সঞ্জয় ঝাই উপ মুখ্যমন্ত্ৰী সম্ৰাট চৌধুৰীক তেওঁৰ বাসগৃহত সাক্ষাৎ কৰিবলৈ যায় । প্ৰায় ৩৫ মিনিট ধৰি চলিছিল এই বৈঠক ।

আনহাতে ১৫ এপ্ৰিলত বিহাৰে লাভ কৰিব নতুন মুখ্যমন্ত্ৰী । পুৱা ১১ বজাত লোক ভৱনত শপতগ্ৰহণৰ দিন ধাৰ্য কৰা হৈছে । আন ২১গৰাকী মন্ত্ৰীৰ লগতে মুখ্যমন্ত্ৰী আৰু উপ-মুখ্যমন্ত্ৰীয়ে শপত গ্ৰহণ কৰাৰ সম্ভাৱনা আছে । প্ৰথমবাৰৰ বাবে বিজেপিয়ে জ্যেষ্ঠ ভাতৃৰ ভূমিকা পালন কৰিব । নতুন মুখ্যমন্ত্ৰীৰ দৌৰত চৰ্চাত আছে সম্ৰাট চৌধুৰীৰ নাম ।

লগতে পঢ়ক : সোণৰ বাংলাক মমতা বেনার্জীয়ে চিণ্ডিকেট ৰাজলৈ ৰূপান্তৰ কৰাৰ অভিযোগ অমিত শ্বাহৰ

সক্ৰিয় ৰাজনীতিলৈ নীতিশ পুত্ৰ । আনুষ্ঠানিকভাৱে জেডিইউত যোগদান কৰিব বিহাৰৰ মুখ্যমন্ত্ৰী নীতিশ কুমাৰৰ পুত্ৰ নিশান্ত কুমাৰে ।

আজি অৰ্থাৎ দেওবাৰে আনুষ্ঠানিকভাৱে জেডিইউত যোগদান কৰিব বিহাৰৰ মুখ্যমন্ত্ৰী নীতিশ কুমাৰৰ পুত্ৰ নিশান্ত-এ । দিনৰ ১ বজাত জেডিইউৰ মুখ্য কাৰ্যালয়ত তেওঁ দলত যোগদান কৰিব । এই কাৰ্যসূচীত উপস্থিত থাকিব জেডিইউৰ জ্যেষ্ঠ নেতাসকল । বিহাৰৰ মুখ্যমন্ত্ৰী নীতিশ কুমাৰৰ ঘনিষ্ঠ বিধায়ক হৰি নাৰায়ণ সিঙে শনিবাৰে দাবী কৰে যে দলৰ অধ্যক্ষৰ পুত্ৰ নিশান্তক পিতৃৰ পদত্যাগৰ পিছত গঠন হ’বলগীয়া নতুন চৰকাৰত উপ-মুখ্যমন্ত্ৰী হিচাপে নিযুক্তি দিয়া হ’ব ।

হৰি নাৰায়ণ সিং নালন্দা জিলাৰ হৰনাউটৰ বিধায়ক, য’ৰ পৰা কুমাৰে নিজেই আশীৰ দশকত সাংসদ হিচাপে কাৰ্যনিৰ্বাহ কৰিছিল । লগতে তেওঁ দাবী কৰে যে নিশান্তে ৪০ বছৰ বয়সত ৰাজনীতিত প্ৰৱেশ কৰিছে আৰু অহা মাহত ৰাজ্যিক বিধান পৰিষদলৈ নিৰ্বাচিত হ’ব । জেডিইউৰ সভাপতিগৰাকীয়ে পদত্যাগ কৰি ৰাজ্যসভালৈ যোৱাৰ সিদ্ধান্তৰ বিষয়ে সতীৰ্থসকলক অৱগত কৰাৰ এদিন পিছতে সিঙে সাংবাদিকৰ আগত কয় যে শুকুৰবাৰে মুখ্যমন্ত্ৰীৰ বাসগৃহত বিধায়িনী দলৰ এখন বৈঠক অনুষ্ঠিত হয় ।

বৈঠকত সৰ্বসন্মতিক্ৰমে নিশান্তক নতুন চৰকাৰত উপ-মুখ্যমন্ত্ৰী হিচাপে নিযুক্তি দিয়াৰ সিদ্ধান্ত গ্ৰহণ কৰা হয় । লগতে সিদ্ধান্ত লোৱা হয় যে নিশান্তে আনুষ্ঠানিকভাৱে জেডি(ইউ)ত যোগদান কৰিব । যিহেতু তেওঁ সাংবিধানিক পদত অধিষ্ঠিত হ’বলৈ বিধায়িনী দলৰ সদস্য হ’ব লাগিব, সেয়েহে এপ্ৰিল মাহত তেওঁ বিধান পৰিষদলৈ নিৰ্বাচিত হ’ব, য’ত প্ৰতি দুবছৰৰ মূৰে মূৰে ৯খন আসনৰ বাবে নিৰ্বাচন অনুষ্ঠিত হয় । তেতিয়া তেওঁ পিতৃৰ পদত্যাগৰ ফলত খালী হোৱা আসনত প্ৰতিদ্বন্দ্বিতা কৰাৰ প্ৰয়োজন নাথাকিব ।

ইফালে, দেওবাৰে নিশান্ত কুমাৰে আনুষ্ঠানিকভাৱে দলত যোগদান কৰিব বুলি নিশ্চিত কৰিছে জেডিইউৰ কাৰ্যকৰী সভাপতি সঞ্জয় কুমাৰ ঝাই । ঝাই কয় যে দলে দিয়া যিকোনো দায়িত্ব ল’বলৈ তেওঁ সাজু । নতুন চৰকাৰে নীতিশ কুমাৰৰ নিৰ্দেশনাত কাম কৰিব ।

লগতে পঢ়ক : ৰাষ্ট্ৰপতিক অপমান কৰি টিএমচিয়ে সকলো সীমা অতিক্ৰম কৰিলেঃ মমতা চৰকাৰক তীক্ষ্ণ সমালোচনা প্ৰধানমন্ত্ৰী মোদীৰ