হৰমুজ প্ৰণালী অতিক্ৰম কৰা ভাৰতীয় জাহাজত ড্ৰ’ন আক্ৰমণৰ অভিযোগ উত্থাপন কৰি ট্ৰাম্পে ইৰাণক সকীয়াই দিছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক লৈ এক ডাঙৰ মন্তব্য কৰিছে। হৰমুজ প্ৰণালী পাৰ হৈ যোৱা ভাৰতীয় জাহাজৰ ওপৰত হোৱা তথাকথিত ড্ৰ’ন আক্ৰমণক লৈ ট্ৰাম্পে ইৰাণক পোনপটীয়া শব্দৰে সকীয়নি দিছে।

ৰাষ্ট্ৰপতি ট্ৰাম্পে ছচিয়েল মিডিয়া প্লেটফৰ্ম ‘ট্ৰুথ ছচিয়েল’ত পোষ্ট কৰি কয় যে ভাৰতীয় জাহাজৰ ওপৰত এনেধৰণৰ আক্ৰমণ সম্পূৰ্ণৰূপে গ্ৰহণযোগ্য নহয়। ট্ৰাম্পে লিখিছে, ‘যোৱা নিশা ষ্ট্ৰেইট অৱ হৰমুজেৰে পাৰ হৈ যোৱা ভাৰতীয় জাহাজৰ ওপৰত ইৰাণৰ ড্ৰ’ন আক্ৰমণ সম্পূৰ্ণৰূপে গ্ৰহণযোগ্য নহয়। ইয়াতকৈ ভাল হ’ব যে তেওঁলোকে নিজৰ আচৰণ শুধৰাই লওক, আৰু সেয়াও অতি সোনকালে।’

ট্ৰাম্পে ইৰাণৰ নেতৃত্বক অতি দায়িত্বহীন আৰু অবিশ্বাস্য বুলি অভিহিত কৰি কয় যে তেওঁলোকৰ সৈতে সজ বিশ্বাসেৰে কোনো চুক্তি কৰা সম্ভৱ নহয়। তেওঁ কয়, ‘ইৰাণে সংবাদ মাধ্যমত ফাদিল কৰা চৰ্তসমূহৰ সৈতে দুয়ো পক্ষৰ মাজত লিখিতভাৱে সন্মত হোৱা চৰ্তসমূহৰ কোনো সম্পৰ্ক নাই। ইৰানৰ সৈতে সদ্ভাৱনাৰ ভিত্তিত আলোচনা কৰাটো অতি কঠিন।’

লগতে পঢ়ক: স্পেচএক্সৰ ঐতিহাসিক আইপিঅ’: বিশ্বৰ প্ৰথম ‘ট্ৰিলিয়নাৰ’ হোৱাৰ দিশে এলন মাস্ক

ইৰাণৰ সামৰিক কমাণ্ডে হৰমুজ প্ৰণালী বন্ধ কৰাৰ কথা ঘোষণা কৰি যিকোনো জাহাজক লক্ষ্য কৰি লোৱাৰ সকীয়নি দিছে।

আমেৰিকা আৰু ইৰাণৰ মাজত সংঘাত পুনৰ তীব্ৰতৰ হৈ পৰিছে। ইৰাণৰ শীৰ্ষ যৌথ সামৰিক কমাণ্ডে বৃহস্পতিবাৰে হৰমুজ প্ৰণালী সম্পূৰ্ণৰূপে বন্ধ কৰাৰ কথা ঘোষণা কৰিছে। ইৰাণে সতৰ্ক কৰি দিছে যে এতিয়াৰে পৰা তেল টেংকাৰ আৰু বাণিজ্যিক জাহাজকে ধৰি কোনো জাহাজে যদি এই জলপথেৰে পাৰ হ’বলৈ চেষ্টা কৰে, তেন্তে তাৰ ওপৰত আক্ৰমণ কৰা হ’ব।

হৰমুজ প্ৰণালী হৈছে বিশ্বৰ অন্যতম গুৰুত্বপূৰ্ণ সামুদ্ৰিক ব্যৱসায়িক পথ, যাৰ জৰিয়তে বিশ্বব্যাপী তেল সৰবৰাহৰ এক বৃহৎ অংশ পাৰ হৈ যায়। এনে পৰিস্থিতিত ইৰাণৰ এই ঘোষণাই আন্তঃৰাষ্ট্ৰীয় বজাৰ আৰু শক্তি খণ্ডত চিন্তা বৃদ্ধি কৰিছে।

ইফালে, ইৰাণৰ সংবাদ মাধ্যম আৰু ইছলামিক ৰিভলিউশ্যনেৰী গাৰ্ড কৰ্পছ (IRGC) নৌসেনাৰ তথ্য অনুসৰি, হৰমুজ প্ৰণালীৰে পাৰ হ’বলৈ চেষ্টা কৰা দুখন “নিয়ম উলংঘা কৰা” জাহাজক লক্ষ্য কৰি লোৱা হৈছে।

অৱশ্যে ইৰাণৰ এই দাবীৰ কিছু সময়ৰ পিছতেই আমেৰিকান সেনাই ইয়াক খণ্ডন কৰে। আমেৰিকাৰ চেন্ট্ৰেল কমাণ্ডে (CENTCOM) কয় যে হৰমুজ প্ৰণালী সম্পূৰ্ণৰূপে বন্ধ হোৱা নাই আৰু আমেৰিকাৰ নৌসেনাৰ জাহাজৰ ওপৰত কোনো ধৰণৰ আক্ৰমণো হোৱা নাই।

লগতে পঢ়ক: “যদি ইৰাণৰ হাতত পাৰমাণৱিক অস্ত্ৰ থাকিলহেঁতেন তেন্তে ইজৰাইল নাথাকিলহেঁতেন”; ট্ৰাম্পৰ বিস্ফোৰক মন্তব্য

আমেৰিকা আৰু ইৰানৰ মাজত সামৰিক সংঘাত পুনৰ তীব্ৰতৰ হৈ পৰিছে।আমেৰিকাৰ সেনাই আপাচে হেলিকপ্টাৰ ভূপতিত কৰাৰ পাছত ইৰাণৰ কেইবাটাও কৌশলগত লক্ষ্যত প্ৰতিশোধমূলক আক্ৰমণ চলাইছে।

হৰমুজ প্ৰণালীৰ আশে-পাশে আমেৰিকা আৰু ইৰানৰ মাজত সামৰিক সংঘাত পুনৰ তীব্ৰতৰ হৈ পৰিছে। আমেৰিকান সেনাই তেওঁলোকৰ দুখন আপাচে হেলিকপ্টাৰ ভূপতিত কৰাৰ পাছত ইৰানৰ কেইবাটাও কৌশলগত ঘাটিত প্ৰত্যুত্তৰমূলক আক্ৰমণ চলাইছে। এই আক্ৰমণসমূহৰ লক্ষ্য আছিল দক্ষিণ ইৰানৰ সেই অঞ্চলটো, যিটো বিশ্বৰ অন্যতম গুৰুত্বপূৰ্ণ সাগৰীয় বাণিজ্য পথ হৰমুজ প্ৰণালীৰ ওচৰত অৱস্থিত।

আমেৰিকান চেন্ট্ৰেল কমাণ্ড (CENTCOM)ৰ মতে, ৰাষ্ট্ৰপতি ড’নাল্ড ট্ৰাম্পৰ নিৰ্দেশত এই আক্ৰমণ কৰা হৈছে। জাৰি কৰা এক বিবৃতিত কোৱা হৈছে যে অলপতে আপাচে হেলিকপ্টাৰ ভূপতিত কৰাৰ প্ৰত্যুত্তৰত ‘আত্মৰক্ষা’ৰ বাবে এই আক্ৰমণ চলোৱা হৈছে। CENTCOM-এ তেওঁলোকৰ বিবৃতিত কয় যে আমেৰিকান বায়ুসেনা আৰু নৌসেনাৰ যুঁজাৰু বিমানে নিখুঁত অস্ত্ৰ ব্যৱহাৰ কৰি ইৰানৰ এয়াৰ ডিফেন্স চিষ্টেম, গ্ৰাউণ্ড কন্ট্ৰোল ষ্টেচন আৰু নিৰীক্ষণ ৰাডাৰ ঘাটিসমূহক লক্ষ্য কৰি লৈছিল। এই অপাৰেচন অলপতে আমেৰিকান সেনা আৰু আন্তঃৰাষ্ট্ৰীয় বাণিজ্যিক জাহাজসমূহৰ ওপৰত হোৱা আক্ৰমণৰো এক সঁহাৰি আছিল।

আক্ৰমণৰ আটাইতকৈ বেছি খবৰ হৰমোজগান প্ৰদেশৰ পৰা পোহৰলৈ আহিছে। ইৰানৰ সংবাদ মাধ্যমৰ মতে কেশম দ্বীপ, বন্দৰ আব্বাছ, চিৰিক আৰু জাস্কত প্ৰচণ্ড বিস্ফোৰণ ঘটে। কেশম দ্বীপ আৰু বন্দৰ আব্বাছৰ আশে-পাশে কেইবাটাও বিস্ফোৰণৰ শব্দ শুনা গৈছে। আনহাতে, চিৰিক চহৰত এটা প্ৰক্ষেপণকাৰী অস্ত্ৰ পৰাৰ কথাও নিশ্চিত কৰা হৈছে। জাস্ক আৰু কুহ-এ-মোবাৰকৰ দুটা স্থানতো এনে প্ৰক্ষেপণকাৰী অস্ত্ৰৰে আক্ৰমণ চলোৱা হয়।

আমেৰিকান সংবাদ মাধ্যমৰ প্ৰতিবেদন অনুসৰি, এই আক্ৰমণসমূহৰ মুখ্য লক্ষ্য আছিল হৰমুজ প্ৰণালীৰ আশে-পাশে মোতায়েন কৰা ইৰানৰ ৰাডাৰ আৰু বায়ু প্ৰতিৰক্ষা নেটৱৰ্ক। ধাৰণা কৰা হৈছে যে আন্তঃৰাষ্ট্ৰীয় জাহাজ চলাচল পথৰ সুৰক্ষা নিশ্চিত কৰিবলৈ আমেৰিকাই এই অঞ্চলটোত ইৰানৰ নিৰীক্ষণ আৰু সামৰিক ক্ষমতা দুৰ্বল কৰিব বিচাৰিব।

ইৰানে এই আক্ৰমণসমূহক নিজৰ সাৰ্বভৌমত্বৰ ওপৰত পোনপটীয়া আক্ৰমণ বুলি অভিহিত কৰিছে। ইৰানৰ ইছলামিক ৰিভল্যুচনেৰী গাৰ্ড কৰ্পছে (IRGC) অভিযোগ কৰিছে যে আমেৰিকান সেনাই মিছা অজুহাত দেখুৱাই জাস্ক, চিৰিক আৰু কেশমৰ কেইবাটাও স্থানক লক্ষ্য কৰি লৈছিল।

IRGCৰ  মতে, এই আক্ৰমণত চিৰিকৰ এটা টেলিকমিউনিকেচন টাৱাৰ ক্ষতিগ্ৰস্ত হোৱাৰ লগতে চহৰখনৰ দুটা পানীৰ টেংকীও ধ্বংস হৈছে। ইয়াৰ পিছতে ইৰানেও প্ৰতিশোধমূলক ব্যৱস্থা গ্ৰহণ কৰিবলৈ আৰম্ভ কৰে। আইআৰজিচিয়ে দাবী কৰিছে যে তেওঁলোকে বাহৰাইনত থকা আমেৰিকাৰ ‘ফিফ্থ ফ্লিট’ক ড্ৰোণ আক্ৰমণৰ জৰিয়তে লক্ষ্য কৰি লৈছে। ইৰানৰ সামৰিক নেতৃত্বই সকীয়াই দিছে যে যদিহে আমেৰিকাৰ এই “আগ্ৰাসন” অব্যাহত থাকে, তেন্তে ইয়াৰ প্ৰত্যুত্তৰ ইয়াতকৈও ভয়াবহ হ’ব।

লগতে পঢ়ক: ব্যৰ্থতা ঢাকিবলৈ পাকিস্তানৰ ‘মিছা খবৰ’ৰ আশ্ৰয় : নতুন দিল্লীৰ তীব্ৰ আক্ৰমণ

হৰমুজক লৈ চলি থকা উত্তেজনাৰ মাজতে আমেৰিকা আৰু ইৰাণৰ মাজত সম্ভাৱ্য চুক্তিৰ আশা তীব্ৰতৰ হৈ পৰিছে। দেওবাৰে আমেৰিকাৰ বিদেশ মন্ত্ৰী মাৰ্কো ৰুবিঅ’ই ইংগিত দিয়ে যে অহা কেইঘণ্টামানৰ ভিতৰত ভাল খবৰ আহিব পাৰে।

হৰমুজ প্ৰণালীক কেন্দ্ৰ কৰি চলি থকা উত্তেজনাৰ মাজতে এতিয়া কূটনৈতিক সমাধানৰ আশাৰ সৃষ্টি হৈছে। বৰ্তমান ভাৰত ভ্ৰমণত থকা আমেৰিকাৰ বিদেশ মন্ত্ৰী মাৰ্কো ৰুবিঅ’ই আগন্তুক কেইঘণ্টামানৰ ভিতৰতে এক বৃহৎ ঘোষণা কৰিব পৰা যাব বুলি ইংগিত দিছে। ইফালে ৰাষ্ট্ৰপতি ড’নাল্ড ট্ৰাম্পেও দাবী কৰিছে যে আমেৰিকা আৰু ইৰাণে যুদ্ধৰ অন্ত পেলাবলৈ চুক্তিত উপনীত হোৱাৰ অতি ওচৰ চাপিছে।

আমেৰিকাৰ বিদেশ মন্ত্ৰী গৰাকীয়ে কয় যে হৰমুজ প্ৰণালী সংকটৰ সন্দৰ্ভত ভাল খবৰ পোহৰলৈ আহিব পাৰে। তেওঁ দিল্লীত বৈদেশিক পৰিক্ৰমা মন্ত্ৰী এছ জয়শংকৰৰ সৈতে যৌথ সংবাদমেল সম্বোধন কৰিছিল। সেই সময়ছোৱাত তেওঁ উল্লেখ কৰে যে বিগত ৪৮ ঘণ্টাত অনুষ্ঠিত হোৱা আলোচনাই ইৰাণৰ সৈতে চুক্তিৰ লক্ষণৰ ইংগিত দিয়ে। অতি সোনকালে ইতিবাচক ফলাফলো আহিব।

বৈদেশিক মন্ত্ৰী মাৰ্কো ৰুবিঅ’ৰ এই বক্তব্যৰ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ঘোষণাৰ মাত্ৰ কেইঘণ্টামান পিছতে আহে, য’ত তেওঁ দাবী কৰে যে ৱাশ্বিংটন আৰু তেহৰাণ চুক্তিত উপনীত হোৱাৰ অতি ওচৰ চাপিছে। ইয়াৰ উদ্দেশ্য হৈছে ইৰাণৰ সৈতে যুদ্ধৰ অন্ত পেলোৱা আৰু হৰমুজ প্ৰণালী পুনৰ মুকলি কৰা। এই বিষয়ে ছচিয়েল মিডিয়া প্লেটফৰ্ম ট্ৰুথ ছ’চিয়েলটো ট্ৰাম্পে লিখিছে।

লগতে পঢ়ক: হৰমুজ প্ৰণালীক লৈ ডাঙৰ খবৰ; পথ মুকলিৰ বাবে সাজু ইৰাণ

ইৰাণৰ পৰা হৰমুজ প্ৰণালীৰ সন্দৰ্ভত ডাঙৰ খবৰ ওলাইছে। ইৰাণৰ মতে অহা ৩০ দিনৰ ভিতৰত হৰমুজ প্ৰণালী পুনৰ পূৰ্বৰ অৱস্থালৈ ঘূৰি আহিব।

ইৰাণে এক বৃহৎ ঘোষণা কৰিছে।তেওঁলোকে উল্লেখ কৰিছে যে, অহা ৩০ দিনৰ ভিতৰত হৰমুজ প্ৰণালীৰ মাজেৰে পাৰ হোৱা জাহাজৰ সংখ্যা পূৰ্বৰ স্তৰলৈ ঘূৰি আহিব পাৰে।অৰ্থাৎ এই পথেৰে পাৰ হৈ যোৱা জাহাজৰ সংখ্যা এতিয়া যুদ্ধৰ পূৰ্বৰ স্তৰলৈ ঘূৰি আহিছে।বিশ্বৰ দেশসমূহে এই বক্তব্যক আশ্বস্ত কৰা খবৰ হিচাপে লৈছে।

হৰমুজ প্ৰণালী বিশ্বৰ বাবে এক জীৱনৰেখা।যুদ্ধ আৰম্ভ হোৱাৰ পিছৰে পৰা সমগ্ৰ বিশ্বৰ অসংখ্য দেশত ইন্ধনৰ সংকটৰ সৃষ্টি হৈছে।অৰ্থনীতিৰ ওপৰত বিৰূপ প্ৰভাৱ পৰিল।এতিয়া ৩০ দিনৰ ভিতৰত হৰমুজ জলদ্বীপক পূৰ্বৰ অৱস্থালৈ ঘূৰাই অনাৰ কথা চৰ্চা হৈছে।অৰ্থাৎ যুদ্ধৰ পূৰ্বে যি পৰিস্থিতি আছিল, সেই পৰিস্থিতি পুনৰ ঘূৰি আহিব।

যোৱা কেইমাহমানৰ পৰা মধ্যপ্ৰাচ্যত উত্তেজনা যথেষ্ট বৃদ্ধি পাইছিল। ইৰাণ আৰু অন্যান্য ৰাষ্ট্ৰৰ মাজত উত্তেজনাৰ বাবে এই পথেৰে ট্ৰেনজিট কৰা জাহাজৰ সংখ্যা হ্ৰাস পাইছে।জাহাজৰ মালিক আৰু তেল কোম্পানীসমূহে আশংকাত ভুগিছে ​​যে তেওঁলোকৰ জাহাজৰ ক্ষতি হ’ব পাৰে।ফলত তেলৰ যোগান লেহেমীয়া হৈছে, যাৰ ফলত বিশ্বৰ তেলৰ মূল্য আৰু বজাৰত প্ৰভাৱ পৰিছে।

এই সকলোবোৰৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে ছ’চিয়েল মিডিয়াত লিখিছে যে আমেৰিকা,ইৰাণ আৰু অঞ্চলটোৰ আন কেইবাখনো দেশৰ মাজত হোৱা চুক্তি চূড়ান্ত হোৱাৰ উপক্ৰম হৈছে।ৰাষ্ট্ৰপতি ট্ৰাম্পে লগতে কয় যে এই চুক্তিত হৰমুজ প্ৰণালী পুনৰ মুকলি কৰাটোও অন্তৰ্ভুক্ত কৰা হৈছে, আৰু ইয়াৰ সন্দৰ্ভত অতি সোনকালে ঘোষণা কৰা হ’ব।

লগতে পঢ়ক: হোৱাইট হাউচৰ সমীপত তীব্ৰ গুলীচালনা: বন্দুকধাৰীসহ দুজন আহত