২০২৫ৰ বৰ্ষশ্ৰেষ্ঠ এদিনীয়া ক্ৰিকেটাৰৰ দৌৰত কোন কোন ? ভাৰতৰ হৈ এই তলিকাত একমাত্ৰ ক্ৰিকেটাৰ বিৰাট কোহলী ।

২০২৫ চনৰ আই চি চিৰ বৰ্ষশ্ৰেষ্ঠ এদিনীয়া ক্ৰিকেটাৰ বঁটাৰ বাবে মনোনীত একমাত্ৰ ভাৰতীয় হৈছে বিৰাট কোহলী । বিৰাটে এই বছৰ টেষ্ট ক্ৰিকেটৰ পৰা অৱসৰ গ্ৰহণ কৰিছিল যদিও তেওঁৰ এদিনীয়া ফৰ্ম অতি উত্তম, যোৱা চাৰিটা এদিনীয়া ইনিংছত ৫০+ ৰান সংগ্ৰহ কৰিছে তেওঁ । বৰ্ষশ্ৰেষ্ঠ এদিনীয়া ক্ৰিকেটাৰৰ বাবে মনোনীত তালিকাত বিৰাটৰ বাহিৰে আন কোনো ভাৰতীয় নাই ।

খবৰ অনুসৰি ২০২৫ চনৰ এদিনীয়া ক্ৰিকেটাৰ অৱ দ্য ইয়েৰৰ বঁটাৰ বাবে বিৰাট কোহলী, জো ৰুট, মেথিউ ব্ৰিট্জকে, শ্বাহী হোপ, ডেৰিল মিচেল, মেট হেনৰী, আদিল ৰছিদ, চিকন্দৰ ৰাজা, মিচেল ছেণ্টনাৰ আৰু জেডেন ছিলছক মনোনীত কৰা হৈছে । আচৰিত কথাটো হ’ল ২০২৫ চনত ৰোহিত আৰু কোহলীয়ে প্ৰায় একে সংখ্যক ৰান সংগ্ৰহ কৰিছিল যদিও ৰোহিত শৰ্মাই এই তালিকাত স্থান লাভ কৰাত ব্যৰ্থ হয় ।

২০২৫ চনত ভাৰতৰ হৈ অগ্ৰণী ৰান সংগ্ৰহকাৰী বিৰাট কোহলী । এইবাৰ বিৰাটে ১৩খন এদিনীয়াত ৬৫১ ৰান সংগ্ৰহ কৰিছে । তেওঁৰ আকৰ্ষণীয় গড় ৬৫.১০ । তেওঁ এইবাৰ তিনিটা শতক আৰু চাৰিটা অৰ্ধশতক অৰ্জন কৰিছে । শেহতীয়াকৈ দক্ষিণ আফ্ৰিকাৰ বিৰুদ্ধে খেলা এদিনীয়া শৃংখলাত তেওঁ একেৰাহে দুটা শতক আৰু অৰ্ধশতক অৰ্জন কৰিছিল । সেই সমগ্ৰ ছিৰিজতে তেওঁ ৩০২ ৰান সংগ্ৰহ কৰিছিল ।

ইয়াৰ পিছত বিৰাট কোহলীক ভাৰতীয় ঘৰুৱা লিষ্ট এ টুৰ্ণামেণ্ট বিজয় হাজাৰে ট্ৰফীত খেলা দেখা যাব । প্ৰায় এটা দশক পূৰ্বে তেওঁ শেষবাৰৰ বাবে এই প্ৰতিযোগিতাত খেলিছিল । চলিত বৰ্ষৰ আৰম্ভণিতে কোহলীয়ে কুমাৰ ছাংগাক্কাৰাক অতিক্ৰম কৰি এদিনীয়া ক্ৰিকেটৰ দ্বিতীয় সৰ্বাধিক ৰান সংগ্ৰহকাৰী হিচাপে পৰিগণিত হৈছিল । তেওঁ ৩০৮খন এদিনীয়াত ১৪,৫৫৭ ৰান সংগ্ৰহ কৰিছে ।

ইতিমধ্যে তেওঁ কোনো এটা ফৰ্মেটত বেছিভাগ শতকৰ অভিলেখ গঢ়ি তুলিছে । এদিনীয়া মেচত বিৰাটে ৫৩টা শতক অৰ্জন কৰিছে । ইয়াৰ পূৰ্বে এদিনীয়া ফৰ্মেটত সৰ্বাধিক শতক অৰ্জন কৰাৰ অভিলেখ শচীন টেণ্ডুলকাৰৰ হাতত আছিল, যিয়ে টেষ্টত ৫১টা শতক অৰ্জন কৰিছিল ।

লগতে পঢ়ক : ৰণক্ষেত্ৰলৈ পৰিণত হ’ল খেলপথাৰ, ফুটবল সম্ৰাটক চাবলৈ নাপায় অনুৰাগীৰ তাণ্ডৱ

এদিনীয়াৰ শীৰ্ষত ‘হিটমেন’ ৰোহিত শৰ্মা

ভাৰতৰ প্ৰাক্তন অধিনায়ক ৰোহিত শৰ্মাই পুনৰবাৰ আই চি চিৰ এদিনীয়া বেটিং ৰেংকিঙত প্ৰথম স্থান দখল কৰিছে । নিউজীলেণ্ডৰ বেটছমেন ডেৰিল মিচেলৰ ৰেটিং পইণ্ট হ্ৰাস হোৱা আৰু শেষৰ দুখন মেচত অংশ ল’ব নোৱৰাৰ বাবে তেওঁক অতিক্ৰম কৰিছে ৰোহিত শৰ্মাই । ভাৰত আৰু দক্ষিণ আফ্ৰিকাৰ মাজত এদিনীয়া শৃংখলা আৰম্ভ হোৱাৰ পূৰ্বে হিটমেন ৰোহিত শৰ্মাই এদিনীয়াৰ এই স্থান পুনৰুদ্ধাৰ কৰিছে ।

নিউজীলেণ্ড আৰু ৱেষ্ট ইণ্ডিজৰ খেলুৱৈৰ উত্থান-

যদিও মিচেলে শীৰ্ষস্থান হেৰুৱাইছে, তথাপিও নিউজীলেণ্ডৰ আন খেলুৱৈসকলৰ ৰেংকিঙত উত্থান ঘটিছে । ৰাচিন ৰবিন্দ্ৰই এটা স্থান আগুৱাই দ্বাদশ স্থান লাভ কৰিছে । ডেভন কনৱেই ১১টা স্থান আগুৱাই ৩১ নম্বৰ স্থানত আছে । ৱেষ্ট ইণ্ডিজৰ অধিনায়ক শ্বাহী হোপ অপৰাজিত শতকৰ বাবে ৰেংকিঙত উত্থান ঘটাই এতিয়া ৮ম স্থানত আছে । বলাৰৰ ভিতৰত মিচেল ছেণ্টনাৰ আৰু মেট হেনৰীৰ প্ৰদৰ্শনৰ বাবে নিউজীলেণ্ডে আৰু অধিক লাভৱান হয় ।

টি-২০ৰ শীৰ্ষ স্থানৰ অল ৰাউণ্ডাৰ ছিকন্দৰ ৰাজা-

জিম্বাবুৱেৰ তাৰকা ছিকন্দৰ ৰাজাই প্ৰথমবাৰৰ বাবে টি-২০ৰ শীৰ্ষ স্থানৰ অল ৰাউণ্ডাৰ ৰেংকিং লাভ কৰি ইতিহাস ৰচনা কৰিছে । ট্ৰাই ছিৰিজৰ সময়ত তেওঁৰ অল ৰাউণ্ড প্ৰদৰ্শনক বহুল প্ৰশংসা কৰা হৈছে ।

টেষ্টত বলাৰ আৰু অলৰাউণ্ডাৰৰ উত্থান-

টেষ্ট ৰেংকিঙতো কিছু গতিশীলতা দেখা গৈছে । ইংলেণ্ডৰ অলি পোপে এতিয়া ২৪ নম্বৰ স্থান লাভ কৰিছে । বাংলাদেশৰ টাইজুল ইছলাম ১৫ নম্বৰ স্থানত । অষ্ট্ৰেলিয়াৰ বেগী বলাৰ মিচেল ষ্টাৰ্ক এতিয়া টেষ্ট বলাৰৰ ভিতৰত পঞ্চম স্থানলৈ উন্নীত হৈছে । অল ৰাউণ্ডাৰ তালিকাত বেন ষ্ট’কছ দ্বিতীয় স্থানলৈ উন্নীত হোৱাৰ বিপৰীতে ভাৰতৰ ৰবীন্দ্ৰ জাডেজা শীৰ্ষত আছে ।

লগতে পঢ়ক : ২০২৬ৰ টি-২০ বিশ্বকাপত ৰোহিত শৰ্মাক ডাঙৰ দায়িত্ব; আই চি চিৰ অধ্যক্ষৰ ঘোষণা

আজি ভাৰত-অষ্ট্ৰেলিয়াৰ প্ৰথম এদিনীয়া মেচ

ভাৰত আৰু অষ্ট্ৰেলিয়াৰ তিনিখন খেলৰ এদিনীয়া শৃংখলাৰ প্ৰথমখন মেচ আজি পাৰ্থৰ অপ্টাছ ষ্টেডিয়ামত অনুষ্ঠিত হ’ব । এই শৃংখলাত ভাৰতীয় দলৰ অধিনায়ক শুভমন গীল অষ্ট্ৰেলিয়ান দলৰ নেতৃত্ব দিব মিচেল মাৰ্ছে । পুৱা ৯ বজাৰ পৰা আৰম্ভ হ’ব এই এদিনীয়া মেচ ।

অধিনায়ক হিচাপে প্ৰথমবাৰৰ বাবে এদিনীয়া ক্ৰিকেটত ভাৰতীয় দলটোক নেতৃত্ব দিব শুভমন গীলে । তেওঁৰ বাবে এই মেচখন অতি বিশেষ । প্ৰবীণ বেটছমেন ৰোহিত শৰ্মা আৰু বিৰাট কোহলীয়েও এই মেচৰ জৰিয়তে আন্তঃৰাষ্ট্ৰীয় ক্ৰিকেটত প্ৰত্যাৱৰ্তন ঘটাইছে । ২২৪ দিনৰ অন্তত ভাৰতৰ হৈ খেলিব লগা ৰোহিত আৰু কোহলীৰ যুটীয়ে অনুৰাগীৰ মাজত প্ৰচণ্ড উত্তেজনাৰ সৃষ্টি কৰিছে । দুয়োগৰাকী খেলুৱৈক চলিত বৰ্ষৰ মাৰ্চ মাহত ভাৰতীয় দলৰ হৈ আই চি চি চেম্পিয়নছ ট্ৰফীত খেলা দেখা গৈছিল, য’ত ৰোহিত ব্ৰিগেডে খিতাপ দখল কৰিছিল ।

নিজৰ কেৰিয়াৰত বিৰাট কোহলী আৰু ৰোহিত শৰ্মা ইমান দীঘলীয়া সময়ৰ বাবে ভাৰতীয় দলৰ পৰা আঁতৰি থকাটো খুব কমেইহে দেখা গৈছে আৰু সেয়াও আঘাত নোহোৱাকৈ । উল্লেখ্য যে ৰোহিত আৰু কোহলী দুয়োজনেই টেষ্ট আৰু টি-২০ আন্তঃৰাষ্ট্ৰীয় খেলৰ পৰা অৱসৰ গ্ৰহণ কৰিছে, গতিকে দুয়োজনেই এতিয়া কেৱল এদিনীয়া ক্ৰিকেটৰ ওপৰত গুৰুত্ব আৰোপ কৰিছে । এদিনীয়াৰ অধিনায়ক পদৰ পৰাও ৰোহিতক অপসাৰণ কৰা হৈছে, য’ত “হিটমেন”য়ে বিশেষ বেটছমেন হিচাপে খেলিব ।

কোহলী-ৰোহিতৰ অন্তিম ছিৰিজ !

বিগত কেইবছৰমানৰ পৰা ভাৰতীয় ক্ৰিকেটত বহু যুৱ তাৰকাৰ উন্মেষ ঘটিছে যদিও বিৰাট কোহলী আৰু ৰোহিত শৰ্মাৰ দৰে ফেন ফ’ল’ৱাৰ কোনো এগৰাকীৰেই নাই । দুয়োজনে এদিনীয়া ক্ৰিকেটত ইমানেই অভিলেখ গঢ়িছে যে এই ফৰ্মেটত তেওঁলোকক শ্ৰেষ্ঠ খেলুৱৈৰ ভিতৰত গণ্য কৰা হয় । অষ্ট্ৰেলিয়াৰ দৰ্শকৰ বাবে ৰোহিত আৰু কোহলীয়ে একেলগে খেলা চোৱাটো এক ৰোমাঞ্চকৰ অভিজ্ঞতা হ’ব । ইফালে এইখনেই অষ্ট্ৰেলিয়াত তেওঁলোকৰ শেষ ছিৰিজ হ’ব পাৰে বুলিও চৰ্চা চলিছে ।

প্ৰথমখন এদিনীয়াত বিৰাট কোহলী, ৰোহিত শৰ্মা, অধিনায়ক শুভমন গীল, শ্ৰেয়াছ আয়াৰ আৰু কে এল ৰাহুলৰ ওপৰত নিৰ্ভৰশীল হ’ব ভাৰতীয় বেটিং । ইফালে, বেগী বলাৰ মহম্মদ চিৰাজে এবছৰতকৈ অধিক সময়ৰ পিছত প্ৰথম এদিনীয়া খেলিব । প্ৰসিদ্ধ কৃষ্ণ, অৰ্শদীপ সিং আৰু হৰ্ষিত ৰানাৰ সৈতে চিৰাজে ফাষ্ট বলিং ইউনিট গঠন কৰিছে । কুলদীপ যাদৱ আৰু অক্ষৰ পেটেলে স্পীন বিভাগত উল্লেখযোগ্য দায়িত্ব কান্ধত ল’ব, আনহাতে হাৰ্দিক পাণ্ডিয়াৰ অনুপস্থিতিত নীতিশ কুমাৰ ৰেড্ডীৰ ভূমিকা গুৰুত্বপূৰ্ণ হৈ পৰিব ।

ইফালে অষ্ট্ৰেলিয়া আঘাত বা তাৰকা খেলুৱৈৰ অনুপস্থিতিৰ বাবে অসুবিধাৰ সন্মুখীন হৈছে । আঘাতৰ বাবে অধিনায়ক পেট কামিন্স খেলপথাৰৰ পৰা আঁতৰি থকাৰ বাবে মিচেল মাৰ্ছে দলটোৰ নেতৃত্ব দিবলৈ আছে । কেমেৰুন গ্ৰীণো আঘাতপ্ৰাপ্ত আৰু তেওঁৰ ঠাইত মাৰ্নাছ লাবুশ্বানে দলত স্থান লাভ কৰিছে ।

লগতে পঢ়ক : ভাৰত-অষ্ট্ৰেলিয়াৰ এদিনীয়া শৃংখলাঃ ৰোহিত-কোহলীৰ ওপৰত নিবদ্ধ থাকিব সকলোৰে দৃষ্টি