অজিত আগৰকাৰৰ নেতৃত্বত BCCIৰ জ্যেষ্ঠ পুৰুষ নিৰ্বাচনী সমিতিৰ এখন গুৰুত্বপূৰ্ণ বৈঠক গুৱাহাটীত অনুষ্ঠিত হয়, য’ত আফগানিস্তানৰ বিৰুদ্ধে ঘৰুৱা শৃংখলাৰ বাবে এই দল নিৰ্বাচন কৰা হয়

আফগানিস্তানৰ বিৰুদ্ধে হ’বলগীয়া আগন্তুক টেষ্ট আৰু এদিনীয়া শৃংখলাৰ বাবে ভাৰতীয় ক্ৰিকেট দল ঘোষণা কৰা হৈছে । নিৰ্বাচকসকলে এইবাৰ অনুভৱী আৰু যুৱ খেলুৱৈৰ সংমিশ্ৰণ ঘটাই দলটাত এক সুন্দৰ ভাৰসাম্য ৰক্ষা কৰাৰ চেষ্টা চলাইছে । গুৰুত্বপূৰ্ণ কথাটো হ’ল, এদিনীয়া আৰু টেষ্ট— দুয়োটা দলৰে অধিনায়কত্বৰ দায়িত্ব অৰ্পণ কৰা হৈছে তাৰকা বেটছমেন শুভমন গীলক ।

অজিত আগৰকাৰৰ নেতৃত্বত বি চি চি আই (BCCI)ৰ জ্যেষ্ঠ পুৰুষ নিৰ্বাচনী সমিতিৰ এখন গুৰুত্বপূৰ্ণ বৈঠক গুৱাহাটীত অনুষ্ঠিত হয়, য’ত আফগানিস্তানৰ বিৰুদ্ধে ঘৰুৱা শৃংখলাৰ বাবে এই দল নিৰ্বাচন কৰা হয় । সূচী অনুসৰি, অহা ৬ জুনৰ পৰা মুলাণপুৰত একমাত্ৰ টেষ্ট মেচখন খেলা হ’ব । ইয়াৰ পিছত অনুষ্ঠিত হ’বলগীয়া তিনিখনীয়া এদিনীয়া শৃংখলাৰ মেচকেইখন ক্ৰমে ১৪ জুনত ধৰ্মশালাত, ১৭ জুনত লক্ষ্ণৌত আৰু ২০ জুনত চেন্নাইত অনুষ্ঠিত হ’ব ।

দলত ৪ গৰাকী নতুন মুখক সুযোগ-

টেষ্ট আৰু এদিনীয়া স্কোৱাডক মিলাই সৰ্বমুঠ চাৰি গৰাকী নতুন খেলুৱৈক ভাৰতীয় দলত সুযোগ দিয়া হৈছে । ইয়াৰ ভিতৰত শেহতীয়া আই পি এল (IPL)ত সুন্দৰ প্ৰদৰ্শন কৰা খেলুৱৈও অন্তৰ্ভুক্ত হৈছে । এই নতুন খেলুৱৈ কেইগৰাকী হ’ল— মানৱ সুথাৰ, গুৰনুৰ ব্ৰাৰ, হৰ্ষ ডুবে আৰু প্ৰিন্স যাদৱ । ইয়াৰে হৰ্ষ ডুবে আৰু গুৰনুৰ ব্ৰাৰে টেষ্ট আৰু এদিনীয়া দুয়োটা দলতে স্থান লাভ কৰিবলৈ সক্ষম হৈছে । আনহাতে, প্ৰিন্স যাদৱক কেৱল এদিনীয়া দলত আৰু মানৱ সুথাৰক কেৱল টেষ্ট দলত অন্তৰ্ভুক্ত কৰা হৈছে ।

এদিনীয়া দলটোত নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ আৰু অৰ্শদীপ সিঙৰ দৰে খেলুৱৈয়ো স্থান পাইছে । মন কৰিবলগীয়া যে, ঋষভ পণ্টে এইবাৰ এদিনীয়া দলত স্থান পোৱা নাই । অৱশ্যে, সম্পূৰ্ণ ফিটনেছ ক্লিয়াৰেন্স লাভ কৰিলে ৰোহিত শৰ্মা আৰু হাৰ্দিক পাণ্ডিয়া এদিনীয়া শৃংখলাৰ বাবে উপলব্ধ হ’ব বুলি জানিব পৰা গৈছে । এদিনীয়া শৃংখলাত কে এল ৰাহুলে উইকেটৰক্ষকৰ মুখ্য দায়িত্ব পালন কৰিব ।

🚨 News 🚨

Presenting #TeamIndia's squads for the @IDFCFIRSTBank Test match and the 3️⃣-match ODI series against Afghanistan in June 🙌#INDvAFG pic.twitter.com/hFiABALLld

— BCCI (@BCCI) May 19, 2026

ঋষভ পণ্টৰ উপ-অধিনায়কত্ব কৰ্তন-

টেষ্ট দলৰ উপ-অধিনায়কৰ দায়িত্ব অৰ্পণ কৰা হৈছে কে এল ৰাহুলক । ইয়াৰ বিপৰীতে ঋষভ পণ্টৰ পৰা উপ-অধিনায়কৰ পদ কাঢ়ি লোৱা হৈছে । এই শৃংখলাত যশস্বী জয়ছোৱাল, ছাই সুদৰ্শন আৰু দেৱদত্ত পড়িক্কলৰ দৰে যুৱ বেটছমেনসকলৰ ওপৰত দলৰ এক ডাঙৰ দায়িত্ব থাকিব । টেষ্ট মেচখনত উইকেটকিপিং বিভাগটো চম্ভালিব ঋষভ পণ্ট আৰু ধ্ৰুৱ জুৰেলে । বোলিং বিভাগত মহম্মদ চিৰাজ, প্ৰসিদ্ধ কৃষ্ণ আৰু কুলদীপ যাদৱৰ দৰে অভিজ্ঞ তাৰকাই ক নেতৃত্ব দিব, যাৰ সৈতে যুৱ বলাৰসকলেও নিজৰ প্ৰতিভা প্ৰমাণ কৰাৰ সুযোগ পাব ।

ভাৰতীয় টেষ্ট দল-

শুভমন গীল (অধিনায়ক), যশস্বী জয়ছোৱাল, কে এল ৰাহুল (উপ-অধিনায়ক), ছাই সুদৰ্শন, ঋষভ পণ্ট (উইকেটৰক্ষক), দেৱদত্ত পাড্ডিক্কল, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, মহম্মদ চিৰাজ, প্ৰসিদ্ধ কৃষ্ণ, মানৱ সুথাৰ, গুৰনুৰ ব্ৰাৰ, হৰ্ষ ডুবে আৰু ধ্ৰুৱ জুৰেল (উইকেটৰক্ষক)।

ভাৰতীয় এদিনীয়া দল-

শুভমন গীল (অধিনায়ক), ৰোহিত শৰ্মা, বিৰাট কোহলী, শ্ৰেয়াস আয়াৰ (উপ-অধিনায়ক), কে এল ৰাহুল (উইকেটৰক্ষক), ইশান কিষাণ (উইকেটৰক্ষক), হাৰ্দিক পাণ্ডিয়া, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, আৰ্শদীপ সিং, প্ৰিন্স যাদৱ, প্ৰসিদ্ধ কৃষ্ণ, গুৰনুৰ ব্ৰাৰ আৰু হৰ্ষ ডুবে ।

লগতে পঢ়ক : ভাৰতৰ নতুন টেষ্ট শৃংখলা ঘোষণা, বিচিচিআইৰ তৰফৰ পৰা অনুৰাগীসকললৈ বিশেষ উপহাৰ

ইডেন গাৰ্ডেনত অনুষ্ঠিত হোৱা এখন খেলত ভাৰতীয় দলে ৱেষ্ট ইণ্ডিজক ৫ উইকেটত পৰাস্ত কৰি টি-২০ বিশ্বকাপ ২০২৬ৰ ছেমি ফাইনেলৰ টিকত নিশ্চিত কৰে

টি-২০ বিশ্বকাপ ২০২৬ৰ ছেমি ফাইনেলত প্ৰৱেশ কৰিছে ডিফেণ্ডিং চেম্পিয়ন ভাৰতীয় দল । দেওবাৰে কলকাতাৰ ইডেন গাৰ্ডেনত অনুষ্ঠিত হোৱা এখন খেলত ভাৰতীয় দলে ৱেষ্ট ইণ্ডিজক ৫ উইকেটত পৰাস্ত কৰি ছেমি ফাইনেলৰ টিকত নিশ্চিত কৰে । উল্লেখ্য যে, ৱেষ্ট ইণ্ডিজক পৰাস্ত কৰি নক আউটত পৰাস্ত কৰা ভাৰতে ষষ্ঠবাৰৰ বাবে টি-২০ বিশ্বকাপৰ ছেমি ফাইনেলত প্ৰৱেশ কৰিছে । অহা ৫ মাৰ্চত অনুষ্ঠিত হ’বলগীয়া টি-২০ বিশ্বকাপ ২০২৬ৰ ছেমি ফাইনেল মেচত ভাৰতীয় দলটোৱে ইংলেণ্ডৰ বিৰুদ্ধে খেলিব ।

৫ মাৰ্চৰ ছেমি ফাইনেলৰ পূৰ্বে জানক টি-২০ বিশ্বকাপত ভাৰতীয় দলৰ নক আউট পৰ্যায়ৰ মেচৰ অভিলেখ-

২০০৭ চনত ছেমি ফাইনেলত অষ্ট্ৰেলিয়াক পৰাস্ত কৰে ভাৰতে-

২০০৭ চনত অনুষ্ঠিত হোৱা উদ্বোধনী টি-২০ বিশ্বকাপত চেম্পিয়ন ভাৰতীয় দলটোৱে ছেমি ফাইনেল টিকট নিশ্চিত কৰিছিল । মহেন্দ্ৰ সিং ধোনীৰ নেতৃত্বত ভাৰতীয় দলটোৱে ছেমিত অষ্ট্ৰেলিয়াক পৰাস্ত কৰিছিল । যুৱৰাজ সিঙে বিস্ফোৰক বেটিং প্ৰদৰ্শনেৰে ৩০ বলত ৭০ ৰান সংগ্ৰহ কৰিছিল । ইফালে ধোনীয়ে ২০০ৰো অধিক ষ্ট্ৰাইক ৰেটত ১৮টা বলত অপৰাজিত ৩৬ ৰান কৰি সংগ্ৰহ কৰিছিল । প্ৰথমে বেটিং কৰি ভাৰতে ২০ অভাৰত ৫টা উইকেট হেৰুৱাই ১৮৮ ৰান সংগ্ৰহ কৰে । ইয়াৰ প্ৰতিক্ৰিয়া স্বৰূপে অষ্ট্ৰেলিয়াই ৭টা উইকেট হেৰুৱাই মাত্ৰ ১৭৩ ৰানহে সংগ্ৰহ কৰে । ইৰফান পাঠান আৰু যোগীন্দৰ শৰ্মাই দুটাকৈ উইকেট দখল কৰে ।

২০১৪ত দক্ষিণ আফ্ৰিকাক পৰাস্ত কৰিছিল ভাৰতে-

২০০৭ চনত খিতাপ জয় কৰাৰ পিছত ভাৰতীয় দলটোৱে ৭ বছৰৰ পাছত পৰৱৰ্তী টি-২০ বিশ্বকাপৰ ছেমি ফাইনেল খেলাৰ সুযোগ লাভ কৰে । ২০১৪ চনৰ টি-২০ বিশ্বকাপৰ ছেমি ফাইনেল ভাৰতে দক্ষিণ আফ্ৰিকাৰ বিৰুদ্ধে খেলিছিল । প্ৰথমে বেটিং কৰি দক্ষিণ আফ্ৰিকাই ২০ অভাৰত চাৰি উইকেটত ১৭২ ৰান সংগ্ৰহ কৰে । অৱশ্যে টিম ইণ্ডিয়াই ১৯.১ অভাৰত মাত্ৰ ৪টা উইকেট হেৰুৱাই ১৭৩ ৰানৰ লক্ষ্যত উপনীত হয় । বিৰাট কোহলীয়ে ৪৪টা বলত অপৰাজিত ৭২ ৰান সংগ্ৰহ কৰে ।

২০১৬ত ৱেষ্ট ইণ্ডিজে ভাঙিছিল কোটি কোটি ভাৰতীয় হৃদয়-

ঘৰুৱা মাটিত অনুষ্ঠিত হোৱা ২০১৬ চনৰ টি-২০ বিশ্বকাপৰ ছেমি ফাইনেলত টিম ইণ্ডিয়াই ৱেষ্ট ইণ্ডিজৰ বিৰুদ্ধে খেলিছিল । প্ৰথমে বেটিং কৰি ভাৰতে ২০ অভাৰত দুটা উইকেটত ১৯২ ৰান সংগ্ৰহ কৰে । বিৰাট কোহলীয়ে ৮৯ আৰু ৰোহিত শৰ্মাই ৪৩ ৰানৰ শক্তিশালী অৱদান অগবঢ়াইছিল । অৱশ্যে লেণ্ডল ছিমনছৰ অপৰাজিত ৮২ আৰু জনছন চাৰ্লছৰ ৩৬ বলত ৫২ ৰানৰ ফলত কেৰিবিয়ান দলটোৱে ১৯৩ ৰানৰ লক্ষ্যত উপনীত হয় ।

২০২২ত ইংলেণ্ড হাতত পৰাস্ত-

অষ্ট্ৰেলিয়াত অনুষ্ঠিত হোৱা ২০২২ চনৰ টি-২০ বিশ্বকাপৰ ছেমি ফাইনেলত ইংলেণ্ডৰ হাতত ভাৰতীয় দলটোৱে শোচনীয় পৰাজয়ৰ সন্মুখীন হৈছিল । ৩৩ বলত হাৰ্দিক পাণ্ডিয়াৰ শক্তিশালী ৬৩ ৰান আৰু বিৰাট কোহলীৰ ৫০ ৰানৰ বাবে ভাৰতে ২০ অভাৰত ৬টা উইকেট হেৰুৱাই ১৬৮ ৰান সংগ্ৰহ কৰে । অৱশ্যে জোছ বাটলাৰ আৰু এলেক্স হেলছৰ বিস্ফোৰক বেটিঙৰ বাবে ইংলেণ্ডে এটা উইকেট হেৰুৱাই ১৬৯ ৰানৰ লক্ষ্যত উপনীত হয় ।

২০২৪ত ইংলেণ্ডৰ বিৰুদ্ধে পোতক তোলে ভাৰতীয় দলে-

২০২৪ চনৰ টি-২০ বিশ্বকাপৰ ছেমি ফাইনেলত ভাৰতীয় দলটোৱে ইংলেণ্ডক পৰাস্ত কৰি পূৰ্বৰ বিশ্বকাপত পৰাজয়ৰ প্ৰতিশোধ লয় । প্ৰথমে বেটিং কৰি ভাৰতীয় দলটোৱে ২০ অভাৰত ৭ উইকেটত ১৭১ ৰান সংগ্ৰহ কৰে । ৰোহিত শৰ্মাই ৩৯টা বলত ৫৭ ৰানৰ শক্তিশালী ইনিংছ খেলাৰ বিপৰীতে সূৰ্যকুমাৰ যাদৱে ৪৭ ৰানৰ বৰঙণি আগবঢ়ায় । ইয়াৰ পিছতে কুলদীপ যাদৱ আৰু অক্ষৰ পেটেলৰ স্পীন ভেল্কীত ইংৰাজ বেটছমেনসকলে সহজেই হাৰ মানি লয় । ইংলেণ্ডে মাত্ৰ ১০৩ ৰানত বল আউট হোৱাৰ বিপৰীতে কুলদীপ আৰু অক্ষৰে তিনিটাকৈ উইকেট দখল কৰে ।

লগতে পঢ়ক : আইচিচিৰ এদিনীয়া ৰেংকিঙত ভাৰতীয় তাৰকাৰ দপদপনি

দক্ষিণ আফ্ৰিকাৰ বিৰুদ্ধে পৰাজয়ৰ পিছত এতিয়া ছেমি ফাইনেলৰ বাট অনিশ্চিত হৈ পৰিছে ভাৰতীয় দলৰ । ইফালে দলটোৰ পৰৱৰ্তী মেচত চলিত টি-২০ বিশ্বকাপত অঘটন ঘটাই ছুপাৰ-৮ত প্ৰৱেশ কৰা জিম্বাবৱেৰ বিৰুদ্ধে আছে ।

চলিত টি-২০ বিশ্বকাপৰ ছুপাৰ-৮ পৰ্যায়ৰ প্ৰথমখন মেচত পৰাজয়ৰ সন্মুখীন হয় টিম ইণ্ডিয়া । দেওবাৰে আহমেদাবাদৰ নৰেন্দ্ৰ মোদী ষ্টেডিয়ামত দক্ষিণ আফ্ৰিকাই ভাৰতীয় দলক ৭৬ ৰানত পৰাস্ত কৰে । এইখন মেচত পৰাস্ত হোৱাৰ পিছত এতিয়া ভাৰতে ছেমি ফাইনেলত প্ৰৱেশ কৰিবলৈ বাকী থকা দুয়োখন মেচতে জয়লাভ কৰিব লাগিব । দক্ষিণ আফ্ৰিকাৰ বিৰুদ্ধে পৰাজয়ৰ পিছত ভাৰতীয় দলৰ মূল একাদশত কিছু পৰিৱৰ্তন হ’ব পাৰে ।

ছুপাৰ-৮ পৰ্যায়ত ভাৰতৰ পৰৱৰ্তী মেচ জিম্বাবৱেৰ বিৰুদ্ধে । এই খেলখন চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব । এই মেচৰ বাবে ইতিমধ্যে চেন্নাই উপস্থিত হৈছে ভাৰতীয় দল । যদিও জিম্বাবুৱে এটা সৰু দল, তথাপিও প্ৰতিযোগিতাখনত অষ্ট্ৰেলিয়া আৰু শ্ৰীলংকাৰ দৰে ডাঙৰ দলক পৰাস্ত কৰি ছুপাৰ-৮ পৰ্যায়ত উপনীত হৈছে দলটো । গতিকে জিম্বাবুৱেৰ বিৰুদ্ধে ভাৰতীয় দলৰ অভিযান সহজ নহ’ব ।

চেন্নাইৰ এম এ চিদাম্বৰম ষ্টেডিয়ামৰ খেলপথাৰ স্পীনাৰৰ বাবে অনুকূল বুলি বিবেচিত হৈছে । ইয়াত স্পীনাৰসকলে আধিপত্য বিস্তাৰ কৰে । গতিকে টিম ইণ্ডিয়াই তিনিজন স্পীনাৰ খেলপথাৰত নমাব পাৰে । তদুপৰি অক্ষৰ পেটেল দললৈ ঘূৰি অহাৰ সম্ভাৱনা আছে । ৱাশ্বিংটন সুন্দৰক অক্ষৰৰ সলনি অন্তৰ্ভূক্ত কৰা হৈছিল যদিও দক্ষিণ আফ্ৰিকাৰ বিৰুদ্ধে পৰাজয়ৰ পিছত এতিয়া দলৰ মূল একাদশলৈ ‘বাপু’ৰ প্ৰত্যাৱৰ্তন নিশ্চিত বুলি বিবেচিত হৈছে ।

ইফালে চলিত টি-২০ বিশ্বকাপ অভিষেক শৰ্মাৰ বাবে দুঃস্বপ্ন হিচাবে বিবেচিত হৈছে । এতিয়ালৈকে তেওঁ আশা কৰা ধৰণে প্ৰদৰ্শন কৰিব পৰা নাই । এতিয়া অভিষেকৰ ঠাইত সঞ্জু চেমচনক পৰৱৰ্তী মেচত অন্তৰ্ভূক্ত কৰাৰ বাবে চৰ্চা চলিছে । অৱশ্যে দল পৰিচালনা সমিতিয়ে অভিষেকৰ ওপৰত নিৰ্ভৰ কৰিব পাৰে, যাৰ ফলত চেমচনে অপেক্ষা কৰিব লাগিব । পৰৱৰ্তী মেচত ভাৰতীয় দলত দুটা পৰিৱৰ্তন হোৱাৰ সম্ভাৱনা আছে । অক্ষৰ পেটেল আৰু কুলদীপ যাদৱ মূল একাদশলৈ ঘূৰি অহাৰ সম্ভাৱনা আছে ।

জিম্বাবুৱেৰ বিৰুদ্ধে ভাৰতৰ সম্ভাৱ্য মূল একাদশ-

অভিষেক শৰ্মা, ঈশান কিষাণ, তিলক বাৰ্মা, সূৰ্যকুমাৰ যাদৱ (অধিনায়ক), শিৱম ডুবে, হাৰ্দিক পাণ্ডিয়া, অক্ষৰ পেটেল, কুলদীপ যাদৱ/ৱাশ্বিংটন সুন্দৰ, বৰুণ চক্ৰৱৰ্তী, অৰ্শদীপ সিং আৰু যশপ্ৰীত বুমৰাহ ।

লগতে পঢ়ক : টি-২০ বিশ্বকাপত থমকিল ভাৰতৰ বিজয় ৰথ, ছুপাৰ-৮ত দক্ষিণ আফ্ৰিকাৰ বিৰুদ্ধে শোচনীয় পৰাজয়

দেওবাৰে ছুপাৰ এইটৰ নিজৰ প্ৰথমখন মেচত দক্ষিণ আফ্ৰিকাৰ মুখামুখি হ’ব ভাৰতীয় দল

চলিত টি-২০ বিশ্বকাপত গ্ৰুপ পৰ্য়ায়ৰ আটাইকেইখন মেচতে জয়লাভ কৰি ছুপাৰ এইটত প্ৰৱেশ কৰিছে সূৰ্যকুমাৰ যাদৱ নেতৃত্বাধীন ভাৰতীয় দল । দেওবাৰে ছুপাৰ এইটৰ নিজৰ প্ৰথমখন মেচত দক্ষিণ আফ্ৰিকাৰ মুখামুখি হ’ব ভাৰতীয় দল । কিন্তু গুৰুত্বপূৰ্ণ এই মেচখনৰ পূৰ্বে কিছু সমস্যাত পৰিছে দলটো । অনুশীলনৰ সময়ত আঘাতপ্ৰাপ্ত হৈছে দলৰ তাৰকা বলাৰ মহম্মদ চিৰাজ । চিৰাজৰ এই আঘাতে চিন্তা বৃদ্ধি কৰিছে মেনেজমেন্টৰ ।

প্ৰকাশিত এক প্ৰতিবেদন অনুসৰি শুকুৰবাৰে অনুশীলনৰ সময়ত আঘাতপ্ৰাপ্ত হয় বেগী বলাৰগৰাকী । নেটত অনুশীলনৰ সময়ত অলৰাউণ্ডাৰ হাৰ্দিক পাণ্ডিয়াৰ এটা বলে তীব্ৰ বেগত চিৰাজক আঁঠুত আঘাত কৰে আৰু তেওঁ লগে লগে মাটিত বহি পৰে । আঘাতৰ পিছতে চিৰাজে খেলপথাৰো ত্যাগ কৰে । চিৰাজৰ এই আঘাতে এতিয়া দলৰ চিন্তা বৃদ্ধি কৰিছে ।

উল্লেখ্য যে, হৰ্ষিত ৰানা আঘাতপ্ৰাপ্ত হৈ বাহিৰ হোৱাৰ পিছত ভাৰতৰ টি-২০ বিশ্বকাপৰ দলত অন্তিম পৰ্যায়ত স্থান লাভ কৰিছিল মহম্মদ চিৰাজে । চলিত প্ৰতিযেগিতাখনত এতিয়ালৈকে চিৰাজে কেৱল এখন মেচ খেলিছে যদিও ছুপাৰ এইট পৰ্যায়ৰ বাবে তেওঁ সুস্থ হৈ উঠাটো অত্যন্ত জৰুৰী ।

ইউ এছ এৰ বিৰদ্ধে অনুষ্ঠিত গ্ৰুপ পৰ্যায়ৰ খেলখনত দলত স্থান লাভ কৰা চিৰাজে মেচখনত ২৯ ৰানৰ বিনিময়ত তিনিটা উইকেট দখল কৰিছিল ।

লগতে পঢ়ক : অভিষেক শৰ্মা নে তিলক বৰ্মা? দক্ষিণ আফ্ৰিকাৰ বিৰুদ্ধে টিম ইণ্ডিয়াৰ প্লেইং ১১ৰ পৰা কাক দিয়া হ’ব বাদ?

যদি অনুমান কৰা সমীকৰণ সঁচা হয় তেন্তে চলিত টি-২০ বিশ্বকাপত অনুগাৰীসকল পুনৰ ভাৰত-পাকিস্তান মেচৰ সাক্ষী হ’ব পাৰে ।

টি-২০ বিশ্বকাপ ২০২৬ক লৈ অনুৰাগীৰ মাজৰ উত্তেজনা এতিয়া তুংগত উঠিছে । এতিয়ালৈকে এই বিশ্বকাপত কেইবাখনো উতেতজনাপূৰ্ণ তথা হাইভল্টেজ খেল দেখা গৈছে । ২০২১ চনৰ চেম্পিয়ন অষ্ট্ৰেলিয়া গ্ৰুপ পৰ্যায়ৰ পৰা বাহিৰ হোৱাটো আছিল চলিত এই প্ৰতিযগিতাৰ আটাইতকৈ ডাঙৰ অঘটন । ইফালে জিম্বাবুৱেই নিজৰ প্ৰদৰ্শনেৰে সকলোকে আপ্লুত কৰিছে । বহু দলে ছুপাৰ এইটৰ বাবে যোগ্যতা অৰ্জন কৰা নাছিল যদিও তেওঁলোকৰ খেলুৱৈসকলে বেট আৰু বল দুয়োটাৰে শিৰোনাম দখল কৰিছে । প্ৰতিযোগিতা আৰম্ভ হোৱাৰ পূৰ্বে কেইবাটাও বিতৰ্কৰ সৃষ্টি হৈছিল যদিও এই সকলোবোৰ ভাৰত আৰু পাকিস্তানৰ মাজত হোৱা মেচখনেৰে নিষ্পত্তি হৈছিল ।

ইফালে গ্ৰুপ এৰ এখন খেলত তীব্র প্ৰতিদ্বন্দ্বী পাকিস্তানক ৬১ ৰাণত পৰাস্ত কৰি টিম ইণ্ডিয়াই চবুৰীয়া দেশখনৰ দৰ্প চূৰ্ণ কৰে । প্ৰতিযোগিতা আৰম্ভ হোৱাৰ পূৰ্বে পাকিস্তানে ভাৰতৰ বিৰুদ্ধে খেলখন বৰ্জন কৰাৰ কথা ঘোষণা কৰিছিল, যাৰ বাবে ক্ৰিকেট পণ্ডিত আৰু অনুৰাগীৰ ব্যাপক সমালোচনাৰ সৃষ্টি হৈছিল । আই চি চিৰ ধমকৰ আশংকাত পাকিস্তানে প্ৰতিযোগিতা আৰম্ভ হোৱাৰ ঠিক আগতেই ইউ টাৰ্ণ মাৰি ভাৰতৰ বিৰুদ্ধে খেলিবলৈ সন্মত হয় ।

গ্ৰুপ পৰ্যায়ত ভাৰতে পাকিস্তানক পৰাস্ত কৰে যদিও এতিয়া পুনৰ চিৰ প্ৰতিদ্বন্দ্বি এই দুয়োখন দেশৰ মাজত টি-২০ বিশ্বকাপ ২০২৬ত মুখামুখি হোৱাৰ সম্ভাৱনা ব্যক্ত কৰিছে একাংশ বিশেষজ্ঞই । যদি অনুমান কৰা সমীকৰণ সঁচা হয় তেন্তে চলিত টি-২০ বিশ্বকাপত অনুগাৰীসকল পুনৰ ভাৰত-পাকিস্তান মেচৰ সাক্ষী হ’ব পাৰে ।

গ্ৰুপ পৰ্যায়ৰ শীৰ্ষত ভাৰত, দ্বিতীয় স্থানত পাকিস্তান-

ভাৰতীয় দলটোৱে গ্ৰুপ এৰ সকলো খেলতে জয়লাভ কৰি পইণ্ট তালিকাৰ শীৰ্ষত স্থান লাভ কৰিছে । ইফালে পাকিস্তানে গ্ৰুপ এত চাৰিখন খেলৰ তিনিখন খেলত জয়লাভ কৰি দ্বিতীয় স্থান দখল কৰে । ছুপাৰ এইটত প্ৰৱেশ কৰিবলৈ যথেষ্ট কষ্ট কৰিছিল যদিও নামিবিয়াৰ বিৰুদ্ধে অন্তিমখন খেলত জয়লাভ কৰি ছুপাৰ এইটৰ বাবে যোগ্যতা অৰ্জন কৰিবলৈ সক্ষম হৈছিল দলটোৱে । ২০০৯ চনৰ টি-২০ চেম্পিয়ন পাকিস্তানে অসংখ্য ত্ৰুটি প্ৰদৰ্শন কৰিছিল আৰু প্ৰথম মেচতে নেদাৰলেণ্ডৰ হাতত পৰাস্ত হোৱা হ’লে প্ৰতিযোগিতাৰ পৰা বাহিৰ হ’লহেঁতেন । পাকিস্তানে নেদাৰলেণ্ডৰ বিৰুদ্ধে গ্ৰুপ এ মেচত তিনিটা বল বাকী থকা অৱস্থাত জয়লাভ কৰে ।

আকৌ হ’ব নেকি ভাৰত-পাকিস্তান মেচ ?

এই প্ৰতিযোগিতাত ২০ টা দলে অংশগ্ৰহণ কৰিছে । সকলো দলকে পাঁচটাকৈ দলৰ চাৰিটা গোটত ভাগ কৰা হৈছিল । প্ৰতিটো গ্ৰুপৰ পৰা শীৰ্ষ দুটা দলে ছুপাৰ এইট ৰাউণ্ডৰ বাবে যোগ্যতা অৰ্জন কৰে । ছুপাৰ এইট ৰাউণ্ডত এতিয়া চাৰিটাকৈ দলৰ দুটা গ্ৰুপ আছে আৰু আইচিচিয়ে ইতিমধ্যে প্ৰস্তুত তালিকা অনুসৰি দল নিৰ্ধাৰণ কৰা হৈছে । ছুপাৰ এইট ৰাউণ্ডত ভাৰতক গ্ৰুপ ১ত স্থান দিয়াৰ বিপৰীতে পাকিস্তানক গ্ৰুপ ২ত স্থান দিয়া হৈছে । টিম ইণ্ডিয়াৰ গ্ৰুপত ৱেষ্ট ইণ্ডিজ, দক্ষিণ আফ্ৰিকা আৰু জিম্বাবুৱে অন্তৰ্ভুক্ত আছে । পাকিস্তানৰ গ্ৰুপত ইংলেণ্ড, নিউজিলেণ্ড আৰু শ্ৰীলংকা আছে ।

ছুপাৰ এইট ৰাউণ্ডত প্ৰতিটো গ্ৰুপৰ পৰা এটা দলে নিজৰ গ্ৰুপৰ বাকী তিনিটা দলৰ বিৰুদ্ধে এখন মেচ খেলিব । যিহেতু ভাৰত আৰু পাকিস্তান দুটা বেলেগ বেলেগ গোটত আছে, গতিকে দল দুটা মুখামুখি নহয় । ছুপাৰ এইটৰ দুয়োটা গ্ৰুপৰ শীৰ্ষ দুটা দলে ছেমি ফাইনেলত প্ৰৱেশ কৰিব । অৱশ্যে ছেমি ফাইনেলত ভাৰত আৰু পাকিস্তানৰ মাজত সংঘৰ্ষৰ সম্ভাৱনা নথকা নহয় । যদি ভাৰত আৰু পাকিস্তানে নিজ নিজ গ্ৰুপত শীৰ্ষ দুটা স্থানত অন্ত পেলায় তেন্তে ছেমি ফাইনেলত সংঘৰ্ষ হ’ব পাৰে ।

ছেমিফাইনেল মেচৰ সমীকৰণ-

ছেমিফাইনেল ফৰ্মেটটো এটা ক্ৰছ অভাৰ ব্যৱস্থাৰ ওপৰত ভিত্তি কৰি তৈয়াৰ কৰা হৈছে :

গ্ৰুপ ১ৰ শীৰ্ষ দল বনাম গ্ৰুপ ২ৰ দ্বিতীয় স্থানৰ দল ।

গ্ৰুপ ২ৰ শীৰ্ষ দল বনাম গ্ৰুপ ১ৰ দ্বিতীয় স্থানৰ দল ।

ভাৰত-পাকিস্তানে কেনেকৈ ছেমি ফাইনেল খেলিব ?

প্ৰথম সমীকৰণ-

-নিজৰ গ্ৰুপত প্ৰথম স্থান দখল কৰিছে ভাৰতে ।

-এই গ্ৰুপত দ্বিতীয় স্থান লাভ কৰিছে পাকিস্তানে ।

-এনে ক্ষেত্ৰত দুয়োটা দল ছেমি ফাইনেলত মুখামুখি হ’ব পাৰে ।

দ্বিতীয় সমীকৰণ-

নিজৰ গ্ৰুপত প্ৰথম স্থানত আছে পাকিস্তান ।

-তেওঁলোকৰ গ্ৰুপত দ্বিতীয় স্থান লাভ কৰিছে ভাৰতে ।

-তেতিয়াও ছেমিফাইনেলত সংঘৰ্ষ সম্ভৱপৰ ।

দুয়োটা ছেমি ফাইনেল কেতিয়া নহয় ?

-যদি দুয়োটা দলে নিজৰ নিজৰ গ্ৰুপত প্ৰথম স্থান লাভ কৰে ।

-যদি দুয়োটা দলে নিজ নিজ গ্ৰুপত দ্বিতীয় স্থান লাভ কৰে ।

-এনে ক্ষেত্ৰত ছেমি ফাইনেলত ইটোৱে সিটো দলৰ বিৰুদ্ধে খেলিব নোৱাৰিব ।

একেটা স্থানত ফাইনেলত সংঘৰ্ষৰ পথ মুকলি কৰিব-

যদি দুয়োটা দলে একেটা স্থানতে ছুপাৰ ৮ স্থানত অন্ত পেলায় (যেনে, দুয়োটা প্ৰথম বা দুয়োটা দ্বিতীয়), তেন্তে তেওঁলোকে পৃথক ছেমি ফাইনেল খেলিব । যদি দুয়োজনে নিজ নিজ ছেমি ফাইনেলত জয়লাভ কৰে তেন্তে ফাইনেলখন হ’ব পাৰে ভাৰত বনাম পাকিস্তানৰ গ্ৰেণ্ড প্ৰতিযোগিতা ।

লগতে পঢ়ক : ৰোমাঞ্চকৰ পৰ্যায়ত টি-২০ বিশ্বকাপঃ ছুপাৰ ৮ত মুখামুখি হ’ব তালিকাৰ শীৰ্ষ চাৰি দল

শনিবাৰৰ পৰা আৰম্ভ হৈছে আই চি চি পুৰুষ টি-২০ বিশ্বকাপ ২০২৬ । এইবাৰ প্ৰতিযোগিতাখনত ২০টা দলে অংশগ্ৰহণ কৰিছে যদিও খেলুৱৈতকৈ অফ-ফিল্ড ৰাজনীতি আৰু ড্ৰামাৰ চৰ্চা বেছি হৈছে ।

৭ ফেব্ৰুৱাৰী, শনিবাৰৰ পৰা আৰম্ভ হৈছে আই চি চি পুৰুষ টি-২০ বিশ্বকাপ ২০২৬ । ভাৰত আৰু শ্ৰীলংকাই যৌথভাৱে আয়োজন কৰিছে এই প্ৰতিযোগিতা । এইবাৰ প্ৰতিযোগিতাখনত ২০টা দলে অংশগ্ৰহণ কৰিছে যদিও খেলুৱৈতকৈ অফ-ফিল্ডৰ ৰাজনীতি আৰু ড্ৰামাৰ চৰ্চা বেছি হৈছে । ডিফেণ্ডিং চেম্পিয়ন আৰু সূৰ্যকুমাৰ যাদৱ নেতৃত্বাধীন টিম ইণ্ডিয়া খিতাপ দখল কৰাৰ সবল প্রতিদ্বন্দ্বী হিচাপে বিবেচিত হৈছে ৷

প্ৰতিযোগিতা আৰম্ভ হোৱাৰ পূৰ্বে বাংলাদেশ আৰু পাকিস্তানৰ সৈতে জড়িত বিতৰ্কই পৰিৱেশ উত্তপ্ত কৰি তুলিছে । নিৰাপত্তাজনিত চিন্তা আৰু বেগী বলাৰ মুস্তাফিজুৰ ৰহমানৰ আই পি এল চুক্তিক লৈ বিবাদৰ বাবে বাংলাদেশে ভাৰতত খেলিবলৈ অস্বীকাৰ কৰে । ইয়াৰ পিছতে পাকিস্তানে বাংলাদেশৰ সমৰ্থনত ভাৰতৰ বিৰুদ্ধে খেল বৰ্জনৰ ঘোষণা কৰে । পাকিস্তানৰ প্ৰধানমন্ত্ৰী শ্বাহবাজ শ্বৰীফেও এই সিদ্ধান্তক ন্যায্যতা প্ৰদান কৰে ।

এই বিশ্বকাপৰ প্ৰথম দিনটোত মুঠ তিনিখন খেল অনুষ্ঠিত হ’ব । কলম্বোৰ সিংহলী ক্ৰীড়া কমপ্লেক্সত পাকিস্তান আৰু নেদাৰলেণ্ডৰ মাজত অনুষ্ঠিত হোৱা উদ্বোধনী মেচখন পুৱা ১১ বজাৰ পৰা আৰম্ভ হয় । এই মেচত পাকিস্তান দলটোৱে ৩ উইকেটৰ বিনিময়ত কঠিন জয় সাব্যস্ত কৰে । দুয়োটা দল গ্ৰুপ এত আছে । দ্বিতীয়খন খেল ৱেষ্ট ইণ্ডিজ আৰু স্কটলেণ্ডৰ মাজত কলকাতাৰ ইডেন গাৰ্ডেনত বিয়লি ৩:০০ বজাৰ পৰা অনুষ্ঠিত হৈছে । ৱেষ্ট ইণ্ডিজ আৰু স্কটলেণ্ডক গ্ৰুপ চিত স্থান দিয়া হৈছে । ইয়াৰ পিছতে মুম্বাইৰ ৱাংখেড়ে ষ্টেডিয়ামত ভাৰত আৰু আমেৰিকা যুক্তৰাষ্ট্ৰৰ মাজত অনুষ্ঠিত হ’ব গ্ৰুপ এৰ মেচ । খেলখন আৰম্ভ হ’ব নিশা ৭ বজাৰ পৰা ।

The reigning champions are ready to defend their throne 🏆

Catch #T20WorldCup action live, starting February 7 🗓️

Pic 1: Suryakumar Yadav
Pic 2: Jasprit Bumrah
Pic 3: Abhishek Sharma
Pic 4: Hardik Pandya pic.twitter.com/wrBfcNZ1LE

— ICC (@ICC) February 6, 2026

খেলপথাৰত টিম ইণ্ডিয়া আটাইতকৈ শক্তিশালী বিবেচিত হৈছে । বিশেষজ্ঞসকলৰ মতে ভাৰতক পৰাস্ত কৰিবলৈ হ’লে এটা দলৰ পৰা অসাধাৰণ প্ৰদৰ্শনৰ প্ৰয়োজন হ’ব, নহ’লে ভাৰতে নিজেই এক উল্লেখযোগ্য ভুল কৰিব লাগিব । যদি ভাৰতে এই বিশ্বকাপত জয়ী হয় তেন্তে ইয়াক স্বাভাৱিক বুলি গণ্য কৰা হ’ব, কিন্তু পৰাজয় হ’ব এক ডাঙৰ অঘটন ।

আন আন প্ৰতিদ্বন্দ্বীসকলৰ ভিতৰত আছে অষ্ট্ৰেলিয়া, ইংলেণ্ড, দক্ষিণ আফ্ৰিকা, নিউজীলেণ্ড, আৰু শ্ৰীলংকা । অষ্ট্ৰেলিয়াৰ বেটিং শক্তিশালী যদিও তেওঁলোকৰ মূল বেষ্ট বলাৰৰ অভাৱ হ’ব পাৰে । ইংলেণ্ডৰ বেটিং অত্যন্ত আক্ৰমণাত্মক হোৱাৰ বিপৰীতে দক্ষিণ আফ্ৰিকাৰ বলিংক বিশ্বৰ অন্যতম বিপদজনক বুলি গণ্য কৰা হয় । নিউজীলেণ্ডে উপমহাদেশীয় পৰিস্থিতিৰ লগত খাপ খাই পৰিছে আৰু শ্ৰীলংকাই ঘৰুৱা পৰিস্থিতিৰ সুবিধা ল’ব পাৰে ।

সহযোগী দলসমূহৰ ভিতৰত নেপালৰ চৰ্চা আটাইতকৈ বেছি । সকলোৰে দৃষ্টি থাকিব ৯ বলত অৰ্ধশতক অৰ্জন কৰি বিশ্ব অভিলেখ থকা দিপেন্দ্ৰ সিং আইৰীৰ ওপৰত । আমেৰিকা আৰু ইটালীৰ দৰে দলৰো আকৰ্ষণীয় কাহিনী আছে । সামগ্ৰিকভাৱে বিতৰ্ক আৰু ৰাজনৈতিক উত্তেজনাৰ মাজত আৰম্ভ হোৱা এই টি-২০ বিশ্বকাপ ক্ৰিকেটৰ ৰোমাঞ্চ আৰু অফ-ফিল্ড ড্ৰামা দুয়োটাৰে বাবে স্মৰণীয় হ’ব ।

টি-২০ বিশ্বকাপৰ বাবে ভাৰতীয় দল :

সূৰ্যকুমাৰ যাদৱ (অধিনায়ক), অক্ষৰ পেটেল (সহ-অধিনায়ক), অভিষেক শৰ্মা, তিলক বাৰ্মা, হাৰ্দিক পাণ্ডিয়া, শিৱম ডুবে, সঞ্জু চেমছন (উইকেটকীপাৰ), কুলদীপ যাদৱ, বৰুণ চক্ৰৱৰ্তী, যশপ্ৰীত বুমৰা, ৱাশ্বিংটন সুন্দৰ, অৰ্শদীপ সিং, ৰিংকু সিং, মহম্মদ চিৰাজ আৰু ঈশান কিষাণ (উইকেটকীপাৰ) ।

লগতে পঢ়ক : ইংলেণ্ডক ধূলিসাৎ কৰি ষষ্ঠবাৰলৈ বিশ্ব চেম্পিয়ন ভাৰত, বৈভৱৰ বেটিং পৰাক্ৰম