ভাৰত-অষ্ট্ৰেলিয়াৰ এদিনীয়া শৃংখলা
দেওবাৰৰ পৰা আৰম্ভ হ’ব ভাৰত আৰু অষ্ট্ৰেলিয়াৰ মাজত তিনিখন মেচৰ এদিনীয়া শৃংখলা । এই শৃংখলাৰ বাবে দীৰ্ঘদিনৰ বিৰতিৰ অন্তত ভাৰতীয় এদিনীয়া দললৈ প্ৰত্যাৱৰ্তন ঘটা ৰোহিত শৰ্মা আৰু বিৰাট কোহলীৰ ওপৰত সকলোৰে দৃষ্টি থাকিব । শুভমন গীলৰ অধিনায়কত্বত এই দুগৰাকী প্ৰবীণ খেলুৱৈয়ে প্ৰথমবাৰৰ বাবে খেলিব । ৰোহিত আৰু কোহলীয়ে চেম্পিয়নছ ট্ৰফীত অন্তিমবাৰৰ বাবে ভাৰতৰ হৈ খেলিছিল আৰু এতিয়া অষ্ট্ৰেলিয়াৰ বিৰুদ্ধে শৃংখলাত পুনৰ খেলপথাৰলৈ উভতি আহিছে ।
ভৱিষ্যতৰ দিশ নিৰ্ধাৰণ হ’ব পাৰে ৰোহিত-কোহলীৰঃ
বিগত সাত মাহত ৰোহিত আৰু কোহলীৰ বাবে বহুখিনি সলনি হৈছে । দুয়োজনে ২০২৭ চনৰ এদিনীয়া বিশ্বকাপত খেলাৰ লক্ষ্য ৰাখিছে যদিও এই ছিৰিজেই নিৰ্ণয় কৰিব যে তেওঁলোক এই মেগা প্ৰতিযোগিতাখনৰ বাবে কিমান ফিট । দুয়োজনে অষ্ট্ৰেলিয়া ভ্ৰমণৰ বাবে যথেষ্ট প্ৰশিক্ষণ লৈছে । আনকি ৰোহিতে ওজনো কমাইছে যদিও ফৰ্মলৈ ঘূৰি অহাটো দুয়োৰে বাবে প্ৰত্যাহ্বান হ’ব, কিয়নো আই পি এলৰ পিছত তেওঁলোকে এতিয়ালৈকে কোনো মেচ খেলা নাই । দুয়োৰে বাবে ভাল খবৰটো হ’ল যে তেওঁলোকে অষ্ট্ৰেলিয়াৰ বিৰুদ্ধে পুনৰ এদিনীয়া দললৈ উভতি আহিছে য’ত তেওঁলোকৰ ভাল অভিলেখ আছে । এই শৃংখলাই দুয়োৰে কেৰিয়াৰৰ ভৱিষ্যতৰ দিশ নিৰ্ধাৰণ কৰিব পাৰে ।
ৰোহিত আৰু কোহলীয়ে এতিয়া ভাৰতৰ হৈ কেৱল এদিনীয়া খেলতহে খেলে । অষ্ট্ৰেলিয়াৰ মিচেল ষ্টাৰ্ক আৰু জোছ হেজলউড পুনৰ দুয়োজনৰ মুখামুখি হ’ব । অধিনায়কত্বৰ বোজাৰ পৰা মুক্ত হ’ব ৰোহিত, যাৰ ফলত তেওঁ মুক্তভাৱে খেলিব পাৰিব । ৰোহিত আৰু কোহলী দুয়ো ২০২৭ চনৰ এদিনীয়া বিশ্বকাপ খেলাৰ লক্ষ্য ৰাখিব । যদিহে কোহলীয়ে নিজৰ সাধাৰণ শৈলীত দীঘলীয়া ইনিংছ খেলে আৰু ৰোহিতে ভাল আৰম্ভণিৰ ব্যৱস্থা কৰে তেন্তে দুয়োজন খেলুৱৈৰ কেৰিয়াৰ আৰু কেইবছৰমানৰ বাবে বৃদ্ধি পাব পাৰে ।
প্ৰত্যাহ্বানৰ সন্মুখীন শুভমন গীল-
ইফালে টেষ্ট ক্ৰিকেটত ভাৰতৰ অধিনায়ক হিচাপে নিজৰ যোগ্যতা প্ৰমাণ কৰি দেখুৱাইছে শুভমন গীলে আৰু এতিয়া এদিনীয়া মেচত সেই গতি অক্ষুণ্ণ ৰখাৰ প্ৰত্যাহ্বানৰ সন্মুখীন হৈছে । গীলৰ বাবে ভাল কথাটো হ’ল যে ৰোহিত আৰু কোহলী দলৰ অংশ হোৱাৰ সময়ত তেওঁক অধিনায়ক হিচাপে নিযুক্তি দিয়া হৈছে । এই দুজন প্ৰবীণ খেলুৱৈৰ পৰা পৰামৰ্শ লোৱাৰ সুযোগ পাব গীলে । দলৰ গঠন সন্দৰ্ভত ক’ব পাৰি যে দল পৰিচালনাই ৰোহিত আৰু গীলৰ অপেনিং যুটিক সালসলনি কৰাৰ সম্ভাৱনা নাই । এনে পৰিস্থিতিত যশস্বী জয়ছোৱালে হয়তো নিজৰ সুযোগৰ বাবে অপেক্ষা কৰিব লাগিব ।
দলৰ সংমিশ্ৰণ-
ৰোহিত আৰু গীলে ইনিংছ মুকলি কৰিব, কোহলীয়ে তিনি নম্বৰত বেটিং কৰিব, তাৰ পিছতে শ্ৰেয়াছ আয়াৰ আৰু কে এল ৰাহুলে বেটিং কৰিব । উইকেট কিপিঙৰ দায়িত্ব ল’ব ৰাহুলে । আঘাতৰ বাবে অল ৰাউণ্ডাৰ হাৰ্দিক পাণ্ডিয়া খেলপথাৰৰ পৰা আঁতৰি আছে, গতিকে নীতিশ কুমাৰ ৰেড্ডীক এদিনীয়াত অভিষেক ঘটোৱাৰ সুযোগ দিয়া হ’ব পাৰে । স্পীন বিভাগত অক্ষৰ পেটেল আৰু কুলদীপ যাদৱে নেতৃত্ব দিব, মহম্মদ চিৰাজ আৰু অৰ্শদীপ সিঙে ফাষ্ট বলিং চম্ভালিব ।
লগতে পঢ়ক : অষ্ট্ৰেলিয়াৰ বিৰুদ্ধে যুঁজলৈ সাজু টিম ইণ্ডিয়া; পাৰ্থত উপস্থিত কোহলী, ৰোহিত আৰু গীল
