দক্ষিণ আফ্ৰিকাৰ বিৰুদ্ধে ঘোষণা ভাৰতীয় দল
ভাৰতীয় ক্ৰিকেট নিয়ন্ত্ৰণ ব’ৰ্ডে দেওবাৰে দক্ষিণ আফ্ৰিকাৰ বিৰুদ্ধে তিনিখন খেলৰ এদিনীয়া শৃংখলাৰ বাবে ভাৰতীয় দল ঘোষণা কৰে । কলকাতা টেষ্টত আঘাতপ্ৰাপ্ত অধিনায়ক শুভমন গীলক আগন্তুক এদিনীয়া শৃংখলাৰ বাবে জিৰণি দিয়া হৈছে । কে এল ৰাহুলক তেওঁৰ ঠাইত দলৰ নেতৃত্ব দিয়াৰ দায়িত্ব দিয়া হৈছে ।
ৰাহুলৰ কান্ধত অধিনায়কৰ দায়িত্ব-
দেওবাৰে বি চি চি আইয়ে আগন্তুক এদিনীয়া শৃংখলাৰ বাবে ভাৰতীয় দলটো ঘোষণা কৰে । ৰোহিত শৰ্মা আৰু বিৰাট কোহলীৰ দৰে প্ৰবীণ খেলুৱৈ থকা দলটোৰ নেতৃত্ব দিব কে এল ৰাহুলে । কলকাতা টেষ্টৰ সময়ত ডিঙিত আঘাত পোৱা গীল বৰ্তমান মুম্বাইত আৰু তেওঁ চিকিৎসাৰ তত্বাৱধানত আছে । শ্ৰেয়াছ আয়াৰো এই শৃংখলাৰ বাবে বিবেচিত নহ’ল । অষ্ট্ৰেলিয়া ভ্ৰমণৰ সময়ত আঘাতপ্ৰাপ্ত হোৱা আয়াৰ বৰ্তমান সুস্থ হৈ উঠিছে ।
বুমৰাহ আৰু ছিৰাজক জিৰণি-
আগন্তুক শৃংখলাৰ বাবে ফাষ্ট বলাৰ যশপ্ৰীত বুমৰাহ আৰু মহম্মদ ছিৰাজক জিৰণি দিয়া হৈছে । বৰ্তমান দুয়োগৰাকীয়ে দক্ষিণ আফ্ৰিকাৰ বিৰুদ্ধে চলি থকা টেষ্ট শৃংখলাত খেলি আছে । বাছনি সমিতিয়ে তেওঁলোকৰ ৱৰ্ক লোড মেনেজৰ বাবে তেওঁলোকক জিৰণি দিছে ।
পুনৰ বিমুখ ছামী-
অভিজ্ঞ বেগী বলাৰ মহম্মদ ছামীক পুনৰবাৰ এই শৃংখলাৰ নিৰ্বাচকসকলে বিমুখ কৰিছে । শেহতীয়াকৈ ঘৰুৱা ক্ৰিকেটত তেওঁৰ আকৰ্ষণীয় প্ৰদৰ্শনৰ পিছত দললৈ প্ৰত্যাৱৰ্তনৰ সুযোগ লাভ কৰিব বুলি চৰ্চা চলিছিল ।
এদিনীয়া শৃংখলাৰ সূচী-
বৰ্তমান ভাৰত আৰু দক্ষিণ আফ্ৰিকাই দুখন টেষ্টৰ শৃংখলা খেলি আছে । কলকাতাত অনুষ্ঠিত প্ৰথমখন খেলত আলহী দলে জয়লাভ কৰি ১-০ ব্যৱধানত অগ্ৰগতি লাভ কৰে । দুয়োটা দলে এতিয়া গুৱাহাটীত দ্বিতীয়খন টেষ্ট খেলি আছে । ইয়াৰ পিছতে দুয়োটা দলে তিনিখন মেচৰ এদিনীয়া শৃংখলা খেলিব । ৩০ নৱেম্বৰত ৰাঁচীত অনুষ্ঠিত হ’ব প্ৰথমখন খেল । ইয়াৰ পিছতে ২ আৰু ৬ ডিচেম্বৰত ক্ৰমে ৰায়পুৰ আৰু বিশাখাপট্টনমত অনুষ্ঠিত হ’ব শৃংখলাৰ পৰৱৰ্তী মেচ ।
লগতে পঢ়ক : গুৱাহাটী টেষ্টত দক্ষিণ আফ্ৰিকাৰ ৰানৰ পাহাৰ; মুথুস্বামীৰ শতক
